ᑲᑎᕕᒃ ᐃᓕᓐᓂᐊᓂᓕᕆᓂᕐᒨᓕᖓᔪᑦ

ᑲᑎᕕᒃ ᐃᓕᓐᓂᐊᓂᓕᕆᓂᖅ 1978-ᒥᓂᑦ ᐱᓇᓱᐊᕐᐸᑲᒥ ᐅᓪᓗᒥᒧᑦ ᑎᑭᐅᑎᒍᓐᓇᓯᓯᒪᕗᖅ ᐃᓕᓐᓂᐊᑎᑕᐅᒍᓐᓇᖃᑦᑕᓚᐅᕐᓯᒪᑎᓪᓗᒋᑦ ᐳᒃᑭᓂᕐᓴᒥ ᑭᓯᐊᓂ ᐃᓕᓐᓂᐊᕕᖃᕐᓱᑎᒃ ᒥᑭᔪᓂᒃ ᓂᓐᓂᐅᕋᓚᐅᑎᑦᓱᑎᒃ. ᐅᓪᓗᒥᐅᓕᕐᑐᖅ, ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᕐᓴᒧᑦ ᑕᓪᓕᒪᒧᑦ ᑎᑭᐅᑎᔪᓂᒃ ᓄᓇᓕᓕᒫᓂ ᐃᓕᓐᓂᐊᕕᖃᕐᐸᓕᕐᑐᖅ, ᐃᓕᓐᓂᐊᓂᓕᕆᓂᕐᒥᓗ ᐃᓕᓐᓂᐊᕈᑎᑦᓴᓕᐅᕐᓂᖅ ᐱᓇᓱᐊᕐᑕᐅᓂᖓᓄᑦ ᐃᓚᐅᔪᒻᒪᕆᐅᑦᓱᓂ ᐅᖃᐅᓯᕐᓂᒃ ᐱᖓᓱᓂᒃ ᐊᑐᕐᓱᑎᒃ ᐃᓕᓐᓂᐊᕈᑎᑦᓴᓕᐅᕐᐸᑐᑦ. ᐃᓕᓐᓂᐊᑏᑦ ᐃᓕᓐᓂᐊᕈᓐᓇᕕᖃᕐᑎᑕᐅᓲᖑᕗᑦ ᖃᓪᓗᓈᑎᑦᑐᑦ ᒍᐃᒍᐃᑎᑐᓪᓗᓃᑦ ᐃᓄᐃᓪᓗ ᐃᓗᕐᖁᓯᖓᓂᒃ ᐅᖃᐅᓯᖓᓂᓪᓗ (ᐃᓄᒃᑎᑐᑦ) ᐃᓕᓐᓂᐊᓂᓕᒫᒥᓂ ᐃᓕᓐᓂᐊᑎᑕᐅᒍᓐᓇᓲᖑᑦᓱᑎᒃ. ᐃᓕᓐᓂᐊᕕᖁᑎᕗᑦ ᐃᓕᓐᓂᐊᕕᑦᓯᐊᒪᕆᐊᓘᕗᑦ ᐅᓪᓗᒥ ᐊᑑᑎᔪᓄᑦ ᐃᓚᐅᖃᑎᐅᑦᓯᐊᓱᑎᒃ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐃᓕᓐᓂᐊᑎᖁᑎᒥᓂᒃ ᐃᓕᓐᓂᐊᑎᑦᓯᓂᖃᖃᑦᑕᐳᑦ ᐱᒍᓐᓇᓂᓕᒫᖏᓐᓄᑦ ᐱᒋᐅᕐᑎᒐᓱᐊᕐᓱᒋᑦ ᐊᒻᒪᓗ ᓄᓇᓕᐅᑉ ᑭᖕᖒᒪᒋᔭᖏᑦ ᐃᓕᓐᓂᐊᑎᑦᓯᒍᑕᐅᑎᑦᓱᒋᑦ. ᐊᒥᓱᑦ ᐃᓕᓐᓂᐊᑏᑦ ᐃᓕᓐᓂᐊᓂᕐᒥᓂᒃ ᑲᔪᓯᓲᖑᕗᑦ ᐃᓕᓐᓂᐊᕈᓐᓇᓯᒐᓱᐊᕐᓱᑎᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ. ᐃᓕᓐᓂᐊᓂᕐᒥᓂᓪᓗ ᓄᕐᙯᔭᕐᓂᐅᔭᔪᑦ ᐃᓕᓐᓂᐊᑎᑕᐅᓂᖃᓲᖑᒋᕗᑦ ᐃᓕᓐᓂᐊᑎᑦᓯᒍᑏᑦ ᐊᓯᐊᒎᕐᑐᓂᒃ

ᐃᓕᓐᓂᐊᑏᑦ ᐃᓕᑦᓯᒍᓐᓇᑕᕐᒥᑎᒍᑦ ᐃᓕᓐᓂᐊᑎᑕᐅᔪᑦ ᐊᑑᑎᔭᐅᓲᖑᒋᕗᑦ ᐃᓕᓐᓂᐊᑎᓄᑦ ᐃᓕᓐᓂᐊᑎᑕᐅᒍᑎᓂᒃ ᐊᓪᓚᓯᒪᔪᓂᒃ ᐊᑑᑎᑦᓯᐊᕈᓐᓇᖏᑦᑐᓄᑦ. ᑖᒃᑯᐊ ᐃᓕᓐᓂᐊᑎᑦᓯᒍᑎᐅᔪᑦ ᑐᕌᕐᑕᖃᓲᖑᕗᑦ ᐃᓅᓯᕐᒥᓂ ᐆᒪᒐᓱᐊᕈᑎᒋᒍᓐᓇᓂᐊᕐᑕᖏᓐᓂᒃ ᐱᓇᓱᒐᕐᒥᓗ ᐃᓕᓐᓂᐊᑎᑕᐅᑦᓱᑎᒃ, ᓇᒻᒥᓂᖅ ᒪᑭᑕᒐᓱᐊᕐᕕᓴᐅᔪᓂᒃ ᓄᐃᑎᑦᓯᓱᑎᒃ ᐱᓇᓱᒐᕐᓄᓗ ᐃᓂᑖᕐᑎᑕᐅᓲᖑᑦᓱᑎᒃ ᐱᓇᓱᒋᐅᕐᓴᑎᑕᐅᑦᓱᑎᒃ. ᑖᒃᑯᐊ ᐃᓕᓐᓂᐊᑏᑦ ᓄᓇᓕᒻᒥᓂ ᒪᑭᑕᒐᓱᐊᕈᑎᒋᓂᐊᕐᑕᒥᓂᒃ ᓄᐃᑎᑦᓯᖃᑦᑕᓯᒪᔪᑦ ᐃᓕᑕᕆᔭᐅᓂᕐᑖᖃᑦᑕᓱᑎᒃ ᓄᓇᓕᓕᒫᓂ ᐊᒻᒪᓗ ᓄᓇᖁᑎᓕᒫᑦᑎᓂ ᐃᓕᑕᕆᔭᐅᓂᕐᑖᑎᑕᐅᖃᑦᑕᓱᑎᒃ ᐃᓕᓐᓂᐊᕕᒃᑯᑦ ᒪᑭᑕᒐᓱᐊᕐᓂᒥᓂᒃ ᓵᓚᖃᐅᑎᑖᖃᑎᐅᖃᑦᑕᓯᒪᓕᕐᑐᑦ.

ᐃᓕᓐᓂᐊᑏᓪᓗ ᐃᓗᓯᕐᓘᑎᖃᕐᑐᑦ ᐃᒻᒥᒎᕐᑎᑕᐅᓲᖑᒍᓐᓀᕆᕗᑦ ᓴᐳᒻᒥᔭᐅᖔᓲᒍᓕᕐᑐᑦ ᓄᓇᓕᒻᒥᓂ ᐃᓕᓐᓂᐊᕈᓐᓇᕕᖃᕐᑎᑕᐅᑦᓱᑎᒃ ᐱᓪᓗᑯᒋᐊᓕᑎᒍᑦ ᐃᓕᓐᓂᐊᑎᑦᓯᒍᑎᑎᒍᑦ ᐃᓕᓐᓂᐊᑎᑕᐅᓂᖃᕐᓱᑎᒃ. ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᖅ ᑲᔪᓯᑎᑕᐅᒍᓐᓇᓲᖑᒋᕗᖅ ᐊᐅᓚᑕᐅᑦᓱᓂ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑐᑦ ᐃᓕᓐᓂᐊᑏᑦ ᐱᒍᑦᔭᐅᕕᖓᓐᓄᑦ, ᐃᓕᓐᓂᐊᓂᖃᖃᑦᑕᓱᑎᒃ ᐳᕐᑐᓂᕐᓴᒋᐊᓪᓚᓂ ᐃᓕᓐᓂᐊᕕᓐᓂ ᐃᓕᓐᓂᐊᕕᕐᔪᐊᓂᓪᓗ. ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖃᓲᖑᒋᕗᑦ ᐃᓕᓐᓂᐊᑕᒥᓂᒃ ᐱᔭᕇᕈᒪᔪᑦ ᐱᓇᓱᒐᕐᓂᓗᓐᓃᑦ ᐃᓕᓐᓂᐊᕈᒪᔪᑦ ᓄᓇᕕᒻᒥ. ᐃᓕᓐᓂᐊᑎᑦᓯᔨᖁᑎᕗᑦ ᐃᓕᓐᓂᐊᑎᑕᐅᓂᖃᓲᖑᒋᕗᑦ ᑲᕙᒪᒃᑯᓂ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᐱᒍᓐᓇᐅᑎᑖᕋᓱᐊᕐᓱᑎᒃ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑎᑕᐅᓯᒪᕗᖅ ᔦᒥᓯ ᐯᑉ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ 1975-ᖑᑎᓪᓗᒍ ᓄᓇᓕᓐᓂᒃ ᖁᓕᓪᓗ ᓯᑕᒪᓪᓗᓂᒃ ᐱᒍᑦᔨᓂᐊᕐᑎᓗᒍ ᓄᓇᕕᒻᒥ, ᐃᓄᓐᓂᓗ ᐃᓕᓐᓂᐊᓂᕐᒥᒃ ᐊᐅᓚᑦᓯᒍᓐᓇᓯᑎᑦᓯᓂᐊᕐᑎᓗᒍ. 1978-ᖑᑎᓪᓗᒍ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᓄᑦᑎᑕᐅᓚᐅᕐᓯᒪᕗᑦ ᐃᓕᓐᓂᐊᑏᑦ, ᐱᓇᓱᑦᑏᑦ ᐃᓪᓗᖁᑏᓪᓗ ᐊᐅᓚᑕᐅᖃᑦᑕᓚᐅᕐᑐᕕᓂᐅᑦᓱᑎᒃ ᑲᕙᒪᑐᖃᒃᑯᓄᑦ ᑯᐯᓪᓗ ᐃᓕᓐᓂᐊᑎᑦᓯᒍᑎᖏᑦ ᐊᑐᕐᑕᐅᑎᑕᐅᓯᑦᓱᑎᒃ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᐅᓚᑕᐅᓂᖃᕐᐳᖅ ᑯᐯᒃᑯᑦ ᑲᕙᒪᖓᑕ ᒪᓕᒐᖏᓐᓄᑦ ᑌᔭᐅᓂᖃᕐᑐᓄᑦ "ᐃᓕᓐᓂᐊᓂᐅᑉ ᒪᓕᒐᖓ ᐊᓪᓚᓅᓕᖓᔪᖅ ᑯᔩᓄᑦ, ᐃᓄᑐᐃᓐᓇᓄᑦ ᐊᒻᒪᓗ ᓇᔅᑳᐱᓄᑦ ᓄᓇᓕᑐᖃᑦᓴᔭᕐᓄᑦ". ᐊᐅᓚᑕᖃᕐᓱᓂ ᓄᓇᕕᒻᒥ ᐃᓕᓐᓂᐊᕆᐅᕐᓴᔪᓂᒃ, ᐳᒃᑭᓂᕐᓴᒥ ᐃᓕᓐᓂᐊᑐᓂᒃ, ᐳᕐᑐᓂᕐᓴᒥ ᐃᓕᓐᓂᐊᑐᓂᒃ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂ ᐃᓕᓐᓂᐊᑐᓂᒃ, ᑲᒪᒋᔭᖃᕆᐊᓪᓚᒥᑦᓱᓂᓗ ᐃᓕᓐᓂᐊᕈᑎᑦᓴᓕᐅᕐᓂᒥᒃ ᐃᓕᓐᓂᐊᑎᑦᓯᒍᑎᑦᓴᓕᐅᕐᓂᒥᓪᓗ ᐃᓄᑦᑎᑑᕐᑐᓂᒃ, ᖃᓪᓗᓈᑎᑐᑦ ᒍᐃᒍᐃᑎᑐᓪᓗ; ᐃᓄᓐᓂᓗ ᐃᓕᓐᓂᐊᑎᑦᓯᔨᓂᒃ ᐃᓕᓐᓂᐊᑎᑦᓯᓂᕐᒥᒃ ᑲᒪᒋᔭᖃᕐᒥᓱᓂ ᑯᐯᑉ ᑲᕙᒪᖓᑕ ᐱᖁᔭᖏᑎᒍᑦ ᐱᒍᓐᓇᓯᑎᒐᓱᐊᕐᓱᒋᑦ; ᑫᓪᓚᑐᐃᔨᐅᑦᓱᓂᓗ, ᐊᑐᐃᓐᓇᕈᕐᑎᕆᔨᐅᑦᓱᓂ ᑲᒪᒋᔭᖃᕐᓱᓂᓗ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑎᑦᓯᓂᕐᒥᒃ.

ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᑎᑦᓯᒍᑎᓕᐊᖏᑦ ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓᑕ ᑯᐯᒻᒥ ᐋᕐᕿᓯᒪᔭᖏᓐᓂᒃ ᒪᓕᒐᐅᓂᐊᕐᑎᓗᒍ ᒪᓕᒋᐊᖃᕐᐳᑦ. ᑌᒣᒐᓗᐊᕐᑎᓗᒍ, ᐃᓗᓕᖏᑦ ᐅᖃᐅᓯᖓᑕᓗ ᐳᕐᑐᓂᖏᑦ ᐋᕐᕿᑕᐅᓯᒪᓲᖑᕗᑦ ᐃᓄᑐᐃᓐᓇᓅᓕᖓᑦᓱᑎᒃ ᐅᖃᐅᓯᐅᑉ ᐁᑉᐱᐅᑎᖓᓂᒃ ᐃᓕᓐᓂᐊᑐᓄᑦ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᓇᓱᐊᕈᑎᒋᓂᐊᕐᑕᒥᓂᒃ ᑮᓇᐅᔭᖃᕐᑎᑕᐅᓲᖑᕗᖅ ᑕᒣᓐᓄᑦ ᑲᕙᒫᓐᓄᑦ, ᑯᐯᑉ ᑲᕙᒪᒃᑯᖏᓐᓂᑦ (75%) ᑲᕙᒪᑐᖃᒃᑯᓂᓪᓗ (25%), ᑖᒃᑯᐊ ᑮᓇᐅᔭᕐᑖᕆᖃᑦᑕᑕᖏᑦ ᐊᕐᖁᑎᓖᓐᓇᐅᑎᓪᓗᒋᑦ ᑯᐯᑉ ᑲᕙᒪᒃᑯᖏᓐᓂᒃ ᐊᐅᓚᑕᐅᓂᖃᕐᓱᑎᒃ ᐃᓕᓐᓂᐊᓂᓕᕆᓂᕐᒧᑦ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᓂᕐᑎᕆᔪᓕᒫᓂᒃ ᐱᒍᑦᔨᓱᓂ ᐃᓕᓐᓂᐊᕕᖁᑎᖃᕐᐳᖅ ᐊᑕᐅᓯᕐᒥᒃ ᐊᑐᓂᑦ ᖁᓕᓪᓗ ᓯᑕᒪᓪᓗᓂᑦ ᓄᓇᓕᓐᓂ. ᐃᓕᓐᓂᐊᕕᖏᑦᑕ ᐊᖏᓂᖏᑦ ᐊᑦᔨᒌᖕᖏᑐᑦ ᐃᓚᖏᑦ ᐃᓕᓐᓂᐊᑎᖁᖃᕐᑐᑦ 55-ᓂᑦ ᑎᑭᐅᑎᑦᓱᑎᓪᓗ 500-ᒧᑦ. ᐳᕐᑐᓂᕆᔭᐅᔪᑦ ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᕐᐹᒧᑦ ᑕᓪᓕᒪᒧᑦ ᑎᑭᐅᑎᑦᓱᑎᒃ (ᐃᓚᒋᔭᐅᑎᓪᓗᒍ ᐱᓇᓱᒐᕐᓂᒃ ᐱᒋᐅᕐᓴᑎᑦᓯᓂᖅ) ᓄᓇᓕᓕᒫᓂ ᐃᓕᓐᓂᐊᑎᑦᓯᒍᑎᐅᓲᖑᕗᑦ. ᐃᓕᓐᓂᐊᕆᐅᕐᓴᑎᑦᓯᓂᖅ ᓄᓇᕕᒻᒥ ᓄᐃᑎᑕᐅᓛᕋᓗᐊᕐᓱᓂ ᐱᒋᐊᕐᑎᑕᐅᓯᒪᕋᑕᖕᖏᒥᔪᖅ.

ᐃᓕᓐᓂᐊᕖᑦ ᐊᖏᓂᖏᑦ ᒪᓕᑦᓱᒋᑦ, ᐃᓕᓐᓂᐊᑏᓪᓗ ᐊᒥᓱᐊᓘᓪᓗᐊᖏᓐᓂᖏᓐᓄᑦ ᐅᖃᐅᓯᕐᓂᓗ ᐱᖓᓱᓂᒃ ᐃᓕᓐᓂᐊᑎᑦᓯᒋᐊᖃᓲᖑᓂᑯᒥᓄᑦ, ᐊᒥᓲᓂᕐᓭ ᐃᓕᓐᓂᐊᑎᑦᓯᕖᑦ ᐳᕐᑐᓂᖃᑎᒌᖕᖏᑐᓄᑦ ᐃᓕᓐᓂᐊᑎᑕᐅᕕᐅᓲᖑᕗᑦ, ᐃᓚᖏᑦ ᒪᕐᕉᓂᒃ ᐱᖓᓱᓂᓪᓗᓃᑦ ᐳᕐᑐᓂᖃᑎᒌᑦᑐᓂᒃ ᐃᓕᓐᓂᐊᑎᖁᑎᖃᖃᑦᑕᑎᓪᓗᒋᑦ.

ᐃᓕᓐᓂᐊᑎᑦᓯᔨᐅᒍᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᕕᑐᐃᓐᓇᓂ ᐃᓄᒻᒪᕇᓪᓗ ᐃᓕᓐᓂᐊᑎᑕᐅᕕᖏᓐᓂ ᑯᐯᒻᒥ ᑲᓇᑕᒥᓪᓗ ᐃᓕᓐᓂᐊᑎᑦᓯᒍᓐᓇᐅᑎᑖᕐᓯᒪᒋᐊᖃᕐᐳᑦ. ᐱᒋᐅᕐᓴᑎᑦᓯᓂᕐᒥᓗ ᐃᓕᓐᓂᐊᑎᑦᓯᔨᐅᓚᖓᔪᑦ ᓇᓗᓀᕐᑕᐅᒍᑎᑖᕐᓯᒪᒋᐊᖃᕐᓱᑎᒃ ᐱᒋᐅᕐᓴᑎᑦᓯᓂᕐᒥᒃ ᐃᓕᓐᓂᐊᑎᑦᓯᒍᑎᒋᓂᐊᕐᑕᒥᓂᒃ, ᐋᕐᕿᒋᐊᕐᑕᐅᒍᓐᓇᕕᖃᕋᓗᐊᕐᑎᓗᒍ ᐱᓇᓱᐊᕐᓂᕆᖃᑦᑕᓯᒪᔭᖏᓐᓄᑦ ᐱᓇᓱᒐᕐᒧᑦ ᐱᑐᑦᓯᒪᓂᖃᕐᑐᓂ.

ᐅᖃᐅᓰᑦ ᐃᓕᓐᓂᐊᑎᑦᓯᒍᑏᑦ ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᓕᓐᓄᑦ ᒪᕐᕉᓄᑦ ᑎᑭᑦᑐᓂ ᐃᓕᓐᓂᐊᑎᑦᓯᓂᖃᓲᖑᕗᑦ ᐃᓄᑦᑎᑐᐃᓐᓇᖅ ᐅᓄᕐᓂᓭᑦ ᐊᓈᓇᖓᑕ ᐅᖃᐅᓯᕐᖄᖓᓂᒃ ᐃᓕᓐᓂᐊᑎᑦᓯᒍᑎᖃᕐᓱᑎᒃ. ᐳᕐᑐᓂᕐᓴᒥ ᐱᖓᓱᓂ ᐱᒋᐊᕐᑎᓗᒍ, ᕿᑐᕐᖓᓕᐅᔪᑦ ᑐᑭᑖᕈᓐᓇᓲᖑᕗᑦ ᕿᑐᕐᖓᒥᓂᒃ ᐃᓕᓐᓂᐊᑎᑦᓯᒍᑎᒋᒍᒪᔭᒥᓂᒃ ᖃᓪᓗᓈᑎᑐᑦ ᒍᐃᒍᐃᑎᑐᓪᓗᓃᑦ. (ᐅᖃᐅᓯᐅᑉ ᐁᑉᐱᐅᑎᖓᓂᒃ ᐃᓕᓐᓂᐊᑎᑦᓯᓂᖅ ᓄᓇᓖᑦ ᐋᕐᕿᓯᒪᔭᖏᑎᒍᑦ ᐱᒋᐊᕐᑕᐅᓂᖓ ᐊᑦᔨᒌᖕᖏᑑᑐᐃᓐᓇᕆᐊᖃᕐᑐᖅ). ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐊᒥᓲᓂᕐᓭᑦ 1978-ᒥᓂᑦ ᒍᐃᒍᐃᑎᑐᑦ ᐃᓕᓐᓂᐊᑎᑕᐅᓂᖃᓲᖑᓕᕐᑐᑦ ᒪᓕᑦᓱᑎᒃ ᕿᑐᕐᖓᓕᐅᔪᑦ ᓇᓪᓕᑳᔭᕕᓂᖏᓐᓂᒃ. ᐅᓪᓗᒥᐅᓕᕐᑐᖅ ᒍᐃᒍᐃᑎᑐᑦ ᐃᓕᓐᓂᐊᑎᑕᐅᓚᖓᔪᑦ ᐊᒥᓱᒻᒪᕆᐊᓘᓂᕐᓴᐅᓲᖑᓕᕐᖁᖅ ᖃᓪᓗᓈᑎᑐᑦ ᐃᓕᓐᓂᐊᑎᑕᐅᔪᓂᒃ.

ᐃᓄᑦᑎᑐᑦ ᐅᖃᐅᓯᕐᒥᒃ ᐃᓗᕐᖁᓯᕐᒥᓗ ᐃᓕᓐᓂᐊᑎᑦᓯᓂᖅ ᑲᔪᓯᑎᓪᓗᒍ ᐃᓕᓐᓂᐊᑎᑦᓯᒍᑎᐅᓲᖑᕗᖅ ᐳᒃᑭᓂᕐᓴᒥᑦ ᐳᕐᑐᓂᕐᓴᒧᑦ. ᐃᙯᓕᓴᕐᓂᖅ ᐅᑉᐱᓂᕐᒥᓗ ᐃᓕᓐᓂᐊᑎᑕᐅᓂᖅ ᐃᓄᑦᑎᑑᕐᑎᓗᒋᑦ ᐃᓕᓐᓂᐊᑎᑦᓯᒍᑎᐅᓲᖑᒋᕗᑦ. ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᒋᐊᕐᑎᓯᓯᒪᓕᕐᒥᔪᖅ ᐱᓇᓱᐊᕋᓱᐊᕐᓂᒥᓂᒃ ᓇᓪᓕᖁᐊᕇᑦᓯᐊᒥᒃ ᐅᖃᐅᓯᕐᖄᖃᕐᓂᒥᒃ ᐃᓄᑦᑎᑐᑦ ᖃᓪᓗᓈᑎᑐᑦ ᒍᐃᒍᐃᑎᑐᓪᓗ ᐃᓄᑦᑎᑐᑦ ᐅᖃᐅᓯᖅ ᐊᑐᕐᑕᐅᓂᕐᐸᐅᓂᐊᕐᑎᓗᒍ ᐃᓘᓐᓇᖏᓐᓂ.

ᐅᖃᐅᓯᖃᕐᓂᖅ ᓇᓪᓕᖁᐊᕇᒥᒃ ᐊᑑᑎᔭᐅᒍᓐᓇᓯᒍᓐᓇᐳᖅ ᐃᓕᓐᓂᐊᑏᑦ ᐃᓄᑦᑎᑐᑦ ᐅᖃᕆᐅᑦᓯᐊᒪᕆᑉᐸᑕ ᑭᓯᐊᓂ ᐅᖃᐅᓯᐅᑉ ᐁᑉᐱᐅᑎᖓᓂᒃ ᐊᑑᑎᒋᐊᖕᖏᓂᕐᒥᓂ. ᖃᐅᔨᓴᕐᓂᐅᓯᒪᔪᑦ ᓯᓚᕐᔪᐊᒥ ᖃᐅᔨᒍᑎᐅᓯᒪᒻᒪᑕ ᐃᓕᓐᓂᐊᑎ ᐅᖃᐅᓯᕐᖄᒥᓂᒃ ᐃᓕᓐᓂᐊᑎᑕᐅᒍᑎᖃᑦᓯᐊᓯᒪᑐᐊᕋᒥ ᐃᓕᓐᓂᐊᑕᒥᓂᒃ ᐱᑦᓯᐊᕈᓐᓇᑐᒻᒪᕆᐊᓘᓂᖓᓂᒃ ᐅᖃᐅᓯᕐᖄᒥᒍᑦ ᐅᖃᐅᓯᐅᓪᓗ ᐁᑉᐱᐅᑎᖏᑎᒍᑦ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᐅᓚᑕᐅᓂᖃᕐᐳᖅ ᑲᒥᓴᓀᑦ ᑲᑎᖕᖓᔨᖏᓐᓄᑦ ᓂᕈᐊᕐᑕᐅᓂᖃᓲᓄᑦ ᓄᓇᓕᓐᓂ ᓂᕈᐊᕐᓯᑕᐅᓯᒪᓚᖓᑦᓱᑎᒃ ᐊᕐᕌᒍᓂᒃ ᐱᖓᓱᓂᒃ. ᐳᕐᑐᓂᕐᓭᑦ ᑲᑎᖕᖓᔨᖏᑦ ᑲᒥᓴᓇᓄᑦ ᓂᕈᐊᕐᑕᐅᓯᒪᑦᓱᑎᒃ ᑲᑎᖕᖓᔨᐅᓲᖑᒋᕗᑦ ᑲᒪᒋᔭᖃᕐᓱᑎᒃ ᐃᓕᓐᓂᐊᓂᓕᕆᓂᕐᒥ ᐊᐅᓚᑕᐅᔪᓂᒃ. ᐊᐅᓚᑦᓯᓂᓕᕆᓂᑎᒍᑦ ᐃᓕᓐᓂᐊᓂᓕᕆᓂᐅᑉ ᐱᓇᓱᑦᑎᖏᑦ ᐱᓇᓱᐊᕐᓂᖃᓲᖑᕗᑦ ᑲᒪᒋᔨᖃᕐᓱᑎᒃ ᑲᔪᓯᒃᑫᔨᒥᒃ, ᐊᐅᓚᑦᓯᓂᓕᕆᔨᒻᒪᕆᐅᔪᒥᒃ ᓯᕗᒃᑲᑕᕐᑎᐅᓱᓂ. ᓄᓇᓕᓐᓂ ᐊᐅᓚᑦᓯᓂᓕᕆᔩᑦ ᑌᔭᐅᓂᖃᕐᑐᑦ ᑲᒪᔨᒻᒪᕆᓐᓂᒃ ᖃᐅᑕᒫᕐᓯᐅᑎᓂᒃ ᐱᓇᓱᐊᓲᖑᕗᑦ ᐊᕐᖁᑎᒋᔭᐅᑦᓱᑎᒃ ᐃᓕᓐᓂᐊᕕᒻᒧᑦ ᐊᒻᒪᓗ ᐃᓕᓐᓂᐊᓂᓕᕆᓂᐅᑉ ᐊᓪᓚᕕᒻᒪᕆᖓᓂ ᐱᓇᓱᐊᕐᑐᓄᑦ. ᓄᓇᓕᓐᓂ ᓂᕈᐊᕐᑕᐅᓯᒪᓲᖑᒻᒥᔪᑦ ᐃᓕᓴᕐᓂᓕᕆᔩᑦ ᕿᑐᕐᖓᓕᐅᔪᓂᑦ ᐱᓯᒪᑦᓱᑎᒃ ᐊᔪᖀᒋᐊᕐᑎᒋᔭᐅᑦᓱᑎᒃ ᑲᒥᓴᓀᑦ ᑲᑎᖕᖓᔨᖏᓐᓄᑦ, ᐊᓯᖏᑎᒍᓪᓗ ᓄᓇᓕᒻᒥᓂ ᐊᐅᓚᑕᖃᕐᒥᓱᑎᒃ.

ᐊᒥᓱᐃᓂᒃ ᐱᓇᓱᐊᕆᐊᖃᕐᓂᕆᓲᖓ ᐃᓕᓴᕐᓂᓕᕆᔩᑦ ᑲᒥᓴᓀᓪᓗ ᑲᑎᖕᖓᔨᖏᑦᑕ ᓄᐃᑎᑦᓯᓯᒪᒋᕗᖅ ᑲᔪᓯᔪᒥᒃ ᐃᑉᐱᒋᔭᖃᕐᓂᒥᒃ ᐃᓕᓐᓂᐊᓂᕐᒨᓕᖓᔪᓕᒫᓂᒃ.
ᐱᓇᓱᐊᖃᑎᖃᕐᓱᓂ ᕿᑐᕐᖓᓕᐅᔪᓂᒃ, ᓄᓇᓕᓐᓂᒃ ᐊᓯᖏᓐᓂᓗ ᐃᓕᓐᓂᐊᓂᕐᒥᒃ ᐱᓇᓱᐊᕐᑕᖃᕐᑐᓂᒃ, ᑎᓕᔭᐅᓯᒪᒍᑎᖓ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᒣᑦᑑᕗᖅ:

ᓄᓇᕕᒻᒥᐅᓂᒃ ᐊᑐᐃᓐᓇᖃᕐᑎᓯᓗᓂ ᐃᓕᓐᓂᐊᓂᒃᑯᑦ ᑐᑭᒧᐊᒍᑎᒋᒍᓐᓇᓂᐊᕐᑕᖏᓐᓂᒃ
ᐃᓕᓐᓂᐊᑐᓕᒫᑦ ᐱᒍᓐᓇᓂᕐᒥᓂᒃ, ᐱᓇᓱᐊᕈᓐᓇᓂᕐᒥᓂᒃ
ᐊᑑᑎᒐᓱᐊᕈᓐᓇᓂᕐᒥᓂᓪᓗ ᐱᒍᓐᓇᓯᑦᓯᐊᖁᓪᓗᒋᑦ ᐃᓄᒍᐃᔭᐅᑦᓯᐊᓗᑎᒃ.


ᐃᓕᓐᓂᐊᓂᒃᑯᑦ ᐱᒍᓐᓇᓯᑎᑦᓯᒍᑎᐅᒐᓱᐊᕐᑐᑦ

  • ᐃᓕᓐᓂᐊᑎᑕᐅᒍᓐᓇᓂᕐᒥᒃ
  • ᐃᓄᐃᑦ ᐃᓕᓐᓂᐊᓂᕐᒥᒃ ᐊᐅᓚᑦᓯᒍᓐᓇᓂᐊᕐᑎᓗᒋᑦ
  • ᐃᓕᓐᓂᐊᑎᑦᓯᒍᑎᖃᕐᓂᒥᒃ ᐃᓗᕐᖁᓯᕐᓄᑦ ᐊᑦᑐᐊᓂᖃᑦᓯᐊᑐᒥᒃ
  • ᐱᒻᒪᕆᐅᑎᑦᓯᓂᕐᒥᒃ ᐅᖃᐅᓰᑦ ᐊᓯᖏᓐᓂᒃ
  • ᐱᓇᓱᐊᖃᑎᖃᕐᓂᒥᒃ ᐃᓕᓐᓂᐊᑎᓂᒃ, ᕿᑐᕐᖓᓕᐅᔪᓂᒃ ᐊᒻᒪᓗ ᓄᓇᓕᒻᒥᒃ
  • ᐃᓄᑦᑎᑐᑦ ᐅᖃᐅᓯᕐᒥᒃ ᐱᒻᒪᕆᐅᑎᑦᓯᓂᕐᒥᒃ
  • ᐃᓕᓐᓂᐊᓂᕐᒥᒍᑦ ᐱᒍᓐᓇᓯᑦᓯᐊᓂᕐᒥᒃ
  • ᐊᑦᔨᒌᑎᑦᓯᓯᐊᓂᕐᒥᒃ (ᐊᑦᔨᒌᑦᓯᐊᒥᒃ ᐃᓕᓐᓂᐊᑎᑦᓯᓂᖃᕈᓐᓇᓗᑎᒃ)
  • ᐊᓯᑦᔨᐸᓪᓕᐊᔪᓄᑦ ᐃᓚᐅᖃᑕᐅᓂᖃᑦᓯᐊᕈᓐᓇᓗᓂ
  • ᐊᑦᑕᓇᖕᖏᑐᒥᒃ ᐃᓕᓐᓂᐊᑎᑦᓯᕕᖃᕐᓂᖅ
  • ᐃᓅᓯᓕᒫᒥ ᐃᓕᓐᓂᐊᕈᒪᓂᕐᒥᒃ ᐱᑕᖃᕐᑎᓯᓂᖅ
  • ᑎᒥᒃᑯᑦ ᐃᑉᐱᓂᐊᕐᓂᑎᒍᑦ ᐃᓱᒪᒐᓱᐊᕐᓂᑯᓪᓗ ᐱᕈᕐᓭᓂᕐᒥᒃ
  • ᖃᐅᔨᓴᕐᑎᐅᓂᕐᒥᒃ ᑐᑭᓯᓇᕐᑎᓯᒍᑎᐅᔪᑦ ᐊᑐᐃᓐᓇᐅᔪᑦ ᐊᑐᕐᓗᒋᑦ
  • ᐊᐅᓚᑦᓯᒍᓐᓇᓂᖅ - ᑐᑭᒧᐊᑦᑎᓯᑦᓯᐊᕈᓐᓇᓂᖅ ᑲᒪᒐᓱᐊᑦᓯᐊᕈᓐᓇᓂᕐᓗ.


ᐃᓕᓐᓂᐊᓂᒃᑯᑦ ᑐᕌᒐᕆᔭᐅᔪᑦ:

  • ᐃᓕᓐᓂᐊᑎᒥᒃ ᐃᓕᑦᓯᒪᓂᕐᑖᑎᑦᓯᓂᖅ ᐱᒍᓐᓇᓂᕐᑖᑎᑦᓯᓂᕐᓗ ᐱᐅᓯᕐᑖᑎᑦᓯᓂᖅ ᐃᒻᒥᓂᕿᒍᓐᓇᓯᑎᑦᓯᐊᕋᓱᐊᕐᓗᒍ, ᐱᒍᓐᓇᓯᐊᕐᓗᓂ ᐃᓄᖃᑎᒥᓂᒃ ᐃᑲᔪᕐᓯᒪᒍᓐᓇᓯᓗᓂ ᓄᓇᓕᒻᒥᓂᓪᓗ.
  • ᐃᓕᓐᓂᐊᑏᑦ ᐃᓄᑦᑎᑐᑦ ᐅᖃᕆᐅᑦᓯᐊᕈᓐᓇᖁᓪᓗᒋᑦ.
  • ᐃᓕᓐᓂᐊᑏᑦ ᐅᖃᐅᓯᐅᑉ ᐁᑉᐱᐅᑎᖓᓂᒃ ᐅᖃᕆᐅᑦᓯᐊᕈᓐᓇᖁᓪᓗᒋᑦ ᐊᑐᕈᓐᓇᓯᐊᕐᓕᕐᓗᒍ.
  • ᐃᓕᓐᓂᐊᑏᑦ ᐃᓗᕐᖁᓯᕐᒥᓂᒃ ᑭᓇᐅᓂᕐᒥᓂᓪᓗ ᐱᔪᕆᒍᑎᖃᕈᓐᓇᓯᐊᕐᑎᒐᓱᐊᕐᓗᒋᑦ ᓲᓱᒋᑦᓯᐊᓗᒍᓗ ᐃᓗᕐᖁᓯᖃᑎᒌᖕᖏᑕᒥᓂᓪᓗ ᓲᓲᑦᓴᕈᓐᓇᓯᖁᓪᓗᒋᑦ.


ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᓇᒻᒥᓂᖅ ᐱᔪᓐᓇᓂᕆᔭᖏᑦ ᑲᒪᒋᔭᑦᓴᖏᓪᓗ

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᐅᓚᑕᐅᕗᖅ ᐃᓕᓴᕐᓂᒥ ᐱᖁᔭᖕᖑᑎᑕᐅᓯᒪᔪᒧᑦ ᓄᓇᖃᕐᖄᓯᒪᔪᓄᐊᖓᔪᒧᑦ ᐊᓪᓚᓄᑦ, ᐃᓄᓐᓄᑦ, ᓈᔅᑲᐱᓄᓪᓗ , ᑖᑦᓱᒧᖓ ᒪᓕᒐᕐᒧᑦ ᐊᐅᓚᑕᐅᓂᖃᕐᓱᓂ ᐊᑦᔨᐅᖏᓐᓂᖏᑦ ᐃᓚᐅᑎᓪᓗᒋᑦ ᐊᕕᑦᑐᓯᒪᓂᕐᒥ 17-ᒦᑦᑐᓂ
ᔦᒥᓯ ᐯᑉ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓᓂ, ᑖᓐᓇ ᐊᕕᑦᑐᓯᒪᓂᕐᒥ 17-ᒦᑦᑐᖅ ᓱᓕᓕᕐᓂᓴᐅᓂᕋᕐᑕᐅᒐᔭᕐᑎᓗᒍ ᐊᑦᔨᐅᖏᑦᑐᑕᖃᕐᓂᐸᑦ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓇᒻᒥᓂᖅ ᐱᔪᓐᓇᓂᖃᕐᐳᖅ ᑲᒪᒋᔭᖃᕐᓱᓂᓗ ᐊᓯᒥᑕ ᐃᓕᓐᓂᐊᓂᓕᕆᓃᑦ ᐊᑦᔨᒋᑦᔭᖏᒻᒥᔭᖏᓐᓂᒃ:

  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᖏᖃᑎᒌᒍᑎᓕᐅᕈᑎᖃᕈᓐᓇᐳᖅ ᐳᕐᑐᓂᓴᒋᐊᓪᓚᒥᒃ ᐃᓕᓐᓂᐊᓂᕐᒨᓕᖓᔪᓂᒃ
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᑐᑭᑖᕈᓐᓇᐳᖅ ᖃᓄᓪᓗᐊᑎᒋᒃ ᐊᑐᕐᑕᐅᓂᖃᕐᓂᐊᒪᖔᑦ ᐅᖃᐅᓯᐅᑉ ᐁᑉᐱᐅᑎᖓ ᐃᓕᓐᓂᐊᑎᑦᓯᒍᑎᐅᓗᓂ, ᒍᐃᒍᐃᑎᑐᑦ ᖃᓪᓗᓈᑎᑐᓪᓗ, ᐃᓄᑦᑎᑐᑦ ᓯᕗᓪᓕᐸᐅᑦᓱᓂ ᐃᓕᓐᓂᐊᑎᑦᓯᒍᑎᐅᓂᐊᕐᑎᓗᒍ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᓯᖏᓐᓂ ᐃᓕᓐᓂᐊᓂᓕᕆᔨᓂᒃ ᐱᓇᓱᐊᖃᑎᖃᕐᓗᓂ ᐊᖏᕐᓯᒪᖃᑎᖃᕐᓗᓂ ᐃᓕᓴᐅᑎᖃᒃᑫᒍᓐᓇᐳᖅ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᐃᓕᓴᕈᑎᓕᐅᕐᑐᓴᐅᕗᖅ ᐃᓕᓭᒍᑎᓕᐅᕈᑎᓂᓗ, ᐃᓕᓴᕐᕕᖃᕐᑎᓯᑦᓱᓂᓗ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓗ ᐃᓄᑦᑎᑐᑦ ᒍᐃᒍᐃᑎᑐᑦ ᖃᓪᓗᓈᑎᑐᓪᓗ.
  • ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓ ᑯᐯᒻᒥ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᒪᓕᒐᓕᐊᕆᓯᒪᔭᖏᓐᓂᒃ ᐃᓄᐃᑦ ᐃᓗᕐᕈᓯᖓᓄᐊᖓᔪᓂᒃ ᐅᖃᐅᓯᖓᓄᓪᓗ ᐊᖓᔪᕐᖃᐅᕕᖃᕈᓐᓇᖏᓪᓚᖅ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᐃᓕᓴᕐᓂᒥ ᐅᓪᓗᖁᑎᓕᐅᕈᓐᓇᐳᖅ ᐊᑕᐅᓯᐅᓕᖓᑐᐃᓐᓇᖏᑦᑐᒥᒃ ᓄᓇᓖᑦ ᐊᑐᓂᑦ ᑭᖕᖒᒪᒋᔭᖏᑎᒍᑦ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᑲᒪᒋᔭᖃᕐᐳᖅ ᐊᖏᖃᑎᒌᒍᑎᓕᐅᕐᓂᒥᒃ ᐃᒻᒥᒍᑦ ᐊᖏᖃᑎᒌᒍᑎᒥᓂᒃ ᐃᓕᓭᔨᓂᒃ, ᐱᒍᓐᓇᐅᑎᓕᓐᓂᒃ ᐱᓇᓱᐊᕐᑎᑐᐃᓐᓇᓂᓗ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᑲᒪᒋᔭᖃᕐᐳᖅ ᐃᓄᐃᑦ ᐃᓕᓭᔩᑦ ᐱᔭᕆᐅᕐᓴᓂᖏᓐᓂᒃ ᐱᔭᕆᐅᕐᓴᑎᑦᓯᓂᕐᒥᒍᑦ ᐃᓕᓴᐅᑎᓕᐊᕆᓯᒪᔭᕐᒥᒍᑦ ᑯᐯᒻᒥ ᐃᓕᓭᔩᑦ ᐱᔪᓐᓇᓂᕆᒋᐊᓕᖏᓐᓂᒃ ᒪᓕᑦᓯᐊᖁᓪᓗᒋᑦ.
  • ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑦᓯᒍᓐᓇᐳᖅ ᐱᓇᓱᐊᕐᑎᑖᕐᓂᒧᑦ ᒪᓕᒐᑦᓴᓂᒃ ᐃᓄᓐᓂᒃ ᐃᓕᓭᔨᑦᓴᒥᓂᒃ ᐃᓗᕐᕈᓯᕐᒥ ᐅᖃᐅᓯᕐᒥᓗ.