ᐃᓕᓐᓂᐊᓂᕐᒥ ᐊᕐᖁᓯᐅᕐᓃᑦ

ᐃᓕᓐᓂᐊᕆᐊᖕᖓᑐᓂ

ᐃᓕᓐᓂᐊᕆᐊᖕᖓᑐᑦ, ᐳᕐᑐᓂᓖᑦ ᐊᑕᐅᓯᕐᒥᒃ ᒪᕐᕉᓂᓪᓗ ᐃᓄᑐᐃᓐᓇᓄᑦ ᐃᓕᓐᓂᐊᑎᑦᓯᔨᓄᑦ ᐃᓕᓐᓂᐊᑎᑕᐅᓲᑦ.

ᐃᓕᓐᓂᐊᕆᐊᖕᖓᑐᓂᒃ ᐃᓕᓐᓂᐊᓂᖃᓲᖑᒐᓗᐊᕐᑎᓗᒍ ᑲᑎᕕᒃᑯᓂ 1970 ᐊᕐᕌᒍᖏᓐᓂᓂᑦ, ᓯᕗᓪᓕᐸᐅᑦᓱᓂ ᐊᕐᕌᒍᕐᒥ ᑕᒡᒐᓂ ᐅᓪᓗᓕᒫᕐᑐᒥᒃ ᐃᓕᓐᓂᐊᓲᖑᓕᕐᑐᑦ ᐃᓕᓐᓂᐊᕆᐊᖕᖓᑐᐊᐲᑦ. ᐃᓕᓐᓂᐊᕈᑎᓕᐅᕐᓯᒪᔪᑦ ᓄᑖᓂᒃ ᐅᑭᐅᕐᑕᑐᒨᓕᖓᔪᓂᒃ ᐃᓕᓐᓂᐊᑎᓂᓪᓗ ᖃᐅᔨᑎᑦᓯᒋᐊᖕᖓᓂᕐᒧᑦ ᐃᓄᒃᑎᑑᕐᑐᓂᒃ. ᐃᓕᓐᓂᐊᑎᑦᓯᕖᑦ ᐊᕕᑦᑐᓯᒪᓂᖃᕐᓱᑎᒃ ᐃᓕᓐᓂᐊᕕᑦᓴᓂᒃ (ᐆᑦᑑᑎᒋᓗᒋᑦ ᐊᑐᐊᕐᓯᕕᒃ, ᐊᓪᓚᕕᒃ ᐊᓯᖏᓐᓂᓗ).  ᐃᓕᓐᓂᐊᑎᑦᓯᓂᐅᕆᐊᓖᑦ ᐊᑕᔪᑦ (ᐆᑦᑑᑎᒋᓗᒋᑦ ᐆᒪᔪᓂᒃ ᐃᓕᓐᓂᐊᓂᖅ, ᐃᓕᓐᓂᐊᓂᐅᓲᕕᓃᑦ ᐃᓕᓐᓂᐊᑎᑦᓯᒍᑎᐅᒋᐊᓪᓚᑐᑦ ᓄᑖᕐᓗ ᐃᓕᓐᓂᐊᑎᑦᓯᒍᑎᐅᓲᑦ ᑭᓯᑦᔪᑎᓐᓂᐊᕈᑎᓂ, ᓱᑯᐃᔦᓂᕐᓂ ᓱᖕᖑᐊᑎᐅᓂᕐᒥᓗ; ᐊᑐᐊᕐᓯᒍᓐᓇᓃᑦ ᐊᓪᓚᒍᓐᓇᓃᓪᓗ ᐱᖕᖑᑎᑕᐅᓯᒪᒻᒥᔪᑦ, ᐃᙯᓕᓴᕐᓂᒥᓪᓗ ᐃᓕᓐᓂᐊᑎᑦᓯᒍᑏᑦ ᐃᓚᐅᒻᒥᓱᑎᒃ).


ᐳᕐᑐᓂᓖᑦ ᐊᑕᐅᓯᕐᒥᒃ

ᐃᑉᐱᒋᔭᐅᓂᖃᓲᑦ ᐅᖄᕈᓐᓇᓂᖏᑦ ᐃᓕᓐᓂᐊᑎᑦᓯᒍᑎᓕᒫᓂ ᐃᓕᓐᓂᐊᑏᑦ ᐅᖄᕈᓐᓇᓯᐊᕆᐊᖃᕐᒪᑕ ᐃᓕᑦᓯᓯᐊᕐᓗᒋᑦ ᐅᖄᕈᓰᑦ. ᐅᖃᐅᓯᕐᒥ ᐃᓕᓐᓂᐊᑎᑦᓯᓃᑦ ᓱᑎᑦᓯᓂᖃᕐᕕᐅᓲᑦ ᐊᑐᐊᕐᓯᒋᐅᕐᓴᓂᕐᒥᒃ, ᐃᓄᒃᑎᑐᑦ ᐊᑐᐊᕐᓯᓂᕐᒥᒃ ᐊᑐᐊᕐᓯᖑᐊᕐᓂᑐᐃᓐᓇᒥᓪᓗ, ᐅᓂᒃᑳᖑᐊᕐᓂᓂᒃ, ᐊᓪᓚᓂᕐᒥᒃ, ᐅᖄᓂᕐᒥᓗ.

ᑭᓯᑦᔪᑎᓐᓂᐊᓂᕐᒥ, ᐅᑯᐊ ᐃᓕᓐᓂᐊᑎᑦᓯᒍᑎᐅᓲᑦ: ᐃᓱᒪᒍᓯᕐᓂᒃ ᐊᑕᐅᓯᖕᖑᑎᑦᓯᓂᖅ (ᐆᑦᑑᑎᒋᓗᒍ ᐊᕕᑦᑐᓯᒪᓂᓕᐅᕐᓂᖅ ᖃᓄᐃᑦᑐᔭᐅᓂᖏᓐᓂᒃ), ᑭᓯᑦᔪᑏᑦ, ᐃᓚᐅᕐᑐᐃᓂᖅ ᐲᕐᓯᓂᕐᓗ, ᓱᕐᖄᑎᕆᓂᖅ, ᓴᓇᒻᒪᓕᕆᓂᕐᓗ. ᐃᓕᓐᓂᐊᕈᑏᑦ ᐊᒥᓱᑦ ᐱᖕᖑᑎᑕᐅᓯᒪᔪᑦ ᑕᒪᒃᑯᓄᖓᓕᖓᔪᑦ.

ᐃᓅᑦᔪᓯᓕᕆᓂᕐᒥ ᐃᓕᓐᓂᐊᑏᑦ ᐃᓕᓐᓂᐊᓲᑦ ᐃᓚᒌᓐᓂᒥᒃ ᐊᖏᕐᕋᒥ ᓯᓚᕐᔪᐊᒥᓪᓗ, ᐃᓄᐃᑦ ᐃᓚᑦᓴᔭᒌᓐᓂᖏᓐᓂᒃ ᐊᑎᖏᓐᓂᓗ, ᐊᕙᑎᒥ ᓄᓇᒥ ᐊᑦᑕᓇᕐᑐᓂᒃ, ᐃᓗᓯᕐᓱᓯᐊᕐᓂᒨᓕᖓᔪᓂᒃ, ᐊᑑᑎᓲᓂᒃ ᓄᓇᓕᒻᒥᓂ (ᓇᓪᓕᐅᓂᕐᓯᐅᓃᑦ ᐊᓯᖏᓪᓗ). ᐃᓕᓐᓂᐊᑎᑦᓯᒍᑎᑦᓴᓖᑦ ᑕᒪᒃᑯᐊ ᐊᑐᓂᑦ.

ᓱᑯᐃᔦᓂᕐᒨᓕᖓᔪᑦ ᐃᓗᓕᓖᑦ ᐅᔭᕋᕐᓂᒃ ᓯᐅᕋᔮᓂᓪᓗ ᑐᑭᓯᓴᕐᓂᓂᒃ, ᑕᐅᕐᑐᓂᒃ ᑕᐅᕐᑐᓂᓪᓗ ᑲᑎᕐᓱᐃᓂᕐᒥᒃ, ᐳᑦᑕᓂᕐᓂᒃ ᑭᕕᓂᕐᓂᓗ, ᑎᒥᒦᑦᑐᓂᒃ, ᓂᐱᓐᓂᒃ ᐆᒪᔪᓂᓪᓗ ᐊᕙᑎᖏᓐᓃᑐᓂᒃ.

ᓂᑦᔮᔫᓕᕆᓂᕐᒥ ᐃᓕᓐᓂᐊᑏᑦ ᐃᓄᒃᑎᑑᕐᑐᓂᒃ ᐃᖕᖏᓂᕐᒥᒃ ᐃᓕᓐᓂᐊᓲᑦ ᑐᑭᓯᓴᕐᑎᑕᐅᑦᓱᑎᓪᓗ ᖃᓄᖅ ᓈᓚᒋᐊᖃᕐᓂᒥᒃ ᑐᓴᕐᓂᔮᕐᓂᒥᓪᓗ ᖃᓄᐃᑦᑐᑐᐃᓐᓇᓂᒃ ᓂᑦᔮᔫᓂᒃ. ᐃᓕᓐᓂᐊᓲᑦ ᖃᓄᖅ ᑎᒥᒥᓂᒃ ᓂᒪᑦᑎᓯᓂᕐᒥᒃ ᓂᑦᔮᔫᓄᑦ ᑖᓂᓯᕐᓂᓂᓪᓗ. ᐃᓕᓐᓂᐊᑎᑕᐅᒋᐊᖕᖓᓱᑎᒃ ᓂᑦᔮᔫᕈᑎᒧᑦ ᐱᖕᖑᐊᓱᑎᒃ. ᐊᐅᓚᒍᓐᓇᓂᖅ, ᓅᕈᓐᓇᓂᖅ ᐃᓂᒥᑦ ᐊᓯᐊᓄᑦ, ᐃᒋᑦᓯᓂᕐᒥ ᐊᑯᕐᓯᓂᕐᒥᓗ ᐱᒍᓐᓇᓃᑦ ᐃᙯᓕᓴᕐᓂᒦᑦᑐᑦ. ᐱᕈᕐᐸᓕᐊᓂᕐᒥ ᐃᓕᓐᓂᐊᓂᖃᓲᑦ ᐃᓅᖃᑎᒌᒍᓐᓇᓂᕐᒥ, ᓴᓗᒪᑦᓯᐊᕆᐊᖃᕐᓂᒥᒃ, ᐊᑖᑕᕘᒥᓪᓗ ᑐᑦᓯᐊᓂᕐᒥᒃ. ᑕᑯᒥᓇᕐᑐᓕᐅᕐᓂᖅ ᓴᓇᑐᔫᒋᐅᕐᓴᓂᖃᕐᑎᓯᓲᖅ ᐊᐅᓚᑦᓯᒍᓐᓇᓂᕐᒥᓗ ᓴᓇᑐᔫᓂᒃᑯᑦ ᓱᓇᑐᐃᓐᓇᓂᒃ ᐱᖁᑎᓂᒃ ᐆᑦᑎᒋᓗᒍ ᖁᓪᓕᓴᔭᖅ.


ᐳᕐᑐᓂᓖᑦ ᒪᕐᕉᓂᒃ

ᐳᕐᑐᓂᓕᓐᓄᑦ ᒪᕐᕉᓂᒃ ᐃᓕᓐᓂᐊᑎᑦᓯᒍᑏᑦ ᐊᑦᔨᓭᓐᓇᒐᓚᖏᑦ ᐳᕐᑐᓂᓖᑦ ᐊᑕᐅᓯᕐᒥᒃ ᐃᓕᓐᓂᐊᑎᑦᓯᒍᑎᖏᓐᓂᒃ. ᑌᒣᒐᓗᐊᕐᑎᓗᒍ ᓱᑎᑦᓯᒍᑎᖏᑦ ᐊᑦᔨᒋᖕᖏᑕᖏᑦ. ᐅᖃᐅᓯᕐᒥ ᐃᓕᓐᓂᐊᑎᑦᓯᒍᑎᓂ, ᐳᕐᑐᓂᓕᓐᓂ ᐊᑕᐅᓯᕐᒥᒃ ᐱᔪᓐᓇᓃᑦ ᐃᓕᓐᓂᐊᑎᑦᓯᒍᑎᐅᓲᑦ ᑲᔪᓯᔭᐅᖏᓐᓇᓱᑎᒃ; ᐃᑉᐱᒋᔭᐅᓂᕐᓴᐅᑎᓪᓗᒋᑦ ᐊᓪᓚᕈᓐᓇᓃᑦ ᐅᖃᐅᓯᕐᓂᓗ ᓄᕐᖃᕈᑎᓂᒃ ᐊᑐᕐᓂᓂᒃ ᐃᓕᓐᓂᐊᑎᑕᐅᕆᐊᖕᖓᓱᑎᒃ. ᑭᓯᑦᔪᑎᓕᕆᓂᕐᒥ ᐳᕐᑐᓂᕐᓴᓂᒃ ᐃᓕᓐᓂᐊᑎᑕᐅᑦᓱᑎᒃ. ᓱᖕᖑᐊᑎᐅᖕᖑᐊᓂᕐᒥᒃ ᐱᒋᐊᖕᖓᑎᑕᐅᑦᓱᑎᒃ. ᐃᙯᓕᓴᕐᓂᖅ, ᑕᑯᒥᓇᕐᑐᓕᐅᕐᓂᖅ, ᓂᑦᔮᔫᓕᕆᓂᖅ ᑖᓂᓯᕐᓂᓗ ᐃᓕᓐᓂᐊᑎᑦᓯᒍᑎᐅᓲᑦ. ᐃᓅᑦᔪᓯᓕᕆᓂᕐᒥ ᐃᓕᓐᓂᐊᓲᑦ ᓄᓇᓕᒻᒥᓂᒃ ᐃᕐᖃᓇᕐᑐᖁᑎᖏᓐᓂᓗ ᓄᓀᓪᓗ ᐋᕐᕿᓯᒪᓂᖏᓐᓂᒃ. ᓱᑯᐃᔦᓂᕐᒥ ᐆᒪᔪᓂᒃ ᐅᑭᐅᕐᑕᑐᒥᐅᔭᓂᒃ ᐃᓕᓐᓂᐊᓱᑎᒃ, ᖃᐅᒪᓂᕐᓂᒃ ᑕᕐᕋᓂᓪᓗ, ᐊᓂᕐᓂᒥᒃ ᓱᓇᑐᐃᓐᓀᓗ ᐱᑦᓴᔭᖏᓐᓂᒃ.


ᐳᕐᑐᓂᓖᑦ ᐱᖓᓱᓂᒃ

ᐅᖃᐅᓯᐅᑉ ᐁᑉᐱᐅᑎᖓᓂ ᐱᒋᐊᖕᖓᑐᑦ (ᖃᓪᓗᓈᑎᑐᑦ ᐅᐃᒍᐃᑎᑐᓘᓐᓃᑦ). ᐃᓕᓐᓂᐊᓲᑦ ᐃᓗᓕᓕᒫᖏᓐᓂᒃ ᐃᓕᓐᓂᐊᑎᑦᓯᒍᑎᐅᒋᐊᓖᑦ (ᑭᓯᑦᔪᑎᓕᕆᓂᕐᒥ, ᓱᑯᐃᔦᓂᕐᒥ, ᑕᑯᒥᓇᕐᑐᓕᐅᕐᓂᒥ ᐃᓅᑦᔪᓯᓕᕆᓂᕐᒥᓗ ᐃᓚᖓᓂᒃ) ᐅᖃᐅᓯᐅᑉ ᐁᑉᐱᐅᑎᖓᓂ. ᐃᓄᒃᑎᑐᑦ ᐃᓕᓐᓂᐊᓲᖑᖏᓐᓇᓱᑎᒃ ᑫᕙᓪᓚᒍᓯᕐᓂ ᐊᒥᓲᖕᖏᑐᓂ ᐱᓇᓱᐊᕈᓯᑕᒫᑦ. ᐅᑉᐱᓂᓕᕆᓂᕐᒥ ᐃᓗᕐᖁᓯᓕᕆᓂᕐᒥᓗ, ᐃᓚᖏᓐᓂᓗ ᐃᓅᑦᔪᓯᓕᕆᓂᕐᒥᒃ ᐃᓄᒃᑎᑐᑦ ᐃᓕᓐᓂᐊᓲᖑᒻᒥᔪᑦ.


ᐳᕐᑐᓂᓖᑦ ᓯᑕᒪᒥᑦ ᐱᖓᓲᔪᕐᑐᒧᑦ

ᐃᓕᓐᓂᐊᖏᓐᓇᓱᑎᒃ ᐅᖃᐅᓯᐅᑉ ᐁᑉᐱᐅᑎᖓᓂ (ᖃᓪᓗᓈᑎᑐᑦ ᐅᐃᒍᐃᑎᑐᓘᓐᓃᑦ) ᐃᓘᓐᓈᒍᓪᓗ ᖃᐅᔨᒪᓂᕐᑖᐸᓪᓕᐊᓂᕐᒧᑦ ᐱᔪᓐᓇᓂᕐᓂᓗ ᐃᓕᓐᓂᐊᕆᐊᓕᒻᒥᓂᒃ. ᐅᖃᐅᓯᕐᒥ ᐃᑉᐱᒋᔭᐅᓗᐊᖕᖑᐊᑎᓪᓗᒋᑦ ᐊᑐᐊᕐᓯᒍᓐᓇᓂᖏᑦ ᐊᓪᓚᕈᓐᓇᓂᖏᓪᓗ. ᑭᓯᑦᔪᑎᓕᕆᓂᕐᒥ ᐱᔪᓐᓇᓂᕐᑖᐸᓪᓕᐊᓱᑎᒃ ᑭᓯᑦᔪᑎᓕᕆᐅᑎᓂᒃ, ᓴᓇᒻᒪᓕᕆᓂᕐᓂ, ᓱᕐᖄᑎᕆᓂᕐᓂ ᑐᑭᑖᕆᓂᕐᓂᓗ; ᐊᑐᒋᐊᖃᓲᖑᑦᓱᑎᓗ ᑭᓯᑦᔪᑎᓕᕆᐅᑎᓂᒃ. ᐃᓕᓐᓂᐊᖏᓐᓇᓲᑦ ᐃᓄᒃᑎᑐᑦ ᐃᓗᕐᖁᓯᓕᕆᓂᕐᒥᓗ, ᐅᓄᕐᓯᒋᐊᕐᑎᓗᒋᑦ ᒪᕐᕉᓂᑦ ᐃᓕᓐᓂᐊᑎᑦᓯᓂᐅᓲᓂᑦ ᐱᓇᓱᐊᕈᓯᑕᒫᑦ ᑕᓪᓕᒪᓄᑦ ᐃᓕᓐᓂᐊᕈᑎᑦᓴᓕᐅᕐᓂᖃᕐᒪᑕ ᐃᓄᒃᑎᑑᕐᑐᓂᒃ.


ᐳᕐᑐᓂᓖᑦ ᓯᑕᒪᐅᔪᖏᒐᕐᑐᒥᒃ

ᐳᕐᑐᓂᖅ ᓯᑕᒪᐅᔪᖏᒐᕐᑐᖅ ᐃᓚᒋᐊᕈᑎᐅᕗᖅ ᐃᓕᓐᓂᐊᓂᕐᒥᒃ ᓲᖑᓰᒋᐊᕐᓂᒧᑦ ᐅᖃᐅᓯᐅᑉ ᐁᑉᐱᐅᑎᖓᓂᒃ ᑭᓯᑦᔪᑎᓕᕆᐅᑎᓂᓪᓗ ᐱᔪᓐᓇᓂᕆᒋᐊᓕᖏᓐᓂᒃ ᐊᑐᐃᓐᓇᐅᒪᑦᓯᐊᑎᑦᓯᒋᐊᕐᓂᒧᑦ ᐳᕐᑐᓂᕐᓴᒥ ᐃᓕᓐᓂᐊᓂᖏᓐᓄᑦ.
 

ᐳᕐᑐᓂᕐᓴᒥ ᐊᑕᐅᓯᕐᒥᑦ ᐱᖓᓱᓄᑦ

ᐃᓕᓐᓂᐊᓲᑦ ᐃᓕᓐᓂᐊᕈᑎᑦᓴᔭᑐᐃᓐᓇᖏᓐᓂᒃ ᐳᕐᑐᓂᕐᒦᑦᑐᑦ ᐃᑉᐱᒋᔭᐅᓂᕐᓴᐅᑎᓪᓗᒋᑦ ᐅᖃᐅᓯᐅᑉ ᐁᑉᐱᐅᑎᖓᓂ ᐱᔪᓐᓇᓂᖏᑦ. ᐃᓕᓐᓂᐊᕈᑏᑦ ᑐᖕᖓᕕᖃᓲᑦ ᑐᑭᒧᐊᒍᑎᖏᓐᓂᒃ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᑯᑦ ᐃᓚᐅᒻᒥᑎᓪᓗᒋᑦ ᐅᑭᐅᕐᑕᑐᒨᓕᖓᔪᑦ. ᐅᑯᐊ ᐃᓕᓐᓂᐊᑎᑦᓯᒍᑏᑦ ᐃᓕᓐᓂᐊᑕᐅᓲᑦ ᐳᕐᑐᓂᕐᓴᒥ ᐃᓕᓐᓂᐊᓂᖏᓐᓂ: ᑭᓯᑦᔪᑎᓕᕆᐅᑏᑦ, ᐅᖃᐅᓯᐅᑉ ᐁᑉᐱᐅᑎᖓᓂ ᐃᓕᓐᓂᐊᑕᒥᓂ (ᐅᐃᒍᐃᑎᑐᑦ ᖃᓪᓗᓈᑎᑐᓘᓐᓃᑦ), ᐃᓅᑦᔪᓯᓕᕆᓂᕐᒥ (ᓄᓇᓕᕆᓂᖅ, ᐃᕐᖃᓇᕐᑐᖁᑎᓕᕆᓂᖅ, ᐱᖁᔭᓕᕆᓂᖅ), ᓇᒻᒥᓂᖅ ᐃᓅᖃᑎᒌᓐᓂᒥᓪᓗ ᐱᕈᕐᐸᓕᐊᓂᕐᒥ ᐃᙯᓕᓴᕐᓂᒥᓗ. ᓱᑯᐃᔦᓂᕐᓂ, ᐃᓕᓐᓂᐊᓲᑦ ᐊᕙᑎᓕᕆᓂᕐᒥᒃ ᐳᕐᑐᓂᕐᓴᒥ 1-ᒥ, ᐊᕙᑎᐅᑉ ᐱᑦᓴᔭᖏᓐᓂᒃ ᐳᕐᑐᓂᕐᓴᒥ 2-ᒥ, ᐳᕐᑐᓂᕐᓴᒥ 3-ᒥ ᑎᒥᒨᓕᖓᔪᓂᒃ. ᐳᕐᑐᓂᕐᓴᒦᓕᕈᑎᒃ 2-ᒥ ᐃᓕᓐᓂᐊᕈᓐᓇᑐᑦ ᖃᕆᑕᐅᔭᓕᕆᓂᕐᒥᒃ ᐳᕐᑐᓂᕐᓴᒥᓪᓗ 3-ᒥ ᐱᓇᓱᒐᕆᒍᒪᔭᕐᓱᓂᕐᒥᒃ. ᐃᓕᓐᓂᐊᕈᓐᓇᖏᓐᓇᓱᑎᓪᓗ ᐃᓄᒃᑎᑐᑦ, ᐅᑉᐱᓂᓕᕆᓂᕐᒥ ᐃᓗᕐᖁᓯᓕᕆᓂᕐᒥᓗ ᐅᖃᐅᓯᕐᖄᒥᓂ ᐳᕐᑐᓂᕐᓴᒥ ᐃᓕᓐᓂᐊᑎᐅᓂᕐᒥᓂ. ᓄᓇᓖᑦ ᐃᓚᖏᓐᓂ ᐃᓄᒃᑎᑐᑦ ᐃᓕᓐᓂᐊᓂᖃᓲᖑᒥᔪᑦ ᐃᓅᑦᔪᓯᓕᕆᓂᕐᒥ.
 

ᐳᕐᑐᓂᕐᓴᒥ ᓯᑕᒪᒥᒥ

ᐃᓕᓐᓂᐊᖏᓐᓇᓲᑦ ᐃᓕᓐᓂᐊᑎᑦᓯᒍᑎᑦᓴᔭᓂᒃ, ᑐᑭᑖᕐᐸᓕᐊᓂᐊᓕᕋᒥᒃ ᓯᕗᓂᕐᒥᓂ ᐃᓕᓐᓂᐊᖏᓐᓇᕈᒪᒻᒪᖔᕐᒥᒃ. ᓱᑯᐃᔦᓂᕐᒥ ᓂᕈᐊᕈᓐᓇᓱᑎᒃ ᑐᑭᓯᐅᕆᒍᑎᓂᒃ 416-ᓕᓐᓂᒃ 436-ᓂᓘᓐᓃᑦ, ᓱᑯᐃᔦᓂᕐᒥᒃ ᐊᓕᐊᒋᔭᖃᕐᓂᓴᓄᑦ. ᓂᕈᐊᕈᓐᓇᓱᑎᓪᓗ ᑭᓯᑦᔪᑎᓐᓂᐊᕈᑎᓂᒃ ᐳᕐᑐᓂᕐᓴᓂᒃ (436-ᓕᓐᓂᒃ) ᖃᕆᑕᐅᔭᓕᕆᓂᕐᓗ ᐃᓕᓐᓂᐊᑕᐅᒋᐊᓪᓚᕆᐊᓕᒃ. ᐃᓅᑦᔪᓯᓕᕆᓂᕐᒥ ᐃᓕᓐᓂᐊᖏᓐᓇᓲᑦ ᓄᓇᓕᕆᓂᕐᒥᒃ, ᐃᕐᖃᓇᕐᑐᖁᑎᓕᕆᓂᕐᒥᒃ ᐱᖁᔭᓕᕆᓂᕐᓂᓗ, ᐃᓚᐅᒻᒥᑎᓪᓗᒋᑦ ᓇᒻᒥᓂᖅ ᐆᒪᒐᓱᐊᕐᓂᒨᓕᖓᔪᑦ. ᐳᕐᑐᓂᕐᓴᒥ 4-ᒥ ᐱᔭᕇᒋᐊᕕᓕᕋᒥᒃ, ᓂᕈᐊᕈᓐᓇᑐᑦ ᐱᓇᓱᒐᕆᒍᒪᔭᕐᒥᓂᒃ ᐃᓕᓐᓂᐊᓂᕐᒥᒃ ᐳᕐᑐᓂᕐᓴᒥᓘᓐᓃᑦ ᐃᓕᓐᓂᐊᑕᒥᓂᒃ ᑲᔪᓯᑐᐃᓐᓇᓗᑎᒃ.
 

ᐳᕐᑐᓂᕐᓴᒥ ᑕᓪᓕᒪᒥ

ᑭᖑᓪᓕᐹᒥ ᐳᕐᑐᓂᕐᓴᒦᓕᕋᒥᒃ, ᐃᓕᓐᓂᐊᖏᓐᓇᓲᑦ ᐃᓕᓐᓂᐊᕆᐊᓕᒻᒥᓂᒃ, ᐅᖃᐅᓯᕐᒥᒃ ᑭᓯᑦᔪᑎᓐᓂᐊᕈᑎᓂᓪᓗ ᐱᔪᓐᓇᓂᖏᑦ ᓲᖑᓂᕐᓴᐅᓕᕐᓱᑎᒃ ᐊᑐᐃᓐᓇᕈᕐᑎᓂᕐᒥᓂ ᐱᔭᕇᒍᓯᕐᑕᐅᓂᕐᒧᑦ ᐃᓕᓐᓂᐊᕆᓪᐊᓛᑐᐃᓐᓇᒋᐊᖃᕐᓂᒧᓪᓗ ᐳᕐᑐᓂᕐᓴᒋᐊᓪᓚᒥ. ᓱᑯᐃᔦᓂᕐᒥ ᐃᓕᓐᓂᐊᕈᓐᓇᓱᑎᒃ ᖃᐅᔨᓴᕐᓂᒥ ᐅᐊᕈᑎᒌᕈᓐᓇᑐᓂᒃ ᖃᐅᔨᓴᕐᓂᒥᓪᓘᓃᑦ ᓱᓇᐅᓂᖏᓐᓂᒃ ᓱᓇᑦᓴᔭᐅᓂᖏᑦᑕ 534-ᓕᓐᓂᒃ. ᐃᓕᓐᓂᐊᓇᐅᑉ ᐊᕐᕌᒍᖓᑕ ᓄᖕᖑᐊᓅᕐᐸᓕᐊᓕᕋᒥᒃ, ᐃᓕᓐᓂᐊᑏᑦ ᖃᐅᔨᓴᕐᑕᐅᓂᖃᓲᑦ ᐅᖃᐅᓯᕐᒥᒃ ᐱᔪᓐᓇᓯᐊᕐᒪᖔᑕ ᐳᕐᑐᓂᕐᓴᒋᐊᓪᓚᒨᕈᓐᓇᓂᕐᒧᑦ. ᐳᕐᑐᓂᕐᓴᒥ 5-ᒥ.