ᐃᓂᓪᓚᑎᕐᑕᐅᓯᒪᔪᖅ ᑯᐯᒻᒥ ᓄᓇᖃᕐᖄᓯᒪᔪᐃᑦ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᓂᖏᓐᓄᑦ ᐊᒻᒪᓗ ᖃᐅᔨᒪᔨᒻᒪᕇᑦ ᑲᑐᑦᔨᖃᑎᒌᕝᕕᖓᓄᑦ (QASEA), 2025-ᒥ ᓇᓪᓕᐅᑎᕗᖅ 25 ᐊᕐᕌᒍᐃᑦ ᒪᑭᑕᓕᕐᓂᖓᓄᑦ ᑖᑦᓱᒪ ᓱᖃᑦᓯᑎᑦᓯᓂᐅᓲᑉ, ᐊᕐᕌᒍᑕᒫᑦ ᑲᑎᖃᑎᒌᑦᑎᓯᓂᐅᑦᓱᓂ 80-ᓂᑦ ᐃᓕᓐᓂᐊᑎᓂᑦ ᓴᕐᕿᑎᑦᓯᓂᖃᕐᑎᓗᒋᑦ ᐃᒻᒥᒍᑦ ᐱᓇᓱᐊᕐᓯᒪᔭᒥᓂᒃ. ᑕᒡᒐᓂ ᐊᕐᕌᒍᒥ ᐱᐅᓯᐅᓛᓕᕐᒥᔪᖅ ᑲᑐᑦᔨᖃᑎᒌᓪᓗᑎᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᓗ ᐊᓪᓓᑦ ᐃᓕᓴᕐᓂᓕᕆᕕᖓᓗ ᐱᓇᓱᐊᖃᑎᒌᓛᕐᓂᐊᑐᑦ ᑰᑦᔪᐊᕌᐱᒻᒥ ᒑᑉᒪᑰᔅᑎᒥᓪᓗ ᓇᑦᓯᐊᓕᐅᑦ 18, 19, 20-ᒥ, 2025-ᖑᑎᓪᓗᒍ.

“ᓴᕐᕿᔮᕐᑎᓯᓂᖃᕐᓗᑎᒃ ᐱᐅᓯᖃᓛᕐᑐᑦ ᐅᓄᕐᓯᕙᓪᓕᐊᓂᖃᕐᑎᓗᒋᑦ ᓵᓚᓖᑦ. ᑌᒪ, ᐃᓕᓐᓂᐊᑏᑦ ᐱᓇᓱᐊᕐᑕᕕᓂᕐᒥᓂᒃ ᓄᐃᑕᑎᑦᓯᓛᕐᑐᑦ ᐃᓕᓐᓂᐊᕕᒻᒥᓂ. ᓂᕈᐊᕐᑕᕕᓃᑦ ᑌᒪ ᐊᐅᓪᓚᓛᕐᓱᑎᒃ ᓱᖃᑦᓯᑎᑕᐅᓂᕐᒧᑦ ᐁᓗᑎᒃ. ᐊᕐᕌᒍᐃᑦ ᐊᒥᓱᐃᑦ ᓈᓯᒪᓕᕐᑐᑦ, ᑕᑯᖃᑦᑕᓯᒪᓕᕐᑐᒍᑦ ᐊᑕᐅᓯᐅᑦᓱᓂ ᐃᓚᐅᔪᒥᒃ. ᓇᓗᓇᖕᖏᑐᖅ ᐃᓕᓐᓂᐊᑎᕗᑦ ᐱᒍᒪᓂᕐᑖᓚᕆᑦᓯᒪᒻᒪᑕ ᓇᒻᒥᓂᖅ ᐱᓇᓱᐊᕐᑕᕕᓂᕐᒥᓂᒃ ᐊᒻᒪᓗ ᓴᕐᕿᔮᕐᑎᓯᒍᓐᓇᓱᑎᒃ”, ᒫᒃ ᓚᓛᓐ, ᐊᖓᔪᕐᖄᖅ QASEA-ᒥ.

ᐊᕐᕌᒍᑕᒫᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐃᓕᓐᓂᐊᕕᖁᑎᖏᑦ ᓇᒻᒥᓂᖅ ᐃᓕᓐᓂᐊᕕᒻᒥᓂ ᓴᕐᕿᔮᕐᑎᓯᓂᖃᓲᑦ ᓱᑯᐃᔦᓂᒃᑯᑦ ᐱᓇᓱᐊᕐᓯᒪᔭᒥᓂᒃ. ᐃᓕᓐᓂᐊᑏᑦ ᖃᑦᓯᑐᐃᓐᓇᓂᑦ ᐅᑭᐅᓖᑦ ᐃᓂᓪᓚᑎᕆᑦᓱᑎᒃ ᐊᒻᒪᓗ ᓄᐃᑕᑎᑦᓯᓂᖃᓲᖅ ᓱᑯᐃᔦᓂᒃᑯᑦ ᐱᓇᓱᐊᕐᓯᒪᔭᒥᓂᒃ, 5 ᐱᓇᓱᐊᕐᑕᕕᓃᑦ ᓄᓇᕕᓕᒫᒥ ᓂᕈᐊᕐᑕᕕᓃᑦ ᑌᒪ ᐊᐅᓪᓚᓲᑦ ᓴᕐᕿᔮᕐᑎᓯᒋᐊᕐᑐᖃᑕᐅᑦᓱᑎᒃ ᑯᐯᓕᒫᒥ ᐱᓯᒪᔪᓪᓗ. ᑯᐯᒻᒥ ᓄᓇᖃᕐᖄᓯᒪᔪᐃᑦ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᓂᖏᓐᓄᑦ (QISF) ᐃᓚᐅᓕᕋᒥᒃ, ᓂᕈᐊᕐᑕᕕᓃᑦ ᐃᓚᐅᖃᑕᐅᔪᑦ ᓴᕐᕿᔮᕐᑎᓯᓲᑦ ᐊᒻᒪᓗ ᓄᐃᑕᑎᑦᓯᓂᖃᕐᓱᑎᒃ ᐱᓇᓱᐊᕐᓯᒪᔭᒥᓂᒃ. ᑌᒪ ᓯᑕᒣᑦ ᐳᕐᑐᓂᕐᓴᒦᑦᑐᑦ ᓂᕈᐊᕐᑕᐅᓂᐊᓕᕐᒥᒐᒥᒃ ᑲᓇᑕᓕᒫᒥ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᓂᖏᓐᓄᑦ (CWSF), ᑲᓇᑕᓕᒫᒥ ᓇᑭᑐᐃᓐᓇᖅ ᐱᓯᒪᔪᑦ ᑲᑎᖃᑎᒌᓐᓂᖃᕐᓱᑎᒃ 500 ᐅᖓᑖᓄᑦ ᐃᓕᓐᓂᐊᑏᑦ ᑲᑎᑦᓱᒋᑦ.

“ᐊᒥᓱᐃᑦ ᐃᓕᓐᓂᐊᑏᑦ ᐱᓇᓱᐊᓲᑦ ᐱᕐᖁᓯᑐᖃᕐᒥᓅᓕᖓᔪᓂᒃ. ᐊᓕᐊᓇᕐᑐᖅ ᑭᖑᕚᒥᑕ ᐱᒋᐊᕐᓯᒪᔭᖏᓐᓂᒃ ᒪᓕᓲᖑᒻᒪᑕ-ᐊᒻᒪᓗ ᓄᐃᑦᓯᓱᑎᒃ ᓱᑯᐃᔦᓂᒃᑯᑦ ᑌᒪ ᐅᓂᒃᑳᑐᐊᓂᐊᓕᕋᒥᒃ ᐱᐅᓯᐅᖃᑦᑕᓯᒪᔪᓂᒃ ᐊᒻᒪᓗ ᐱᕐᖁᓯᑐᖃᕐᓂᒃ. ᑕᒪᒃᑯᐊ ᐱᓇᓱᐊᕐᑕᐅᓯᒪᑐᐃᓐᓇᖏᑦᑐᑦ; ᐃᓕᓐᓂᐊᑏᑦ ᓂᕈᐊᓲᑦ ᑐᖕᖓᕕᐅᒐᔭᕐᑐᒥᒃ ᑐᕌᕐᓂᖃᓪᓚᕆᑦᑐᒥᒃ ᐃᒻᒥᓄᑦ, ᐊᒻᒪᓗ ᑌᒣᑦᓱᒍ ᑐᓴᕈᒥᓇᕐᑐᓚᕆᐊᓘᓲᖅ,” ᐅᖄᔪᕕᓂᖅ ᒫᒃ ᓚᓛᓐ, ᐊᖓᔪᕐᖄᖅ QASEA-ᒥ.

ᑯᐯᒻᒥ ᓄᓇᖃᕐᖄᓯᒪᔪᐃᑦ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᓂᖏᓐᓄᑦ ᐊᒻᒪᓗ ᖃᐅᔨᒪᔨᒻᒪᕇᑦ ᑲᑐᑦᔨᖃᑎᒌᕝᕕᖓᓄᑦ (QASEA) ᖄᖏᕐᓂᑯᓕᐅᕐᑎᐅᒐᓂ ᑎᒥᐅᔫᕗᖅ ᓱᑯᐃᔦᓂᕐᒨᓕᖓᔪᓂᒃ ᐱᑦᔪᑎᖃᕐᓂᐊᑎᓪᓗᒍ ᐊᒻᒪᓗ ᖃᐅᔨᒪᔨᒻᒪᕆᓐᓂᒃ ᓴᓇᓂᒃᑯᑦ ᓄᓇᖃᕐᖄᓯᒪᔪᓄᑦ ᐅᕕᒃᑲᓄᑦ ᓄᓇᖃᕐᖄᓯᒪᔪᐃᑦ ᓄᓇᓕᖏᓐᓂ ᐊᒻᒪᓗ ᐃᓄᐃᑦ ᓄᓇᓕᖏᓐᓂ ᑯᐯᒻᒥ. ᑕᑯᒋᐊᖃᑦᑕᕆᑦ ᐃᓕᓐᓂᐊᕕᓯᑦᑕ ᕓᔅᐳᒃᖓᓂᒃ ᖃᐅᔨᒋᐊᖁᓪᓗᓯ ᓄᓇᓕᓯᑦᑕ ᓱᑯᐃᔦᓂᕐᒧᑦ ᐱᓇᓱᐊᕐᓂᖏᓐᓂ, ᐊᒻᒪᓗ ᑐᑭᓯᒋᐊᑦᓯᐊᕈᒪᕈᕕᑦ ᑕᒡᒐᓂ ᐊᕐᕌᒍᒥ ᓴᕐᕿᔮᕐᑎᓯᓂᐅᓛᕐᑐᓂ, ᑕᑯᒋᐊᕈᓐᓇᖁᑎᑦ QASEA ᐱᑐᕝᕕᖓᓄᑦ.