ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕕᖃᕐᓂᖅ

ᓄᐃᑕᐅᓚᐅᕐᓂᕋᒥᓂᑦ 1978-ᒥ, ᑲᑎᕕᒃ ᐃᓕᓐᓂᐊᓂᓕᕆᓕᖅ ᐱᓇᓱᐊᕐᓯᒪᕗᖅ ᐱᑕᖃᕐᑎᓯᑦᓱᓂ ᐱᒍᑦᔨᓂᕐᒥᒃ ᐃᓕᓐᓂᐊᓂᓕᕆᓂᕐᒥᒃ ᐃᓄᓐᓂᒃ ᓄᓇᓕᓐᓂᑦ ᖁᓕᓪᓗ ᓯᑕᒪᓪᓗᓂᒃ ᓄᓇᕕᒻᒥ. ᓱᕐᕋᑕᐅᓂᖃᖕᖏᑲᓗᐊᕐᑎᓗᒋᑦ ᓄᕐᖃᔪᐃᑦᑐᒥᒃ ᐊᔪᐃᓐᓇᓂᖏᓐᓄᑦ ᐊᒻᒪᓗ ᐅᐱᓐᓇᑐᒻᒪᕆᒻᒥᒃ ᐊᖏᕐᓯᒪᓂᖏᓐᓄᑦ ᐱᓇᓱᑦᑎᑕ, ᐱᔪᒥᑎᒋᓇᖏᓐᓇᓚᖓᔫᒐᓗᐊᖅ ᐃᓕᓐᓂᐊᑎᑦᑎᓄᑦ ᐃᓱᒻᒥᑑᑎᓂᕐᒃ ᐱᒐᓱᐊᕐᑕᕗᑦ. ᓱᕐᖁᐃᑐᒥᒃ ᐃᓅᖃᑎᒌᑦᑎᒍᑦ ᐱᓀᓗᑕᕐᓄᑦ ᐊᑑᑎᖃᑦᑕᓯᒪᔪᓄᑦ ᓄᓇᕕᒻᒥ ᓱᕐᕋᑕᐅᓯᒪᓂᖓᓗ ᐱᐊᕋᐅᑉ ᐱᕈᕐᐸᓕᐊᓂᖓ, ᐊᑐᓪᓗᑐᒋᐊᖃᕐᓯᒪᔪᖅ ᐃᑉᐱᒋᔭᐅᖁᔨᓗᐊᖕᖑᐊᓂᖅ ᐱᓪᓚᕆᐅᓂᖓᓂᒃ ᓲᖑᓯᒋᐊᕐᓂᖅ ᐃᓅᖃᑎᒌᑎᒍᑦ  ᐃᑉᐱᓂᐊᕐᓂᑎᒍᓪᓗ ᐱᒍᓐᓇᓃᑦ , ᐱᐅᓯᕙᓕᐊᑎᒍᒪᑐᐊᕈᑦᑎᒍ ᐃᓱᒻᒥᑑᑎᓂᖅ ᐃᓕᓐᓂᐊᓂᖅ.

ᖁᕝᕙᒋᐊᕐᑎᓯᓂᖅ ᐱᒐᓱᐊᕐᑕᒥᓂᒃ ᐱᔭᖃᕐᓂᒥᒃ ᐊᒻᒪᓗ ᐃᓗᓯᕐᓱᓯᐊᕐᓂᖏᓐᓂᒃ ᐃᓕᓐᓂᐊᑎᖁᑎᑦᑕ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᑐᑭᑖᕐᓯᒪᕗᖅ ᓄᐃᑦᓯᓂᕐᒥᒃ ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕕᓐᓂᒃ ᑎᑭᐅᑎᒍᓐᓇᓯᒍᒪᑦᓱᓂ ᐱᓕᐊᖃᕐᓂᒧᑦ. ᑐᕌᒐᖓ ᑭᖑᓂᖓᓂ ᑖᑦᓱᒪ ᐱᓇᓱᐊᕋᑦᓴᐅᑉ, ᐱᔪᓐᓇᑎᑦᓯᒍᒪᓂᕐᒥᒃ ᐱᓇᓱᑦᑎᓂᑦ ᑐᑭᓯᒪᑦᓯᐊᓂᕐᓴᐅᖁᑦᓱᒋᑦ ᐃᓕᓐᓂᐊᑎᖁᑎᑦᑎᓂᒃ, ᓴᐳᑦᔨᒋᐊᓪᓚᓕᐅᒥᓗᒋᑦ ᓈᒻᒪᑐᒥᒃ ᐃᓕᓐᓂᐊᓂᖏᓐᓂᒃ ᑫᓪᓗᑐᕐᓗᒋᓪᓗ ᐱᕙᓪᓕᐊᓂᖏᓐᓂᒃ ᐱᔪᓐᓇᓂᖏᓐᓂᒃ ᓄᑭᖏᓐᓂᒃ.  ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕖᑦ ᐱᒋᐊᖕᖓᕈᑎᒃ ᐱᓇᓱᑦᑎᓂᒃ ᖃᐅᔨᒻᒪᓕᐅᒥᑎᑦᓯᒐᓱᐊᕐᑐᖅ ᒫᓐᓇᓗ ᐱᐅᓯᐅᓯᒪᔪᑐᙯᓪᓗ ᖁᐊᕐᓵᓯᒪᐅᑎᖏᓐᓂᒃ, ᓲᑭᐊᖑᒐᓗᐊᖅ, ᓱᕐᕃᓯᒪᔪᓂᒃ ᖃᐅᑕᒫᑦ ᐃᓅᓯᖏᓐᓂᒃ ᐊᒥᓱᑦ ᐃᓕᓐᓂᐊᑏᑦ, ᐊᒻᒪᓗ ᓱᕃᓂᕆᖃᑦᑕᑕᖏᑦ ᑖᒃᑯᐊ ᓈᒻᒪᖏᑦᑐᑦ ᓱᓐᓂᕕᓃᑦ ᐃᑉᐱᓂᐊᕐᓂᖏᓐᓂᒃ, ᐃᓅᑉ ᐱᐅᓯᖓᓂᒃ ᐊᒻᒪᓗ ᐃᓕᑦᓯᕙᓪᓕᐊᓂᖓᓂᒃ.

ᑖᓐᓇ ᐱᓇᓱᐊᕋᑦᓴᖅ ᐊᑐᕐᓱᒍ, ᐃᓕᓐᓂᐊᕕᐅᑉ ᐱᓇᓱᑦᑎᖏᑦ ᐱᕙᓪᓕᐊᔪᑦ ᐸᕐᓇᓂᑦᓱᑎᒃ ᓴᐳᑦᔨᓂᕐᒥᒃ ᓱᕐᖁᐃᓱᑦᓯᐊᑐᒥᒃ ᐃᓅᑉ ᐱᐅᓯᖓᓂᒃ ᐃᓕᓐᓂᐊᕕᒻᒥᓂ ᐱᖃᕐᑎᓯᓂᕐᒥᒃ ᐃᓕᓐᓂᐊᑎᓂᑦ ᐊᑦᑕᓀᑐᒥᒃ (ᐊᑐᓂᑦ ᑎᒥᒧᑦ ᐃᓱᒪᒧᓪᓗ), ᓱᕐᖁᐃᓱᑦᓯᐊᑐᒥᒃ, ᐊᒻᒪᓗ ᐊᑦᔨᒌᓕᔪᒥᒃ ᓇᔪᕐᑕᖓ ᓄᐃᑕᑎᑦᓯᓯᐊᕐᑐᒥᒃ ᑐᑭᖃᑦᓯᐊᓂᕐᒥᒃ ᐃᓕᓐᓂᐊᑎᐅᓪᓗ ᐃᓕᓐᓂᐊᑎᑦᓯᔨᐅᓪᓗ ᐃᓅᖃᑎᒌᑦᓯᐊᓂᖓᓂᒃ. ᓄᐃᑎᕆᓂᖅ ᑌᒣᑦᑐᒥᒃ ᓇᔪᕐᑕᖓᓂᒃ ᐊᑑᑎᓪᓚᕆᒋᐊᓕᒃ ᑲᒪᒋᑦᓯᐊᓗᓂᒋᑦ ᐃᓱᒻᒥᑑᑎᓂᕐᒥᒃ, ᐃᓅᖃᑎᒌᑎᒍᑦ ᐊᒻᒪᓗ ᐃᒻᒥᒎᓈᕐᑎᑐᓄᑦ ᐱᒐᓱᐊᕐᑕᒥᓂᒃ ᐱᔭᖃᕐᓂᑯᑦ ᐃᓕᓐᓂᐊᑎᑦᑎᓄᑦ.

ᑐᓂᔭᐅᒪᔪᖅ ᐃᓕᓐᓂᐊᑎᑦᓯᔨᒧᑦ ᐃᓗᓕᒋᔭᐅᓪᓚᕆᑦᑐᖅ ᓱᕐᖁᐃᓱᑦᓯᐊᑐᒥᒃ ᑫᓪᓗᑐᐃᓂᓕᒃ ᐃᓕᓐᓂᐊᑎᐅᑉ ᐱᒐᓱᐊᕐᑕᖓᓂᒃ ᐱᔭᖃᕐᑎᓯᓂᕐᒥᒃ, ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕖᑦ ᐅᒃᑯᐃᖔᕈᑎᖃᑦᓯᐊᑐᑦ ᐊᑕᐅᓯᐅᖃᑎᖃᕐᓗᓂ ᐃᓕᓐᓂᐊᑎᒥᒃ “ᐊᔭᐅᕆᓂᕐᒥᒃ” ᐱᒍᑦᔨᓂᒃᑯᑦ ᐃᑲᔪᕐᑕᐅᒍᒪᔪᕐᑕᖃᑦᓴᓂᕐᐸᑦ. ᓇᓪᓕᐅᑎᑦᑕᑐᑦ ᐃᓕᓐᓂᐊᕋᑦᓴᓕᐅᕐᓂᑎᒍᑦ ᐃᓱᐊᕐᓭᔩᑦ, ᐱᓇᓱᐊᖃᑦᑕᓯᒪᔪᑦ ᐊᕐᕌᒍᓂ ᐊᒥᓱᓂ ᓄᓇᕕᒻᒥ ᐃᓕᓐᓂᐊᕕᖏᓐᓂ, ᐱᑎᑦᓯᔪᖅ ᐃᑲᔪᕐᓯᒪᓂᕐᒥᒃ ᐃᓕᓐᓂᐊᑎᑦᓯᓂᕐᒥ ᐱᓇᓱᑦᑎᖏᓐᓂᒃ ᐃᓚᒋᐊᕈᑎᐅᑎᓪᓗᒍ ᐱᔭᕆᐅᕐᓴᑎᑦᓯᓂᕐᒥᒃ ᐃᓕᓐᓂᐊᕕᒃ ᑐᖕᖓᕕᒃ ᐃᒫᙰᕐᑎᓂᒃ ᐃᓕᓐᓂᐊᕕᓐᓂ ᐊᑐᓂᑦ. ᐊᔭᐅᕆᓂᖅ ᐃᑲᔪᕐᓯᓂᓕᒃ ᐱᖕᖑᑎᑦᓯᓂᕐᒥᒃ ᓲᖑᓂᕐᓴᒥᒃ ᐃᓗᓕᖏᓐᓂᒃ ᓴᐳᒻᒥᔪᖅ ᐱᑐᑦᓯᒪᐅᑎᓂᖏᓐᓂᒃ ᐃᓕᓐᓂᐊᑎᑦᓯᔨᐅᑦᓱᑎᒃ ᓲᖑᓂᖏᓐᓂᒃ ᐃᓕᑕᕆᔭᐅᑦᓱᑎᓪᓗ ᐱᐅᔪᒥᒃ ᐋᕐᕿᓯᒪᐅᑎᑦᓭᑦ ᐊᕕᖃᑎᒌᒍᑎᐅᒍᓐᓇᓱᑎᒃ ᐊᓯᖏᓐᓄᑦ. ᐃᓕᓐᓂᐊᑎᑦᓯᔩᑦ ᐃᓕᑦᓯᕕᖃᕈᓐᓇᓱᑎᓪᓗ ᐊᒻᒪᓗ ᐱᕙᓪᓕᐊᓗᑎᒃ ᐱᐅᓂᕐᓴᒥᒃ ᐆᑦᑐᕋᕐᓂᕐᒥᒃ ᖁᕝᕙᒋᐊᕐᑎᓯᔪᒥᒃ ᓄᐃᑎᕆᓂᕐᒥᒃ ᐃᓕᓐᓂᐊᕕᒻᒥ ᖃᕆᐊᒥ ᓇᔪᕐᑕᖓᓂ,  ᓴᐳᑦᔨᓚᖓᔪᒥᒃ ᐃᓕᑦᓯᕙᓪᓕᐊᓂᖏᓐᓂᒃ ᐃᓕᓐᓂᐊᑎᖁᑎᓕᒫᑦᑎᓄᑦ . 

ᐊᕐᕌᒍᑕᒫᑦ ᑲᔪᓯᑎᑕᐅᓂᖓ, ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕖᑦ ᐱᒋᐊᖕᖓᒍᑎᒃ ᐊᓯᑦᔨᕙᓪᓕᐊᔪᖅ, ᐊᐅᓚᓂᖃᑦᓯᐊᕙᓪᓕᐊᑐᐃᓐᓇᑐᖅ ᐊᑕᐅᑦᓯᑰᖃᑕᐅᑦᓯᐊᕙᓪᓕᐊᑐᐃᓐᓇᓱᓂᓗ ᑭᖕᖕᒎᒪᒋᔭᐅᔪᓄᑦ ᐃᓪᓕᓇᕐᑐᖁᑎᖏᓐᓄᑦ ᓄᓇᕕᒻᒥ ᐃᓕᓐᓂᐊᕕᖏᓐᓄᑦ.  ᓱᖏᐅᑎᓂᖅ ᓯᕕᑐᔪᑦ ᒪᖕᖑᐃᑦ(ᐊᒫᖏᑦ) ᐱᐅᓯᑦᓴᓕᐊᕆᔭᐅᓯᒪᔪᑦ ᐊᒻᒪᓗ ᐆᑦᑐᕋᕐᓃᑦ ᐃᓕᓐᓂᐊᕕᓐᓂ ᐊᑯᓂ ᐊᑐᕐᑕᐅᒋᐊᓕᒃ ᑭᓯᐊᓂ ᓱᕐᖁᐃᓱᑦᓯᐊᑐᒥᒃ ᐊᓯᑦᔨᕙᓪᓕᐊᑐᐃᓐᓇᑐᖅ ᐱᕙᓪᓕᖁᑎᑦᓴᖏᓐᓂᒃ ᐅᕕᒐᕐᑐᖁᑎᑦᑕ.


ᐃᓘᓐᓇᑎᒃ ᐃᓄᒻᒪᕇᑦ ᐱᓇᓱᑦᑐᑦ ᐃᓕᓐᓂᐊᕕᑦᑎᓂ ᐱᕕᑦᓴᖃᑦᓯᐊᑐᑦ, ᖃᐅᑕᒫᑦ, ᓱᕃᓂᕐᒥᒃ ᐃᒻᒥᒎᓈᕐᑎᑐᓂᒃ, ᐃᓅᖃᑎᒌᑎᒍᑦ, ᐱᔭᕆᐅᕐᓴᓂᕐᒥ ᐱᕙᓪᓕᐊᓂᕐᒥᓗ ᐃᓕᓐᓂᐊᑎᑦᑎᓄᑦ ᐊᒻᒪᓗ ᑎᓕᔨᒍᑎᐅᑦᓱᓂ ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕕᓐᓄᑦ; ᐱᖃᕐᑎᓯᓗᓂ ᑭᖕᒎᒪᒋᔭᖏᓐᓂᒃ ᐱᐅᒃᑯᑎᓂᒃ ᐃᓕᓐᓂᐊᕕᒻᒥ ᐱᓇᓱᑦᑎᖏᓐᓂᒃ ᐃᑲᔪᕐᓯᑐᐃᓐᓇᒋᐊᓕᓐᓂᑦ ᐱᕙᓪᓕᐊᕈᑎᑦᓴᖏᓂᒃ ᐃᓗᓯᕐᓱᓯᐊᕐᓂᖏᓐᓂᒃ ᐃᓕᓐᓂᐊᑎᖁᑎᑦᑕ.

  ᐊᐱᕐᓱᑕᐅᔫᑉ ᑭᐅᒍᑎᖓ

"ᑕᑯᓐᓇᑕᒃᑰᕙᖓ ᐹᔪᐊᓘᖕᖏᓂᕐᓭᑦ ᐊᒻᒪᓗ ᑐᑮᕈᖕᖏᓂᕐᓴᐅᓱᑎᒃ ᐊᓃᖕᖑᐊᓇᕐᓯᒥ, ᑐᑭᓕᕇᑦᓯᐊᓂᕐᓴᐅᓕᕐᓱᑎᓪᓗ ᐃᓕᓐᓂᐊᑏᑦ ᐊᔪᕆᓴᖃᑎᒌᑦᓯᒪᓂᑦᑎᓄᑦ.  ᐃᓕᓐᓂᐊᑏᑦ ᐃᓕᓐᓂᐊᑎᑦᓯᔩᓪᓗ ᐃᓅᖃᑎᒌᑦᓯᐊᓕᕐᓂᓴᔮᕐᓱᑎᓪᓗ ᐊᒻᒪᓗ ᐃᓕᓐᓂᐊᑎᑦᓯᔩᑦ ᑕᑯᓐᓇᕈᓐᓇᓯᓂᕐᓴᐅᓱᑎᒃ ᓱᕐᖁᐃᓱᑦᓯᐊᓂᕐᓴᒥᒃ ᐊᓕᖏᓭᖕᖏᖔᕐᓱᑎᒃ.

ᐊᓂᐊᑦ ᑖᓯ-ᑎᐊᓐ
ᐱᑕᑲᓪᓚᖅ ᐃᓕᓐᓂᐊᕕᒃ

____________________________

"ᐃᑉᐱᓂᐊᒋᔭᕋ ᐊᑕᐅᓯᖅ ᓱᕐᕋᐅᑎ ᐃᑲᔪᕐᓯᓂᕆᓚᖓᔭᖓ ᐊᓯᑦᔨᐸᓪᓕᐊᓂᑦᑎᓂᒃ ᓱᓕᑦᓯᐊᑐᒥᒃ ᐃᓚᑦᔪᒍᓱᒍᓐᓇᑐᓂᑦ ᐃᓕᓐᓂᐊᕕᒃ ᑐᑭᓯᑦᔫᒥᒍᑎᐅᒋᐊᖓ ᑐᑭᓯᒪᔭᐅᑦᓱᓂᓗ ᐱᓇᓱᑦᑎᖁᑎᑦᑎᓄᑦ, ᑐᑭᓕᒃ ᐃᒻᒥᒎᓈᕐᑎᑐᓕᒫᑦ ᐱᓇᓱᑦᑐᑦ ᐃᓕᓐᓂᐊᕕᐅᑉ ᐃᓗᐊᓂ; ᐃᓕᓐᓂᐊᑏᓪᓗ ᐃᑎᕐᐸᒪᖓᔪᑦ ᐃᓕᓐᓂᐊᕕᑦᑎᓄᑦ ᑎᒍᓯᕙᓐᓂᐊᑐᑦ ᐊᑦᔨᒋᔭᐅᖕᖏᓂᕐᒥᓂᒃ ᐱᒍᓐᓇᓂᕐᒥᓂᓪᓗ ᐱᑦᓯᐊᕆᐊᒥᒃ. ᐱᓇᓱᑦᑎᐅᓱᑕ, ᖃᐅᔨᑦᔫᒥᒋᐊᖃᕐᒥᔪᒍᑦ ᐊᒥᓱᑦ ᐃᓕᓐᓂᐊᑎᖁᑎᕗᑦ ᐃᑎᕐᐸᑐᑦ ᐃᓕᓐᓂᐊᕕᑦᑎᓄᑦ “ᑕᑯᑦᓴᐅᖏᑦᑐᒥᒃ ᓇᒻᒪᑐᖅ”, ᐃᓗᓕᖃᕈᓐᓇᑐᓂᒃ ᐋᓐᓂᓇᕐᑐᓂᒃ, ᐃᓱᒫᓗᓐᓂᒥᒃ, ᑯᑮᖓᓂᕐᒥᒃ ᐃᕐᓯᓂᕐᒥᓗ,  ᐃᓓᓐᓇᖏᓐᓂᒃ ᐅᖃᕐᓱᖓ.  ᐃᓕᓐᓂᐊᑎᑦᓯᓂᕗᑦ ᐅᐸᓗᙰᓯᒪᒋᐊᖃᕐᐳᖅ ᐱᐊᕃᑦ ᑌᒣᑦᑐᓚᕆᐅᒍᓐᓇᓂᖏᓐᓂᒃ ᐊᒻᒪᓗ ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕖᑦ ᑐᕌᒐᖓ ᐊᑑᑎᑎᑦᓯᒍᓐᓇᓚᕿᔪᖅ. ᔮᓂᒻᒪᕆᒃ ᐃᓕᓐᓂᐊᕕᒃ ᐃᓱᒻᒥᑐᕐᓂᕋᓄᓪᓕ ᖃᓄᐃᖕᖏᑐᖅ ᑎᑭᐅᑎᕙᓪᓕᐊᓂᖓ ᐃᓚᑦᔪᒍᓱᒍᓐᓇᑐᒥᒃ ᐃᓕᓐᓂᐊᕕᖕᖑᕙᓪᓕᐊᓂᖓ ᐊᒻᒪᓗ ᐊᓕᐊᑦᓱᖓ ᐃᓚᒋᔭᐅᖃᑕᐅᒐᒪ ᑮᑖᐱᐅᒐᓗᐊᖅ."

Lorenzo Dredge
ᔮᓂᒻᒪᕆᒃ ᐃᓕᓐᓂᐊᕕᒃ
ᐃᓕᓐᓂᐊᑎᑦᓯᔨ ᐳᕐᑐᓂᕐᓴᓂᒃ 2 ᐊᒻᒪᓗ 3-ᐃᓅᓯᕐᒧᑦ ᐊᐅᓚᒍᓯᕐᓂᒃ ᑐᑭᓯᓴᕐᓂᒃ /ᖃᓪᓗᓈᑎᑐᑦ