ᒪᓐᑐᔨᐊᓪ (ᑯᐯᒃ) ᓇᑦᔪᐃᔭᕐᕕᒃ 20, 2024 – ᕙᓃ ᓯᓚᑦᑐᓴᕐᕕᖓ ᑲᔪᓯᒋᐊᓪᓚᑐᒥ ᐃᓕᓐᓂᐊᓂᕐᒧᑦ ᐱᒍᑦᔨᕕᖓ ᑐᓴᕐᑎᓯᓕᕐᒥᔪᑦ ᐱᓇᓱᐊᖃᑎᖃᓂᐊᓕᕐᓂᒥᓄᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ, ᓄᓇᕕᐅᑉ ᐃᓕᓴᕐᓂᓕᕆᕕᖁᑎᖓ (ᑯᐯᒃ) ᐃᓕᑕᕆᔭᐅᒍᑎᒥᒃ ᒪᓂᒪᓂᐊᕐᓱᑎᒃ ᓯᓚᑦᑐᓴᕐᕕᒥ ᐃᓕᑕᕆᔭᐅᒍᑎᑖᕋᓱᐊᕐᓗᑎᒃ ᐃᓕᓐᓂᐊᓂᕐᒧᑦ (ACS) ᐅᐊᕈᑦᔨᑐᕐᓯᒪᔪᓂᒃ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᕐᒥᒃ. ᐱᓇᓱᐊᖃᑎᒌᓐᓂᖅ ᑮᓇᐅᔭᖃᕐᑎᑕᐅᓂᐊᕐᑐᖅ ᓴᐳᒻᒥᔭᐅᓂᐊᕐᓱᓂᓗ ᑯᐯᒃᑯᑦ ᒥᓂᔅᑕᖃᕐᕕᑯᖏᓐᓄᑦ ᐳᕐᑐᓂᕐᓴᒥ ᐃᓕᓐᓂᐊᕕᖃᕐᓂᒧᑦ ᐊᒻᒪᓗ ᓴᕐᕿᑎᑦᓯᓱᓂ ᐃᓚᒋᔭᐅᓂᕐᒧᑦ ᐸᕐᓇᓯᒪᐅᑎᓕᕆᓂᕐᒧᑦ ᑌᔭᐅᔪᒧᑦ Plan d’action nordique de la Société du Plan Nord (PAN).

ᓄᐃᑦᓯᒍᑎᖏᑦ ᓇᔪᕐᑕᐅᒐᔭᕐᑐᒥ ᖃᐅᔨᓴᕐᓂᖅ ᐊᒻᒪᓗ ᓴᕐᕿᑎᑕᐅᒌᕐᓯᒪᓂᖓ ᐱᕙᓪᓕᐊᑎᑕᐅᓂᕕᓂᖓ ᐊᕐᕌᒍᓂᑦ ᓯᑕᒪᐅᔪᖕᖏᒐᕐᑐᓂ ᕙᓃ ᓯᓚᕐᑐᓴᕐᕕᖓᓂ ᑕᐸᓀᓪᓕᐅᑎᑦᓯᑌᓕᓂᕐᒧᑦ ᐱᓪᓗᑯᒋᐊᓕᓕᕆᔩᑦ ᐱᓇᓱᕝᕕᖓᓂ, 450-ᓂᑦ ᑫᕙᓪᓚᒍᓯᕐᓂ ᐃᓕᓐᓂᐊᕋᑦᓴᖅ ACS ᓄᐃᑕᐅᓯᒪᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑭᖕᖒᒪᒋᔭᖏᑦ ᒪᓕᑦᓱᒋᑦ. ᐱᓗᐊᕐᑐᒥ, ᐃᓕᓐᓂᐊᕋᑦᓴᖅ ᒪᓂᒪᔭᐅᓂᐊᕐᑐᖅ ᐋᕐᕿᓯᒪᑎᓪᓗᒍ ᐃᓕᑕᕆᔭᐅᒍᑎᑖᕋᓱᐊᕐᑐᐃᑦ ᐃᓕᓐᓂᐊᓚᐅᕋᑎᒃ ᐃᓚᐅᓛᕐᑐᓄᑦ ᐱᓇᓱᐊᕇᕐᑐᓄᑦ ᓄᓇᕕᒻᒥ ᑕᐸᓀᓪᓕᐅᑎᑦᓯᑌᓕᓂᕐᒥᒃ ᐱᓪᓗᑯᒋᐊᓕᓕᕆᔨᓄᑦ ᐅᕝᕙᓘᓐᓃᑦ ᐃᓕᒃᑰᑐᒥᒃ ᐃᓕᓐᓂᐊᓃᑦ ᐱᓪᓗᑯᒋᐊᓕᓕᕆᔨᓄᑦ ᐱᓇᓱᕝᕕᒥᓂ. ᐃᓕᓐᓂᐊᑕᐅᓗᓂ ᑖᓐᓇ ᐱᓂᐊᕐᓂᖃᖃᑦᑕᕋᔭᕐᑐᑦ ᐆᑦᑐᕋᑦᓴᖃᑦᑕᓗᑎᒃ, ᐃᓚᐅᑎᓪᓗᒍ ᓱᓕᔪᖕᖑᐊᓗᑎᒃ ᐆᑦᑐᕋᕐᓂᖅ, ᑕᑯᓐᓇᑎᑕᐅᖃᑦᑕᓗᑎᓗ ᐊᒻᒪᓗ ᐱᐅᓕᓂᐊᕋᓕᐅᖃᑦᑕᓗᑎᒃ. ᐃᓕᓐᓂᐊᑕᖏᑦ ᐅᐊᕈᑦᔨᑐᕐᓯᒪᓂᖃᓛᕐᑐᑦ ᑕᕐᕋᒥᐅᑦ ᐱᐅᓯᒋᓲᖏᓐᓂ ᐃᓗᓕᖃᕐᓗᑎᒃ ᐊᒻᒪᓗ ᐃᓄᑦᑎᑑᕐᓂᒥᒃ ᐃᓕᓐᓂᐊᑕᐅᔪᐃᑦ ᑐᕌᕐᓂᖃᑦᓯᐊᑑᖁᓪᓗᒋᑦ ᑐᑭᓯᒪᔭᖏᓐᓂ ᐊᒻᒪᓗ ᑭᓇᐅᓂᕐᒥᓂ ᑎᒍᒥᐊᑦᓯᐊᖁᓪᓗᒋᑦ ᐊᑐᓂ. ACS-ᒥ ᐱᒋᐅᕐᓴᓂᕐᒧᑦ ᐃᓚᐅᔪᑦ ᖁᕝᕙᕆᐊᒍᑎᑖᕐᑎᑕᐅᓛᕐᑐᑦ ᐃᓕᓐᓂᐊᓂᕐᒧᑦ ᒥᓂᔅᑕᖃᕐᕕᖓᓄᑦ ᐃᓕᑕᕆᔭᐅᒍᑎᑖᕐᓗᑎᒃ ᐃᓕᓐᓂᐊᓂᕐᒧᑦ ᐅᐊᕈᑦᔨᑐᕐᓯᒪᔪᓂ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᕐᒥ.

ᐅᐊᕈᑦᔨᑐᕐᓯᒪᔪᓂ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᖅ ACS ᓄᓇᕕᒻᒥᐅᓕᒫᓄᑦ ᐊᑑᑎᔭᐅᓛᖕᖏᑑᒐᓗᐊᖅ ᑭᖕᖒᒪᒋᔭᖏᑎᒍᑦ, ᑭᓯᐊᓂᓗ ᐊᓯᖏᓐᓄᒐᓴᖅ ᓄᓇᖃᕐᖄᓯᒪᔪᓄᑦ ᐊᒻᒪᓗ ᓄᓇᓕᐊᕈᓐᓄᑦ ᐳᕐᑐᓂᕐᓴᕆᐊᓪᓚᒥ ᐃᓕᓐᓂᐊᕕᖃᑦᓯᐊᖏᑦᑐᓄᑦ. ᒪᑯᐊ ᑎᒥᐅᔪᐃᑦ ᐱᓇᓱᑦᑎᑖᕙᓪᓗᓲᑦ ᐅᐊᕈᑦᔨᑐᕐᓯᒪᔪᓂ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᕐᒥᒃ ᐃᓕᓐᓂᐊᕖᑦ, ᐯᕆᑦᓯᕖᑦ, ᐊᓂᕐᕋᕆᔭᐅᔪᐃᑦ ᐃᓚᒌᑦᑐᓄᑦ, ᐅᕕᒃᑲᓂ ᐃᑲᔪᕐᑏᑦ ᐱᒍᑦᔨᔨᖏᑦ, ᐋᓐᓂᐊᕖᑦ, ᐋᓐᓂᐊᕕᒻᒪᕇᑦ ᐊᒻᒪᓗ ᐃᓗᓯᓕᕆᕖᑦ ᐃᓚᐅᑎᓪᓗᒋᑦ ᒪᒥᓴᕐᕖᑦ ᐊᒻᒪᓗ ᐊᓂᕐᕋᐅᓚᐅᕐᑐᑐᑦ.

ᐅᖃᐅᓯᑦᓴᕆᔦᑦ:

“ᑲᔪᓯᔪᒥᒃ ᐃᓕᓐᓂᐊᕕᐅᑦᓱᑕ ᐊᓕᐊᓱᓪᓚᕆᒃᑯᒍᑦ ᐱᓇᓱᐊᖃᑎᖃᓚᖓᓂᑦᑎᓂᒃ ᐊᒻᒪᓗ ᐱᕕᑦᓴᖃᕐᑎᓯᓂᐊᕐᓂᖓᓄᑦ ᐃᓅᑦᔪᓯᒋᔭᐅᔪᓂᒃ ᐊᓯᑦᔨᑐᐃᓛᕐᓂᐊᒪᑦ ᓄᓇᓕᓐᓂ ᐃᓄᐃᑦ ᓄᓇᓕᖏᓐᓂ ᑯᐯᒻᒥ. ᑖᓐᓇ ᐱᓇᓱᐊᕐᑕᐅᓂᖓ ᑲᔪᓯᑦᓯᐊᑐᒥ ᓱᕐᕇᓂᖃᖃᑦᑕᒪᑦ ᐃᓄᓐᓂᒃ, ᐊᒻᒪᓗ ᓂᕆᐅᓐᓂᖃᕐᑐᒍᑦ ᐱᔭᕇᒍᓯᓛᕐᓂᐊᑐᓂᑦ ᐊᒥᓱᓂᑦ ᐅᐊᕈᑦᔨᑐᕐᓯᒪᔪᓂᒃ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᕐᒥᒃ ᓄᓇᕕᒻᒥ ᐊᕐᕌᒎᓛᕐᑐᓂᑦ ᙯᔪᓂ,” ᐅᖃᕐᑐᕕᓂᖅ ᑯᕆᐊᑯᕆ ᑐ ᓘᑲ, ᑐᑭᒧᐊᕐᑎᓯᔨ, ᑲᔪᓯᔪᒥᒃ ᐃᓕᓐᓂᐊᕕᖃᕐᑎᓯᓂᖅ ᐊᒻᒪᓗ ᓄᓇᓕᓐᓂ ᐱᒍᑦᔨᓃᑦ.

“ᐱᓇᓱᐊᖃᑎᒌᓐᓂᖅ ᐅᐊᕈᑦᔨᑐᕐᓯᒪᔪᓂᒃ ᐃᑲᔪᕐᑎᐅᓂᕐᒧᑦ ᐱᓪᓗᑯᒋᐊᓕᓕᕆᓂᕐᒥᒃ ᓄᑖᖑᒐᓗᐊᕐᑎᓗᒍ, ᓴᕐᕿᑎᑦᓯᕗᖅ ᐱᓇᓱᐊᖃᑎᖃᕐᓂᑯᑦ ᕙᓃ ᓯᓚᑦᑐᓴᕐᕕᖓᓂᒃ ᐱᕙᓪᓕᐊᓯᒪᓕᕐᑐᒥ ᐊᕐᕌᒍᐃᑦ ᐱᖓᓲᔪᕐᑐᐃᑦ ᐃᓗᐊᓂ ᐅᖓᑖᓄᓪᓗ ᑲᑎᕕᒃ ᐃᓕᓴᕐᓂᓕᕆᓂᒃᑯᓗ ᐱᒍᑦᔨᒋᐊᓪᓛᕕᒻᒥ ᐊᒻᒪᓗ ᓴᑐᕐᓇᑐᓕᓐᓂ ᐃᓕᓐᓂᐊᕕᖃᕐᓂᓄᑦ. ᐅᑉᐱᒋᔭᖃᑦᓯᐊᑐᖓ ᓯᓚᑦᑐᓴᕐᕕᒥ ᐃᓕᑕᕆᔭᐅᒍᑎᑖᕋᓱᐊᕐᓗᑎᒃ ᐃᓕᓐᓂᐊᓂᕐᒧᑦ ᑎᑭᐅᑎᓛᕐᓂᐊᒪᑦ ᑭᖕᖒᒪᒋᔭᑦᑎᒍᑦ ᐱᓇᓱᕝᕕᑎᓐᓂ. ᑖᓐᓇ ᐱᓇᓱᐊᕐᑕᖅ ᑐᖕᖓᕕᖃᕐᖁᖅ ᐱᓇᓱᑦᑏᑦ ᐃᓕᑕᕆᔭᐅᒪᕆᐊᖃᕐᓂᖏᓐᓄᑦ ᐃᓕᓐᓂᐊᓚᐅᕋᑎᒃ ᐊᒻᒪᓗ ᐱᔪᓐᓇᐅᑎᒋᓯᒪᔭᖏᑦ ᐱᓇᓱᒐᕐᒨᓚᐅᕋᑎᒃ. ᑖᓐᓇ ᐱᐅᔪᐸᐅᔮᓗᒃ. ᓂᕆᐅᓐᓂᖃᕐᑐᒍᑦ ᐱᒋᐅᕐᓴᑎᑕᐅᓛᕐᓂᐊᑐᑦ ᓱᓕᑦᓯᐊᑐᒥ ᐃᑉᐱᓂᐊᕆᔭᖃᑦᓯᐊᓂᐊᕐᓂᖏᓐᓄᑦ ᐊᒻᒪᓗ ᐱᒍᒪᓂᖃᑦᓯᐊᓗᑎᒃ ᖃᐅᔨᒪᓂᕐᒥᓂᒃ ᐅᖓᑖᓄᒋᐊᓪᓚᒃ ᐱᒐᓱᐊᖁᓪᓗᒋᑦ, ᓲᖑᓯᒋᐊᕐᓗᒋᓪᓗ ᐱᔪᓐᓇᐅᑎᒋᒌᕐᑕᖏᑦ ᐊᒻᒪᓗ ᓄᑖᓂᓪᓗ ᐱᔪᓐᓇᐅᑎᑖᕐᓗᑎᒃ,” ᒪᒪᑑ ᕙᓕᓘ ᑎᐅᑉ, ᑐᑭᒧᐊᕐᑎᓯᔨ ᐃᓄᒻᒪᕇᑦ ᐃᓕᓐᓂᐊᕕᖏᓐᓂ ᐊᒻᒪᓗ ᐱᓇᓱᒐᕐᓂᒃ ᐱᒋᐅᕐᓴᑎᑕᐅᕕᓐᓂ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ.

— 30 — 

ᑐᑭᓯᒋᐊᑦᓯᐊᒍᒪᕈᕕᑦ, ᐅᖄᕕᒋᓗᒍ:

Marguerite Corriveau, Communications and Corporate Affairs, Vanier College
514-744-7500 ext. 7596 | corrivem@vaniercollege.qc.ca

ᔮᑦ ᑐᔅᓅ ᐱᐊᕐᓃ, ᐊᑕᐅᑦᓯᑰᕐᑎᓯᔨ ᑐᓴᐅᒪᖃᑎᒌᕈᑎᓂᒃ ᑲᑎᕕᒃ ᐃᓕᓴᕐᓂᓕᕆᓂᖅ
514 797-8220 ᐅᕝᕙᓘᓐᓃᑦ 1 800 361-2244 ᓃᓂᕐᓗᒍ 309 | publicrelations@kativik.qc.ca