ᐃᓕᓐᓂᐊᕈᑎᓕᐅᕐᕕᒥ ᐱᓇᓱᑦᑏᑦ ᐱᓇᓱᐊᖃᑎᖃᓲᑦ ᐃᓕᓐᓂᐊᑎᑦᓯᔨᓂᒃ, ᐃᓄᑐᖃᕐᓂᒃ ᐊᒻᒪᓗ ᖃᐅᔨᒪᓂᓕᓐᓂᒃ ᐃᒣᓘᖃᑎᒋᑦᓱᒋᑦ:

• ᐱᐅᓕᐊᕐᑕᐅᒍᑎᓕᐅᕐᓱᒋᒃ ᐊᒻᒪᓗ ᓇᑭᖕᖓᓂᑕᐅᓂᖏᑦ ᓇᓗᓀᕐᓱᒋᑦ ᐃᓕᓐᓂᐊᕈᑎᑦᓴᑕᖏᑦ;
• ᐃᓕᓐᓂᐊᑎᑦᓯᓗᓂ ᐃᑲᔪᕐᓯᒪᓗᓂᓗ ᐃᓕᓐᓂᐊᕈᑎᑦᓴᓂᒃ ᓄᐃᑦᓯᖃᑎᐅᔪᓂᒃ; ᐊᒻᒪᓗ
• ᐱᓇᓱᒍᑎᑦᓭᑦ ᐃᓕᓐᓂᐊᕈᑎᑦᓭᓗ ᐱᓇᓱᒍᑎᑦᓴᖃᕐᑎᓯᒍᑎᒃᑯᑦ ᓄᐃᑕᑎᑌᑦ ᓄᓇᕕᒻᒥᐅᑕᐅᑦᓯᐊᓂᖏᓐᓂᒃ ᑲᒪᓗᓂ.

ᐃᓕᓐᓂᐊᑎᑦᓯᔨᓄᑦ, ᐱᕙᓪᓕᑕᐅᒍᑎᖏᑦ ᐃᒣᓕᖓᔪᑦ:

• ᐃᓕᓐᓂᐊᕈᑎᑦᓭᑦ ᐸᕐᓀᑕᐅᓯᒪᔪᒃ ᐃᓄᑐᐃᓐᓇᓄᐊᖓᔪᓂᒃ ᐋᕐᕿᓱᕐᑕᐅᓯᒪᒍᓯᓖᑦ ᒪᓕᑦᓯᐊᓱᑎᒃ ᐱᑕᖃᕆᐊᓕᒻᒥᒃ ᑯᐯᒃ ᐃᓕᓐᓂᐊᕈᑎᑦᓴᓄᑦ ᐱᓇᓱᒍᑎᖓᓂᒃ;
• ᐱᔪᓐᓇᐅᑎᓖᑦ ᓄᓇᕕᒻᒥ ᐃᓕᓐᓂᐊᑎᑦᓯᔩᑦ ᐃᓱᒪᑖᖃᑎᒋᔭᐅᒍᓐᓇᑐᑦ ᐱᓇᓱᒍᑎᑦᓴᓂᓪᓗ ᑕᐅᕐᓰᖃᑎᒋᒍᓐᓇᑐᑦ, ᐃᓕᓐᓂᐊᑎᑦᓯᒍᓯᑦᓯᐊᓂᒃ ᐱᕈᕐᓭᔪᑦ ᐃᓕᓐᓂᐊᕕᒻᒥ ᐊᒻᒪᓗ ᐊᑦᔨᒌᖕᖏᑐᑎᒍᑦ ᐃᓕᓐᓂᐊᑎᑦᓯᒍᓯᑎᒍᑦ ᐃᓕᓐᓂᐊᑏᑦ ᑭᖕᖒᒪᒋᔭᖏᓐᓂᒃ ᑭᓇᐅᓂᖏᓐᓂᓗ ᓄᐃᑕᑎᑦᓯᓯᐊᕐᑐᑯᑦ;
• ᓄᓇᓕᖓᑕ ᓄᓇᖓᓂᒃ, ᐅᖃᐅᓯᕐᒥᒃ, ᐊᒻᒪᓗ ᓄᓇᓕᒻᒥᒃ ᖃᐅᔨᒪᓂᕐᒥᓂᒃ ᐃᑲᔪᕐᓯᒪᒍᑎᖃᕈᓐᓇᓂᖅ ᐃᓘᓐᓇᖏᓐᓂ ᓄᓇᓕᓕᒫᓂ, ᐊᒻᒪᓗ ᐃᒻᒥᒎᕐᑎᓗᒋᑦ ᐃᓕᓐᓂᐊᑎᓂᒃ ᓇᓪᓕᐊᓂᑦ ᓄᓇᓕᒻᒥ;
• ᐃᓕᓐᓂᐊᕈᑎᑦᓴᒋᐊᓪᓓᑦ ᓱᓇᓱᐊᕐᑎᓯᒍᑎᐅᒍᓐᓇᑐᑦ ᐃᓕᓐᓂᐊᓂᖅ ᐱᓪᓗᒍ ᑲᑎᕕᒃᑯᑦ ᑕᐅᑐᑦᑕᖓᓂᒃ ᑐᖕᖓᕕᓖᑦ.

ᐃᓕᓐᓂᐊᑎᓄᑦ, ᐱᕙᓪᓕᑕᐅᒍᑎᖏᑦ ᐃᒣᓕᖓᔪᑦ:

• ᐱᐅᓕᐊᕐᑕᐅᓯᒪᔪᑦ ᒪᓕᐅᑎᔪᑦ ᐃᓕᓐᓂᐊᓂᕐᒥ ᓱᓇᓱᐊᕐᑎᓯᒍᑎᑦᓭᑦ ᐃᓕᑦᓯᕙᓪᓕᐊᒍᑎᑦᓴᐅᓱᑎᒃ ᐱᒍᓐᓇᑕᐅᒋᐊᓕᓐᓂᒃ ᐱᒃᑲᕆᑦᓯᕙᓪᓕᐊᒍᑎᑦᓴᐅᓱᑎᓗ ᐃᓕᓐᓂᐊᕕᒻᒥ ᐊᒻᒪᓗ ᓇᖕᒥᓂᖅ ᐱᒍᒪᓂᕐᒥᓄᑦ;
• ᐱᒋᐅᕐᓴᓗᒋᑦ ᐃᓕᓐᓂᐊᒐᕐᓂ ᐱᓇᓱᒋᐊᓖᑦ ᐃᓕᓐᓂᐊᕕᒻᒥ ᐱᔭᖃᑦᓯᐊᓂᕐᓴᐅᒍᑎᓄᑦ ᐊᑦᔨᒌᖕᖏᑐᓂᑦ ᑐᑭᓯᒪᓂᕐᓂᑦ ᐃᓕᓐᓂᐊᒐᕐᓂᓗ;
• ᓈᓭᒍᑎ ᐅᖃᐅᓯᕐᑕᖏᓐᓂᒃ ᐃᓄᒃᑎᑐᑦ ᑌᒎᓰᑦ ᐃᓕᖓᔪᑦ ᐃᓕᓐᓂᐊᒐᕐᓄᑦ ᐊᑦᔨᒌᖕᖏᑐᓄᑦ;
• ᓴᓇᖕᖑᐊᑕᕕᓂᕐᓂᒃ ᐊᒻᒪᓗ ᐱᓇᓱᐊᕐᑕᐅᔪᕕᓂᕐᓂᒃ ᑕᑯᑦᓴᐅᑎᑦᓯᖃᑎᒌᕝᕕᓴᖅ, ᐊᒻᒪᓗ ᐃᓕᓐᓂᐊᑎᓂᒃ ᐱᑐᖃᑎᖃᕐᕕᓴᐅᑦᓱᓂ ᓇᑭᑐᐃᓐᓇᓕᒫᖅ ᓄᓇᕕᒻᒥ.

ᕿᑐᕐᖓᓕᓐᓄᑦ, ᐱᕙᓪᓕᑕᐅᒍᑎᖏᑦ ᐃᒣᓕᖓᔪᑦ:

• ᐊᓂᕐᕋᓯᒪᓗᓂ ᖃᓄᐃᓘᕈᑎᑦᓭᑦ ᓱᓇᓱᐊᕐᑎᓯᒍᑎᑦᓭᓗ ᐃᑲᔪᕐᓯᒍᑎᑦᓴᐅᓱᑎᒃ ᐃᓕᓐᓂᐊᑎᐅᑉ ᐃᓕᓐᓂᐊᕕᒻᒥ ᐱᔭᖃᑦᓯᐊᕈᑎᑦᓴᖏᓐᓂᒃ;
• ᐃᓓᒋᐊᕈᑎᑦᓭᑦ ᖃᐅᔨᒪᐅᓯᕐᓂᒃ ᓱᓇᓱᐊᕐᑎᓯᒍᑎᑦᓴᓄᑦ ᓄᓇᒥ ᐃᓚᒥᓂᒃ ᓄᓇᒦᖃᑎᖃᕐᓗᓂ;
• ᓈᓭᒍᑎ ᐅᖃᐅᓯᕐᑕᖏᓐᓂᒃ ᐃᓄᒃᑎᑐᑦ ᑌᒎᓰᑦ ᐃᓕᖓᔪᑦ ᐃᓕᓐᓂᐊᒐᕐᓄᑦ ᐊᑦᔨᒌᖕᖏᑐᓄᑦ.