ᐃᓄᒻᒪᕇᑦ ᐃᓕᓐᓂᐊᕕᖓᓂ ᐱᓇᓱᒐᕐᓂᓗ ᐱᒋᐅᕐᓴᑎᑕᐅᕕᖓᓂ ᐃᓗᓕᖓᓃᑦᑐᖅ ᐃᓕᓐᓂᐊᓂᕐᒥᒃ ᑲᔪᓯᓂᖅ ᑌᔭᐅᒍᓯᖓ ᐊᓯᑦᔨᑕᐅᓯᔪᖅ. ᓱᒐᒥ? ᐊᓯᑦᔨᑕᐅᓚᕿᓯᔪᖅ ᐱᑦᔪᑎᖃᕐᓱᓂ ᐊᒥᓱᖕᖑᕙᓪᓕᐊᑐᐃᓐᓇᒪᑕ ᐃᓕᓐᓂᐊᑕᐅᔪᑦ ᐃᓘᓐᓇᓯᐊᑎᓗ ᐱᒍᑦᔨᕖᑦ ᒪᓂᒪᔭᐅᔪᑦ.

ᑖᓐᓇ ᐊᓪᓚᓯᒪᔪᖅ ᐊᓯᑦᔨᑕᐅᓚᕿᔪᒥᒃ ᑐᑭᓯᓇᕐᑎᓯᔪᖅ.

ᐱᒍᑦᔨᐅᑏᑦ ᒪᓂᒪᔭᐅᔪᑦ ᐃᓄᒻᒪᕇᑦ ᐃᓕᓐᓂᐊᕕᖓᓂ ᐱᓇᓱᒐᕐᓂᓗ ᐱᒋᐅᕐᓴᑎᑕᐅᕕᒻᒥ ᐊᕕᑦᑐᑕᐅᒪᔪᑦ ᐱᖓᓱᐃᓕᖓᔪᒥᒃ ᐃᓗᓕᖃᕐᓱᑎᒃ: ᐃᓘᓐᓈᒍᑦ ᐃᓕᓐᓂᐊᑎᑕᐅᓂᖅ, ᐱᔪᓐᓇᐅᑎᑖᕐᓂᒥᒃ ᐱᒋᐅᕐᓴᑎᑕᐅᓂᖅ ᐊᒻᒪᓗ ᑌᔭᐅᖃᑦᑕᓯᒪᔪᑦ ᑲᔪᓯᔪᒥᒃ ᐃᓕᓐᓂᐊᓂᖅ — ᓇᒻᒥᓂᖃᕐᕕᒃ ᐊᒻᒪᓗ ᓄᓇᓕᓐᓂ ᐱᒍᑦᔨᔩᑦ. ᐱᒋᐊᕐᓂᖓᓂ, ᐅᖄᔪᖅ ᒪᒪᑑ ᑎᐅᑉ, ᑐᑭᒧᐊᕐᑎᓯᔨ ᐃᓄᒻᒪᕇᑦ ᐃᓕᓐᓂᐊᕕᖓ ᐱᓇᓱᒐᕐᓂᓗ ᐱᒋᐅᕐᓴᑎᑕᐅᕕᒻᒥ, “ᑐᓴᖃᑦᑕᓯᒪᔪᒍᑦ ᐅᖃᕐᑐᓂᒃ ᒪᓂᒪᔭᕗᑦ ᑌᔭᐅᖃᑦᑕᓯᒪᓂᖓᓄᑦ ‘ᑲᔪᓯᔪᒥᒃ ᐃᓕᓐᓂᐊᓃᑦ’ ᑐᑭᓯᒪᔭᐅᖃᑦᑕᓂᖓᓄᑦ ᐃᓕᓐᓂᐊᑎᑦᓯᑐᐃᓐᓇᔪᕆᔭᐅᑦᓱᑕ ᐃᓕᓐᓂᐊᓂᕐᓅᓕᖓᑐᐃᓐᓇᑐᓂᒃ.”

ᑕᒪᑦᓱᒪ ᐃᓗᓕᖓᓂᒃ, ᐊᓪᓚᓯᒪᔪᖅ “ᐃᑲᔪᕐᓂᖅ” ᑐᑭᖃᕐᖁᖅ ᐱᒋᐅᕐᓴᑎᑕᐅᓂᕐᒥᒃ ᐅᖓᑖᓄᒋᐊᓪᓚᖅ ᐱᕕᑦᓴᖃᕐᑎᓯᑦᓱᓂ. ᐆᑦᑑᑎᒋᓗᒍ, ᓄᓇᒥ ᑎᒍᒥᐊᕐᑎᑯᑦ ᐃᑲᔪᕐᑕᐅᓂᖃᕈᒪᓕᕐᐸᑕ, ᐱᒋᐅᕐᓴᑎᑕᐅᓂᕐᒥᒃ ᐊᑑᑎᒐᔭᖕᖏᑐᑦ. ᐱᒍᑦᔨᔩᑦ ᐱᓇᓱᑦᑎᖏᑦ ᐱᓇᓱᐊᓯᕋᔭᕐᑐᑦ ᖃᓄᕐᑑᓗᑎᒃ ᐃᑲᔪᕐᓗᑎᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓂ.

ᑐᑭᓯᓇᕐᑎᓯᕗᖅ ᐊᖏᓂᕐᓴᕆᐊᓪᓚᒥᒃ ᐱᒍᓐᓇᕕᖃᕐᒪᑦ ᐊᒻᒪᓗ ᐊᑐᓕᕐᑎᓯᒍᓐᓇᒪᑦ. ᐊᐅᓚᑕᐅᖕᖏᒪᑕ ᐊᑦᔨᓭᓐᓇᖓᓄᑦ “ᐅᑭᐅᑭᑦᑐᐃᑦ ᐃᓕᓐᓂᐊᕕᖏᓐᓂ”, ᐃᓄᒻᒪᕇᑦ ᐃᓕᓐᓂᐊᕕᖓᑦ ᖃᐅᔨᓴᕐᓂᖃᕈᓐᓇᑐᑦ ᐱᒍᑦᔭᒥᑕ ᑭᖕᖒᒪᒋᔭᖏᓐᓂ ᐊᒻᒪᓗ ᐱᕙᓪᓕᐊᑎᑦᓯᒐᓱᐊᕐᓗᑎᒃ ᑕᒪᒃᑯᓂᖓ ᑭᖕᖒᒪᒋᔭᐅᔪᓂᑦ.

ᑐᑭᒧᐊᕐᑎᓯᔨ ᐅᖃᕐᒥᔪᖅ ᐆᒥᖓ “ᓄᓇᓕᓐᓂ”. ᐃᓄᒻᒪᕇᑦ ᐃᓕᓐᓂᐊᕕᖓ ᐱᓇᓱᒐᕐᓂᓗ ᐱᒋᐅᕐᓴᑎᑕᐅᕕᒃ ᐱᓇᓱᐊᖃᑎᖃᕈᒪᒻᒥᔪᖅ ᐃᓱᒪᒋᔭᖃᓯᒪᕐᖂᖏᑦᑐᓂᓪᓘᓃᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ, ᐃᓚᐅᑎᓪᓗᒋᑦ ᐊᕐᓀᑦ ᑲᑐᑦᔨᖃᑎᒌᑦᑐᑦ ᐊᒻᒪᓗ ᐊᓯᖏᓐᓂᑦ ᑎᒥᐅᔪᓂᑦ ᑐᖕᖓᕕᖃᓲᓂᑦ ᐃᓄᐃᑦ ᐃᓗᕐᕈᓯᖏᓐᓂ, ᐅᖃᐅᓯᖓᓂ ᐊᒻᒪᓗ ᑭᓇᐅᓂᖏᓐᓂ.

ᑌᔭᐅᒍᓯᖓ ᐊᓯᑦᔨᑕᐅᓯᔪᖅ ᐱᑦᔪᑎᖃᕐᓱᓂ ᐱᐅᓂᕐᓴᒥᒃ ᑐᑭᖃᑦᓯᐊᑐᒥᒃ ᐱᒍᑦᔨᐅᑎᓂᒃ ᐊᑐᐃᓐᓇᐅᑎᑕᐅᔪᓂᒃ ᑐᖕᖓᕕᖃᑦᓯᐊᑑᖁᓪᓗᒍ, ᐱᐅᓯᐅᒥᒋᐊᕐᓗᒍᓗ ᑕᑯᑦᓴᐅᓂᖓ, ᐃᓚᐅᑎᑕᐅᑦᓯᐊᓂᖃᖁᓪᓗᒍᓗ ᐊᒻᒪᓗ ᐅᓂᖔᕐᑕᐅᓯᐊᖁᓪᓗᒍ.