ᑐᓴᕐᑎᑕᐅᓯᒪᔪᒍᑦ ᐃᓕᓐᓂᐊᑎᑦᓯᔩᑦ, ᐱᔪᓐᓇᐅᑎᓖᑦ, ᐊᒻᒪᓗ ᐱᓇᓱᑦᑎᑐᐃᓐᓀᑦ ᐊᔭᐅᕆᒐᓱᐊᕐᓂᒧᑦ ᓄᕐᖃᖓᓛᕐᓂᐊᒪᑕ ᓇᑦᔪᐃᔭᕐᕕᒃ 8-11-12-13-14, 2023.  ᑕᒪᓐᓇ ᐊᔭᐅᕆᒐᓱᐊᕐᓂᒧᑦ ᓄᕐᖃᖓᑫᓐᓇᓂᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐱᓇᓱᑦᑎᖏᓐᓂᒃ ᑭᒡᒐᑐᕐᑐᐃᑦ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖓᑕ ᐱᒋᐊᕐᑎᑕᖓ.  ᖃᐅᔨᒪᖁᕙᑦᓯ ᐃᒫᒃ ᐊᔭᐅᕆᒐᓱᐊᕐᓂᒧᑦ ᓄᕐᖃᖓᑫᓐᓇᑐᖃᓛᕐᒪᑦ ᐱᒋᐊᕐᓗᓂ ᑏᓯᒻᐱᕆ 8-ᒥ ᕿᑎᕋᓕᒥ ᐅᓐᓄᐊᑯᑦ ᐃᓱᓕᓪᓗᓂᓗ ᑏᓯᒻᐱᕆ 14-ᒥ 11 :59 pm-ᖑᕐᐸᑦ.

ᐋᕐᕿᓱᕐᓯᒪᓂᖓ ᐃᓕᓐᓂᐊᕕᐅᑉ ᐊᐅᓚᓂᕆᖓᓲᖓᓂᒃ ᐊᓯᑦᔩᒋᐊᖃᓚᕿᑎᑦᓯᒪᑦ  ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖓᑕ ᐊᐅᓚᑦᔮᓓᓂᕆᓛᕐᑕᒥᓂᒃ ᐊᔭᐅᕆᒐᓱᐊᕐᓂᒥᓂᓪᓗ ᑕᑯᑦᓴᐅᑎᑦᓯᒍᑎᒋᓛᕐᑕᒥᓂᒃ ᐅᖃᐅᓯᕆᓯᒪᔭᖓ ᐱᑦᔪᑎᒋᑦᓱᒍ.

ᑌᒣᒻᒪᑦ, ᐅᒃᑯᐊᓯᒋᐊᖃᓛᕋᑦᑕ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᑎᑦᓯᓂᕐᒥ ᐱᓇᓱᕝᕕᓕᒫᖏᓐᓂᒃ (ᐃᓕᓐᓂᐊᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᕕᖏᑦ) ᑕᒪᓐᓇ ᐊᔭᐅᕆᒐᓱᐊᕐᓂᒧᑦ ᓄᕐᖃᖓᑫᓐᓇᓂᖅ ᐊᑑᑎᓂᖓᓂ.

ᐃᓕᓐᓂᐊᓃᑦ, ᐃᓕᓐᓂᐊᑎᓂᒃ ᐅᓯᑲᑦᑕᐅᑎᖏᑦ ᐊᒻᒪᓗ ᐅᐃᒪᓇᕐᑐᒥᒃ ᐯᕆᑦᓯᕕᖃᕐᓂᖏᑦ ᑲᔪᓯᒋᐊᓪᓚᓛᕐᓱᑎᒃ ᑏᓯᒻᐱᕆ 15, 2023-ᒥ.