ᐊᕐᕌᒍᑕᒫᑦ, ᓄᓇᕕᐅᑉ ᐃᓕᓐᓂᐊᑎᖏᑦ ᐃᓚᐅᓲᑦ ᑯᐯᒃ ᓄᓇᓕᑐᖃᑦᓴᔦᑦ ᓱᑯᐃᔦᓂᑎᒍᑦ ᑕᑯᑦᓴᐅᑎᑦᓯᕕᖓᓄᑦ, ᐱᓂᐊᕐᓂᐅᔪᖅ ᓇᕝᕚᑕᐅᒪᔪᖅ ᑲᔪᖏᕐᓭᓂᕐᒧᑦ ᖃᐅᔨᓴᕐᓂᒥᒃ ᓱᑯᐃᔦᓂᕐᒨᓕᖓᔪᒥᒃ ᖃᐅᔨᒪᓂᕐᑎᒍᑦ ᐊᑑᑎᒍᑎᑦᓴᓄ ᑕᒪᒃᑯᓄᖓ ᐊᔾᔨᒌᖕᖏᑐᓄᑦ ᓴᓇᓂᕐᓄᑦ ᐊᐅᓚᔪᓕᕆᓂᕐᓄᑦ ᐊᓯᖏᓐᓄᓗ ᑖᒃᑯᓇᓂ ᓄᓇᓂᑐᖃᑦᓴᔦᑦ ᐃᓅᓱᒃᑐᐃᑦ/ᐅᕕᒃᑫᑦ ᑯᐯᒃ ᐊᓪᓓᑦ ᐃᓄᐃᓪᓗ ᐃᓕᓐᓂᐊᕕᖏᓐᓂᒃ.
ᐱᒋᐊᕈᑎᒋᓗᖑ, ᐃᓕᓐᓂᐊᑏᑦ ᐃᓚᐅᔪᓂ ᐃᓕᓐᓂᐊᕕᓐᓂ ᓇᓗᓀᕐᓯᓲᑦ ᓱᓇᐅᓂᖓᓂᒃ ᐱᓇᓱᐊᕐᓂᕆᒍᒪᔭᒥᓂᒃ, ᐋᕐᕿᓱᕐᓂᐊᕐᑕᒥᓂᒃ ᐃᑲᔪᕐᑎᖃᕐᓱᑎᒃ ᓱᑯᐃᔦᓂᑎᒍᑦ ᐃᓕᓐᓂᐊᑎᑦᓯᔨᒥᓂᒃ.
ᐃᓱᒪᒥᑦᓯᐊᑐᖅ ᐊᑐᓂ ᐃᓕᓐᓂᐊᑎᒃ ᐊᑐᓂᓗ ᐱᓇᓱᐊᖃᑎᒌᑦᑐᑦ ᓇᓗᓀᕐᓯᒐᔭᕆᐊᒥᒃ ᓱᓇᒨᓕᖓᓂᕆᓚᖓᔭᖓᓂᒃ ᐅᓇᒻᒥᒋᔭᒥᑦᑕ, ᑲᔪᖏᕐᓴᔭᐅᖏᓐᓇᓱᑎᓪᓗ ᐱᒐᓱᐊᕐᓂᐊᕆᐊᒥᒃ ᐱᑐᑦᓯᒪᔪᒥᒃ ᐃᓗᕐᖁᓯᒥᓅᓕᖓᔪᒥᒃ.
ᑲᕈᓖᓐ ᐃᑲᔪᕐᑎᐅᓱᓂ ᐃᓱᐊᕐᓭᔨ ᑐᑭᒧᐊᕐᑎᓯᔨᐅᑦᓱᓂᓗ ᓄᓇᓕᑐᖃᑦᓴᔦᑦ ᓱᑯᐃᔦᓂᑎᒍᑦ ᑕᑯᑦᓴᐅᑎᑦᓯᕕᖓᓂ ᓄᓇᓕᓕᒫᑎᒎᕐᑐᒥᒃ, ᐱᕕᑦᓴᖃᕐᑎᓯᑦᓱᓂ ᐱᑑᑎᑎᑦᓯᓂᕐᒥᒃ ᐃᓕᓐᐊᑎᑦᓯᔨᓄᑦ ᐃᓗᓐᓇᖏᓐᓂᒃ ᐃᓚᐅᔪᓂᒃ ᐃᓕᓐᓂᐊᕕᓐᓂᒃ ᓄᓇᕕᒻᒥ. ᑎᑭᐅᑎᑎᑦᓯᓚᕿᔪᖅ ᑖᑦᓱᒥᖓ ᐱᓇᓱᐊᖃᑎᖃᕐᓂᒥᒃ ᓂᐊᓕ ᑑᑲᖅᒥᒃ, ᐃᓕᓐᓂᐊᑎᖏᑦ ᐳᒃᑭᓂᓖᑦ 5-ᓂᒃ 6-ᓂᓪᓗ ᐃᕗᔨᕕᐅᑉ ᓄᕝᕕᑎᐅᑉ ᐃᓕᓐᓂᐊᕕᖓ ᑲᑎᑦᓱᑎᒃ ᐱᓇᓱᐊᕐᓂᐊᓱᑎᒃ ᑕᒪᒃᑯᓂᖓ ᐱᐅᓯᕐᓱᓱᑎᒃ ᓂᕈᒥᑦᑎᓯᓲᓂᒃ ᐅᑭᐅᕐᑕᑐᒥ. “ᐃᓕᓐᓂᐊᑎᒃᑲ ᐊᓕᐊᒋᔭᖃᓪᓚᕆᓲᑦ ᐱᓇᓱᐊᕐᓱᑎᒃ ᑕᒪᒃᑯᓂᖓ ᐃᓕᖓᔪᓂᒃ ᐊᕙᑎᒥᓄ, ᑕᒪᑦᓱᒥᖓ ᑕᒫᓂᑦᑐᓂᒃ,” ᐅᖃᕐᑐᖅ ᓂᐊᓕ.
ᓇᓗᓀᕐᓗᒍ ᐅᖃᐅᓯᑦᓴᐅᒍᓐᓇᑐᖅ ᓄᐃᑦᓯᓗᓂᓗ ᒪᓂᔭᑦᓴᒥᒃ ᑖᑦᓱᒪ ᐱᔭᕇᕐᓯᒪᔫᑉ ᐱᓇᓱᐊᕐᓂᐅᑉ ᓇᐅᓕᒫᓅᓕᖓᔪᑦᓴᓄᑦ
ᖃᓄᖅ ᓇᓗᓀᕐᓯᓯᓲᖑᒻᒪᖔᑕ ᐅᖃᐅᓯᑦᓴᐅᔪᒥᒃ ᖃᓄᐃᑦᑐᑐᐃᓐᓇᑎᒎᒍᓐᓇᑐᖅ. ᓂᐊᓕ ᑐᕕᐅᑉ ᐃᓕᓐᓂᐊᑎᖏᑦ, ᐃᒣᓕᖓᒐᓚᓚᐅᔪᖅ “ᐊᓐᓇᐅᒪᔪᖅ” ᑕᓚᕖᓴᕐᑎᒍᑦ ᑲᑦᓱᙰᓕᓚᐅᔪᖅ ᐃᓕᓐᓂᐊᑎᖏᓐᓂᒃ! ᑕᑯᓯᒪᒧᑦ ᐱᓕᐅᔾᔨᔪᒥᒃ ᐊᓛᔅᑲᒥᑦ ᓄᐊᑦᓯᔪᒥᒃ ᖃᓄᐃᑦᑐᑐᐃᓐᓇᓂᒃ ᐱᖁᑎᓂᒃ ᐊᑐᕈᓐᓇᑕᒥᓂ ᑌᒫ ᓴᓇᓂᐊᕐᑕᒥᓂᒃ ᓇᒻᒥᓂᖅ ᐃᓪᓗᒥᒃ. ᓂᐊᓕ ᐊᐱᕆᔪᖅ ᖃᓄᐃᓘᒐᔭᕐᒪᖔᕐᒥ ᑖᓐᓇ ᐱᓂᐊᕐᓂᐅᔪᖅ ᐃᕗᔨᕕᒻᒦᑐᕕᓂᐅᑉᐸᑦ. ᐃᓕᓐᓂᐊᑎᖏᓪᓗ ᑌᒪ ᐱᒋᐊᓯᓚᐅᔪᑦ ᐅᖄᓂᖃᓚᐅᔪᑦ ᓄᓇᓕᒻᒥ ᐱᕈᕐᑐᓂᒃ ᓂᕈᒥᑦᓯᒍᑎᓕᓐᓂᒃ; ᑌᒣᒻᒪᓗᑦᑕᐅᖅ ᐱᓇᓱᐊᕐᑕᖓ ᐱᒋᐊᖕᖓᓚᕿᓯᒪᔪᖅ.
“ᐃᓕᓐᓂᐊᓚᐅᔪᒍᑦ ᓄᑕᐅᖕᖏᑐᒻᒪᕆᓐᓂᒃ ᐃᓄᐃᑦ ᐊᓂᕐᕋᕕᓂᖏᓐᓂᒃ, ᐃᓚᐅᑎᓪᓗᒋᑦ ᖃᐅᔨᒪᔭᐅᑦᓯᐊᖏᓐᓂᐹᖅ ᐆᑦᑐᕋᐅᑎᒃ: ᖃᕐᒪᖅ. ᑖᓐᓇ ᐊᓂᕐᕋᖅ ᐃᓄᐃᑦ ᓴᓇᓯᒪᔭᖓ ᓄᓇᐅᑉ ᕿᑎᕐᖃᖓᑕ ᐃᑭᐊᖓᓃᑦᓱᓂ ᓴᓇᒪᒍᑎᖃᕐᓱᓂ ᐊᒥᕕᓂᕐᓂᒃ, ᓴᐅᓂᕕᓂᕐᓂᒃ ᑎᔾᔭᓗᕕᓂᕐᓂᓗ ᑌᒪᓗ ᖁᓕᑕᐅᒪᑦᓱᓂ ᓯᕐᒥᕈᕐᓯᒪᔪᓂᒃ ᓇᓇᔭᓂᒃ ᐅᕐᖂᑎᑦᓯᓂᐊᕐᑐᓂᒃ. ᐊᐱᕆᐅᑎᐅᓚᐅᔪᖅ ᐅᓇ, ᓇᓪᓕᐊ ᐱᕈᕐᓯᐊᖅ ᐊᑐᕋᔭᕐᑕᕗᑦ ᑕᒫᓂ ᐃᕗᔨᕕᒻᒥ, ᓇᓪᓕᐊ ᓂᕈᒥᑦᑎᑦᓯᓯᐊᕐᓂᐸᐅᒐᔭᕐᖃ.
ᑭᖑᓪᓕᖅ, ᓂᐊᓕᐅᑉ ᐃᓕᓐᓂᐊᑎᖏᑦ, ᐃᓚᐅᑎᓪᓗᒋᑦ ᐃᓗᓐᓇᑎᒃ ᐃᓚᐅᔪᑦ ᐊᓯᖏᓐᓂᒃ ᐃᓕᓐᓂᐊᕕᓕᓐᓂᒃ, ᒪᓂᔨᓚᐅᔪᑦ ᐱᓇᓱᐊᕐᑕᒥᓂᒃ ᓄᓇᓕᐅᑉ ᑲᑎᒪᔨᐊᐱᖏᓐᓄᑦ ᓇᓗᓀᕐᓯᔨᓄᑦ ᕿᒥᕐᕈᓯᐊᕐᓂᖃᕆᐊᖃᓚᐅᔪᓄᑦ ᐊᑐᓂ ᐱᓇᓱᐊᕐᑕᕕᓂᕐᓂᒃ ᑎᒍᓯᓗᑎᓪᓗ ᓵᓚᓕᓐᓂᒃ. ᑌᒪ ᑭᖑᓪᓕᕆᓕᕐᒥᔭᖓ ᑎᒍᓯᓂᐅᔪᖅ ᓇᓗᓀᕐᓯᓂᕐᒥᒃ ᓇᓪᓕᐊ ᐱᓇᓱᐊᕐᓃᑦ ᐱᓕᐅᔾᔨᒐᔭᕐᒪᖔᑕ ᑖᒃᑯᓇᓂ ᑕᓪᓕᒪᓂ ᐊᕕᑦᑐᓯᒪᓂᓕᓐᓂ ᑯᐯᒃᒥ ᑭᖑᓪᓕᐸᐅᓕᔪᓄᑦ.
“ᐊᑐᓲᖑᔪᒍᑦ ᑖᑦᓱᒥᖓᑦᓭᓇᖅ ᒪᓕᒐᕐᓂᒃ ᑯᐯᒃᒥ ᓄᓇᓕᑐᖃᑦᓴᔦᑦ ᓱᑯᐃᔦᓂᑎᒍᑦ ᖃᐅᔨᒪᓂᕐᑎᒍᑦ ᐊᑑᑎᒍᑎᑦᓴᓄ ᑕᒪᒃᑯᓄᖓ ᐊᔾᔨᒌᖕᖏᑐᓄᑦ ᓴᓇᓂᕐᓄᑦ ᐊᐅᓚᔪᓕᕆᓂᕐᓄᑦ ᐊᓯᖏᓐᓄᓗ ᑲᑐᔾᔨᖃᑎᒌᓐᓂᖓᓄᑦ (AQASI), ᐊᑐᐃᓐᓇᕈᕐᑎᕆᓲᖅ ᑯᐯᒃᒥ ᓄᓇᓕᑐᖃᑦᓴᔦᑦ ᓱᑯᐃᔦᓂᑎᒍᑦ ᐱᓂᐊᕐᓂᐅᔪᒥᒃ. ᓇᓗᓀᕐᓯᓚᐅᔪᒍᑦ ᒪᓂᔭᐅᔪᓂᒃ ᑐᖕᖓᕕᖃᕐᓱᑎᒃ ᓱᑯᐃᔦᓂᕐᒥᒃ ᑐᖕᖓᕕᓕᓐᓂᒃ ᓄᐃᑦᓯᒍᓯᒥᑎᒍᓪᓗ,” ᑐᑭᓯᑎᑦᓯᔪᖅ ᑲᕈᓖᓐ ᒫᕐᑌᖕ.
ᑕᕝᕙᓂ ᐊᕐᕌᒍᒥ, ᑯᐯᒃᒥ ᑭᖑᓪᓕᐸᐅᓕᔪᑦ ᓄᓇᒥ ᑳᑎᓅᒦᓚᐅᔪᑦ ᑌᑲᓂ ᐃᓕᓐᓂᐊᕕᕐᔪᐊᑉ ᑯᐯᒃᒥ ᐅᑕᒉᒥ (UQO).
“ᑌᒪᖕᖓᒐᓚ, ᐃᓕᓐᓂᐊᑏᑦ ᐊᓪᓚᓕᕋᒥᒃ ᓄᓇᓕᒻᒥᓂᒃ ᐱᑦᓱᑎᒃ ᑭᖑᓪᓕᐸᐅᓕᔪᓕᐊᓕᕋᒥᒃ, ᑕᑯᑦᓴᐅᓲᑦ ᐅᑉᐱᕆᔭᖃᓪᓗᐊᖏᒋᐊᒥᒃ ᐃᒻᒥᓂᒃ ᑖᑦᓱᒥᖓ ‘ᒥᑭᔫᒋᐊᖓ’ ᓱᑯᐃᔦᓂᕐᑎᒍᑦ ᐱᓇᓱᐊᕐᑕᒥᓂᒃ. ᑌᒪ ᑌᑯᖕᖓᓱᑎᒃ, ᑕᑯᓯᑦᓱᑎᓪᓗ ᖃᓄᓪᓗᐊᑎᒋᒃ ᐊᓯᖃᕆᐊᖓ ᐃᓚᐅᒻᒥᔪᓂᒃ ᑌᑲᓂ. ᓯᕗᓪᓕᒥ, ᑲᖕᖑᓱᑦᓱᑎᒃ, ᑭᓯᐊᓂ ᐱᔭᕇᕐᓂᖓᓂ ᐅᓪᓗᖓᑕ ᓯᕗᓪᓕᐹᖓᓂ, ᐃᓱᕐᕆᓯᐅᒥᑦᓯᐊᑐᕕᓃᑦ ᐅᖄᕕᖃᒍᓐᓇᓯᑦᓱᑎᒃ ᑭᓇᓕᒫᒃᑯᓂᒃ. ᐱᒍᓐᓇᓯᑦᓯᐊᓱᑎᒃ ᓇᒻᒥᓂᖅ-ᑲᑦᓱᙰᓐᓂᒥᒃ,” ᐅᖃᕐᑐᖅ ᑳᕈᓖᓐ ᒪᕐᑌᖕ ᖁᖓᑦᓱᓂ.
ᓂᐊᓕ ᑲᔪᓯᔪᖅ, ᐅᖃᕐᓱᓂ ᖃᓄᓪᓗᐊᑎᒋᒃ ᐃᓕᓐᓂᐊᑎᖏᑦ ᐱᒍᓐᓇᓂᖃᑦᓯᐊᕆᐊᖏᑦ – “ᑌᒪᖕᖓᑕᒫᑦ.” ᐱᔭᐅᒋᐊᓕᒃ ᑖᓐᓇᐅᓗᓂ ᑐᑭᓯᓇᕐᑎᓯᓗᓂ ᐱᓇᓱᐊᕐᓂᒥᒃ ᑖᒃᑯᓄᖓ ᓇᓗᓀᕐᓯᔨᓄᑦ, ᑭᓯᐊᓂᒋᐊᓪᓚᒃ ᐊᓯᖏᓐᓄᑦ ᐳᓛᕆᐊᕐᑐᓄᑦ ᐃᓕᓐᓂᐊᕖᑦ ᐊᒥᓱᐃᖁᑎᖏᓐᓄᑦ ᓇᐅᓕᒫᓄᓕᖓᔪᓄᓪᓗ – ᑌᒫᒻᒪᕆᒃ ᑕᑯᑦᓴᐅᔮᕐᑎᓯᑦᓯᐊᑐᑦ ᑖᒃᑯᓄᖓ ᐃᓄᓱᒃᑐᓄᑦ/ᐅᕕᒃᑲᓄᑦ ᐃᓄᖕᓄᑦ ᑌᒫᒃ ᐊᒥᓲᓂᕐᓴᓄᑦ ᐅᖄᓚᐅᕐᓯᒪᖕᖏᑐᑦ ᓯᕗᕌᓂ ᖃᐅᔨᒪᔮᕆᖕᖏᓚᕆᓯᒪᔭᒥᓄᑦ!
ᐃᓚᐅᔪᑦ ᑯᐯᒃᒥ ᑭᖑᓪᓕᐸᐅᓕᔪᓄᑦ: ᐅᐱᒍᓱᓐᓇᓂᕐᒦᑦᑐᖅ ᐱᓂᐊᕐᓂᖅ!
ᑕᕝᕙᓂ, ᓄᓇᕕᒻᒥ ᐱᓇᓱᐊᖃᑎᒌᑦᑐᑦ ᐱᔭᕇᓐᓂᖃᓚᐅᕐᑐᑦ ᑭᖑᓪᓕᐹᓕᔪᓂᒃ ᐱᖓᓱᐃᓂᒃ ᓵᓚᐅᖃᐅᑎᐅᔪᓂᒃ:
ᐃᓕᖓᔪᖅ ᓄᕝᕕᑎᐅᑉ ᐃᓕᓐᓂᐊᕕᖓᓄᑦ, ᐃᕗᔨᕕᒃ:
- ᐱᓇᓱᐊᖃᑎᒋᔭᖏᑦ ᑎᐊᓱᕇ ᖃᐅᓈᓘᑉ ᐅᓪᓗᕆᐊ ᒪᖏᐅᓪᓗ, ᐃᓕᓐᓂᑎᑦᓯᔨᖓᓗ ᐋᓂ ᓚᕕᐊᒃ, ᐱᖓᔪᖕᖑᓚᐅᔪᑦ ᐳᕐᑐᓂᓕᒻᒥ 1 ᐊᕕᑦᑐᓯᒪᒍᑎᖓᓂ ᐱᓇᓱᐊᕐᓯᒪᔭᒥᓄᑦ “ᓂᕈᒥᓐᓃᖅ/ᓂᓪᓚᓱᓐᓃᖅ ᓱᕐᕃᕙ ᐃᑉᐱᓂᐊᕐᓂᒥᒃ ᐊᑦᑑᔭᕐᑕᐅᓂᕐᒧᑦ?”
- ᐱᓇᓱᐊᖃᑎᒌᔭᖏᑦ ᐃᓕᓴᐱ ᐁᓇᓕᐅᑉ ᔨᐊᓂᕕᐊᕝ ᓯᒥᒐᒃ, ᐃᓕᓐᓂᐊᑎᑦᓯᔨᖓᓗ ᓂᐊᓕ ᑐᕕᖅ, ᑎᒍᓯᓚᐅᔪᑦ ᐱᓪᓗᑯᑦᑐᒥᒃ “ᐃᓗᕐᖁᓯᑎᒍᑦ ᐊᑑᑎᓯᒪᓂᕐᒧᑦ” ᐁᑦᑑᑎᒥᒃ ᑖᑦᓱᒧᖓ ᐱᓇᓱᐊᕐᑕᒥᓄᑦ “ᐱᐅᓯᕐᓱᓱᑎᒃ ᓂᕈᒥᑦᑎᓯᓲᑦ.”
ᐃᓕᖓᔪᖅ ᔮᓂᒻᒪᕆᐅᑉ ᐃᓕᓐᓂᐊᕕᖓᓄᑦ, ᑰᔾᔪᐊᒥ: ᑌᕉᓐ ᐊᕐᓇᑐᒃ, ᐃᓕᓐᓂᐊᑎᑦᓯᔨᖓᓗ ᕚᕐᔭᓀ ᓅᕆᕚᕐ ᑎᒍᓯᓚᐅᔪᖅ ᐱᓪᓗᑯᑦᑐᒥᒃ “ᓄᐃᑦᓯᓂᕐᒧᑦ” ᐁᑦᑑᑎᒥᒃ ᑖᑦᓱᒧᖓ ᐱᓇᓱᐊᕐᑕᒥᓄᑦ “ᓲᖑᓯᓴᒋᐊᓪᓚᒍᓐᓇᑐᖅ ᐃᑯᒪᖁᑎᐅᔪᒥᒃ ᐱᓱᓪᓗᓂ.”
ᑌᒫᒃ ᐱᔪᕕᓂᐅᒐᓗᐊᕈᑎᒃ ᐱᓐᓂᖏᒃᑲᓗᐊᕈᑎᒃ ᓵᓚᖃᐅᑎᒥᒃ, ᐊᐱᕆᒍᕕᑦ ᑳᕈᓃᓐ ᓂᐊᓕᒥᓪᓗ ᖃᓄᖅ ᑐᑭᖃᒍᔾᔨᒪᖔᑕ ᑖᒃᑯᓄᖓ ᐃᓕᓐᓂᐊᑎᓄᑦ ᑌᒫᒃ ᐃᓚᐅᒋᐊᒥᒃ ᑯᐯᒃ ᓄᓇᓕᑐᖃᑦᓴᔦᑦ ᓱᑯᐃᔦᓂᕐᒧᑦ ᐱᓂᐊᕐᓂᖓᓂ, ᓇᓗᕐᖁᑎᒐᓛᖕᖏᑐᑦ ᑭᐅᒍᑎᒥᓂᒃ: ᐱᕈᕐᓴᔪᐃᑦ ᐃᒻᒥᓂᕐᓱᒍᓐᓇᓂᕐᑎᒍᑦ; “ᖃᐅᔨᑦᓱᑎᓪᓗ ᐃᒻᒥᓂᒃ ᑕᕝᕘᓇ ᐱᖃᑎᒥᑎᒍᑦ, ᑕᕝᕘᓇ ᐃᓅᓱᒃᑐᑎᒍᑦ/ᐅᕕᒃᑲᑎᒍᑦ ᑌᒫᑦᓭᓇᖅ ᐃᓅᓱᒃᑑᒐᒥᒃ/ᐅᕕᒃᑲᐅᒐᒥᒃ;” ᑕᐅᓯᑕᓐᓂᐅᔪᖅ “ᐊᑭᑖᕐᖃᔭᔾᔭᖏᑦᑌ ᑖᓐᓇ;” ᐊᖏᓖᒋᐊᕐᓯᒪᔪᖅ ᓇᒻᒥᓂ-ᑲᑦᓱᙰᓐᓂᕆᔭᖏᓐᓂᒃ. ᐃᓱᒪᒍᓯᖅ ᑖᓐᓇ ᐅᖃᐅᓯᕆᔭᐅᔪᖅ ᐃᓕᓐᓂᐊᑎᒧᑦ ᓯᐊᓂᕕᐊᕝ ᓯᒥᒐᕐᒧᑦ: “ᐅᑎᕋᒪ ᓄᓇᕕᒻᒧᑦ, ᐃᑉᐱᓂᐊᓚᐅᔪᖓ ᑲᑦᓱᙰᑦᑑᒋᐊᒥᒃ.” ᐊᒻᒪᓗ ᓱᓀᓐᓈ ᐊᓕᐊᒋᓂᕐᐹᕆᓚᐅᔭᖓ ᑕᒪᑦᓱᒪ ᐊᑑᑎᓂᑦᓯᐊᕌᓘᓚᐅᔫᑉ? “ᑲᑎᓯᓂᖅ ᓄᑖᓂᒃ ᐃᓄᖕᓂᒃ ᐅᖄᖃᑎᒋᑦᓱᒋᓪᓗ. ᐊᒻᒪᓗ ᐱᖃᑎᑖᕆᐅᕐᓂᒥᒃ ᐊᓯᖏᓐᓂᒃ ᐱᓯᒪᔪᓂᒃ ᑯᐯᒃᒥᐅᓂᒃ.”
ᑌᒪᓗ ᑕᒪᓐᓇ ᓱᓇᒦᕗᖅ ᐱᒍᒪᓯᒪᒐᔭᕐᑕᕗᑦ ᓯᕗᓂᕐᒥ ᐃᓚᐅᖃᑦᑕᕋᔭᕐᑐᓄᑦ, ᑌᒣᒻᒪᑦ ᑕᑰᑎᓛᕐᖁᒍᑦ ᑌᑲᓂ ᐊᕐᕌᒎᓛᕐᑐᒥ!