ᐃᓕᓴᐱ ᓚᒧᕈ ᐃᓕᓭᒍᒪᓂᓕᒃ ᐊᒥᓱᐃᓂᒃ ᐱᑦᔪᑎᖃᕐᓱᓂ, ᑭᓯᐊᓂ ᐱᓗᐊᕐᑐᒥ ᐊᑕᐅᓯᓗᐊᖕᖑᐊᖅ ᐱᑦᔪᑎᑦᓯᐊᕿᒋᓂᕐᐹᖓ: ᐃᕗᔨᕕᐅᑉ ᓄᓇᓕᖓᓂ ᑲᒃᑲᓛᑦ ᐊᓕᐊᓇᕐᑐᒥᒃ ᓯᕗᓂᑦᓴᖃᖁᑦᓱᒋᑦ.

ᐃᓕᓴᐱ ᐃᑲᔪᕐᓯᒪᔭᐅᓂᕐᓴᐅᒋᐊᓕᓐᓂᒃ ᐱᓪᓗᑯᒋᐊᓕᑎᒍᑦ ᐃᓕᓐᓂᐊᑎᑦᓯᔨ ᓄᕝᕕᑎ ᐃᓕᓴᕐᕕᒥ ᐃᕗᔨᕕᒻᒥ. ᐱᓇᓱᒐᓕᒃ ᐊᒥᓱᐃᓂᒃ ᐱᔭᑦᓴᑕᓕᒻᒥᒃ ᑭᓯᐊᓂ ᓀᓈᕐᓗᒍ, ᓯᕗᓪᓕᐸᐅᑦᔨᒍᒪᓲᖅ ᐱᒻᒪᕆᐅᓗᓂ ᐃᓕᑦᓯᕕᐅᒍᓐᓇᑐᒥᒃ ᐊᕙᑎᖃᕐᑎᓯᓂᕐᒥᒃ. ᐅᓪᓗᑕᒫᑦ, ᓈᓚᓲᖅ ᐃᓕᓵᖏᑦ ᖃᓄᐃᓘᓕᕐᒪᖔᑕ ᐃᑲᔪᕐᓯᒍᒪᑦᓱᒋᑦ ᐋᕐᕿᒍᑎᑦᓴᓂᒃ ᐊᔪᐃᓐᓇᖃᑎᒋᓗᒋᑦ.

ᐃᓕᓴᐱᒧᓪᓕ, ᐃᓕᓐᓂᐊᑎᑦᓯᔨᖕᖑᓂᖓ ᐅᓪᓗᕆᐊᓂ ᐊᓪᓚᓯᒪᔪᕕᓂᖅ. ᐳᕐᑐᓂᖅ 5-ᒦᑦᓱᓂ, ᐃᓚᒌᑦ ᖃᓪᓗᓈᑦ ᓄᓇᖓᓄᑦ ᓅᑦᑐᕕᓃᑦ, ᐊᒻᒪᓗ ᓵᖕᖓᓯᒋᐊᖃᖃᑦᑕᓯᔪᕕᓂᖅ ᐱᒐᓱᐊᒻᒪᕆᓐᓇᑐᓂᒃ ᐃᓕᕕᖃᕋᓱᐊᕐᓱᓂ ᐅᐃᒍᐃᑎᑐᑦ ᐅᖃᐅᓯᖅ ᐊᑐᕐᓱᒍ ᐃᓕᓴᕐᕕᒥᒃ. “ᐃᑲᔪᕐᓯᔭᐅᓚᐅᕐᓯᒪᔪᖓ. ᐃᓕᔭᐅᑦᓱᖓ ᐊᔪᐃᓐᓇᓂᕐᓴᐅᒍᑦᔨᕕᒻᒧᑦ ᐃᓕᓐᓂᐊᑎᑦᓯᕕᒻᒧᑦ, ᑭᓯᐊᓂ ᐊᕐᕌᒍᓂ ᐊᒥᓱᓂ ᑌᒣᒃᑯᐊᑲᓂᒃ ᐊᖑᒻᒪᑎᒐᓱᐊᕆᐊᖃᓚᐅᕐᓯᒪᔪᖓ.” ᓴᐱᕐᕆᐊᓚᐅᕐᓯᒪᖕᖏᑐᖅ, ᐊᒻᒪᓗ ᐱᔪᓐᓇᓯᐊᓚᕿᑦᓱᓂ.

ᑕᒐ ᐅᓪᓗᑕᒫᑦ ᐱᑦᓯᐊᕋᓱᐊᕈᑎᒋᓲᕆᓕᕐᑕᖓ ᐃᕐᖃᐅᒪᑦᓱᓂ ᐃᑲᔪᕐᓯᔭᐅᓯᒪᑦᓱᓂ ᑌᒫᒻᒪᕆᒃ ᐱᕙᓪᓕᑕᐅᒍᓐᓇᓯᒪᒐᒥ ᓇᒻᒥᓂᖅ ᐃᓕᓐᓂᐊᓂᒃᑰᓂᖃᕐᑎᓗᒍ: “ᑕᒪᓐᓇᑕᒐ ᐱᔪᑦᓴᐅᔮᕈᑎᒋᕙᑦᑕᕋ.”

ᐅᓪᓗᑕᒫᑦ, ᑲᒃᑲᓛᑦ ᑌᒪᖕᖓᑦ ᓄᑖᓂᒃ ᐊᐱᕐᓲᑎᑦᓴᑖᓲᑦ. ᐅᐱᒍᓱᓲᖅ ᐃᓕᑦᓯᒍᒪᓂᖏᓐᓂᒃ ᐊᒻᒪᓗ ᐃᓱᒪᖏᑦᑕ ᐅᒃᑯᐃᖔᑦᓯᐊᓂᖏᓐᓂᒃ. ᑕᒪᑐᒧᖓ ᑲᔪᓯᒍᒪᓕᕐᑐᕕᓂᖅ ᐃᓕᓐᓂᐊᕆᐊᓪᓚᕈᒪᑦᓱᓂ ᐃᓕᓴᕐᕕᔪᐊᒥ Université du Québec-ᒥ Abitibi-Témiscamingue-ᒥ ᐃᓕᓐᓂᐊᑎᑦᓯᖃᑕᐅᑦᓱᓂ ᐃᓕᓭᔨᓂᒃ ᐃᓄᑦᑎᑐᑦ ᐅᖃᐅᓯᓪᓚᕆᓪᓕᓂᒃ ᐃᓕᓵᓂᒃ.

ᐅᕕᒃᑲᐅᓂᕐᓴᐅᓱᓂ, ᐃᓕᓴᐱ ᑌᒪᖕᖓᓂᑦ ᐃᒻᒥᓂᒃ ᐃᓕᓐᓂᐊᑎᑦᓯᔨᐅᓛᕐᓂᒥᓂᒃ ᑕᑯᓐᓇᖃᑦᑕᓂᖕᖏᑐᖅ: “ᑎᒻᒥᔫᓂ ᑭᒡᒐᓕᕋᕐᑎᐅᒍᒪᓯᒪᔪᖓ ᐅᕝᕙᓘᓐᓃᑦ ᓂᐅᕕᕐᑎᓯᔨᐅᓗᖓ, ᐊᓯᒋᐊᓪᓚᖏᓐᓂᒃ ᑕᑯᓐᓇᖃᑦᑕᓚᐅᕐᓯᒪᖕᖏᑐᖓ. ᑭᖑᓂᖓᒍᑦ, ᐃᓄᒃᑎᑑᓕᕐᑎᕆᔨᐅᒍᒪᓯᒪᔪᖓ. ᑌᒪ ᐃᓕᓴᕐᕕᒥ ᐱᓇᓱᐊᓯᓚᐅᕐᓯᒪᔪᖓ ᐃᓕᓐᓂᐊᕆᐊᕐᓯᒪᑦᓱᖓ, ᐊᒻᒪᓗ ᐊᓕᐊᒋᒻᒪᕆᓚᐅᕐᓯᒪᑦᓱᒍ! ᐅᕕᒃᑲᓄᑦ ᐱᔪᑦᓴᐅᔮᓚᕿᑎᑕᐅᓲᒍᔪᖓ.

ᐱᓇᓱᑦᑐᓴᕐᓯᐅᐳᒍᑦ! ᐱᓇᓱᐊᖃᒌᑦᑐᓄᑦ ᐃᓚᐅᒋᑦ ᐅᕙᑦᑎᓄᑦ ᐱᓇᓱᒐᕐᒧᑦ ᐃᓕᒐᓱᐊᕈᑎᓕᐅᕐᓗᑎᓗ ᐅᓪᓗᒥ.
ᐃᓕᒐᓱᐊᕆᑦ ᒫᓐᓇ ➔