ᑰᑦᔪᐊᖅ, ᑎᓯᒻᐱᕆ 5, 2024 – ᑐᑭᐊᒍᑦ ᐃᓗᓯᓕᕆᓂᐅᑉ ᑐᕐᖃᑕᕐᕕᖓᑕ ᐅᐃᒪᓇᕐᑐᓯᐅᑎᒥᒃ ᐋᓐᓂᐊᕕᒻᒧᑦ ᐋᑕᐅᔪᖃᓚᐅᕐᑎᓇᒍ ᐱᒍᑦᔨᒋᐊᖃᕐᓂᒧᑦ ᐊᐅᓚᑦᔭᕆᐊᕈᑎᑦᓴᓕᐊᕆᓯᒪᔭᖓᑕ ᓄᐃᑦᓯᓂᕐᒧᑦ ᓇᐅᑐᐃᓐᓀᑦ ᖃᐅᔨᒪᒋᐊᖃᕐᓂᖏᓐᓄᑦ, ᓇᓗᓇᕈᓐᓀᖁᖅ ᑌᒣᑦᑐᒥᒃ ᐃᓕᓭᕐᓂᑕᖃᕆᐊᖃᕐᓂᖓ ᓄᓇᕕᒻᒥ.  ᑕᒪᓐᓇ ᐊᐅᓚᑦᔭᕆᐊᕈᑎᑦ ᐃᑲᔪᕐᑐᕈᒪᓗᒍ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᑦ ᑲᑎᕕᒃ ᐃᓕᓴᕐᓂᓕᕆᔨᒃᑯᓗ ᐃᑲᔪᕐᑎᒌᑦᓱᑎᒃ ᓄᐃᑦᓯᒋᐊᕐᓂᒧᑦ ᐱᒋᐅᕐᓴᑎᑦᓯᓂᕐᒥᒃ ᐊᑭᖃᕈᓐᓀᑎᓪᓗᒍ ᐆᒻᒪᔮᕐᑐᒥᒃ ᓇᕐᕐᑭᑎᑦᓯᒐᓱᐊᕈᓯᕐᒥᒃ (CPR) ᐃᓕᓐᓂᐊᑎᑕᐅᓂᖅ ᖃᓄᖅ ᐆᒻᒪᕆᑦᓴᐅᑎᒃ ᑲᐴᑎᒃ ᖃᓄᖅ ᐊᑐᕐᑕᐅᒋᐊᖃᕐᒪᖔᑦ (EpiPen) ᐋᖓᔮᓐᓇᑐᕐᑐᓗᐊᕐᓯᒪᔪᒥᓪᓗ ᖃᓄᖅ ᐊᑑᑎᔭᐅᒋᐊᖃᕐᒪᖔᑦ (naloxone) ᐃᓄᒻᒪᕆᓐᓄᑦ ᐅᑭᐅᓕᓐᓄᑦ 18-ᒥᑦ ᐅᖓᑖᓄᓪᓗ ᑰᑦᔪᐊᒥ, ᐱᒋᐊᕐᓗᓂ 2025 ᐱᒋᐊᕐᕐᑲᒥᐅᑎᓪᓗᒍᓗ.

ᐃᓕᓐᓂᐊᑎᑕᐅᓂᖅ ᐊᑑᑎᓛᕐᑐᖅ ᐃᓄᒻᒪᕇᑦ ᐃᓕᓐᓂᐊᕕᖓᓂ ᐅᑯᓇᓂ ᐅᓪᓗᓂ ᐃᑲᐅᕐᓂᓂᓪᓗ.

• ᐱᖓᔪᐊᓐᓂ, ᔭᓄᐊᕆ 22, 2025 6:00ᒥ ᐅᓐᓄᑯᑦ 8:00ᒧᑦ ᐅᓐᓄᑯᑦ.
• ᐊᓪᓕᖏᓱᖓᕐᒥ, ᔭᓄᐊᕆ 25, 2025 9:30ᒥᑦ ᐅᓪᓛᑯᑦ 3:30-ᒧᑦ ᐅᓐᓄᓴᒃᑯᑦ.

ᐃᓕᓐᓂᐊᑎᑦᓯᓃᑦ ᐊᑐᓂᑦ ᓯᕕᑐᓂᖃᕋᔭᕐᑐᑦ ᐃᑲᐅᕐᓂᒥᒃ ᐊᑕᐅᓯᕐᒥᒃ ᐊᑎᕐᒥᓂᓪᓗ ᐊᓪᓚᑕᐅᑎᑦᓯᖄᕆᐊᑐᑦᔭᒐᑎᒃ. ᐁᐃᕐᖄᑐᑐᐃᓐᓀᑦ ᓯᕗᓪᓕᐅᔭᐅᓗᑎᒃ.

“ᐃᓕᒪᓇᕐᑐᒦᑦᑎᓯᑦᑌᓕᓂᖅ ᖃᓄᐃᖕᖏᓯᐊᖁᔨᓂᕐᓗ ᓄᓇᓕᑦᑐᓂᒃ ᓯᕗᓪᓕᐸᐅᑦᔭᐅᒋᐊᖃᕐᐳᖅ,” ᐅᖃᕐᑐᖅ ᔨᐊᓂᕙ ᒪᓂᖅ ᒍᐊᑦᑭᓐᔅ, ᑲᔨᓯᒃᑫᔨᖓ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᑦᑕ (NRBHSS). “ᑖᒃᑯᓂᖓ ᐆᒻᒪᑖᕐᑐᓂᒃ ᐋᖓᔮᓐᓇᑐᕐᑐᓗᐊᕐᓯᒪᔪᓂᓪᓗ ᓇᕐᕐᑭᑎᑦᓯᒐᓱᐊᕈᑎᓂᒃ, ᐆᒻᒪᕆᑦᓴᐅᑎᒃ ᑲᐴᑎᒃ (EpiPen) ᐃᓕᓐᓂᐊᑎᑦᓯᓂᒃᑯᑦ, ᑐᕌᒐᖃᕐᐳᒍᑦ ᓄᒃᑭᑎᑦᓯᓂᐊᕐᓗᑕ ᐃᓄᑑᑦᑎᑐᓂᒃ ᐱᒋᐅᕐᑎᓗᒋᓪᓗ ᐱᒋᐅᕐᑕᐅᓚᕆᒋᐊᓕᓐᓂᒃ ᑕᒪᓐᓇ ᐅᐃᒪᓇᕐᑐᖃᓕᕐᑎᓗᒍ ᐊᓐᓇᑐᐃᒍᓐᓇᓂᐅᒻᒪᑦ.  ᑕᒪᓐᓇ ᐱᓇᓱᖃᑎᖃᕐᓂᖅ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᓄᓇᓕᓕᐅᕈᑎᒋᒍᓐᓇᓚᖓᔭᕗᑦ ᐃᓕᒪᓇᖕᖏᓂᕐᓴᒥᒃ ᒪᑭᒋᐊᑦᓯᐊᕈᓐᓇᓗᓂᓗ.”

“ᒫᓐᓇᐅᑎᓪᓗᒍ, ᓄᓇᓖᑦ ᐱᒍᑦᔭᐅᓂᖓᑕ ᐱᓇᓱᒐᖃᕐᓂᐅᓗ ᐊᑖᒍᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖓᓂ, ᐋᓐᓂᓯᒪᔪᓕᕆᓂᕐᒥᒃ ᐱᒋᐅᕐᓴᑫᓲᒍᔪᒍᑦ ᓄᓇᕕᐅᑉ ᑎᒥᖁᑎᖏᑦᑕ ᐱᓇᓱᑦᑎᖏᓐᓂᒃ.  ᑖᓐᓇᓕ ᐆᑦᑐᕋᕐᑕᐅᔪᖅ ᐊᑑᑎᓕᕐᑎᓗᒍ ᓂᕆᐅᒋᔭᖃᕐᑐᒍᑦ ᑭᖕᖒᒪᓇᓪᓚᕆᑦᑐᑦ ᐃᓅᓕᑦᓯᒐᓱᐊᕈᓰᑦ ᑎᒍᐃᓐᓇᐅᓂᕐᓴᐅᓚᖓᓕᕆᐊᖏᓐᓂᒃ ᐊᒥᓲᓂᕐᓴᓄᑦ ᓄᓇᕕᒻᒥᐅᓄᑦ.  ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᑦ ᑕᑯᒍᓐᓇᓚᐅᔪᕗᑦ ᐱᕕᑦᓴᒥᓪᓗ ᑎᒍᓯᒋᐊᑦᓴᐅᑎᒋᑦᓱᑎᒃ ᐊᖏᓕᒋᐊᕐᑎᓯᒍᓐᓇᓚᖓᔪᒥᒃ ᐊᑐᐃᓐᓇᐅᒍᓐᓇᓂᖏᓐᓂᒃ ᐱᒋᐅᕐᓴᓯᒪᔪᑦ ᐊᑐᐃᓐᓇᕆᕙᑦᑕᕗᑦ.  ᓇᑯᕐᒦᐳᒍᑦ ᑕᒪᑐᒥᖓ ᑲᑐᑦᔨᖃᑎᖃᕈᓐᓇᕋᑦᑕ,” ᐅᖃᕐᑐᖅ ᖄᔨᐊ ᑭᓕᐅᑕᖅ, ᑲᔪᓯᒃᑫᔨᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ.

ᑖᓐᓇ ᐱᒋᐅᕐᓴᑎᑦᓯᓂᖅ ᐆᑦᑐᕋᕐᑕᐅᓚᖓᔪᖅ, ᓯᕗᓂᖃᕐᓱᑕ ᓄᐃᑦᓯᒍᒪᓂᕐᒥᒃ ᐃᑎᓂᕐᓴᒥᒃ ᑲᔪᓯᒋᐊᓪᓛᕈᓐᓇᓗᓂᓗ ᓄᓇᕕᒻᒦᑐᓕᒫᓄᑦ ᓄᓇᓕᓐᓄᑦ.  ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᑦ ᑲᑎᕕᒃ ᐃᓕᓴᕐᓂᓕᕆᓂᕐᓗ ᑐᓂᒪᒍᑎᖃᕐᐴᒃ ᐃᓕᒪᓇᕐᑐᒦᑦᑌᓕᓂᕐᒧᑦ ᑐᑭᓯᒪᒋᐊᖃᕐᓂᒥᒃ, ᓯᕗᕐᖐᓯᒪᒋᐊᖃᕐᓂᒥᒃ ᐱᓗᐊᕐᓯᒪᓕᕋᒥᒃ ᑐᖁᐃᓐᓇᓚᕿᒍᓐᓇᑐᓂᒃ, ᐊᑐᐃᓐᓇᐅᒋᐊᖃᕐᓂᒥᓪᓗ ᓄᓇᕕᓕᒫᒥ ᓄᓇᓕᒻᒧᐊᖓᔪᓂᒃ ᐊᐅᓚᑦᔭᕆᐊᕈᑎᖃᖃᑦᑕᓗᑕ ᑖᓐᓇ ᐆᑦᑐᕋᐅᑎᒋᓗᒍ.

ᖃᓄᐃᑦᑑᓂᖓ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ

ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᓇᐅᓕᒫᓂᒃ ᐱᒍᑦᔨᕕᐅᕗᖅ ᓄᐃᑕᐅᓯᒪᑦᓱᓂ 1978-ᒥ ᔦᒥᓯ ᐯ  ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ.  ᑲᒪᒋᔭᓕᒃ ᑯᐯ ᓄᓇᖁᑎᖓᓃᑦᑐᓕᒫᓂᒃ 55 ᐃᑳᖓᔫᑉ ᖁᓛᓂ ᐱᒍᑦᔨᒍᑎᖃᕐᓱᓂ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᓄᓇᓯᒪᔪᓂᒃ ᓄᓇᓕᓐᓂ ᖁᓕᓪᓗ ᓯᑕᒪᓪᓗᓂ.

ᖃᓄᐃᑦᑑᓂᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ

ᑲᑎᕕᒃ ᐃᓕᓴᕐᓂᓕᕆᓂᖅ, ᓄᓇᕕᒻᒥᐅᑦ ᐃᓕᓴᕐᓂᓕᕆᔨᖓ ᓄᐃᑕᐅᓯᒪᕗᖅ 1975-ᒥ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA). 1978-ᒥᓂᑦ, ᑖᓐᓇᑑᑦᓱᓂ ᐃᓕᓐᓂᐊᓂᕐᒥᒃ ᐱᒍᑦᔨᔨᐅᔪᖅ ᓄᓇᕕᒻᒥ ᓄᓇᓯᒪᔪᓂᒃ.  ᐊᖏᖃᑎᒌᓐᓂᐅᑉ ᐊᑖᒍᑦ, ᐃᓕᓐᓂᐊᓂᓕᕆᓂᖅ ᐃᓕᓴᕐᓂᒥᒃ ᐱᒍᑦᔨᔨᐅᕗᖅ ᐊᑦᔨᒋᔭᐅᑦᔭᖏᑦᑐᓂᒃ ᓄᑭᖃᕐᓱᓂ ᐊᐅᓚᑦᓯᕕᖃᕐᓱᓂᓗ ᑐᕌᖓᔪᒥᒃ ᓴᐳᒻᒥᓂᕐᒧᑦ ᐱᕈᕐᑎᓯᕙᓪᓕᐊᓂᕐᒧᓗ ᐃᓄᐃᑦ ᐅᖃᐅᓯᖓᓂᒃ, ᐃᓗᒡᒍᓯᖓᓂᒃ ᐃᓅᒍᓯᕐᒥᓗ ᓴᓇᔭᐅᒪᔪᓂᒃ ᐱᒍᑦᔨᒍᑎᓂᒃ ᐊᑐᕐᓱᑎᒃ ᐃᓕᓐᓂᐊᑎᑦᓯᒍᑎᓐᓂᓗ. ᑕᒪᓐᓇ ᐃᓕᓐᓂᐊᑎᑦᓯᓂᕐᒧᑦ ᓴᓇᔭᐅᒪᔪᖅ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕙᑦᑐᑦ ᐃᓕᓐᓂᓐᐊᕕᓕᒫᓂ ᖁᓕᓪᓗ ᓯᑕᒪᓪᓗᓂ ᓄᓇᕕᐅᑉ ᓄᓇᓕᖁᑎᖏᓐᓂ.  ᐃᓄᒃᑎᑐᑦ ᐅᖃᐅᓯᕐᕐᑳᒥᓂᒃ ᐅᐃᒍᐃᑎᑐᓪᓗ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᓐᓂᒃ.  ᐃᓕᓴᕐᓂᓕᕆᓂᖅ ᐃᖏᕐᕋᑎᑦᓯᔪᖅ 18-ᓂᒃ ᐳᒃᑭᓂᕐᓴᖃᐅᑎᓂᒃ ᐳᕐᑐᓂᕐᓴᖃᐅᑎᓂᓪᓗ ᐃᓕᓐᓂᐊᕕᓐᓂᒃ, ᐱᖓᓲᔪᕐᑐᓂᓪᓗ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ.  ᑐᑭᓯᒋᐊᓪᓚᕈᒪᒍᑦᓯ ᑕᑯᒋᐊᕋᑦᓴᖅ ᖃᕆᑕᐅᔭᒃᑯᑦ kativik.qc.ca.

 – 30 –

ᓄᐃᑦᓯᔪᖅ: ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᐱᒍᑦᔨᓂᕐᒧᑦ ᑲᑎᒪᔩᑦ

ᑐᑭᓯᒐᓱᐊᕐᕕᐅᒍᓐᓇᑐᑦ:
Yentl Béliard-Joseph, ᑐᓴᐅᒪᑎᑦᓯᔨ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᓐᓂ
media.nrbhss@ssss.gouv.qc.ca

Jade Duchesneau-Bernier, ᑐᓴᐅᒪᑎᑦᓯᔨ, ᑲᑎᕕᒃ ᐃᓕᓴᕐᓂᓕᕆᓂᕐᒥ
514 797-8220 or 1 800 361-2244 ext. 309
publicrelations@kativik.qc.ca