ᐃᓕᓐᓂᐊᓂᐅᑉ ᐱᕙᓪᓕᐊᓂᕆᓯᒪᔭᖓ ᓄᓇᕕᒻᒥ

ᐃᓄᑦᑎᒍᑦ ᐱᐅᓯᑐᖃᕐᑎᒍᑦ ᐃᓕᓐᓂᐊᑎᑦᓯᓂᖅ

ᐃᓄᐃᑦ ᐱᕈᕐᐸᓕᐊᓯᒪᕗᑦ ᓄᓇᒥ ᓄᓇᕕᒻᒥ ᑌᔭᐅᔪᒥ (ᑯᐯᑉ ᑕᕐᕋᖓ 55 ᐃᑳᖓᔫᑉ ᖁᓛᓂ) ᐊᕐᕌᒍᓂᒃ 4000-ᓂᒃ ᐊᓂᒍᕐᑐᓂ. ᑕᒪᒃᑯᐊ ᐊᓂᒍᕐᐸᓕᐊᑎᓪᓗᒋᑦ ᐃᓄᐃᑦ ᐃᓕᓐᓂᐊᑎᑦᓯᓂᖃᖃᑦᑕᓯᒪᕗᑦ ᐃᑦᔪᐊᖃᑦᑕᑕᐅᓂᕐᒥᒍᑦ ᐱᓇᓱᐊᕐᑕᒥᓂᒃ ᐅᖃᐅᓯᕐᒥᓂᒃ ᐃᓗᖅᑯᓯᕐᒥᓂᓪᓗ ᑕᑯᓐᓇᑕᐅᑎᑦᓯᓱᑎᒃ ᐃᓅᒐᓱᐊᑐᐃᓐᓇᐸᓚᐅᕋᒥᒃ ᐆᒪᒐᓱᐊᓱᑎᒃ. ᕿᑐᕐᖓᓕᐅᔪᑦ, ᐃᓚᒋᔭᐅᔪᑦ ᑌᒣᒃᑯᐊᕆᔭᐅᔪᓪᓗ, ᐱᐅᓯᑐᖃᕐᒥᒃ ᐃᓕᓐᓂᐊᑎᑦᓯᕙᓚᐅᖅᑯᑦ ᐃᑦᔪᐊᖃᑦᑕᑕᐅᑦᓱᑎᒃ ᐱᒍᓐᓇᓯᓂᐊᕐᓂᖓ ᐱᕕᑦᓴᒥᒃ ᐁᑦᑐᑕᐅᓯᒪᑎᓐᓇᒍ. ᐊᑐᐃᓐᓇᐅᓕᕋᒥ ᐱᐊᕋᖅ ᐱᒍᓐᓇᓯᒐᒥ ᐱᒋᐅᕐᓴᑎᑕᐅᕙᓚᐅᖅᑯᖅ ᐱᒍᓐᓇᓂᖓ ᒪᓕᑦᓱᒍ ᐊᑐᐃᓐᓇᐅᓕᕐᓂᖓ.


ᐊᔪᕿᕐᑐᐃᔩᑦ

ᐊᖏᓕᑲᒃᑯᑦ ᐊᔪᕿᕐᑐᐃᔨᖏᑦ ᐊᒻᒪᓗ ᑲᑐᓕᒃᑯᓗ ᐊᔪᕿᕐᑐᐃᔩᑦ ᓄᓇᕕᒻᒦᐸᓚᐅᖅᑯᑦ 1811-ᒥᑦ 1956 ᑎᑭᑦᓱᒍ, ᐃᓄᓐᓂᒃ "ᐅᑉᐱᓕᕐᑎᓯᒐᓱᐊᕐᓱᑎᒃ". ᐱᓇᓱᐊᕈᑎᒥᓂᒃ ᐊᑐᕐᓱᑎᒃ ᐃᓄᓐᓂᒃ ᐃᓕᓐᓂᐊᑎᑦᓯᐸᓚᐅᕐᑐᑦ ᐃᓄᒻᒪᕆᓐᓂᓗ ᐃᓕᓐᓂᐊᕈᒪᔪᓂᒃ ᐊᓪᓚᓂᐊᕆᐅᕐᓴᑎᑦᓱᒋᑦ ᐊᓪᓚᒋᐅᕐᓴᑎᑦᓱᒋᑦ ᑭᓯᑦᓯᒍᑎᓐᓂᐊᕆᐅᕐᓴᑎᑦᓱᒋᑦ ᐅᑉᐱᓂᕐᒥᓗ ᐃᓕᓐᓂᐊᑎᑦᓱᒋᑦ.

1811-ᒥ ᑲᖏᕐᓱᐊᓗᒃᔪᐊᒨᕆᐅᓚᐅᕐᑐᕕᓂᐅᕗᑦ ᑰᒃᔪᐊᒧᓪᓗ ᐊᖏᓕᑲᒃᑯᑦ ᐊᔪᕿᕐᑐᐃᔨᖏᑦ ᓛᐸᑐᐊᒥᑦ ᐱᑦᓱᑎᒃ. ᓯᕗᓪᓕᐹᑦ ᑲᑐᓕᒃᑯᑦ ᐊᔪᕿᕐᑐᐃᔨᖏᑦ ᐅᑭᐅᕐᓯᐅᕆᐊᙵᓚᐅᕐᑐᕕᓂᐅᕗᑦ ᑰᒃᔪᐊᒥ 1853-ᖑᑎᓪᓗᒍ. 1900 ᐊᕐᕌᒍᐃᑦ ᓯᕗᓂᖏᑎᒍᑦ ᐃᓄᐃᑦ ᐃᓕᓐᓂᐊᑎᑕᐅᕙᓕᕐᓂᖁᑦ ᐃᓄᑦᑎᑐᑦ ᐊᓪᓚᒋᐅᕐᓴᓂᕐᒥᒃ ᐊᖏᓕᑲᒃᑯᑦ ᐊᔪᕿᕐᑐᐃᔨᖏᓐᓄᑦ.

ᑌᑦᓱᒪᓂ ᐃᓄᐃᑦ ᓂᒪᔭᑦᑐᒪᕆᐅᖏᓐᓇᓚᐅᕐᓯᒪᒻᒪᑕ ᐃᓕᓐᓂᐊᑎᑦᓯᓂᖅ ᐊᑌᓐᓇᓕᒫᕐᑐᒥᒃ ᐊᑑᑎᔭᐅᖃᑦᑕᓚᐅᕐᓯᒪᖏᑦᑐᖅ ᓱᓕ.

ᓄᓇᕕᒻᒥ ᐃᓕᓐᓂᐊᑎᑦᓯᔨᒃ ᓯᕗᓪᓕᐹᖅ ᑰᒃᔪᐊᒥ ᓇᑉᐸᑕᐅᒋᐊᙵᓕᓚᐅᕐᓂᖁᖅ ᐊᖏᓕᑲᒃᑯᓄᑦ 1932-ᖑᑎᓪᓗᒍ. ᐃᓄᐃᑦ ᖃᓪᓗᓂᐊᕆᐊᕐᓯᒪᓕᑐᐊᕐᒪᑕ ᐅᐱᕐᖔᓯᐅᕆᐊᕐᑐᓕᕐᒪᑕᓗ ᐊᖏᓕᑲᒃᑯᑦ ᐊᔪᕿᕐᑐᐃᔨᖏᑦ ᐃᓕᓐᓂᐊᑎᑦᓯᕙᑦᑐᕕᓃᑦ ᑭᓯᑦᓯᒍᑎᓐᓂᐊᓂᕐᒥᒃ ᐊᓪᓚᒋᐅᕐᓴᓂᕐᒥᓗ.

1956-ᖑᑎᓪᓗᒍ ᑲᕙᒪᒃᑯᓄᑦ ᐃᑲᔪᕐᑕᐅᓱᑎᒃ (ᑲᕙᒪᑐᖃᒃᑯᓄᑦ), ᐳᕕᕐᓂᑐᒥ ᐃᓕᓐᓂᐊᑎᑦᓯᕕᐅᓂᐊᕐᑐᖅ ᓇᑉᐸᑕᐅᓕᕐᓂᕆᕗᖅ (ᑲᑐᓕᒃᑯᑦ) ᐊᔪᕿᕐᑐᐃᔨᖓ ᐅᒥᑲᓪᓚᐅᓂᕋᕐᑕᐅᕙᓚᐅᕐᑐᖅ ᐃᓕᓐᓂᐊᑎᑦᓯᓯᑎᓪᓗᒍ ᐅᒥᑲᓪᓚᐅᑉ ᐱᐅᓯᖓ ᐱᓇᓱᐊᕐᓂᖓ ᐊᑦᔨᐅᖏᑦᑑᓚᐅᕐᓯᒪᒋᕗᖅ - ᐃᓄᑦᑎᑑᓕᕐᑎᕆᕙᓚᐅᕐᑐᖅ ᖃᓪᓗᓈᑎᑑᕐᑐᓂᒃ ᐃᓕᓐᓂᐊᑎᒥᓄᑦ ᐃᓕᓐᓂᐊᑎᑦᓯᒍᒋᓂᐊᕐᑕᒥᓂᒃ ᓇᓗᓇᙱᓂᕐᓴᐅᑎᑦᓯᒐᓱᐊᕐᓱᓂ. |ᑖᒃᑯᐊ ᐊᔪᕿᕐᑐᐃᔩᑦ ᐃᓕᓐᓂᐊᑎᑦᓯᕕᖏᑦ ᑲᔪᓯᓯᒪᙱᑐᑦ ᑮᓇᐅᔭᖃᑦᓯᐊᖏᓐᓂᑯᒧᑦ, ᐱᓇᓱᑦᑎᖃᑦᓯᐊᖏᓐᓂᒧᑦ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᐱᒋᐅᕐᓴᓯᒪᔪᖃᙱᓂᑯᒥᓄᑦ.


ᑕᐅᕐᔅᓯᑲᑦᑕ|ᑎᑦ ᒥᕐᖁᓕᓐᓂᐊ|ᑎᑦ

ᓯᕗᓪᓕᐹᑦᓯᐊᖑᑦᓱᓂ ᓂᐅᕕᕐᑎᑯᑦ ᒥᖅᑯᓕᕆᕕᖓ ᑲᒻᐸᓂᒃᑯᓄᑦ ᐊᐅᓚᑕᐅᑦᓱᓂ ᐅᒃᑯᐃᕆᐊᙵᓚᐅᕐᓂᖁᖅ ᑰᒃᔪᐊᕌᐱᒻᒥ 1829-ᖑᑎᓪᓗᒍ. ᑖᒃᑯᐊ ᑕᐅᕐᓰᑲᑦᑕᑐᑦ ᐱᒍᒪᔭᖃᓗᐊᙳᐊᓂᖅᑯᑦ ᒥᖅᑯᓕᓐᓂᒃ ᑕᐅᕐᓰᖃᑎᖃᕐᐸᓱᑎᒃ ᐱᖁᑎᓄᑦ, ᐃᓕᓐᓂᐊᑎᑦᓯᒍᑎᐅᒋᐊᙵᓕᕐᑎᓗᒍ ᒪᑭᑕᒐᓱᐊᕐᓂᒥᒃ. ᐃᓄᐃᑦ ᑕᐅᕐᓰᖃᑎᖃᕐᓂᒥᒍᑦ ᒥᖅᑯᓕᓐᓂᒃ ᐃᓕᓐᓂᐊᑎᑕᐅᒋᐊᙵᓯᓐᓂᖁᑦ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒥᒃ.


ᑲᕙᒪᑐᖃᒃᑯᑦ ᐃᓕᓐᓂᐊᑎᑦᓯ/ᖏᑦ

ᐃᓄᐃᑦ ᐊᐅᓚᑕᐅᓚᐅᕐᓯᒪᒐᒥᒃ ᑲᕙᒪᑐᖃᒃᑯᓄᑦ ᐊᖏᖃᑎᒌᒍᑎᐅᓯᒪᔪᖅ 1867-ᒥ ᒪᓕᑦᓱᒍ (ᐃᓕᑕᕆᔭᐅᓂᖃᕐᓱᓂ ᑲᕙᒪᑐᖃᒃᑯᑦ ᐃᖅᑲᑐᐃᕕᕐᔪᐊᖏᑎᒍᑦ ᑌᔭᐅᑦᓱᓂ In Re Eskimos (1939) R.C.S. 104), ᐊᒻᒪᓗ ᐊᐅᓚᑕᐅᒻᒥᓱᑎᒃ ᑯᐯᑉ ᑲᕙᒪᖓᓄᑦ ᐊᖏᖃᑎᒌᒍᑎᐅᓯᒪᔪᖅ 1912-ᖑᑎᓪᓗᒍ ᒪᓕᑦᓱᒍ (ᐊᖏᔪᒻᒪᕆᐊᓗᒃ ᓄᓇᖁᑎᐅᔪᖅ ᓄᓇᑦᓯᐊᒥᐅᒃ ᑲᕙᒪᒃᑯᖏᓐᓂ ᐱᑎᓪᓗᒍ ᐁᑦᑑᑎᐅᓚᐅᕐᓯᒪᒻᒪᑦ), ᓯᕗᓪᓕᐸᐅᑦᓱᑎᒃ ᑲᕙᒪᑐᖃᒃᑯᑦ ᐃᓕᓐᓂᐊᑎᑦᓯᕕᓐᓂᒃ ᓇᑉᐸᑎᕆᓯᔪᕕᓂᐅᕗᑦ ᓄᓇᕕᒻᒥ.ᑕᒪᓐᓇ ᐊᑑᑎᔭᐅᓚᐅᕐᓯᒪᕗᖅ ᓯᓚᕐᔪᐊᓕᒫᒥ ᐅᓇᑕᕐᔪᐊᓂᐅᑉ ᑐᖓᓕᖓᑕ ᑭᖑᓂᖓᒍᑦ ᑲᕙᒪᑐᖃᒃᑯᑦ ᐱᒻᒪᕆᐅᑎᑦᓯᒐᓱᐊᓯᓐᓂᒪᑕ ᐅᑭᐅᕐᑕᑐᒥᐅᑦ ᐱᕈᕐᐸᓕᐊᑎᑕᐅᒋᐊᖃᕐᓂᖓᓂᒃ.

ᐱᒻᒪᕆᕈᕐᐸᓕᐊᑎᑕᐅᒻᒪᑕ ᑕᕐᕋᒥᐅᑦ, ᐊᔪᕿᕐᕐᑐᐃᔨᒃᑯᑦ ᐃᓕᓐᓂᐊᑎᑦᓯᕕᒋᕙᑦᑕᕕᓂᖏᑦ ᑎᒍᔭᐅᓕᕐᓂᕆᕗᑦ ᑲᕙᒪᑐᖃᒃᑯᓄᑦ ᐃᓂᓪᓚᑎᕐᑕᐅᒋᐊᑦᓯᐊᓯᑦᓱᑎᒃ ᐊᓯᖏᓐᓂᓗ ᑲᓇᑕᒥ ᓄᓇᓕᓐᓂ ᐃᑦᔭᓯᑎᑕᐅᒐᓱᐊᓯᑦᓱᑎᒃ.

ᑲᕙᒪᑐᖃᒃᑯᑦ ᐃᓄᐃᑦ ᐱᑦᓴᓕᐅᕈᑎᐅᒍᓐᓇᓂᖏᓐᓂᒃ ᐱᒍᓐᓇᓯᒍᓐᓇᓂᖏᓐᓂᒃ ᐃᓕᑕᕆᔭᖃᓕᕋᒥᒃ ᐃᓄᓐᓂᒃ ᑲᓇᑕᒥᐅᓄᑦ ᐃᓚᒋᔭᐅᑎᑦᓯᕙᓪᓕᐊᒐᓱᐊᓯᓐᓂᖁᑦ. ᐃᓕᓐᓂᐊᑎᑦᓯᒍᑎᑎᒍᑦ ᐱᒋᐅᕐᓴᑎᑦᓯᒍᑎᑎᒍᓪᓗ ᐃᓄᓐᓂᒃ ᐱᓇᓱᐊᕋᓱᐊᓯᓐᓂᖁᑦ ᐅᑭᐅᕐᑕᑐᒥ ᐱᑦᓴᖑᕋᔭᖁᑦᓱᒋᑦ ᐅᓇᑕᕐᔪᐊᓂᐅᑉ ᑭᖑᓂᖓᒍᑦ. ᕈᓂᕿᑯᕿᓴᑕᖑᓄᕿᑭᐅ' 1958-ᖑᑎᓪᓗᒍ "ᑕᐅᑐᖅᑰᓚᐅᕐᑐᕕᓂᐅᒻᒪᑦ ᐅᑭᐅᕐᑕᑐᒥᐅᓂᒃ" ᓂᕈᐊᕐᑕᐅᑎᑦᓯᒐᓱᐊᕐᓂᒥᒃ ᓇᓪᓕᖁᐊᕆᔭᐅᓕᕐᑎᓯᓗᓂ ᐊᓯᓕᒫᖏᓐᓄᑦ ᑲᓇᑕᒥᐅᓄᑦ ᑌᒣᒻᒪᑦ ᐃᓕᓐᓂᐊᑎᑦᓯ"ᑦ ᐅᑭᐅᕐᑕᑐᒥ ᓄᐃᑎᑕᐅᓕᓚᐅᕐᑐᕕᓃᑦ ᑰᒃᔪᐊᕌᓗᒻᒥ ᑰᒃᔪᐊᕌᐱᒻᒥᓗ.

ᐃᓄᐃᑦ ᐱᕕᑦᓴᑖᕐᑎᑕᐅᓐᓂᖁᑦ "ᓇᓪᓕᖁᐊᕆᔭᐅᒍᓐᓇᓯᑎᑕᐅᑦᓱᑎᒃ ᑲᓇᑕᒥᐅᖑᖃᑎᒥᓄᑦ" ᐃᓕᓐᓂᐊᑎᑕᐅᓂᒃᑯᑦ - ᑌᒣᒐᓗᐊᕐᑎᓗᒍ ᖃᓪᓗᓈᑎᑐᑦ ᐅᖃᐅᓯᕐᒥᒃ ᐃᓕᓐᓂᐊᑎᑦᓯᓂᖅ ᐊᑑᑎᔭᐅᔪᕕᓂᑐᖃᐅᕗᖅ ᐅᖃᐅᓯᖅᑳᒥᓂᓪᓗ ᐊᑐᑐᐊᕋᒥᒃ ᐃᓕᓐᓂᐊᕕᒻᒥ ᓱᒋᐊᕐᑕᐅᒍᑎᖃᕐᐸᓚᐅᕐᐳᑦ. Ontario-ᒥᐅᑦ ᐃᓕᓐᓂᐊᑎᑦᓯᒍᑎᖏᓐᓂᒃ ᐊᑐᕐᑐᕕᓂᐅᕗᑦ. ᐃᓄᐃᓪᓗ ᑐᓵᔨᒋᔭᐅᓂᐊᕐᑐᑦ ᐃᓕᓐᓂᐊᑎᑕᐅᓂᖃᓚᐅᕐᓯᒪᒋᕗᑦ ᑲᒪᔨᐅᓂᐊᕐᑎᓗᒋᑦ ᐃᓕᓐᓂᐊᑎᓂᒃ ᐱᓇᓱᒋᐅᕐᓴᑎᑕᐅᓚᖓᔪᓂᒃ. ᐃᓕᓐᓂᐊᓂᖅ ᐱᒋᐊᕐᐸᓕᐊᑎᓪᓗᒍ, ᐱᐊᕂᑦ ᑮᓇᐅᔭᖏᑦ ᓂᕿᑖᕈᑏᓪᓗ ᐊᖅᑯᑎᒋᔭᐅᔪᕕᓂᐅᕗᑦ ᐃᓕᓐᓂᐊᑎᑦᓯᓚᕿᒍᑎᐅᒐᓱᐊᕐᓱᑎᒃ.

ᐃᓕᓐᓂᐊᑎᑦᓯᒍᑎᐅᔪᖅ ᐃᓘᓐᓇᖏᓐᓄᑦ ᑐᕌᖓᓚᐅᕐᓯᒪᕗᖅ ᐃᓕᓐᓂᐊᕈᒪᔪᓕᒫᓄᓪᓗ ᐊᑐᐃᓐᓇᐅᑎᑕᐅᑦᓱᓂ ᐊᑭᖃᕐᑎᓇᒍ. ᐃᓄᐃᑦ ᐃᓕᓐᓂᐊᑎᑕᐅᒍᓐᓇᖃᑦᑕᓚᐅᕐᓯᒪᕗᖅ ᐱᓇᓱᒐᕐᑖᕈᓐᓇᓯᑦᓱᑎᒃ ᑲᓇᑕᒥ ᐱᓇᓱᕝᕕᐅᔪᓂ. ᑌᒣᒐᓗᐊᕐᑎᓗᒍ ᐃᓄᐃᑦ ᐃᓕᓐᓂᐊᕈᑎᑦᓴᓕᐅᕐᓂᒥᒃ ᒪᓕᒐᓕᓕᐅᕐᓂᒥᓪᓗ ᐃᓕᓐᓂᐊᓂᕐᒥᒃ ᐱᓇᓱᐊᕐᑕᖃᕈᓐᓇᓚᐅᕐᓯᒪᙱᑐᑦ.

1949-ᒥ ᐱᒋᐊᕐᑎᓗᒍ, ᑲᕙᒪᑐᖃᒃᑯᑦ 1963 ᑎᑭᑦᓱᒍ ᐃᓕᓐᓂᐊᑎᑦᓯᕕᓐᓂᒃ ᓇᑉᐸᑎᕆᓚᐅᕐᓯᒪᕗᑦ ᓄᓇᕕᒻᒥ, ᑲᕙᒪᑐᖃᒃᑯᑦ ᓄᓇᖃᖅᑳᓯᒪᔪᓕᕆᔨᖏᑦ ᐃᓕᓐᓂᐊᓂᕐᒥᒃ ᐊᐅᓚᑕᖃᓪᓚᕆᓚᐅᕐᓯᒪᕗᑦ. 1950 ᐊᕐᕌᒍᖏᓐᓂ 1960-ᓗ ᐊᕐᕌᒍᖏᓐᓂ, ᐃᓄᐃᑦ ᕿᑐᕐᖓᖏᑦ ᐃᓕᓐᓂᐊᐸᓕᓚᐅᖅᑯᑦ ᑲᕙᒪᑐᖃᒃᑯᑦ ᐃᓕᓐᓂᐊᑎᑦᓯᕕᖏᓐᓂ ᓄᓇᕕᒻᒥ. 1963 ᐊᕐᕌᒍᖓᑕ ᐃᓱᐊᓂ, ᑲᕙᒪᑐᖃᒃᑯᑦ ᐃᓕᓐᓂᐊᑎᑦᓯᕕᖃᓕᓚᐅᕐᓯᒪᕗᑦ ᖁᓕᓐᓂᒃ ᓄᓇᓕᓐᓂ: ᐃᓄᑦᔪᐊᖅ (1949), ᑰᒃᔪᐊᖅ (1949), ᑲᖏᕐᓱᐊᓗᒃᔪᐊᖅ (1962), ᖁᐊᕐᑕᖅ (1960), ᑲᖏᕐᓱᒃ (1960), ᑲᖏᕐᓱᔪᐊᖅ (1960),
ᓴᓪᓗᓂ (1957), ᐃᕗᔨᕕᒃ (1960), ᐳᕕᕐᓂᑐᖅ (1958) ᐊᒻᒪᓗ ᑰᒃᔪᐊᕌᐱᒃ (1957).

ᑯᐯᒃᑯᑦ ᐃᓕᓐᓂᐊᑎᑦᓯᕕᖏᑦ
1963 ᑎᑭᑦᓱᒍ ᑯᐯᑉ ᑲᕙᒪᒃᑯᖏᑦ ᐃᓄᓐᓂᒃ ᑯᐯᑉ ᑕᕐᕋᖓᓂᒥᐅᓂᒃ ᑲᒪᕋᑕᓚᐅᕐᓯᒪᙱᑐᑦ. 1963-ᒥ ᐱᒋᐊᕐᑎᓗᒍ ᐅᓪᓗᒥᒧᑦ ᑎᑭᑦᓱᓂ ᑯᐯᑉ ᑲᕙᒪᒃᑯᖏᑦ ᑲᒪᒐᓱᐊᕐᐸᓕᐊᓕᓚᐅᕐᓯᒪᕗᑦ ᐃᑯᒪᓕᐅᕐᓂᒥᒃ ᐅᔭᕋᑦᓴᔭᕐᓂᐊᓂᕐᒥᓗ ᐱᑦᔪᑎᖃᕐᓱᑎᒃ ᐃᓇᖏᕐᓯᐸᓪᓕᐊᒐᓱᐊᓯᑦᓱᑎᒃ ᑲᕙᒪᑐᖃᒃᑯᑦ
ᐊᐅᓚᕙᑦᑕᖏᓐᓂᒃ.

1963-ᖑᑎᓪᓗᒍ ᑯᐯᒃᑯᑦ ᑲᕙᒪᖓ ᒪᓕᒐᕐᒥᒃ ᑭᓯᑦᓯᒍᑎᓕᒻᒥᒃ 60-ᒥᒃ ᓄᐃᑎᑦᓯᒋᐊᙵᓚᐅᕐᓯᒪᕗᖅ ᐃᓕᓐᓂᐊᑎᑦᓯᓂᕐᒥᒃ ᐱᒍᑦᔨᕕᐅᓂᐊᕐᑐᒥᒃ ᓄᐃᑎᑦᓯᓱᑎ. ᐃᓕᓐᓂᐊ"ᑦ ᐊᐅᓚᑕᐅᓂᐊᓕᕐᑎᓗᒋᑦ ᑲᕙᒪᒃᑯᓄᑦ.

ᑕᒪᓐᓇ ᐱᓂᐊᕐᓂᐅᓯᒪᔪᖅ ᑌᔭᐅᓚᐅᕐᓯᒪᔪᖅ ᑯᐯᒻᒥ "ᓂᐸᖃᙱᑐᒥᒃ ᐊᓯᑦᔨᐸᓪᓕᐊᓂᖅ" ᑯᐯᓕᒫᒥ ᐃᓕᓐᓂᐊᓂᖅ ᓄᑕᐅᓯᓕᕐᑕᐅᒋᐊᓯᑎᓪᓗᒍ.

ᑯᐯᑉ ᑲᕙᒪᖓ ᐃᓕᓐᓂᐊᑎᑦᓯᓂᕐᒥᒃ ᐊᖅᑯᑎᖃᕐᐸᓕᐊᒐᓱᐊᓯᓐᓂᖁᖅ ᐃᓕᓐᓂᐊᑎᑦᓯᕕᑦᑕᓱᓂᓗ ᑲᖏᕐᓱᔪᐊᒥ ᑰᒃᔪᐊᒥᓗ 1963-ᖑᑎᓪᓗᒍ ᐊᐅᓚᑕᐅᓚᖓᑎᓪᓗᒍ ᑯᐯᑉ ᑕᕐᕋᖓᓂ ᐊᐅᓚᑦᓯᔨᐅᔪᓄᑦ. 1968-ᖑᑎᓪᓗᒍ, ᓄᑖᖅ ᐃᓕᓐᓂᐊᓂᓕᕆᓂᐅᓂᐊᕐᑐᖅ ᓄᓇᓕᓐᓂ ᓄᐃᑎᑕᐅᓚᐅᕐᓯᒪᕗᖅ ᑌᔭᐅᑦᓱᓂ ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᓂᖅ - ᑖᓐᓇ ᐊᐅᓚᑦᓯᓕᓚᐅᕐᓯᒪᔪᖅ ᐃᓕᓐᓂᐊᓂᕐᒥᒃ ᑯᐯᑉ ᑕᕐᕋᖓᓂ.

ᑖᓐᓇ ᓄᐃᑎᑦᓯᓚᐅᕐᓯᒪᕗᖅ ᐱᒻᒪᕆᐅᑎᓪᓗᒍ ᑭᑐᕐᖓᓕᐅᔪᑦ ᑲᑎᙵᔨᐅᕕᑦᓴᖏᓐᓂᒃ; ᐃᓄᐃᓪᓗ ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᑦᓯᔨᐅᓂᕐᒥᒍᑦ ᐃᓕᑕᕆᔭᐅᓂᕐᑖᒍᓐᓇᓯᑎᑦᓱᒋᑦ (ᐱᒋᐅᕐᓴᑎᑦᓯᓂᐅᓂᐊᕐᑐᒥᒃ ᐊᖏᖃᑎᒌᒍᑎᓕᐅᕐᓯᒪᑦᓱᑎᒃ ᑯᐯᑉ ᐃᓕᓐᓂᐊᕕᕐᔪᐊᖓᒍᑦ ᒪᑭᐊᓪᓗ ᐃᓕᓐᓂᐊᕕᕐᔪᐊᖓᒍᑦ); ᓯᕗᓪᓕᐹᑦ ᐃᓕᓐᓂᐊᕈᑎᑦᓴᓕᐅᕐᑎᐅᒐᔭᕐᑐᑦ ᐱᓇᓱᑦᑎᑖᒍᓚᐅᕐᓯᒪᕗᑦ; ᓯᕗᓪᓕᐹᓪᓗ ᐃᓄᐃᑦ ᐃᓗᖅᑯᓯᖓᓂᒃ ᐃᓕᓐᓂᐊᑎᑦᓯᔨᐅᒐᔭᕐᑐᑦ ᐱᓇᓱᑦᑎᑕᐅᓯᑦᓱᑎᒃ; ᐃᓄᒻᒪᕇᓪᓗ ᐃᓕᓐᓂᐊᑎᑕᐅᒍᑎᑦᓴᖏᑦ ᐱᒋᐊᕐᑎᑕᐅᑦᓱᑎᒃ; ᐊᒻᒪᓗ ᒍᐃᒍᐃᑎᑐᑦ ᑕᕐᕋᒥ ᐃᓕᓐᓂᐊᑎᑦᓯᓂᖅ ᐊᑐᓕᕐᑎᑕᐅᑦᓱᓂ (ᐱᐅᓯᕐᓲᑎᐅᙱᑐᑎᒍᑦ ᐃᓄᐃᑦ ᐃᓕᓐᓂᐊᕈᓐᓇᓯᑎᑕᐅᑦᓱᑎᒃ ᒍᐃᒍᐃᑎᑐᑦ ᐅᖃᐅᓯᕐᒥᒃ).

ᑖᒃᑯᐊ ᐃᓕᓐᓂᐊᑎᑦᓯᒍᑎᖏᑎᒍᑦ ᐊᑐᐃᓐᓇᕈᕐᑕᐅᔪᖃᓚᐅᕐᓯᒪᒋᕗᖅ ᐱᒍᓐᓇᕕᖃᕐᑎᓯᓂᕐᒥᒃ ᓯᕗᓪᓕᐹᓂᒃ ᐊᕐᕌᒍᓂᒃᒃ ᐱᖓᓱᓂᒃ ᐱᐊᕋᖅ ᐃᓕᓐᓂᐊᑎᑕᐅᔪᖅ ᐊᖓᔪᖅᑳᖓ ᑐᑭᑖᕈᓐᓇᑎᓪᓗᒍ ᐃᓕᓐᓂᐊᑎᑕᐅᖁᔨᒍᓂ ᕿᑐᕐᖓᒥᓂᒃ ᒍᐃᒍᐃᑎᑐᑦ ᖃᓪᓗᓈᑎᑐᓪᓗᓃᑦ ᐱᕕᑦᓴᑖᕐᑎᑕᐅᑦᓱᑎᒃ. ᐅᖃᕐᓱᑎᓪᓗ ᑭᖑᓂᖓᒍᑦ ᐃᓄᑦᑎᑐᑦ ᐃᓕᓐᓂᐊᑎᑦᓯᓂᖅ ᐊᑑᑎᔭᐅᕙᓪᓕᐊᓯᒐᔭᕐᑎᓗᒍ ᐃᓕᓐᓂᐊᕆᐊᙵᑐᓂᑦ ᐳᕐᑐᓂᓕᓐᓄᑦ ᐱᖓᓱᓄᑦ ᑎᑭᓪᓗᓂ, ᑯᐯᑉ ᑲᕙᒪᖓ ᐃᓄᓐᓂᒃ ᐃᓕᓐᓂᐊᑎᑦᓯᔨᙳᕆᐅᕐᓴᑎᑦᓯᒋᐊᖃᓚᐅᕐᓯᒪᔪᖅ. ᑲᕙᒪᑐᖃᒃᑯᓂ ᐃᓕᓐᓂᐊᑎᑦᓯᕙᑦᑐᕕᓃᑦ ᐱᓇᓱᑦᑎᑖᕆᔭᐅᓕᕐᓂᖁᑦ ᐃᓕᓐᓂᐊᑎᑦᓯᕕᐅᔪᒥ ᐃᑲᔪᕐᓂᐊᑎᓪᓗᒋᑦ. ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᓂᖅ ᐃᓄᐃᑦ ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᑕᐅᓂᖓᓂᒃ ᐱᒋᐊᕐᑎᓯᓚᐅᕐᓂᖁᖅ ᐱᓇᓱᐊᖃᑎᐅᒋᐊᙵᑎᑦᓯᓯᑦᓱᓂ ᒪᑭᐊᓪ ᐃᓕᓐᓂᐊᕕᕐᔪᐊᖓᓂᒃ, ᐃᓕᓐᓂᐊᑎᑦᓯᒋᐊᙵᓯᓚᐅᕐᓂᖁᑦ ᑰᒃᔪᐊᒥ 1975-ᖑᑎᓪᓗᒍ.

ᑯᐯᒃᑯᑦ ᐃᓕᓐᓂᐊᑎᑦᓯᕕᖏᑦ ᑲᕙᒪᑐᖃᒃᑯᓗ ᐊᑕᐅᑦᓯᑰᕐᓱᑎᒃ ᐱᓇᓱᐊᓚᐅᕐᓯᒪᕗᑦ ᓄᓇᓕᓐᓂ. ᑯᐯᑉ ᑲᕙᒪᖓᑦ ᑐᕌᕐᑕᖃᕐᑐᕕᓂᖅ ᐃᓕᓐᓂᐊᓂᓕᐅᔪᓕᒫᖅ ᐊᐅᓚᑕᐅᒐᔭᕐᑎᓗᒍ ᑯᐯᒃᑯᓄᑦ ᑲᕙᒪᑐᖃᒃᑯᑦ ᐲᕐᓗᒋᑦ. ᑲᕙᒪᑐᖃᒃᑯᓕ ᐊᑐᐃᓐᓇᐅᖏᓐᓇᑐᕕᓂᐅᕗᑦ
ᑭᙴᒪᒋᔭᐅᓂᓕᒫᒥᓂ ᐃᓄᓐᓄᑦ.

1960 ᐊᕐᕌᒍᖏᓐᓂ, ᑯᐯᑉ ᑲᕙᒪᒃᑯᖏᑦ ᐱᔭᕋᓕᓚᐅᕐᓯᒪᕗᑦ ᐃᓄᓐᓂᒃ ᐊᐅᓚᑦᓯᐸᓪᓕᐊᒐᓱᐊᓕᕐᓱᑎᒃ ᐃᓕᓐᓂᐊᓂᖏᑎᒍᑦ ᐅᑉᐱᕆᔭᐅᑦᓴᐅᑎᒋᒍᓐᓇᓚᐅᕐᓯᒪᙱᓇᒥᒃ. ᑲᕙᒪᒃᑯᑦ ᑭᒡᒐᑐᕐᑎᖏᑦ ᐊᓯᑦᔨᒪᑕ ᐃᓕᓐᓂᐊᓂᒐᓴᐅᑉ ᒪᓕᒐᒐᓴᖓ ᐊᓯᑦᔨᓚᐅᕐᓯᒪᒋᕗᖅ. ᑌᒣᓐᓂᖓᓄᑦ ᕿᑐᕐᖓᓕᐅᔪᑦ ᐃᓕᓐᓂᐊᑎᑦᓯᒍᒪᑦᓯᐊᓚᐅᕐᓯᒪᒍᓐᓀᑐᑦ ᑯᐯᑉ ᑕᕐᕋᖓᑕ ᐃᓕᓐᓂᐊᓂᓕᕆᓂᖓᓐᓂ. 70 ᐊᕐᕌᒍᖏᑦᑕ ᕿᑎᒐᓚᖓᓂ, ᐊᒥᓲᓂᕐᓭᑦ ᓯᑕᒪᕕᓪᓗᐊᑐᒥᒃ ᐃᓕᓐᓂᐊᓚᐅᕐᓯᒪᔪᑦ ᑲᕙᒪᑐᖃᒃᑯᑦ ᐃᓕᓐᓂᐊᑎᑦᓯᕕᖏᓐᓂ.

70 ᐊᕐᕌᒍᖏᑦ ᕿᑎᕋᐅᑎᓯᒪᓕᕐᑎᓗᒋᑦ, ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᖅ ᐃᓕᓐᓂᐊᑎᑦᓯᑎᕕᖃᓕᓚᐅᕐᓯᒪᕗᖅ ᖁᓕᓂᒃ ᓄᓇᓕᓐᓂ ᐊᒻᒪᓗ ᐃᓄᓐᓂᒃ ᐃᓕᓐᓂᐊᑎᑦᓯᔨᓂᒃ ᐃᓕᓐᓂᐊᑎᑦᓯᓂᖓ ᐃᖏᕐᕋᓯᐊᓕᕐᓱᓂ. ᐃᓕᓐᓂᐊᑎᖁᑎᑖᑦᓯᐊᓯᕋᑕᙱᑲᓗᐊᕐᓱᑎᒃ, ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᓂᖅ ᓲᓱᒋᔭᐅᑦᓯᐊᓚᐅᕐᓯᒪᕗᖅ ᑲᕙᒪᑐᖃᒃᑯᓄᑦ ᐃᓕᓐᓂᐊᑎᑦᓯᓂᕐᒥᒍᑦ ᑎᒥᖁᑎᒥᒍᓪᓗ. ᓱᕐᕋᑕᐅᓂᖃᕐᓱᑎᒃ ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᓂᐅᔪᒧᑦ ᑲᕙᒪᑐᖃᒃᑯᑦ ᓄᐃᑎᑦᓯᓕᓚᐅᕐᓯᒪᒋᕗᑦ ᕿᑐᕐᖓᓕᐅᔪᓂᒃ ᑲᑎᙵᔨᖃᕐᓂᒥᒃ ᐊᒻᒪᓗ ᐃᓄᑦᑎᑐᑦ ᐃᓕᓐᓂᐊᑎᑦᓯᓂᕐᒥᒃ.

ᐃᓄᐃᑦ ᓇᒻᒥᓂᖅ ᐊᐅᓚᑦᓯᒍᒪᓂᖓ ᓄᐃᒋᐊᙵᓕᓚᐅᕐᑐᕕᓂᐅᕗᖅ ᑯᐯᒃᑯᑦ ᑲᕙᒪᖓᑦ ᐅᖄᒍᑎᖃᖃᑦᑕᓯᑐᐊᕐᒪᑦ ᑰᓐᓂᐊᓂᕐᒥᒃ ᐃᑯᒪᓕᐅᕈᑎᑦᓴᒥᓂᒃ 1971-ᖑᑎᓪᓗᒍ ᐃᓄᓐᓂᒃ ᑯᔩᓂᓪᓗ ᐊᓪᓚᓂᒃ ᖃᐅᔨᒋᐊᕐᕕᖃᓚᐅᕋᑎᒃ ᓱᕐᕋᑕᐅᓂᖃᕐᓂᐊᑐᓂᒃ ᑲᔪᓯᒐᓱᐊᓯᓚᐅᕐᑐᕕᓂᐅᒻᒪᑕ. ᑌᑦᓱᒪᓂ ᑕᒪᓐᓇ ᐱᓇᓱᐊᕐᑕᐅᐸᓪᓕᐊᓯᑎᓪᓗᒍ ᐃᓄᐃᑦ ᑲᑐᑦᔨᖃᑎᒌᓐᓂᖓ ᑯᐯᑉ ᑕᕐᕋᖓᓂ ᓄᐃᑎᑕᐅᓕᓚᐅᕐᓂᑯᖅ ᐃᓄᓐᓄᑦ ᓂᐱᖃᕈᑎᐅᓂᐊᓕᕐᓱᓂ. ᐃᓄᐃᑦ ᓄᓇᒥᓂ ᐊᐅᓚᑦᓯᓂᐊᕈᑎᒃ ᐃᓕᓐᓂᐊᓂᕐᒥᒃ ᑎᒍᓯᒋᐊᖃᓚᐅᕐᓯᒪᕗᑦ.

ᐃᓱᐊᓄᑦ ᑎᑭᑦᓱᒍ ᑯᐯᑉ ᑕᕐᕋᖓᓂ ᐃᓕᓐᓂᐊᓂᓕᕆᓂᖅ ᐃᓇᖏᕐᑕᐅᓕᕐᓂᑯᖅ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ.


ᔨᐃᒥᓯ ᐯᑉ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒋᓐᓂᖓ

ᔦᒥᓯ ᐯᑉ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑎᓕᐅᕐᑕᐅᓚᐅᕐᓯᒪᕗᖅ ᓅᕕᒻᐱᕆ 11, 1975-ᖑᑎᓪᓗᒍ. ᑖᓐᓇ ᐊᖏᖃᑎᒌᓐᓂᐅᔪᖅ ᐊᖏᖃᑎᒌᒍᑎᐅᓚᐅᕐᓯᒪᔪᑦ ᐃᓄᐃᑦ ᓄᓇᒥᓂᒃ ᓴᒃᑯᓯᑎᓪᓗᒋᑦ ᑯᐯᑉ ᑕᕐᕋᖓᓂ, ᒪᑭᑕᒐᓱᐊᕈᑎᐅᓂᐊᕐᑐ ᐃᓅᓯᕐᒥᓗ ᓯᕗᒧᐊᑉᐸᓕᐊᒍᑎᐅᓚᖓᔪᑦ ᐃᓄᓐᓄᑦ ᑕᐅᕐᓯᐅᑎᐅᑎᓪᓗᒋᑦ. ᑌᒣᒐᓗᐊᕐᑎᓗᒍ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑎᑕᐅᓚᐅᕐᓯᒪᔪᖅ ᑯᐯᒻᒥ ᐃᓕᓐᓂᐊᓂᐅᑉ ᒪᓕᒐᖓᑕ ᐊᑖᓃᓚᖓᑦᓱᓂ, ᑯᐯᑉ ᑕᕐᕋᖓᓂ ᓄᓇᓕᓐᓂᒃ ᐱᒍᑦᔨᓂᐊᕐᑎᓗᒍ, 55 ᐃᑳᖓᔫᑉ ᖁᓛᓂᒥᐅᓂᒃ ᑕᕐᕋᒥ.


ᑲᑎᕕᒃ ᐃᓕᓐᓂᐊᓂᓕᕆᓂᖅ

ᓵᑉᑕ 17 ᔦᒥᓯ ᐯᑉ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓᓂ ᑲᑎᕕᒃ ᐃᓕᓐᓂᐊᓂᓕᕆᓂᕐᒥᒃ ᓄᐃᑎᑦᓯᒍᑎᐅᓚᐅᕐᓯᒪᕗᖅ, ᐃᓄᓐᓂᑐᐃᓐᓇᐅᖏᑦᑐᖅ ᐱᒍᑦᔨᓂᐊᕐᓱᓂ ᐃᓕᓐᓂᐊᑎᑦᓯᓂᕐᒥᒃ ᐊᐅᓚᑕᖃᕐᓂᐊᓕᕐᑎᓗᒍ ᓄᓇᕕᓕᒫᒥ ᓄᓇᕕᒻᒥᐅᓕᒫᑦ ᐃᓕᓐᓂᐊᕈᓐᓇᕕᖃᕐᓂᐊᓕᕐᑎᓗᒋᑦ, ᐅᓄᕐᓂᓭᑦ ᐃᓄᑐᐃᓐᓇᐅᑎᓪᓗᒋᑦ.

ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᑎᑦᓯᒍᑎᖏᑦ ᐱᒋᐊᕐᐸᓕᐊᓕᓚᐅᕐᓯᒪᕗᑦ ᑯᐯᑉ ᑕᕐᕋᖓᑕ ᐃᓕᓐᓂᐊᓂᓕᕆᓂᖓᑕ ᐱᒋᐊᕐᑎᑕᕕᓂᖏᓐᓂᒃ ᐃᓱᒪᑖᕐᕕᖃᕐᓱᑎᒃ. ᐃᓄᑦᑎᑐᑦ ᐅᖃᐅᓯᕐᒥᒃ ᐃᓕᓐᓂᐊᑎᑦᓯᓂᖅ ᐊᕐᕌᒍᓂᒃ ᐱᖓᓱᓂᒃ ᓯᕗᓪᓕᐹᓂᒃ ᐱᐊᕋᐅᑉ ᐃᓕᓐᓂᐊᓂᖓᓂ ᐊᑑᑎᔭᐅᖃᑦᑕᓂᐊᓕᕐᑎᓗᒍ ᑭᖑᓂᖓᒍᑦ ᖃᓪᓗᓈᑎᑐᑦ ᒍᐃᒍᐃᑎᑐᓪᓗᓃᑦ ᐃᓕᓐᓂᐊᑎᑕᐅᖃᑦᑕᕈᓐᓇᓯᓗᑎᒃ. ᐃᓗᖅᑯᓯᕐᒥᒃ ᐃᓕᓐᓂᐊᑎᑦᓯᓂᖅ ᐅᑉᐱᓂᕐᒥᓗ ᐃᓕᓐᓂᐊᑎᑦᓯᒍᑎᐅᓂᐊᕐᑎᓗᒍ ᐃᓄᓐᓄᑦ. ᐃᓗᖅᑯᓯᕐᒥᒃ ᐃᓕᓐᓂᐊᑎᑦᓯᓃᑦ ᒪᙯᑦᑎᓯᓃᓪᓗ ᐃᓕᓐᓂᐊᑎᑦᓯᒍᑎᐅᓂᐊᕐᑎᓗᒋᑦ. ᐃᓕᓐᓂᐊᑎᑦᓯᔩᓪᓗ ᐃᓕᓐᓂᐊᑎᑕᐅᓂᖓᑦ ᑲᔪᓯᑎᑕᐅᓂᐊᕐᑎᓗᒍ ᐊᒻᒪᓗ ᐃᓕᓴᕐᓂᓕᕆᔩᑦ (ᐊᔪᖀᒋᐊᕐᑎᐅᔪᑦ ᑭᑐᕐᖓᓖᓐᓇᕙᓪᓘᓱᑎᒃ) ᓄᓇᓕᒻᒥ ᓂᕈᐊᕐᑕᐅᓂᐊᕐᑎᓗᒋᑦ. ᐊᑐᓂᓪᓗ ᓄᓇᓖᑦ ᓂᕈᐊᕐᓂᐊᓗᑎᒃ ᑲᒥᓴᓇᑦᓴᒥᓂᒃ. ᐃᓕᓐᓂᐊᑎᑦᓯᒍᑎᐅᔪᓪᓗ ᑯᐯᒻᒥ ᐃᓕᓐᓂᐊᑎᑦᓯᒍᑎᐅᔪᓂᒃ ᖃᓪᓗᓈᑎᑐᑦ ᒍᐃᒍᐃᑎᑐᓪᓗᓃᑦ ᒪᓕᓐᓂᐊᑎᓪᓗᒋᑦ.


ᐃᓇᖐᓂᖅ

ᓯᕗᓪᓕᐹᒥ ᑲᒥᓴᓀᑦ ᑲᑎᙵᒋᐊᙵᓚᐅᕐᓯᒪᕗᑦ ᓯᑦᑎᒻᐱᕆ 1976-ᖑᑎᓪᓗᒍ, ᑭᖑᓂᖓᒍᑦ ᐊᐅᓚᑦᓯᓂᓕᕆᓂᕐᒥ ᐱᓇᓱᐊᕐᓂᐊᑐᑦ ᐱᓇᓱᑦᑎᑖᕆᔭᐅᑎᓪᓗᒋᑦ ᐅᐱᕐᖓᓴᐅᓕᕐᑎᓗᒍ 1977-ᒥ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᑎᒍᓯᓪᓚᕆᓕᓚᐅᕐᓯᒪᕗᖅ ᐃᓕᓐᓂᐊᑎᓂᒃ, ᐃᓕᓐᓂᐊᑎᑦᓯᔨᓂᒃ ᐃᓕᓐᓂᐊᑎᑦᓯᕕᐅᔪᓂᓪᓗ ᑲᕙᒪᑐᖃᒃᑯᓂᑦ ᑯᐯᓪᓗ ᑲᕙᒪᒃᑯᖏᓐᓂᑦ ᔪᓓᒥ 1978-ᖑᑎᓪᓗᒍ.


ᑎᓕᔭᐅᒪᐅᑎ

ᐃᓕᓐᓂᐊᑎᑦᓯᓂᖅ ᐃᓕᓐᓂᐊᕆᐅᕐᓴᔪᓂᒃ, ᐳᒃᑭᓂᕐᓴᒥ ᐃᓕᓐᓂᐊᑐᓂᒃ ᐳᕐᑐᓂᕐᓴᒥᓗ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂ

ᐃᓕᓐᓂᐊᕈᑎᑦᓴᓕᐅᕐᓂᖅ ᐃᓕᓐᓂᐊᑎᑦᓯᒍᑎᑦᓴᓂᓪᓗ ᓄᐃᑎᑦᓯᓂᖅ ᐃᓄᑦᑎᑑᕐᑐᓂᒃ, ᖃᓪᓗᓈᑎᑐᑦ ᒍᐃᒍᐃᑎᑐᓪᓗ

ᐃᓄᐃᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᔭᐅᓂᐊᕐᑎᓗᒋᑦ ᑯᐯᑉ ᑲᕙᒪᖓᓐᓂᑦ ᐃᓕᑕᕆᔭᐅᓂᕐᑖᕈᓐᓇᓯᓗᑎᒃ

ᐃᓕᓐᓂᐊᕈᑎᑦᓴᓕᐅᕐᓂᐊᓗᓂ ᐃᓄᐃᑦ ᐃᓗᖅᑯᓯᖓᓂᒃ ᐅᖃᐅᓯᖓᓐᓂᒃ ᐱᐅᓯᑐᖃᖏᓐᓂᓗ ᑐᙵᕕᖃᕐᑐᒥᒃ ᐊᑐᐃᓐᓇᕈᕐᑎᕆᓂᐊᕐᓗᓂᓗ ᐃᓕᓐᓂᐊᑎᓂᒃ ᐅᓪᓗᒥᐅᔪᖅ ᐃᓅᓯᐅᓕᕐᑐᒧᑦ ᐃᓚᐅᒍᓐᓇᓯᐊᖁᓪᓗᒋᑦ

ᑫᓪᓚᑐᐃᓂᐊᕐᓗᓂ ᐊᑐᐃᓐᓇᐅᑎᑦᓯᓂᐊᕐᓗᓂ ᑲᒪᒋᔭᖃᕐᓂᐊᓗᓂᓗ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥᒃ

ᐃᓕᓐᓂᐊᓂᓕᕆᓂᐅᑉ ᐱᓇᓱᑦᑎᖏᓐᓂᒃ ᐃᓕᓐᓂᐊᑎᑦᓯᓂᐊᕐᓗᓂ ᐊᐅᓚᑦᓯᓂᓕᕆᓂᕐᒥᒃ ᐱᓇᓱᒐᕐᒥᓃᒋᕐᑐᓂᓪᓗ ᐃᓕᓐᓂᐊᑎᑦᓯᓂᕐᒥᒃ

ᐃᓄᒻᒪᕇᓪᓗ ᐊᑐᐃᓐᓇᖃᕐᕕᐅᓂᐊᕐᑎᓗᒋᑦ ᐃᓕᓐᓂᐊᑕᒥᓂᒃ ᐱᔭᕇᕈᒪᒍᑎᒃ ᐱᓇᓱᒐᕐᒥᓗᓐᓃᑦ ᐃᓕᓐᓂᐊᕈᒪᒍᑎᒃ

ᐅᓪᓗᒥᐅᔪᖅ ᓄᓇᕕᒻᒥ ᓯᕗᓂᕐᒥᓗ ᐃᓕᓐᓂᐊᓂᒃᑯᑦ ᑭᖒᒪᒋᔭᐅᓂᐊᕐᑐᓂᒃ ᐊᑐᐃᓐᓇᖃᕐᑎᓯᓗᓂ.

(ᑐᑭᓯᓇᕐᑎᑕᐅᒍᑎᖏᑦ ᐃᓄᐃᑦ ᐃᓕᓐᓂᐊᓂᓕᕆᓂᖓᑦᑕ 1912-ᒥ - 1991-ᒧᑦ ᑎᑭᑦᑎᓗᒋᑦ ᐱᔭᐅᓯᒪᔪᓂᑦ ᐊᑐᐊᒐᓕᐊᖑᓯᒪᔪᓂ ᐊᓪᓚᑕᐅᓯᒪᔪᑦ ᒪᓕᑦᓱᒋᑦ Brian Callagghan-ᒧᑦ 1992-ᖑᑎᓪᓗᒍ ᑕᒡᒐᓂ ᐊᓪᓚᓯᒪᔪᒥ ᐊᑐᕐᑕᐅᔪᑦ.)