ᒪᓐᑐᔨᐊᓪ (ᑯᐯᒃ) ᓇᑦᓯᐊᓕᐅᑦ 25, 2024 – ᐅᐱᒍᓱᒃᑯᒍᑦ ᑐᓴᕐᑎᓯᒋᐊᒥᒃ ᓴᕐᕿᑎᑕᐅᒪᔪᖅ ᐊᑎᓕᒃ ᑕᕐᕋᑑᑎᖅ | ᑌᒪ, 25-ᓄᑦ ᐃᓕᓐᓂᐊᑎᓄᑦ ᐃᓱᐊᕐᓯᕕᐅᑉ ᐃᓕᓐᓂᐊᕕᖓᓂ ᐱᓯᒪᔪᓄᑦ ᐳᕕᕐᓂᑐᒥ, ᓵᓚᓕᕕᓂᒃ Initiative ᓵᓚᖃᐅᑎᖓᓂ, ᐱᓕᐅᑎᒍᑎᐅᑦᓱᓂ Essor Recognition Awards-ᑯᓂ. ᑕᒪᒃᑯᐊ ᓵᓚᖃᐅᑏᑦ ᑐᓂᔭᐅᓲᑦ ᑲᑐᑦᔨᖃᑎᒌᒍᑎᐅᑦᓱᑎᒃ ᐊᕐᕌᒍᑕᒫᑦ ᒥᓂᔅᑕᖃᕐᕕᑯᓐᓄᑦ ᐃᓕᓐᓂᐊᓂᕐᒥᒃ ᐊᒻᒪᓗ ᐃᓗᕐᕈᓯᓐᓂᐊᓂᕐᒧᑦ ᑐᓴᐅᒪᖃᑎᒌᓐᓂᒧᓪᓗ ᒥᓂᔅᑕᐅᕕᖓᓄᑦ. ᐃᓕᑕᕆᔭᖃᓲᑦ ᐱᒋᐊᖕᖓᐅᑎᕕᓂᐅᔪᓂᑦ ᐊᒻᒪᓗ ᐊᑦᔨᐅᖏᑦᑑᓂᐅᔪᓂᑦ ᐃᓕᓐᓂᐊᕕᓐᓂ ᐊᒻᒪᓗ ᐃᓗᕐᕈᓯᑎᒎᕐᑐᓂᒃ ᓄᓇᓕᓐᓂᑦ ᐊᑦᔨᒌᖕᖏᑐᓂᑦ ᓄᓇᓕᓕᒫᓂᑦ ᑯᐯᒃᒥ.

ᑕᕐᕋᑑᑎᖅ | ᑌᒪ ᐱᒋᐊᖕᖓᑕᐅᓯᒪᔪᖅ ᐆᑦᑐᕋᐅᑎᐅᑦᓱᓂᓪᓗ ᐃᓕᓐᓂᐊᑎᑦᓯᔨᒧᑦ ᐃᓕᓐᓂᐊᓂᓕᕆᓂᕐᒥᒃ ᖃᐅᔨᒋᐊᕐᕕᒧᑦ ᓇᑕᓖ ᑲᓚᐅᑦᒧᑦ, ᐱᓇᓱᐊᖃᑎᖃᕐᓱᓂ ᑕᑯᓐᓇᒐᖃᕐᕕᑯᓐᓂ Musée national des beaux-arts du Québec (MNBAQ). ᐃᓱᐊᕐᓯᕕᐅᑉ ᐃᓕᓐᓂᐊᕕᖓᓂ ᐃᓕᓐᓂᐊᑏᑦ ᓴᕐᕿᑎᑦᓯᔪᕕᓃᑦ ᓄᐃᑦᓯᒋᐊᓪᓚᑐᒥᒃ ᓂᕈᐊᕐᓯᒪᔭᒥᓂᒃ ᐱᓇᓱᐊᕐᑕᐅᔪᕕᓂᕐᓂᑦ MNBAQ-ᒃᑯᑦ ᑕᑯᓐᓇᑕᐅᕕᒻᒦᑐᓂ. ᑲᒪᔨᖃᕐᓱᑎᒃ ᓇᑕᓖ ᑲᓚᐅᑦᒥᒃ, ᓴᓇᓯᕙᓪᓕᐊᔪᕕᓃᑦ ᑐᖕᖓᕕᖃᕐᓱᑎᒃ ᑕᐅᕐᓯᑲᑦᑕᐅᑎᓐᓂᑯᑦ ᐊᒻᒪᓗ ᓲᓱᒋᔭᖃᕐᓂᑯᑦ ᐃᓕᓐᓂᐊᑏᑦ ᒫᓐᓇᐅᓕᕐᑐᒥ ᐱᐅᓯᐅᓲᓂ ᒪᓕᑦᓱᑎᒃ ᐊᒻᒪᓗ ᓯᓚᐅᑉ ᐅᕐᖂᓯᕙᓪᓕᐊᓂᖓᑕ ᒥᑦᓵᓄᓕᖓᔪᓂᑦ ᓄᓇᓕᒻᒥᓂ ᐊᑑᑎᔪᓕᒃ ᐅᓪᓗᑕᒫᑦ.

ᑕᑯᑦᓴᐅᑎᑕᕕᓂᖅ ᐳᕕᕐᓂᑐᒥ ᐅᐱᕐᖓᓴᐅᑎᓪᓗᒍ 2023-ᒥᑦ, ᑕᒪᒃᑯᐊ ᐱᓇᓱᐊᕐᑕᐅᔪᕕᓃᑦ ᓴᕐᕿᑎᑕᐅᓯᒪᔪᑦ MNBAQ-ᒃᑯᓂ ᒪᓐᓂᓕᐅᑦ 2, 2024-ᒧᑦ ᑎᑭᓪᓗᒍ, ᐃᓚᐅᑎᑕᐅᑦᓱᓂ ᓴᕐᕿᑎᑕᐅᓯᒪᔪᖅ ᐊᑎᖃᕐᓱᓂ Tarratuutiq | Taima: Artistic and climate insights in Nunavik. ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐸᕐᓀᒥᔪᑦ ᓴᕐᕿᑎᑦᓯᓛᕐᓂᒥᓂᒃ ᑕᒪᒃᑯᓂᖓ ᐱᓇᓱᐊᕐᑕᐅᒪᔪᓂᑦ ᓄᓇᕕᒻᒥ.

ᐅᖃᐅᓯᑦᓭᑦ:

“Essor-ᒃᑯᑦ ᐃᓕᑕᕆᔭᐅᒍᑎᖓ ᓯᕗᓪᓕᐹᑦᓯᐊᖑᕗᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᓄᑦ. ᐱᓇᓱᐊᕐᑕᐅᓯᒪᔪᑦ ᐃᓕᓐᓂᐊᑎᓄᑦ ᐃᓱᐊᕐᓯᕕᐅᑉ ᐃᓕᓐᓂᐊᕕᖓᓂ ᑕᑕᒥᓐᓇᑐᑦ. ᓄᐃᑦᓯᓱᑎᑦ ᓲᖑᔪᓪᓚᕆᒻᒥᒃ ᐅᖃᐅᓯᑦᓴᒥᒃ ᓄᓇᕕᒻᒧᓕᖓᔪᒥᒃ ᐅᖓᑖᓄᐊᓗᓪᓗ. ᐅᐱᒋᔭᒃᑲ ᑖᒃᑯᐊ ᐅᑭᐅᑭᑦᑐᐃᑦ ᓄᓇᕕᒻᒥᐅᑦ ᐊᔪᐃᓐᓇᕈᑎᖃᕐᓂᖏᓐᓄᑦ. ᐅᖃᕆᐊᓪᓚᕈᒪᑦᓱᖓᓗ, ᐱᔪᓐᓇᐅᑎᓕᒻᒥᒃ ᐊᔪᐃᓐᓇᓯᑎᐅᑦᓱᓂ ᐃᓕᓐᓂᐊᑎᑦᓯᔨᒥᒃ ᓇᑕᓖ ᑲᓚᐅᑦᒥᒃ ᐃᓕᓐᓂᐊᑎᑦᓯᔨᖃᖕᖏᑯᑦᑕ ᐊᒻᒪᓗ ᐱᓇᓱᐊᖃᑎᒋᔭᐅᓐᓂᖏᑉᐸᑕᓗ MNBAQᒃᑯᑦ, ᐃᓕᓐᓂᐊᑏᑦ ᓂᐱᖏᑦ ᐊᒻᒪᓗ ᐅᖃᐅᓯᑦᓴᖏᑦ ᓴᕐᕿᑎᑕᐅᒐᔭᓐᓂᖏᑦᑐᑦ ᐅᓪᓗᒥ ᓴᕐᕿᑎᑦᓯᔪᕕᓂᑦᓯᐊᖑᒻᒪᑕ. ᓇᑯᕐᒦᕈᒪᕗᖓ ᐱᓇᓱᐊᕐᑐᕕᓂᕐᓂᒃ ᑕᒪᒃᑯᐊ ᐱᓇᓱᐊᕐᑕᕕᓃᑦ ᓄᐃᑕᕕᓂᑦᓯᐊᖑᒍᓐᓇᓯᓐᓂᒪᑕ, ᐊᒻᒪᓗ ᓱᕐᕃᓚᕆᑦᓱᑎᒃ ᓄᐃᑦᓯᔪᕕᓂᐅᒻᒪᑕ ᐃᑉᐱᓇᕐᑐᒥᒃ.”

ᓯᐊᔭ ᐋᓗᐸ, ᐊᖓᔪᕐᖄᖅ

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 18-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca