ᓅᕕᒻᐱᕆᐅᑉ ᑕᕐᕿᖓᓄᑦ ᑎᑭᑉᐸᓕᐊᓕᑕᐃᓐᓇᑎᓪᓗᑕ, ᓱᓇᑐᐃᓐᓇᐃᑦ ᐊᒥᓱᑦ ᐊᑑᑎᓯᒪᓕᕇᕐᖁᑦ.  ᓯᕗᒧᐊᑦᑏᑦᒥᑦ ᐱᖁᔭᖅ 14-ᒧᑦ (ᓕᕇᕐᒥᔪᖅ) ᐊᑑᑎᓃᑦ ᐊᑑᑎᔪᕕᓃᑦ, ᐊᒥᓱᒐᓚᐃᑦ ᐱᑦᔪᑏᑦ ᐃᓕᑦᓯᓄᑦ ᖃᐅᔨᒪᔭᐅᒋᐊᖃᕐᖁᑦ.  ᐅᓇᑕᒐ ᓇᐃᓈᕐᓯᒪᔪᖅ ᐃᓘᓐᓈᒍᑦ ᓇᓗᓇᐃᕐᑕᐅᓂᖓᑕ.

ᐱᒋᐊᕈᑎᒋᓗᒍ, ᖃᐅᔨᔭᐅᖁᔨᓗᐊᖕᖑᐊᖁᖓ ᐱᓇᓱᑦᑎᑕ ᐱᓇᓱᓐᓂᖏᑦᑕ ᐱᐅᔫᓂᖓᓂᒃ.  ᑕᕐᕿᐅᓚᐅᕐᑐᓂ ᖄᖏᕐᑐᓂ, ᑐᓴᕐᑕᐅᑎᑦᓯᒍᓐᓇᓚᐅᕐᖁᒍᑦ ᐱᓇᓱᑦᑎᑐᐃᓐᓇᓂᒃ ᓇᑯᕐᓴᓂᑦᑎᓂᒃ, ᑲᒪᔨᓂᒃ ᐊᒻᒪᓗ ᐃᓕᓐᓂᐊᕕᒻᒥ ᐊᐅᓚᑦᓯᔨᓂᒃ.  ᓅᕕᒻᐱᕆᒥ, ᐱᓇᓱᐊᕈᓯᒋᐊᓪᓚᒥᒃ ᐊᓯᐊᓂᒃ ᑐᕌᕐᑎᑕᐅᒪᔪᖃᓛᕆᕗᖅ ᐱᒍᓐᓇᑐᓪᓚᕇᑦ ᐱᓇᓱᓐᓂᕆᓲᖏᑦᑕ ᓇᑯᕐᒦᑕᐅᓂᖓᓄᑦ ᐃᓕᖓᔪᒥᒃ.  ᖃᐃᖁᕙᑦᓯ ᖁᕕᐊᓲᑎᖃᕆᐊᕐᑐᖁᑦᓱᓯ ᑕᒃᑲᓂ ᐱᓇᓱᐊᕈᓯᕐᒥ ᑕᐃᒫᑦᓴᐃᓇᖅ ᕿᓚᓈᕐᓗᓯ ᐱᓇᓱᑦᑎᑐᐃᓐᓇᓂᒃ ᐊᓕᐊᓱᒍᑦᔨᓚᐅᔪᒻᒥᒐᑦᓯ ᐊᓕᐊᓱᒍᑦᔨᒋᐊᕐᑐᖁᑦᓱᓯ.

ᐊᓯᐊᓂᒃ ᑐᓴᕋᑦᓴᒥᒃ ᐅᖃᐅᓯᖃᓯᒻᒥᓗᖓ, ᖃᐅᔨᓴᕆᐊᖕᖓᐅᑏᑦ ᐃᓚᖏᑦᑕ ᖃᐅᔨᔭᐅᒍᑎᕕᓂᖏᑦ ᐊᒻᒪᓗ ᐅᓐᓂᑑᑎᕕᓃᑦ ᑯᐸᐃᒃᑯᑦ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓᑕ (MEQ) ᖃᐅᔨᓴᕐᓂᖓᓄᑦ ᒫᓐᓇᒐᓚᒃ ᑕᑯᔭᐅᑎᑕᐅᓚᐅᕐᖁᑦ ᐅᕙᑦᑎᓄᑦ.  ᑐᓴᕐᑎᓯᐅᑎᒃ ᐃᓗᐃᑦᑐᒃ ᓴᕐᕿᑎᑕᐅᓂᑦᓴᖓ ᐱᕕᑦᓴᖃᖏᓐᓇᑑᒐᓗᐊᖅ ᓇᑦᔪᐃᔭᕐᕕᒃ 1-ᒧᑦ ᑎᑭᓪᓗᒍ, ᓄᐃᓯᒪᔭᖏᑦᑕ ᐃᓓᓐᓇᖏᑦᑕ ᒥᑦᓵᓄᑦ ᖃᓄᕐᑑᒐᓱᐊᖏᓐᓇᑐᒍᑦ.  ᐊᑕᐅᓯᖅ ᐱᑦᔪᑎ ᓇᓗᓇᖕᖏᓯᐊᕐᑐᖅ ᐅᕙᑦᑎᓄᑦ:  ᓂᕆᐅᒃᑯᒍᑦ ᑯᐸᐃᒃᑯᑦ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓ ᐃᓚᐅᓂᕐᓴᐅᖃᑦᑕᓛᕆᐊᖓ ᐊᒻᒪᓗ ᓄᓇᕕᒻᒥ ᖃᐅᑕᒫᑦ ᖃᓄᐃᓕᖓᓂᓪᓚᕆᐅᓲᑦ ᒪᓗᓐᓇᐅᑎᖏᑦ ᑐᑭᓯᔭᐅᓗᑎᒃ.  ᐆᑦᑑᑎᒋᓗᒍ, ᐱᖁᔭᖅ ᒪᓕᑦᓱᒍ ᐊᑐᕐᑕᐅᓚᕆᒋᐊᓕᒃ ᓱᖏᐅᓯᓴᕐᓂᖅ ᔭᐃᒥᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᓐᓂᖓᓂ ᐱᕙᓪᓕᕈᑕᐅᕋᔭᕐᖁᖅ ᑯᐸᐃᒃᑯ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓᓂ ᐊᑦᔨᒌᓂᒃ ᐱᑦᔪᑎᓕᓐᓄᑦ ᐱᓇᓱᖃᑎᒋᓲᓕᒫᑦᑎᓄᑦ.

ᑭᓯᐊᓂ, ᑖᑦᓱᒧᖓ ᖃᐅᔨᓴᕐᓂᒧᑦ ᓄᕐᖃᖓᑎᑕᐅᓚᐅᕋᑕᖕᖏᑐᒍᑦ.  ᐱᓇᓱᓐᓂᖅ ᐊᒥᓱᓂᒃ-ᐅᖃᐅᓯᕐᓅᓕᖓᔪᓂᒃ ᐱᓇᓱᓐᓂᒥᒃ ᐊᒻᒪᓗ ᐃᓕᓐᓂᐊᑎᑦᓯᓂᖅ ᐱᕙᓪᓕᐊᓯᐊᕐᖁᑦ, ᒫᓐᓇ ᓯᕗᓕᕐᑕᐅᓱᑕ ᐊᕐᖁᓯᐅᕐᑏᑯᓐᓄᑦ, ᑲᑎᖕᖓᔩᑦ ᑲᔪᓯᑎᑦᓯᓛᕐᖁᑦ ᐱᓇᓱᕝᕖᑦ ᐱᓇᓱᖃᑎᒌᓐᓂᖏᓐᓂᒃ.  ᓂᕆᐅᑦᑐᖓ ᓇᓗᓇᐃᕐᓯᒍᓐᓇᓯᓛᕆᐊᒥᒃ ᐅᓪᓗᒥᒃ ᐆᑦᑐᕋᕐᑕᐅᓛᕐᑑᑉ ᐱᒋᐊᕐᕕᓴᖓᓂᒃ.  ᑕᒃᑲᓂᑦᓴᐃᓇᖅ ᐱᑦᔪᑎᒨᓕᖓᔪᒥ, ᓯᕗᒧᐊᑦᑏᑯᑦ ᐃᖏᕐᕋᓯᕙᓪᓕᐊᒋᕗᑦ.  ᐱᖓᓲᔪᕐᑐᑦ ᖃᐅᔨᒋᐊᕐᓃᑦ ᐃᓄᐃᑦ ᐃᓱᒪᒋᔭᖏᓐᓂᒃ ᐊᑐᕐᑕᐅᓯᒪᓕᕐᖁᑦ ᒫᓐᓇᒧᑦ ᑎᑭᑦᓱᒍ, ᐊᒻᒪᓗ ᐃᓄᓐᓂᒃ ᐃᓱᒪᕘᕐᑎᓯᒋᐊᓪᓚᓛᕆᕗᒍᑦ ᓅᕕᒻᐱᕆᒥ, ᑏᓯᒻᐱᕆᒥ ᐊᒻᒪᓗ ᐊᕐᕌᒎᑉ 2025 ᐱᒋᐊᕐᓂᖓᓂ.  ᒪᓕᒍᓐᓇᑐᑎᑦ ᐱᕙᓪᓕᐊᓂᖓᓂᒃ ᑖᑦᓱᒪ ᐋᕐᕿᓯᒪᐅᑎᑦᓴᐅᑉ ᐸᕐᓇᑕᐅᓂᖓᓂᒃ ᒫᓂ.

ᐱᖁᔭᖅ 14 ᓲᕐᓗ ᐋᕐᕿᓱᒐᕐᑎᑐᑦ ᐱᔭᕇᒻᒪᐃᑐᕐᑎᑑᕐᑯᖅ ᐅᕙᑦᑎᓄᑦ.  ᖃᐅᔨᕙᓪᓕᐊᓕᕐᖁᒍᑦ ᓱᕐᕋᐃᓂᖏᓐᓂᒃ ᐅᐃᒍᐃᑎᑐᑦ ᐃᓕᓐᓂᐊᒐᐃᑦ ᐃᓚᒋᐊᕐᑕᐅᒍᑎᕕᓂᖏᓐᓂᒃ; ᐃᓕᓐᓂᐊᑏᑦ ᐃᓚᖏᑦ ᐊᖏᕐᓂᕈᓐᓇᐃᖁᑦ ᐃᓕᓐᓂᐊᓂᕐᒧᑦ ᐃᑲᔪᕐᑕᐅᒍᑎᓂᒃ ᐊᒻᒪᓗ ᑲᔪᓯᓛᕈᓐᓇᐃᓱᑎᒃ ᐳᕐᑐᓂᕐᓴᒥ ᐃᓕᓐᓂᐊᕇᕐᓯᒪᔪᑦ ᐃᓕᓐᓂᐊᓂᕆᓲᖓᓂᒃ ᐱᑦᔪᑎᒋᑦᓱᒋᑦ ᓄᑖᑦ ᐅᖃᐅᓯᕐᒨᓕᖓᔪᑦ ᐊᑐᕆᐊᓖᑦ.  ᐃᓕᓐᓂᐊᑏᑦ ᐊᓯᖏᑦ ᐃᓕᓐᓂᐊᕕᑦᓴᓂᒃ ᕿᓂᖃᑦᑕᓯᒪᓕᕐᖁᑦ ᓯᓚᕐᖃᑎᑦᑎᓂ ᓄᓇᐅᑉ ᐊᕕᑦᑐᓯᒪᓂᖏᓐᓃᑐᓂ.  ᕿᒥᕐᕈᓯᒪᓕᕐᖁᒍᑦ ᐃᓕᓐᓂᐊᕋᑦᓴᐅᖔᕋᔭᕐᑐᓂᒃ “ᐅᐃᒍᐃᑎᑑᓲᕈᕐᑎᓯᓂᕐᒥᒃ” ᐃᓕᓐᓂᐊᒐᕐᓂᒃ, ᑭᓯᐊᓂ ᐃᓕᓐᓂᐊᑎᕗᑦ ᐃᓂᖃᖕᖏᑐᑦ.

ᑕᐃᒪᐃᒐᓗᐊᕐᑎᓗᒍ, ᑯᐸᐃᒃᑯᑦ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓᑕ ᖃᐅᔨᓴᕐᓂᖓᑎᑐᓪᓗᐊᓯᐊᖅ, ᑖᓐᓇ ᐱᖁᔭᖅ ᓱᕐᕋᐃᓚᐅᖕᖏᑐᖅ ᐊᑐᐃᓐᓇᖃᕐᑎᓯᒍᒪᓂᑦᑎᓂᒃ ᐊᖏᓂᕐᓴᒥᒃ ᐊᑐᐃᓐᓇᖃᕐᑎᓯᓂᕐᒥᒃ ᐳᕐᑐᓂᕐᓴᒥ ᐃᓕᓐᓂᐊᕇᕐᓯᒪᔪᓄᑦ ᐃᓕᓐᓂᐊᓂᕐᒥᒃ.  ᐱᕙᓪᓕᐊᑎᑕᐅᓂᖓ ᐅᐃᒍᐃᑎᑐᑦ ᐊᑦᔨᐸᓱᖓᓂᒃ ᓄᓇᕕᒃ ᓯᕗᓂᑦᓴᕗᑦᑯᑦ ᓯᕗᒧᐊᑉᐸᓕᐊᕗᖅ.  ᕿᓂᕐᖁᒍᑦ ᐱᓇᓱᖃᑎᑦᓴᓂᒃ ᐊᑦᔨᒌᖕᖏᑐᓂ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᓐᓂᒃ.  ᐊᑐᐃᓐᓇᖃᕐᓂᖅ ᐳᕐᑐᓂᕐᓴᒥ ᐃᓕᓐᓂᐊᕇᕐᓯᒪᔪᑦ ᐃᓕᓐᓂᐊᖓᓂᒃ ᑐᑦᓯᕋᐅᑎᐅᖏᓐᓇᖃᑦᑕᓯᒪᕗᖅ ᓄᓇᕕᒻᒥᐅᓄᑦ ᐅᑭᐅᓂᒃ ᐊᒥᓱᓂ.  ᐆᒃᑑᐱᕆ 2023-ᒥᑦ ᒫᑦᔨ 2024-ᒧᑦ, ᓄᓇᕕᒻᒥ 14 ᓄᓇᓖᑦ ᐃᓘᓐᓇᑎᒃ ᐅᐸᑦᑕᐅᓂᕐᖁᑦ ᐊᒻᒪᓗ ᐃᓱᒪᕘᕐᑎᑕᕕᓂᐅᑦᓱᑎᒃ ᑕᐅᑐᖕᖑᐊᑕᒥᓂᒃ ᓄᓇᕕᒻᒥ ᐳᕐᑐᓂᕐᓴᒥ-ᐃᓕᓐᓂᐊᕇᕐᓯᒪᔪᑦ ᐃᓕᓐᓂᐊᕕᖓᓂᒃ ᐃᓕᓐᓂᐊᕕᖃᕋᔭᕐᐸᑦ.  ᐃᓱᒪᕘᕐᑎᓯᒍᑎᕕᓂᐅᑉ ᑐᓴᕐᑎᓯᒍᑎᖓ ᐱᔭᕇᕐᑕᐅᓛᕐᑐᖅ ᐅᑭᐊᑦᓴᒥ ᑐᓴᕐᑕᐅᑎᑕᐅᓂᐊᖕᖒᕆᔭᐅᑦᓱᓂᓗ ᓄᓇᓖᑦ ᐃᓕᓐᓂᐊᕕᖏᑦᑕ ᑭᒃᑲᑐᕐᑎᖏᓐᓄᑦ ᑏᓯᒻᐱᕆ 2024-ᒥ.

ᐱᔭᕇᕈᑎᒋᓗᒍ, ᓇᓗᓇᐃᕐᓯᒍᒪᕗᖓ ᒫᓐᓇ “ᓯᓚᐅᑉ ᑖᕐᑑᓂᕆᓲᖓᑕ” ᐱᒋᐊᕐᓂᕆᓕᕐᒥᒪᐅᒃ.  ᐅᑭᐊᑦᓴᖅ – ᐅᑭᐅᒨᕐᐸᓕᐊᑦᓱᓂ ᐊᒻᒪᓗ ᐅᓪᓘᓗ ᖃᐅᒪᓂᖏᑦᑕ ᑲᐃᕙᓪᓚᒍᓯᖏᑦ ᓇᐃᓪᓕᐸᓪᓕᐊᓱᑎᒃ – ᓱᕐᕋᐃᓲᖑᕘᒃ ᐃᓄᓐᓂᒃ ᖃᓄᓕᒫᖅ.  ᑕᐃᒪᖕᖓᓂᑦ, ᐅᑭᐊᑦᓴᒥ ᐃᓄᐃᑦ ᐱᓇᓱᖏᓐᓇᓕᒫᓲᕕᓂᐅᕗᑦ.  ᓂᕿᓕᕆᖏᓐᓇᓕᒫᕐᓱᑎᒃ, ᓴᓇᕐᕈᑎᓕᕆᖏᓐᓇᓕᒫᕐᓱᑎᒃ, ᐊᒻᒪᓗ ᒪᖃᐃᒍᑎᓕᕆᖏᓐᓇᓕᒫᕐᓱᑎᒃ, ᐊᑐᐃᓐᓇᕈᕐᑎᓱᑎᒃ ᐅᑭᐅᒧᑦ.  ᑕᐃᒪᐃᓐᓂᑯᖓᓄᑦ, ᐃᓱᒪᓯ ᖃᓄᐃᖕᖏᓯᐊᕐᓂᖓᓂᒃ ᑲᒪᑦᓯᐊᖁᕙᑦᓯ ᖃᐅᔨᒋᐊᕐᕕᖃᖁᕙᓯᓗ ᓄᓇᓕᓯ ᐊᖑᑏᑦ ᑲᑐᑦᓯᖃᑎᒌᓐᓂᖏᓐᓄᑦ, ᓄᓇᓕᐅᑉ ᐱᖕᖑᐊᕕᖓᓄᑦ, ᐅᕝᕙᓘᓐᓃᑦ ᒥᕐᓱᕕᒻᒧᑦ.  ᓇᒻᒥᓂᖅ ᐱᔭᑦᓴᓄᑦ ᑕᑕᑎᕐᓗᓯ ᐃᓕᕐᖁᓯᕐᓅᓕᖓᔪᓄᑦ ᓱᖃᑦᓯᒍᑎᓄᑦ ᓵᖕᖓᓯᒍᑎᒋᓗᒋᑦ ᑕᕐᕿᓂᒃ ᑖᕐᑐᓂᒃ ᖃᐃᔪᓂ.  ᐃᓚᒋᐊᕈᑎᒋᓗᒍ, ᐱᓇᓱᑦᑎᓄᑦ ᐊᒻᒪᓗ ᐃᓚᒌᓄᑦ ᐃᑲᔪᕐᑕᐅᓃᑦ ᐊᑐᐃᓐᓇᐅᖏᓐᓇᓕᒫᕆᕗᑦ – ᐊᑮᑦᑑᓱᑎᒃ ᐊᒻᒪᓗ ᑭᓇᑐᐃᓐᓇᑯᓐᓄᑦ ᑐᓴᕐᑕᐅᒋᐊᖃᖕᖏᑑᑦᓱᑎᒃ ᐱᒍᑦᔭᐅᒍᑏᑦ.

ᖄᔨᐊ ᑭᓕᐅᑕᒃ,

ᑲᒪᔨᒻᒪᕆᒃ