ᐊᓪᓚᑕᕐᑎᓯᒍᑏᑦ ᑐᕐᖃᑕᕐᕕᒥᒃ ᐃᓕᓐᓂᐊᓂᓕᕆᓂᕐᓄᑦ, ᐱᖕᖑᐊᑐᓕᕆᓂᕐᓄᑦ, ᐱᖕᖑᐊᓂᕐᓄᓗ

ᐊᓪᓚᑕᕐᑎᓯᒍᑏᑦ ᑐᕐᖃᑕᕐᕕᒥᒃ ᐃᓕᓐᓂᐊᓂᓕᕆᓂᕐᓄᑦ, ᐱᖕᖑᐊᑐᓕᕆᓂᕐᓄᑦ, ᐱᖕᖑᐊᓂᕐᓄᓗ

ᑐᕐᖃᑌᔨ ᐳᕉᙰ,

ᐊᒡᓚᒍᑎᖃᕐᐳᖓ ᑲᒪᒋᔭᐅᒋᐊᓪᓚᕈᑎᑦᓴᖏᓐᓄᑦ ᒪᕐᕈᐃᒍᑦᓱᑎᒃ ᐃᓱᒫᓗᒋᔭᐅᔫᓐᓂᒃ ᐅᐃᒪᓇᕐᑐᖁᑎᒋᔭᐅᑦᓱᑎᒃ ᐃᓕᓐᓂᐊᓂᕐᒨᓕᖓᔫᓐᓂᒃ ᓄᓇᕕᒻᒥ.  ᓯᕗᓪᓕᒥ, ᖁᕝᕙᕆᐊᕈᑎᑖᕐᑎᓯᒍᑎᖏᑦ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᓴᓇᑦᑐᓴᐅᑎᓕᕆᐅᑎᓂᒃ ᓱᑯᐃᔦᓂᕐᒥᓗ ᐃᓕᓐᓂᐊᕈᑎᑦᓴᖏᑦᑕ, ᐊᒻᒪᓗ 2) ᑭᖕᖒᒪᓇᕐᓂᖓᑕ ᑐᕐᖃᑕᕐᕕᑯᑦ ᑎᓕᔨᓂᕆᒐᔭᕐᑕᖓᓂᒃ ᑐᕐᖃᑌᔨᐅᑉ ᑐᖓᓕᖓᑕ ᐱᓇᓱᕝᕕᖓᓂᑦ ᐱᓇᓱᐊᖃᑎᒋᓂᐊᕐᑕᕗᓐᓂᑦ ᓇᓪᓕᐅᑎᑦᑕᓯᐊᕐᑐᒥᒃ ᐋᕐᕿᓱᐃᑦᓴᐅᑎᒋᖃᑎᒋᕙᒐᔭᕐᑕᖓᓂᓗ ᐋᕐᕿᓱᕆᐊᓖᑦ ᐱᓇᓱᐊᕐᑕᐅᒋᐊᖃᓕᑐᐊᕐᐸᑕ.

ᐊᕐᕌᒍᓂ ᑕᓪᓕᒪᓂᑦ ᖄᖏᕐᑐᓂᑦ, ᐊᒡᓚᕕᖃᕐᐸᓕᕋᑦᑕ ᐃᓕᓐᓂᐊᓂᓕᕆᓂᕐᒥᑦ ᑐᕐᖃᑌᔨᒥᒃ ᐃᑲᔪᕐᑕᐅᒍᒪᐅᑎᑦᑎᓂᒃ ᐱᓇᓱᐊᕐᑕᐅᒋᐊᖃᕐᓯᒪᔪᓂᑦ ᐃᓱᒫᓗᒋᔭᖃᕈᑎᐅᔪᓂᒃ ᐃᓕᓐᓂᐊᓂᕐᒥᒃ ᑎᓕᔭᐅᓯᒪᓂᑦᑎᓄᑦ ᑲᒪᒋᔭᕆᐊᓕᑦᑎᓄᓪᓗ, ᓲᓱᒋᓕᕐᑕᐅᓚᐅᕐᓯᒪᑎᓐᓇᒋᑦ ᐊᒡᓚᑕᕕᓂᕗᑦ.  ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᓴᓇᑦᑐᓴᐅᑎᓕᕆᐅᑎᓄᑦ ᓱᑯᐃᔦᓂᕐᒥᓗ ᐃᓕᓐᓂᐊᕋᑦᓴᓄᑦ ᖁᕝᕙᕆᐊᕈᑎᑖᕐᑎᓯᒍᑎᖏᑦ ᐆᒃᑐᕋᐅᑎᒍᓐᓇᐳᑦ ᖃᓄᑎᒋᓪᓗᐊᖅ ᑐᓴᕐᑑᔮᖕᖏᓭᓐᓇᖃᑦᑕᓯᒪᒻᒪᖔᑦ ᐃᑲᔪᕐᑕᐅᒍᒪᐅᑎᕗᓐᓂᒃ ᓴᐳᑦᔭᐅᒍᒪᐅᑎᕗᓐᓂᓗ.  ᑌᒣᓕᖓᓯᒪᓂᑯᖓᓄᑦ, ᓄᓇᕕᒻᒥ ᐃᓕᓐᓂᐊᑏᑦ ᑎᑭᐅᑎᓯᒪᖃᑦᑕᓕᕐᖁᑦ ᖃᓄᐃᓕᖓᓂᕐᒧᑦ ᑖᒃᑯᐊ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᓂᕐᒧᓗ ᑐᕐᖃᑕᕐᕕᑯᑦ ᑌᒣᓚᕿᑎᑕᖏᓐᓂᒃ.

ᐊᕐᕌᒍᐃᑦ ᐱᖓᓱᑦ ᐊᓂᒍᕐᓯᒪᓕᕐᑐᑦ ᑌᒪᖕᖓᓂᑦ ᑐᑭᒧᐊᑦᑎᓯᔨᓯ ᐃᓕᓐᓂᐊᕈᑎᑦᓴᓕᐅᕐᓂᒧᑦ, ᒥᔅᑕ ᐊᒥᐊᓪ, ᐃᓄᒻᒪᕆᐅᓕᕐᓂᒧᑦ ᓄᕐᖃᓚᐅᔪᑎᓪᓗᒍ ᐱᓇᓱᒐᕐᒥᓂᒃ.  ᒫᓐᓇᒧᑦ, ᖃᐅᔨᑎᑕᐅᓯᒪᖕᖏᓚᒍᑦ ᑭᒡᒐᑐᕐᑎᓯᓐᓂᒃ ᐱᓇᓱᖃᑎᒋᓚᖓᔭᕗᓐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒨᓕᖓᔪᓂᒃ.  ᓄᕐᖃᓚᐅᔪᑎᓪᓗᒍᓂᑦ ᒥᔅᑕ ᐊᒥᐊᓪ, ᑌᒪᖕᖓᑦ ᐋᕐᕿᑕᐅᖁᔨᒐᓱᐊᖏᓐᓇᓯᒪᕗᒍᑦ ᑐᕐᖃᑌᔨᒧᑦ ᐃᓕᓐᓂᐊᕈᑎᑦᓭᑦ ᖁᕝᕙᕆᐊᕈᑎᖏᓐᓂᒃ.  ᑭᓯᐊᓂ, ᐱᓇᓱᐊᖃᑎᑦᓴᖃᕐᐸᖏᓪᓚᒍᑦ ᑌᑲᖕᖓᑦ ᑎᓕᔭᐅᒍᑎᓕᒻᒥᒃ.  ᒪᓐᓇᓗ ᑌᒪᖕᖓᑦ ᐱᓇᓱᖃᑎᒋᒋᐊᓕᕗᑦ ᐊᓯᑦᔨᑕᕐᑎᓗᒋᑦ ᖃᐅᔨᒪᓪᓗᐊᒐᓛᒐᑎᓗ ᓄᓇᕕᒻᒨᓕᖓᔪᓂᒃ ᐊᓯᒋᐊᓪᓚᖏᓐᓂᒃ ᐱᔭᕆᐊᑦᑐᑎᕆᓯᒪᓲᖑᕗᑦ.

ᐅᓪᓗᒥᒧᑦ, ᓄᕐᖃᐅᔨᓯᒪᖏᓐᓇᑐᒍᑦ ᐊᒻᒪᓗ ᓇᓗᓀᕐᓯᕕᐅᓯᒪᒐᑕ ᐱᓇᓱᑦᑕᐅᔪᑦ ᐱᕙᓪᓕᐊᔭᐅᒋᐊᖏᑦ ᑐᕐᖃᑕᕐᕕᑯᓐᓂ.  ᐱᒻᒪᕆᐅᓂᖓ ᑕᒪᑦᓱᒪ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕈᑎᑦᓭᑦ ᖁᕝᕙᕆᐊᕈᑎᖏᑦᑕ ᐃᓱᒫᓗᒋᔭᐅᓂᖓᓄᑦ, ᐃᒣᓕᖁᔨᓪᓚᕆᑉᐳᒍᑦ ᐅᓪᓗᖁᑏᑦ ᓇᓗᓇᖕᖏᓯᐊᕐᓗᑎᒃ ᑐᓴᕐᑎᓯᒍᑎᐅᑦᓴᐅᑎᒋᓗᑎᒃ ᐅᕙᑦᑎᓂᒃ ᐊᒻᒪᓗ ᐱᓂᐊᕐᓂᖃᕈᑎᐅᑦᓴᐅᑎᒋᓗᑎᒃ ᐱᔭᕇᕐᑕᐅᒍᑎᒋᒋᐊᓕᖏᑦ ᖁᕝᕙᕆᐊᕈᑎᒋᒋᐊᓕᖏᑦᑕ ᐱᓇᓱᐊᕐᑕᐅᓂᖏᓐᓂᑦ.

ᐅᖃᕆᐊᑦᓯᐊᕈᒪᒻᒥᓱᖓ ᐃᒫᒃ ᑭᖑᕙᕆᐊᕈᑎᐅᓚᖓᔪᑐᐃᓐᓀᑦ ᕿᒥᕐᕈᔭᐅᓂᖏᓐᓂᒃ ᖁᕝᕙᕆᐊᕈᑎᓕᐅᕐᑕᐅᓂᖏᓐᓂᓗ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕈᑎᑦᓴᖏᑦᑕ ᓱᕐᕃᔪᒻᒪᕆᐅᒻᒪᑕ ᐱᑦᔪᑎᓕᐅᕆᓪᓗᑐᕐᓱᑎᓗ ᐃᓕᓐᓂᐊᑎᕗᓐᓂᒃ ᐊᒻᒪᓗ ᓄᓇᕕᓕᒫᒥᒃ.  2014-2015-ᒥᓂᑦ, ᐳᕐᑐᓂᕐᓴᒥ 5ᒥ

ᐃᓕᓐᓂᐊᕇᔨᐊᕆᖃᑦᑕᑕᕗᑦ ᐁᑦᑐᑕᐅᖃᑦᑕᓯᒪᓕᕐᒪᑕ ᓱᓕᓂᕋᕐᑕᐅᒍᑎᖓᓂᒃ ᐳᕐᑐᓂᕐᓴᒥ ᐃᓕᓐᓂᐊᒉᑦ ᓇᓪᓕᖁᐊᖏᓐᓂᒃ ᐱᔭᕇᕐᓂᖓᑕ, ᐳᕐᑐᓂᕐᓴᓂ ᐃᓕᓐᓂᐊᒐᕐᓂᒃ ᐱᔭᕇᕐᓯᒪᒍᑎᓪᓗᑑᖕᖏᑐᒥᒃ.  ᓱᓕᓂᕋᕐᑕᐅᒍᑏᑦ ᐳᕐᑐᓂᕐᓴᒥ ᐃᓕᓐᓂᐊᒉᑦ ᓇᓪᓕᖁᐊᖏᓐᓂᒃ ᐱᔭᕇᕐᓯᒪᓂᕃᒍᑏᑦ ᒫᓐᓇᓯᐅᑎᑐᐃᓐᓇᐅᓚᖓᓯᒪᔪᑦ.  ᐃᓕᓐᓂᐊᓂᓕᕆᔨᒃᑯᑦ ᑐᕌᒐᖃᕐᐳᑦ ᐱᓇᓱᐊᖃᑎᖃᑦᓯᐊᓂᕐᒥᒃ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᒥᒃ ᐱᑕᖃᕐᑎᓯᑦᓯᐊᕈᒪᒧᑦ ᓄᓇᕕᓕᒫᒥ ᐱᔭᕇᕈᑎᑖᖃᑦᑕᑎᓪᓗᒋᑦ ᐳᕐᑐᓂᕐᓴᓂ ᐃᓕᓐᓂᐊᒐᕐᓂᒃ ᐱᔭᕇᕈᑎᓂᒃ ᐳᕐᑐᓂᕐᓴᒥ 5ᒥ ᐃᓕᓐᓂᐊᑕᒥᓂᒃ ᐱᔭᕇᑐᐊᕈᑎᒃ.

ᑭᖑᕙᕆᐊᕐᑎᑕᐅᓂᕆᖃᑦᑕᑕᕗᑦ ᑕᒪᒃᑯᓂᖓ ᐋᕐᖀᒐᓱᓂᕗᑦᑕ ᓴᓇᑦᑐᓴᐅᑎᓕᕆᐅᑎᓂᒃ ᓱᑯᐃᔦᓂᕐᒥᓗ ᐃᓕᓐᓂᐊᕈᑎᑦᓴᕗᓐᓂᒃ ᖁᕝᕙᕆᐊᕈᑎᑖᕆᔭᐅᒋᐊᓕᓐᓂᒃ ᓇᓗᓇᕈᓐᓀᑎᑦᓯᕗᑦ ᑎᓕᔭᐅᓯᒪᒍᑎᓕᒻᒥᒃ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᑦ ᐃᑲᔪᕐᑎᖃᕆᐊᖃᕐᓂᖓᓂᒃ.  ᑐᕐᖃᑕᕐᕕᑯᑦ ᐱᓇᓱᑦᑎᖏᑦ ᐊᓯᑦᔨᕋᓕᑦᓯᑎᐅᓂᖏᑦ ᐱᔭᕆᐊᑐᔪᒋᐊᓪᓚᐅᑎᑦᓯᓲᖅ.

ᐱᓇᓱᐊᕐᑕᐅᒋᐊᓖᑦ ᐱᔭᕆᐊᑐᔫᕗᑦ ᐊᒻᒪᓗ ᑕᒪᑦᓱᒧᖓ ᑭᓯᐊᓂ ᓱᓕᓂᕋᕐᑕᐅᒍᑎᖓ ᐳᕐᑐᓂᕐᓴᓂ ᐃᓕᓐᓂᐊᒉᑦ ᓇᓪᓕᖁᐊᖏᓐᓂᒃ ᐱᔭᕇᕐᓯᒪᒍᑎᐅᑉ-ᐳᕐᑐᓂᕐᓴᓂ ᐱᔭᕇᕈᑎᐅᑉ ᐃᓱᒫᓗᓐᓇᓂᖓᑐᐊᖑᖕᖏᓚᖅ.  ᐊᒥᓱᐃᖑᕗᑦ ᐱᓪᓗᑯᒋᐊᓕᕐᑕᓖᓪᓗ ᐃᓕᓐᓂᐊᓂᕐᒨᓕᖓᔪᐃᓪᓗ ᐃᓱᒫᓗᓐᓇᑐᐃᑦ, ᑕᒪᒃᑯᐊᓗ ᑲᔪᓯᑎᑕᐅᑦᓯᐊᕆᐊᖃᕐᓱᑎᒃ ᑐᕐᖃᑕᕐᕕᐅᑉ ᐃᑲᔪᕐᑎᖓᑕ ᐱᓇᓱᐊᕐᕕᖓᓂ, ᒪᓕᑦᓱᒍ ᐃᓕᓐᓂᐊᕆᐊᕐᑎᑕᐅᕙᓚᐅᕐᑐᑦ ᖃᐅᔨᓴᕐᑎᖏᑦᑕ ᐃᒫᙰᕈᑎᒋᓯᒪᔭᖓ 62, iv.

ᐃᕐᙯᑎᒋᐊᕐᐸᒋᑦ ᐃᒫᒃ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᓴᓇᑦᑐᓴᐅᑎᓕᕆᐅᑎᓂᒃ ᓱᑯᐃᔦᓂᕐᒥᓗ ᐃᓕᓐᓂᐊᕈᑎᑦᓴᓕᐊᕆᓯᒪᔭᖏᑦ ᐅᑕᕐᕿᒪᑕ ᐊᖏᕐᓂᓴᕐᓂᑦ ᐊᒻᒪᓗ ᓯᕗᓪᓕᐸᐅᑎᑕᐅᓪᓗᑐᖁᓕᕐᑕᕗᑦ ᐃᓕᓐᓂᐊᑎᖁᑎᕗᑦ ᓄᓇᕕᒻᒥ ᐱᑎᑕᐅᖃᑦᑕᕆᐊᓪᓚᒍᓐᓇᓯᖁᓗᒋᑦ ᐱᔭᕇᕈᑎᒥᒃ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᐱᔭᕇᑐᐊᕈᑎᒃ.

ᕿᓚᓈᕈᑎᖃᕐᐳᒍᑦ ᑐᑭᖃᑦᓯᐊᑐᓂᒃ ᑭᓪᓕᖃᕐᕕᐅᓂᑦᓴᕗᓐᓂᒃ ᐃᒫᒃ ᑖᒃᑯᐊ ᒪᕐᕉᒃ ᐃᓱᒫᓘᑏᒃ ᓯᕗᓪᓕᐸᐅᑦᔭᐅᓚᖓᓂᖏᑦᑕ, ᓇᓗᓀᕐᓯᖃᒻᒥᓚᐅᔪᒐᕕᑦ ᑎᕆᓪᓗᓕᐅᑦ 28-ᖑᑎᓪᓗᒍ,  2017-2018-ᒥ ᐃᓕᓐᓂᐊᓂᕐᒧᑦ ᑮᓇᐅᔭᕐᑐᕈᑎᐅᒐᔭᕐᑐᐃᑦ ᒥᑦᓴᐅᓵᕐᑕᐅᓯᒪᒍᑎᖏᑦ ᑯᐯᑉ ᐅᖃᕐᕕᒪᕆᖓᓂ ᕿᒥᕐᕈᔭᐅᑎᓪᓗᒋᑦ.

ᓱᓕᑦᓯᐊᓱᖓ ᐊᒡᓚᐳᖓ,

 

ᐋᓚᓯ ᓈᓚᒃᑑᔭᒃ

ᐊᖓᔪᕐᖄᖅ