ᒪᓐᓂᓕᐅᖑᑎᓪᓗᒍ ᑐᕓᔮᕉᑎᓪᓗᒍᓗ ᕿᑲᕐᓇᐅᓂᖓᓂ ᓇᓗᓀᕐᓯᕙᓪᓗᓲᖑᔪᒍᑦ. ᑌᒣᒐᓗᐊᕐᑎᓗᒍ, ᐊᒥᓱᓄᑦ ᐃᓄᓐᓄᑦ ᐃᓕᓐᓂᐊᑎᑦᓯᔨᓄᑦ ᓄᓇᕕᒻᒥᐅᓄᑦ, ᖁᕕᐊᓇᕐᑐᖅ ᐱᔪᓐᓇᐅᑎᑖᕐᐸᓕᐊᒐᓱᐊᕐᓂᒧᑦ ᐱᕙᓪᓕᐊᓂᖃᓲᖑᒪᑕ.

ᐅᐱᕐᖔᒥ ᐱᒋᐅᕐᓴᑎᑕᐅᓂᖅ, ᐱᕐᖁᓯᑐᖃᖅ

ᐃᓕᓐᓂᐊᓇᖅ ᐱᔭᕇᑐᐊᕐᒪᑦ, ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᑕᐅᓂᖃᓯᓲᑦ ᐃᓕᓐᓂᐊᑏᑦ ᐃᓂᒋᓲᖏᓐᓃᖔᓕᕐᓱᑎᒃ. ᐊᕐᕌᒍᑕᒫᑦ, ᑖᒃᑯᐊ 70 ᐃᓕᓐᓂᐊᑎᑦᓯᔩᑦ ᓄᓇᓕᒻᒧᑦ ᑲᑎᖃᑎᒌᓲᑦ ᐱᒋᐅᕐᓴᑎᑕᐅᓂᖃᕆᐊᕐᑐᓱᑎᒃ ᐅᐱᕐᖔᒥ ᐱᒋᐅᕐᓴᑎᑕᐅᓂᐅᓲᒧᑦ ᐊᐅᓚᑕᐅᑎᓪᓗᒍ ᐱᓇᓱᐊᖃᑎᒌᑦᓱᑎᒃ ᒪᑭᐊᓪ ᐃᓕᓐᓂᐊᕕᕐᔪᐊᖓᑦ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᖅ.

ᑕᒡᒐᓂ ᐊᕐᕌᒍᒥ, ᐱᒋᐅᕐᓴᑎᑕᐅᓃᑦ ᑲᖏᕐᓱᔪᐊᒦᑦᑐᕕᓃᑦ — ᐱᒋᐅᕐᓴᑎᑕᐅᓃᑦ ᐅᓄᕐᓂᖏᑦ ᐃᓚᐅᔪᐃᓪᓗ ᐃᑭᓪᓕᒋᐊᕐᓯᒪᓚᕿᑦᓱᑎᒃ, ᓯᓚᕐᓂᓗᑦᑐᖅ ᐱᑦᔪᑎᒋᑦᓱᒍ. ᐃᓄᐃᑦ ᐃᑉᐱᓂᐊᕐᓂᓕᕕᓃᑦ ᐃᓚᒌᓐᓂᒥᓄᑦ ᐊᕐᓴᓂᐅᑉ ᐃᓕᓐᓂᐊᕕᖓᓃᑦᓱᑎᒃ. ᑲᑎᒪᑦᓱᑎᒃ ᕿᑦᑌᖓᓇᕐᑐᕕᓂᖅ, ᖁᕕᐊᓱᐊᖃᑦᑕᓱᑎᒃ ᐃᔪᕿᑕᐅᔭᕐᓱᑎᓪᓗ ᐱᒋᐅᕐᓴᑎᑕᐅᓂᕐᒥᑕ ᓯᓚᑖᓂ.

ᐱᒋᐅᕐᓴᑎᑕᐅᒍᑎᐅᓲᑦ ᑖᒃᑯᓇᓂ ᒪᕐᕉᓂᒃ ᐱᓇᓱᐊᕈᓰᓐᓂ ᒪᓂᒪᔭᐅᓲᖅ ᐃᓕᓐᓂᐊᑏᑦ ᖁᕝᕙᕆᐊᕈᑎᑖᖁᓪᓗᒋᑦ ᐃᓕᑕᕆᔭᐅᒍᑎᑖᕐᓂᒧᑦ ᑐᕌᕐᑐᒥᒃ ᐅᕝᕙᓘᓐᓃᑦ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ ᐱᓯᒪᔪᒥᒃ ᐳᕐᑐᓂᕐᓴᐅᑉ ᐊᓪᓕᖓᓂ ᐃᓕᑕᕆᔭᐅᒍᑎᒥᒃ.

“ᓯᕗᓪᓕᐹᒥ, ᐱᓇᓱᑦᑎᑖᕆᔭᐅᕐᖄᕆᐊᖃᕐᑐᑎᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓄᑦ ᐃᓕᓐᓂᐊᑎᑦᓯᔨᐅᒋᐅᕐᓴᓂᕐᒧᑦ ᐃᓕᒪᖁᓪᓗᑎᑦ. ᐃᓕᓐᓂᐊᑎᑖᓲᖑᔪᒍᑦ ᑌᒪᖕᖓᑦ ᐱᓇᓱᑦᑎᑖᓲᖑᒐᑦᑕ ᓄᑖᓂᑦ ᑌᒪᖕᖓᑦ. ᑌᒪᖕᖓᓂ, ᐃᓕᓐᓂᐊᑏᑦ ᐃᓕᓐᓂᐊᑎᑦᓯᔨᐅᕆᐅᕐᓴᓯᓲᑦ ᖃᖓᑐᐃᓐᓇᖅ, ᐊᒻᒪᓗ ᐱᔭᕇᓲᖑᑦᓱᑎᒃ ᖃᖓᑐᐃᓐᓇᖅ ᐊᑦᔨᒌᖕᖏᑐᓂ,” ᐅᖃᕐᑐᕕᓂᖅ ᔅᑏᕙᓐ ᐲᑐᔅ, ᑐᑭᒧᐊᕐᑎᓯᔨ ᓄᓇᖃᕐᖄᓯᒪᔪᐃᑦ ᐃᓄᐃᓪᓗ ᐃᓕᓐᓂᐊᑎᑕᐅᓂᖏᑦ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ.

ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᕆᓲᖏᑦᑕ ᑐᕌᒐᕆᔭᖓᑦ ᐊᑐᐃᓐᓇᕈᕐᑎᖁᓪᓗᒋᑦ ᐃᓕᓐᓂᐊᑎᑦᓯᔩᑦ ᐃᓄᑦᑎᑑᕐᓂᒥᒃ ᐃᓕᓐᓂᐊᑎᑦᓯᓂᐊᕐᓂᒧᑦ ᐱᓇᓱᑦᑎᑖᕆᔭᐅᓲᖑᒻᒪᑕ ᐱᓇᓱᐊᓚᐅᕐᓯᒪᕋᑎᒃ. “ᐱᒋᐅᕐᓴᑎᑕᐅᓂᕐᒥᒍᑦ, ᐱᔪᓐᓇᐅᑎᑖᕐᐸᓕᐊᑦᓱᑎᒃ ᖁᕝᕙᐅᒥᓲᑦ ᐊᒻᒪᓗ ᑐᖕᖓᓱᓐᓂᓴᐅᓯᑦᓱᑎᒃ ᐃᓂᒋᔭᕐᒥᓂ,” ᐅᖃᕐᑐᕕᓂᖅ ᐊᐅᑎᕇ ᐱᐯᖕ-ᖁᓪ, ᑐᑭᒧᐊᕐᑎᓯᔨᐅᑉ ᐃᑲᔪᕐᑎᖓ ᐱᒋᐅᕐᓴᑎᑦᓯᓂᕐᒧᑦ ᐱᕙᓪᓕᐊᑎᑕᐅᓂᖓᓄᑦ, ᑲᑎᕕᒃ ᐃᓕᕐᓴᓂᓕᕆᓂᖅ. ᐱᒋᐅᕐᓴᑎᑕᐅᓂᖏᓐᓂ, ᐃᑲᔪᕐᓂᖃᓲᑦ ᐃᓕᓐᓂᐊᑎᑦᓯᔨᓂᒃ ᐃᓕᓐᓂᐊᑎᑦᓯᒍᓐᓇᐅᑎᑖᕐᓂᒧᑦ, ᑭᓯᐊᓂ ᐊᑌᓐᓇᖁᑦᓱᒋᓪᓗ. “ᓴᐳᒻᒥᔭᐅᓃᑦ ᐃᓚᐅᑎᑕᐅᓃᓪᓗ ᐃᑉᐱᓂᐊᕆᑦᓱᒍ, ᐊᑕᕈᒥᓇᕐᑐᓯᐊᖅ,” ᐅᖃᕐᑐᕕᓂᖅ.

ᐃᓄᐃᑦ ᐱᒋᐅᕐᓴᑎᑕᐅᓲᑦ ᓄᓇᕕᒻᒥ, ᐱᓇᓱᐊᕐᑕᐅᓂᖓᑕ ᑐᖕᖓᕕᓪᓚᕆᖓ

ᐱᒋᐅᕐᓴᑎᑕᐅᓂᖅ ᐊᑑᑎᒍᓐᓇᕋᔭᖕᖏᑐᖅ ᐃᓄᐃᑦ ᐃᓕᓐᓂᐊᑎᑦᓯᔩᑦ ᐱᔪᓐᓇᐅᑎᖃᖕᖏᐸᑕ ᐃᓚᐅᓂᖃᖕᖏᐸᑕᓗ, ᐃᓕᓐᓂᐊᑎᑦᓯᔩᑦ ᐊᕐᕌᒍᓂ ᐊᒥᓱᓂᑦ ᐋᕐᕿᓱᐃᖃᑦᑕᓯᒪᔪᑦ ᐃᒻᒥᓂᕐᓱᓱᑎᒃ ᐱᒋᐅᕐᓭᒍᑎᒋᑦᓱᒋᓪᓗ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᑦᓯᒍᑎᐅᓲᑦ ᐃᓄᑦᑎᑑᕐᑐᑦ.

“ᐃᓕᑕᕆᔭᐅᓪᓚᕆᒋᐊᓖᑦ. ᒪᑭᐊᓪ ᐃᓕᓐᓂᐊᕕᕐᔪᐊᖓᑕ ᐱᒋᐅᕐᓭᔨᖏᓐᓄᑦ ᐊᑦᔨᖏᓐᓂ ᓄᐃᑦᓯᒍᓐᓇᖏᑦᑐᒍᑦ ᐃᓕᓐᓂᐊᑎᑦᓯᒍᑎᐅᓲᓂᑦ. ᑌᒣᒍᓐᓇᕋᔭᖕᖏᑐᖅ […]. ᐱᑦᔪᑕᐅᖕᖏᓱᑎᒃ ᐅᖃᐅᓰᑦ, ᐱᑦᔪᑎᖏᑦ ᐅᖓᑖᓄᐊᓘᕐᑐᑦ. ᑭᖕᖒᒪᒋᓪᓚᕆᑦᑕᕗᑦ. ᖃᐅᔨᒪᓂᖏᑦ ᓄᓇᕕᒻᒥ ᐃᓕᓐᓂᐊᕖᑦ ᐋᕐᕿᓯᒪᓂᖏᑦ, ᐃᓄᐃᑦ ᐃᓕᓐᓂᐊᑏᑦ ᑐᖕᖓᕕᓪᓚᕇᑦ. ᑭᓯᐊᓂᓗ ᐅᖓᑖᓄᒋᐊᓪᓚᖅ, ᐱᒋᐅᕐᓴᑎᑦᓯᓂᕐᒧᑦ ᐊᑐᕐᓂᕆᓲᖏᑦ ᐱᐅᔪᓪᓚᕆᐊᓗᒃ.
ᔅᑏᕙᓐ ᐲᑐᔅ, ᑐᑭᒧᐊᕐᑎᓯᔨ ᓄᓇᖃᕐᖄᓯᒪᔪᐃᑦ ᐃᓄᐃᓪᓗ ᐃᓕᓐᓂᐊᑎᑕᐅᓂᖏᑦ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ.

ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᐊᕐᓂᒧᑦ ᐊᖏᕐᑐᑦ ᐃᓕᓐᓂᐊᕕᕐᔪᐊᒥ ᐱᓯᒪᔪᓂᒃ ᐃᓕᓐᓂᐊᑎᑕᐅᓂᕐᒧᑦ ᑐᑭᑖᕐᓂᖃᓪᓚᕆᓲᑦ ᓄᓇᓕᒻᒥ ᐃᑲᔪᕐᓂᖅ ᐱᑦᔪᑎᒋᑦᓱᒍ. ᐃᓕᓐᓂᐊᑎᑦᓯᓕᕋᒥᒃ ᐃᓕᓐᓂᐊᑎᑦᓯᔩᑦ ᑌᒫᑐᐃᓐᓇᖅ ᐃᓕᓐᓂᐊᕆᐊᑐᐃᓐᓇᕈᓐᓇᕋᔭᖕᖏᓱᑎᒃ ᐃᓕᑕᕆᔭᐅᒍᑎᑖᕐᓂᒧᑦ ᐳᕐᑐᓂᕐᓴᐅᑉ ᐊᓪᓕᖓᓂ ᑭᓯᐊᓂᓕ ᐃᓕᓐᓂᐊᑎᑦᓯᓱᑎᒃ ᐱᕙᓪᓕᐊᒐᓱᐊᕐᑐᑦ.

ᒪᑭᐊᓪ ᓇᔪᒐᖓᓂ ᐱᒋᐅᕐᓴᑎᑕᐅᓃᑦ

ᒪᕐᕉᒃ ᐱᓇᓱᐊᕈᓰᒃ ᓈᕋᑕᖕᖏᑎᓪᓗᒍ ᐅᐱᕐᖔᒥ ᐱᒋᐅᕐᓴᑎᑕᐅᓂᕕᓃᑦ, ᐊᒥᓲᖕᖏᑐᑦ ᐃᓕᓐᓂᐊᑎᑦᓯᔩᑦ ᐊᐅᓪᓚᕆᐊᓪᓚᓲᑦ ᒪᑭᐊᓪ ᐃᓕᓐᓂᐊᕕᕐᔪᐊᖓᓄᑦ ᒪᓐᑐᔨᐊᓪᒨᕐᓱᑎᒃ, ᒪᕐᕉᓂᒃ ᐱᒋᐅᕐᓴᑎᑕᐅᒍᑏᓐᓂᒃ ᐃᓚᐅᕆᐊᕐᑐᓱᑎᒃ.

ᐃᓕᓐᓂᐊᕕᕐᔪᐊᒦᑦᓱᑎᒃ, ᐃᑉᐱᓂᐊᕐᓂᖃᓲᑦ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᐅᓂᕐᒥᒃ. “ᐱᒋᐅᕐᓴᑎᑦᓯᒍᑎᕆᓲᕗᑦ ᓄᓇᕕᒻᒥ ᐊᑑᑎᔭᐅᓲᖏᓐᓀᑦ, ᑌᒣᑦᓱᒍ ᒪᑭᐊᓪᒦᑦᓱᑎᒃ ᐃᓱᒪᒋᔭᖃᓲᑦ ᖃᓂᖕᖏᑐᐊᓗᒻᒦᓂᕐᒥᓂᒃ. ᑖᕗᖓ ᑎᑭᒐᒥᒃ, ᑖᒃᑯᐊ ᐃᓕᓐᓂᐊᑏᑦ ᐅᐱᒍᓱᓐᓂᖃᓲᑦ. ᐊᑦᔨᖑᐊᕐᑖᓱᑎᒃ ᑭᓇᐅᓂᕐᒥᓂᒃ ᓄᐃᑦᓯᒍᑎᒥᒃ, ᕿᒥᕐᕈᐊᖃᐅᑎᒨᕐᓱᑎᒃ ᐊᒻᒪᓗ ᐃᑉᐱᓂᐊᒋᑦᓱᒋᑦ ᑕᒪᒃᑯᐊ ᐃᓂᐅᔪᑦ ᓇᔪᕐᑕᖏᑦ ᑭᒡᒐᑐᕐᓂᖃᕐᒪᑕ ᑲᓇᑕᒥ ᐱᕐᖁᓯᐅᓯᒪᔪᓂᒃ,”  ᐊᐅᑎᕇ ᐱᐯᖕ-ᖁᓪ ᐅᖃᕐᑐᕕᓂᖅ.

ᑕᒡᒐᓂ ᐅᐱᕐᖔᒥ, ᐃᓘᓐᓈᒍᑦ ᐱᒋᐅᕐᓴᑎᑕᐅᑦᓱᑎᒃ ᐃᓄᑦᑎᑐᑦ ᐱᒋᐅᕐᓴᑕᕕᓃᑦ, ᑕᒡᒐᓂ ᐃᓕᓐᓂᐊᕕᕐᔪᐊᒥ.

ᐃᓕᓐᓂᐊᑎᑦᓯᔨᐅᑦᓱᓂ ᐅᐱᓐᓇᑐᑦ ᐊᒻᒪᓗ ᑫᓪᓗᑐᕐᑕᐅᓇᕐᓱᓂ.

ᐃᓚᐅᒍᒪᑦᓴᓂᕈᕕᑦ, ᓄᓇᓕᓐᓂ ᐃᓕᓐᓂᐊᕕᑦᓯᓄᑦ ᐅᖄᕕᖃᕈᓐᓇᖁᑎᑦ!

ᐃᓕᓐᓂᐊᑎᑦᓯᔨᖕᖑᖃᒻᒦᑦ ᓴᐳᒻᒥᔭᐅᑦᓯᐊᓲᑦ ᐱᓇᓱᑦᑎᐅᖃᑎᒌᑦᑐᓄᑦ. ᐱᕕᑦᓴᖃᕐᑎᑕᐅᒍᓐᓇᒥᑦᓱᑎᒃ ᐱᒋᐅᕐᓴᑎᑕᐅᓂᕐᓄᑦ.

ᐱᕚᓪᓕᕈᑎᑦᓴᓂᒃ ᐱᐅᔪᓂᒃ ᒪᓂᔨᔪᒍᑦ.