2023-2024 ᐃᓕᓐᓂᐊᓇᐅᑉ ᐊᕐᕌᒍᖓ: ᐊᒥᓱᐊᓗᓐᓂᒃ ᐱᕕᑦᓴᖃᕐᓂᖏᑦ ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒻᒥ
ᐊᑕᐅᓯᕐᒥᒃ ᑐᑭᒨᕐᑐᒥᒃ ᖃᐅᔨᒍᒪᕈᕕᑦ ᐱᓇᓱᐊᕐᑕᐅᓯᒪᔪᐃᑦ ᒥᑦᓵᓄᑦ ᐱᒍᑦᔨᒋᐊᓪᓛᕕᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒥᒃ ᐱᒍᑦᔨᔨᓄᑦ, ᐃᒣᓕᖓᒐᔭᕐᑐᖅ: ᑖᒃᑯᐊ ᐱᓇᓱᑦᑎᐅᖃᑎᒌᑦᑐᑦ ᐊᔪᐃᓐᓇᕈᑎᖃᓪᓚᕆᓲᑦ ᐃᓕᓐᓂᐊᑕᐅᔪᐃᑦ ᓱᓕᑦᓯᐊᑑᑎᒐᓱᐊᕐᓱᒋᑦ ᐃᓕᓐᓂᐊᑎᖁᑎᑦᑕ ᑭᖕᖒᒪᒋᔭᖏᓐᓂᒃ ᒪᓕᑦᑐᓂᒃ.
ᑌᒣᒻᒪᑦ, ᓀᓪᓕᑎᕐᓯᒪᔪᖅ ᐊᓪᓚᓯᒪᔪᖅ ᐃᓗᐃᑦᑐᒥᒃ ᑐᑭᓯᓇᕐᑎᓯᕐᖃᔭᖕᖏᑐᖅ, ᐱᓇᓱᑦᑏᑦ ᐃᑲᔪᕐᓂᖃᓲᖑᒻᒥᒪᑕ ᐊᓯᖏᓐᓂᑦ ᐃᓕᓐᓂᐊᕕᓐᓂᑦ, ᐊᑦᔨᒌᖕᖏᑐᓂᒃ ᐱᒋᐅᕐᓴᑎᑦᓯᓂᖃᕐᓱᑎᒃ ᐃᓕᓐᓂᐊᕖᑦ ᐱᓇᓱᑦᑎᖁᑎᖏᓐᓂ. ᑖᓐᓇ ᐊᓪᓚᓯᒪᔪᖅ ᓇᓗᓀᕐᓯᕗᖅ ᐊᕐᕌᒎᓛᐅᔫᑉ ᐱᓇᓱᐊᕐᓂᕕᓂᖏᓐᓂ.
ᐱᒋᐊᖕᖓᐅᑎᒋᑦᓱᒍ, ᓱᓕᑦᓯᐊᑐᒥᒃ ᐅᖃᓚᐅᕋᑕᖕᖏᓚᒍᑦ: ᐊᑕᐅᓯᐊᐱᒻᒥᒃ ᑐᑭᒨᕐᑐᒥᒃ ᐊᓪᓚᕋᓱᐊᕈᑦᑕ ᓀᓗᐊᕐᑐᖅ ᐱᓇᓱᐊᕐᑕᐅᖃᑦᑕᓯᒪᓕᕐᑐᓂᒃ ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓃᑦ ᐱᓇᓱᑦᑎᖏᓐᓄᑦ. ᑐᕌᒐᖃᕐᓱᑎᒃ ᐊᔪᐃᓐᓈᕆᓂᕐᒥᒃ “ᐃᓕᓐᓂᐊᑎᓂᑦ ᐃᓚᐅᑎᑦᓯᓯᐊᕐᓂᒥᒃ ᐊᒻᒪᓗ ᖃᓄᐃᖕᖏᓯᐊᕐᓂᖏᓐᓂ ᐊᑐᓂᑦᓯᐊᖅ ᐱᒍᑦᔭᐅᓂᒃᑯᑦ ᓴᐳᒻᒥᔭᐅᓂᒃᑯᓗ ᐃᑲᔪᕐᓯᓂᐊᕐᑎᓗᒋᑦ ᐱᕈᕐᐸᓕᐊᓂᖏᓐᓂ ᐊᒻᒪᓗ ᐃᓕᑦᓯᒍᑎᒋᓂᐊᕐᓗᒍ ᓈᒻᒪᓯᐊᕐᑐᑯᑦ ᐊᒻᒪᓗ ᐃᓗᕐᕈᓯᒥᒃ ᐃᓗᓕᖃᑦᓯᐊᑎᓪᓗᒍ.” ᐃᓚᒋᐊᓪᓚᑐᒥᒃ, ᐱᒍᑦᔨᕕᐅᑉ ᐋᕐᕿᓯᒪᒍᓯᖓᑕ ᐃᓂᓪᓚᑕᐅᒪᓂᖓ ᒪᓕᑦᑕᐅᓲᒥᒃ ᐱᓯᒪᓪᓚᕆᑦᑐᖅ ᖁᐊᕐᓭᔭᐅᒪᔪᓂᒃ-ᖃᐅᔨᒪᓂᓖᑦ ᒪᓕᑦᑕᐅᒍᓯᖓᓂᒃ.
ᒪᑯᐊ ᐆᑦᑑᑏᑦ…
“ᑲᒪᒋᔭᖃᓪᓚᕆᓲᖑᔪᒍᑦ ᐃᓱᒫᓗᒍᑎᒋᔭᑦᑎᓂ ᐱᐊᕋᕐᒥᒃ ᐊᒻᒪᓗ ᐱᓇᓱᐊᕐᓂᖃᓲᖑᑦᓱᑕ ᑲᑐᑦᔨᖃᑎᒌᓐᓂᑯᑦ ᐃᓕᓐᓂᐊᕖᓪᓗ ᐊᑐᓂ, ᐃᓚᒌᓪᓗ ᐊᑐᓂ ᐊᒻᒪᓗ ᓄᓇᓖᓪᓗ ᐊᑐᓂ. ᐱᒋᐅᕐᓴᑎᑦᓯᓂᖃᓲᖑᔪᒍᑦ ᐱᓇᓱᑦᑎᖁᑎᑦᑎᓂᑦ ᐃᓕᓐᓂᐊᕕᓐᓂ ᓄᓇᓕᐅᑉ ᐃᓗᐊᓂ ᐃᒻᒥᓂᕐᓱᕈᓐᓇᓯᖁᓪᓗᒋᑦ ᐃᑲᔪᕐᓯᒐᓱᐊᕐᓂᒥᒃ ᐱᒍᑦᔨᓂᖃᑦᓯᐊᖁᓪᓗᒋᑦ ᐃᓕᓐᓂᐊᑎᓂᒃ.
ᐱᐅᓯᒋᔭᐅᔪᓂ ᐃᓱᐊᕐᓭᓃᑦ ᐊᒻᒪᓗ ᖃᓄᐃᓘᒋᐊᕐᓃᑦ ᐱᓗᐊᕐᑐᒥ ᐃᓚᐅᓂᓕᓐᓄᑦ ᐅᐃᕆᒪᓂᒃᑯᑦ ᐊᑐᕐᓂᓗᓐᓂᒥᒃ
ᐃᓕᓐᓂᐊᑎᓂ ᐃᓱᐊᕐᓭᔩᑦ ᐊᒻᒪᓗ ᐃᓕᓐᓂᐊᑎᓂ ᐃᑲᔪᕐᑏᑦ ᐱᔪᓐᓇᐅᑎᓖᑦ ᐊᕐᕌᓂ ᐱᒋᐅᕐᓴᑎᑕᐅᓂᖃᓚᐅᔪᑦ ᓱᒋᐊᕈᓐᓇᓯᖁᓪᓗᒋᑦ ᐅᐃᕆᒪᔪᓂᒃ ᐊᑐᕐᓂᓗᑦᑐᖃᑐᐊᕐᐸᑦ (ᐃᓗᕐᕈᓯᑎᒍᑦ ᒪᓕᓐᓂᑯᑦ) ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᑦᑎᖏᓐᓄᑦ ᐱᒋᐅᕐᓴᑎᑕᐅᑦᓱᑎᒃ.
ᑖᑦᓱᒪ ᐱᒋᐅᕐᓴᑎᑦᓯᒍᑕᐅᓂᖓ ᐊᖏᓂᕐᓴᒥᒃ ᑐᕌᕐᓂᖃᓪᓚᕆᑦᑐᖅ ᐃᓕᓴᕐᓂᓕᕆᓂᒃᑯᓗ ᐃᓘᓐᓈᒍᑦ ᐊᒻᒪᓗ ᐱᑦᔪᑎᖃᕐᓱᑎᒃ ᓄᐃᑦᓯᒐᓱᐊᕐᓂᒥᒃ “ᐅᐃᕆᒪᔪᖃᓕᕐᐸᑦ ᐱᐅᓯᐅᒋᐊᓖᑦ ᐃᓕᓐᓂᐊᕕᐅᑉ ᐃᓗᐊᓂ.” ᑖᓐᓇ ᐱᐅᓯᑦᓴᓕᐊᕆᔭᐅᓯᒪᔪᖅ, ᐱᓯᒪᑦᓱᓂ ᐱᖁᔭᒥᒃ ᐊᒻᒪᓗ ᐸᕐᓇᑕᐅᒪᔪᒥᒃ ᐊᑐᓕᕐᑎᑕᐅᓚᐅᕐᑐᕕᓂᕐᒥᒃ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᓄᑦ, ᐆᑦᑐᕋᐅᑎᐅᓛᕐᓂᐊᑐᖅ ᓄᓇᓕᓐᓂ ᐱᖓᓱᓂᑦ ᓄᓇᕕᒻᒥ ᐃᓕᓐᓂᐊᓇᐅᑉ ᐊᕐᕌᒍᖓᓂ 2024-2025ᒥ.
“ᐱᒻᒪᕆᐅᑎᑦᓯᓚᕆᑦᑐᒍᑦ ᐅᐃᕆᒪᑦᑌᓕᒪᓂᕐᒥᒃ, ᖃᓄᐃᓘᒋᐊᕐᓃᑦ ᐃᒻᒥᒎᕐᑐᑎᒍᑦ ᐊᒻᒪᓗ ᐃᒻᒥᓂᒃ ᐱᓂᕐᓗᑌᓕᒪᓂᕐᒥᒃ. ᐊᕙᑎᖃᖁᑎᔨᔪᒍᑦ ᐊᑦᑕᓇᖕᖏᑐᑦᓯᐊᒥ ᓄᐃᑕᑎᑦᓯᖔᕐᑎᓗᒍ ᐱᕈᕐᐸᓕᐊᓂᕐᒥᒃ ᐊᒻᒪᓗ ᐃᓕᓐᓂᐊᓂᕐᒥᒃ ᐃᓕᓐᓂᐊᕕᖁᑎᑦᑎᓂ. ᓯᕗᓂᕐᒥ, ᐱᐅᓯᑦᓴᓕᐊᕆᔭᐅᓯᒪᔪᑦ ᑲᔪᓯᑎᑕᐅᓂᖃᕋᔭᕐᑐᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐃᓕᓐᓂᐊᕕᓕᒫᖏᓐᓂ ᒫᓐᓇ ᐱᒋᐊᕐᓗᒍ ᐊᒻᒪᓗ 2025-2026 ᐃᓕᓐᓂᐊᓇᐅᑉ ᐊᕐᕌᒍᖓᓂ.
ᐃᓕᒃᑰᑐᒥᒃ ᐃᓕᓐᓂᐊᓃᑦ
ᐊᕐᕌᓂ ᐃᓕᓐᓂᐊᓇᐅᓚᐅᔪᒥ, ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒻᒥ ᐱᓇᓱᑦᑏᑦ ᒪᓂᒪᓚᐅᔪᑦ ᐊᒥᓱᐃᓂᒃ ᐊᑐᕐᓂᖃᓪᓚᕆᑦᑐᓂᑦ ᐱᒋᐅᕐᓴᑎᑦᓯᓂᖃᕐᓱᑎᒃ ᐋᕐᕿᓱᐃᓂᕐᒥᒃ ᐃᓕᒃᑰᑐᒥᒃ ᐃᓕᓐᓂᐊᓂᕐᒧᑦ ᐸᕐᓀᒍᑏᑦ (IEP). ᐅᖄᕈᑎᐅᓯᒪᔪᖅ, ᐊᓯᖃᕋᓗᐊᕐᒥᑎᓪᓗᒍ, ᑲᔪᓯᑎᑦᓯᓂᖅ ᐃᓕᒃᑰᑐᒥᒃ ᐃᓕᓐᓂᐊᓂᕐᒧᑦ ᐸᕐᓀᒍᑎᓂᒃ ᐃᓚᐅᑎᑕᐅᖁᓪᓗᒋᑦ ᐃᓕᓐᓂᐊᑏᑦ ᑭᖕᖒᒪᑦᓯᔪᑦ ᐃᒻᒥᒍᑦ.
“ᐃᓕᒃᑰᑐᒥᒃ ᐃᓕᓐᓂᐊᑎᑦᓯᒍᑏᑦ ᐸᕐᓇᑕᐅᒍᑎᖓ ᐊᑐᕐᑐᒪᕆᒃ ᐸᕐᓀᒍᑎᐅᑦᓱᓂ ᐊᒻᒪᓗ ᑐᓴᐅᒪᖃᑎᒌᒍᑎᐅᓲᖑᑦᓱᓂ ᓱᒋᐊᕐᓂᕆᔭᐅᔪᐃᑦ ᐱᑦᔪᑎᒋᑦᓱᒋᑦ ᐃᓕᓐᓂᐊᕕᓕᒫᑦ ᐃᑲᔪᕐᑎᖏᓐᓄᑦ. ᐱᓇᓱᐊᖃᑎᒌᒍᑎᐅᑦᓱᓂ ᐱᐅᓯᐅᓲᑦ ᐃᓕᓐᓂᐊᑏᑦ ᐃᑉᐱᓂᐊᕐᓂᖃᕐᑎᓱᒋᑦ ᐱᒻᒪᕆᐅᔪᖁᑎᐅᓂᕐᒥᒃ, ᖁᕝᕙᐅᒥᒍᑎᒋᑦᓱᒍ ᐊᒻᒪᓗ ᑲᒪᒋᔭᐅᑦᓯᐊᓂᕐᒥᒃ ᐱᕈᕐᐸᓕᐊᑦᓯᐊᕈᓐᓇᓯᓗᑎᒃ ᐱᒍᓐᓇᕕᓕᒫᒥᒍᑦ.
ᑲᔪᓯᔪᒥᒃ ᐱᒋᐅᕐᓴᑎᑕᐅᓂᖅ
ᓄᐃᑦᓯᖁᓪᓗᒋᑦ ᑕᑯᓐᓇᑕᐅᒍᓯᕐᒥᒃ, ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒻᒥ ᐱᓇᓱᑦᑏᑦ ᑲᒪᒋᔭᖃᓚᐅᔪᑦ ᑲᔪᓯᑎᑦᓯᓂᕐᒥᒃ ᐱᒋᐅᕐᓴᑎᑦᓯᓂᐅᔪᓂ ᐊᕐᕌᒍᓕᒫᒥ.
ᓯᕗᓪᓕᐹᒥ ᓄᓇᓕᑦᑎᒍᑦ ᐱᒋᐅᕐᓴᑎᑦᓯᓃᑦ ᐃᑲᔪᕐᑎᓂ ᐃᓕᓐᓂᐊᑎᑦᓯᔨᓂ ᐅᖃᐅᓯᓕᓐᓂᑦ ᐱᖓᓱᐃᓂᑦ ᐃᒻᒥᒎᕐᑐᓂ, ᑐᑭᓯᓇᕐᑎᓯᒍᑎᖃᕐᓱᓂ “ᐃᓕᓐᓂᐊᓂᓖᑦ”. ᑕᒪᒃᑯᐊ ᒪᕐᕈᕕᑦᓱᑎᒃ-ᑕᕐᕿᑕᒫᑦ ᑲᑎᒪᓃᑦ ᐱᐅᓯᖃᖃᑦᑕᓚᐅᔪᑦ ᒪᕐᕉᓂᒃ ᐱᑦᔪᑎᖃᕐᓱᑎᒃ ᑐᓴᐅᒪᔭᐅᒋᐊᓕᓐᓂ ᑐᑭᓯᓇᕐᑎᓯᒍᑎᐅᑦᓱᑎᒃ ᐱᔭᑦᓴᕆᔭᐅᔪᓂ ᐊᒻᒪᓗ ᐱᐅᓯᐅᒋᐊᓕᓐᓂ ᐃᓕᓐᓂᐊᑎᑦᓯᔨᓄᑦ ᐃᑲᔪᕐᑎᓄᑦ, ᐃᓚᐅᑎᓪᓗᒋᑦ ᐱᕕᑦᓴᖃᕐᑎᓯᒍᑎᐅᑦᓱᑎᒃ ᐃᓕᓐᓂᐊᑎᑦᓯᔨᓂᒃ ᐅᖄᖃᑎᒌᖃᑦᑕᓂᕐᒥᒃ ᐊᑦᔨᒌᖕᖏᑐᓂ ᓄᓇᓕᓐᓂ ᐱᓯᒪᔪᓂᒃ ᐊᑕᐅᑦᓯᑯᑦ ᑲᑎᖃᑎᒌᖃᑦᑕᖁᓪᓗᒋᑦ ᐅᖄᖃᑎᒌᓪᓗᑎᒃ ᐊᒻᒪᓗ ᐱᕕᑦᓴᖃᕐᑎᑕᐅᖁᓪᓗᒋᑦ ᐱᓀᓗᑕᒋᔭᒥᓂᒃ ᐅᖄᖃᑎᒌᓐᓂᒥᒃ ᐊᑑᑎᓯᒪᔭᕐᒥᓂᓪᓗ.
ᑭᖑᓂᖏᑦ ᐱᒋᐅᕐᓴᑎᑦᓯᓃᑦ ᐃᓕᒃᑰᑐᓂᑦ ᐃᓕᓐᓂᐊᓃᑦ ᐊᒻᒪᓗ ᑕᐸᓀᓪᓕᐅᑎᑦᓯᑌᓕᓂᕐᒥᒃ ᐱᓪᓗᑯᒋᐊᓕᓕᕆᔩᑦ. ᐱᓇᓱᐊᖃᑎᖃᕐᓱᑎᒃ ᕙᓃ ᐃᓕᓐᓂᐊᕕᖓᓂ, ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒻᒥ ᐱᓇᓱᑦᑏᑦ ᓄᐃᑦᓯᓯᒪᔪᑦ ᐊᑦᔨᒌᖕᖏᑐᓂᑦ ᐃᓕᑕᕆᔭᐅᒍᑎᑖᕐᕕᐅᒍᓐᓇᑐᓂ ᐱᒋᐅᕐᓴᑎᑦᓯᓂᖃᕐᓱᑎᒃ ᒪᓕᑦᓱᒋᑦ ᐱᐅᓯᐅᓕᕐᑐᑦ ᓇᒻᒥᓂᕆᓪᓚᕆᑦᑕᕗᑦ. ᐱᒋᐅᕐᓴᑎᑦᓯᓃᑦ ᑐᕌᒐᕆᓯᒪᔭᖏᑦ ᓲᖑᓰᒋᐊᖁᓪᓗᒋᑦ ᐱᔪᓐᓇᓂᕆᔭᐅᔪᓂ ᑖᒃᑯᓂᖓ ᐃᓄᓐᓂᑦ ᐱᔭᑦᓴᖃᓪᓚᕆᑦᑐᓂᑦ ᐃᓕᓐᓂᐊᑏᑦ ᐊᓂᒎᑎᑦᓯᐊᖁᓪᓗᒋᑦ ᐱᓐᓇᓂᖃᑦᓯᐊᖏᓐᓂᐹᑦ.
ᓀᓪᓕᑎᕐᓗᒍ, ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᕕᒻᒥ ᐱᓇᓱᑦᑏᑦ ᕿᑲᑐᐃᓐᓇᓯᒪᖕᖏᑐᑦ, ᓂᓪᓕᐅᑎᒋᑦᓱᒋᑦ, 2023-2024 ᐊᕐᕌᒍᖏᓐᓂ. ᓱᓇᓂᒃ ᑕᑯᓐᓇᖑᐊᕐᕿᑦ ᓯᕗᓂᕐᒥ ᓂᕆᐅᒋᕈᓐᓇᑕᑦᑎᓂᑦ ᐃᓕᓐᓂᐊᓇᖅ ᐊᕐᕌᒍᖓ ᐱᒋᐊᓛᕐᑎᓗᒍ?
