ᐱᒋᐊᕐᑎᑕᐅᓯᒪᔪᑦ ᐃᓕᓴᕐᕕᓂ ᐱᓇᓱᐊᕈᑕᐅᑦᓱᑎᒃ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᕐᒥᒃ ᓄᕐᖃᑎᑦᓯᒋᐊᕐᓂᓄᑦ ᐃᓕᓴᕐᕕᒥᓂ ᐱᕙᓪᓖᓯᒪᑦᓯᐊᒪᕆᓕᕐᑐᑦ. ᐃᑲᔪᕐᑎᓗᒍ ᓯᓐᓯᐊ ᑲᐅᑐᕈᐃ, ᐃᓕᓴᕐᓂᒧᑦ ᑐᑭᓯᓂᐊᕐᕕᕗᑦ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᕐᒥᒃ ᓄᕐᖃᑎᑦᓯᒋᐊᕐᓂᓄᑦ ᐱᓇᓱᒐᕐᓂᒃ, ᐃᓕᓴᕐᕖᑦ ᐱᓇᓱᐊᕈᑎᖃᓕᕐᑐᑦ ᓄᕐᖃᑎᑦᓯᒍᒪᒧᑦ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᕐᒥᒃ. ᐃᑲᔪᕐᓯᕙᑦᑐᖅ ᐃᓕᓵᓂᒃ, ᐃᓕᓵᑦ ᐊᖓᔪᕐᖄᖏᓐᓂᒃ/ᑲᒪᔨᖏᓐᓂᒃ ᐊᒻᒪᓗ ᐃᓕᓴᕐᕖᑦ ᐱᓇᓱᑦᑎᖏᓐᓂᒃ ᑲᒪᓂᕐᓄᑦ ᐊᒻᒪᓗ ᖃᓄᐃᓕᒋᐊᕈᑎᑦᓴᓄᑦ ᐃᓕᓴᕐᕕᓂ ᐃᕐᓯᓵᕆᓃᑦ ᓄᕐᖃᖁᓪᓗᒋᑦ. ᐃᓕᓴᕐᕖᑦ ᐱᐅᒃᑯᑎᖃᕐᑎᓯᓕᕐᑐᑦ ᐃᓕᓵᓂᒃ ᐊᒻᒪᓗ ᐊᖓᔪᕐᖄᖏᓐᓂᒃ/ᑲᒪᔨᓐᓂᒃ ᓴᓇᕐᕈᑎᓂᒃ ᐊᒻᒪᓗ ᐃᑲᔪᕐᑎᓴᓂᒃ ᖃᓄᖅ ᑕᑯᔭᐅᒍᓐᓇᒪᖔᑕ, ᑲᒪᒋᔭᐅᒍᓐᓇᒪᖔᑕ ᐊᒻᒪᓗ ᐃᑲᔪᕐᓯᔭᐅᒍᒪᒍᓐᓇᒪᖔᑕ ᐱᑦᔪᑎᐅᑎᓪᓗᒍ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᖅ.

ᓯᓐᓯᐊ ᑯᑐᕈᐃ ᐅᓪᓗᒥ ᐱᓇᓱᐊᓕᕐᑐᖅ ᐊᓇᕐᕋᐅᔨᒐᑦᓴᓂᒃ ᐊᑐᐊᒑᐱᓐᓂᒃ ᑐᕌᕐᑐᓂᒃ ᐊᖓᔪᕐᖄᕆᔭᐅᔪᓄᑦ ᐊᒻᒪᓗ ᑲᒪᔨᒋᔭᐅᔪᓄᑦ ᐃᑲᔪᕐᓯᐅᑎᑦᓴᓂᒃ ᐃᓕᑕᕐᓯᒋᐊᕐᑎᓗᒋᑦ ᕿᑐᕐᖓᖏᑦ ᐃᕐᓯᓵᕐᑕᐅᖃᑦᑕᓕᕐᐸᑕ ᓱᓇᐅᒋᔭᐅᖕᖏᒧᑦ. ᐊᑐᐊᒑᐲᑦ ᑐᑭᓯᑎᑦᓯᒍᓐᓇᑐᑦ ᐊᖓᔪᕐᖄᓂᒃ/ᑲᒪᔨᓂᒃ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᖅ ᖃᓄᐃᑦᑑᒪᖔᑦ, ᐃᓕᓵᓪᓗ ᓱᓇᐅᒋᔭᐅᖕᖏᒧᑦ ᐃᕐᓯᓵᕐᑕᐅᕙᑦᑐᑦ ᖃᓄᐃᑦᑐᑰᕈᓐᓇᒪᖔᑕ, ᖃᓄᕐᓗ ᐅᓪᓗᑕᒫᑦ ᐊᓇᕐᕋᒥ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᖅ ᐊᑑᑎᑎᑕᐅᑦᑌᓕᒍᓐᓇᒪᖔᑦ, ᖃᓄᕐᓗ ᐃᓕᓴᕐᕕᓂ ᑐᓴᕐᑎᑕᐅᒍᓐᓇᒪᖔᑦ ᓱᓇᐅᒋᔭᐅᖕᖏᒧᑦ ᐃᕐᓯᓵᕐᑕᐅᔪᓂᒃ ᐊᒻᒪᓗ ᓱᒋᐊᖃᓕᕋᔭᕐᓂᖏᓐᓂᒃ ᑭᖑᓂᖓᒍᑦ.

ᐅᓇᑕᒐ ᐆᑦᑐᕋᐅᑏᑦ ᐃᓚᖓ ᓄᓇᓖᑦ ᐊᒻᒪᓗ ᐃᓕᓴᕐᕖᑦ ᐱᓇᓱᐊᖃᑎᒌᒍᑎᒋᓕᕐᑕᖏᑦᑕ ᐊᒻᒪᓗ ᐋᕐᕿᓱᐃᒋᐊᕐᓂᒧᑦ ᐃᑲᔪᕐᑎᒌᒍᑎᒋᓕᕐᓱᒍ.

“Stall Talks” ᐱᒋᐊᕐᑎᑕᐅᓯᒪᔪᖅ ᔮᓂᒻᒪᕆᒃ ᐃᓕᓴᕐᕕᒥ (ᑰᑦᔪᐊᒥ) ᐃᓕᔭᐅᓯᒪᓕᕐᓱᓂ ᐳᕐᑐᕐᓴᓂ ᐊᕐᓀᑦ ᖁᕐᕕᑯᕕᖏᑦᑕ ᐊᑭᓐᓇᖏᓐᓂ ᖃᓄᖅ ᓵᓚᒋᔭᐅᒋᐊᕈᓐᓇᒪᖔᑕ ᐅᖃᐅᓯᑎᒍᑦ ᐊᒻᒪᓗ ᐃᓅᖃᑎᒋᔭᕐᓂᒃ ᐊᑐᕐᓂᓗᓐᓃᑦ. ᐃᓕᓴᕐᕕᒃ ᖃᐅᔨᓯᒪᒻᒪᑦ ᐅᖃᐅᓯᑎᒍᑦ ᐊᑐᕐᓂᓗᓐᓂᖅ ᐃᓕᓴᕐᕕᓂ ᓂᕕᖕᖓᐅᖃᕐᑕᐅᓯᒪᓲᒍᓂᖏᓐᓂᒃ ᐊᒻᒪᓗ ᐊᓪᓚᑕᐅᓯᒪᑦᓱᑎᒃ ᐊᕐᓀᑦ ᖁᕐᕕᑯᕕᖏᑦᑕ ᐊᑭᓐᓇᖏᓐᓂ. ᓈᒻᒪᓂᕐᓴᓂᒃ ᓄᐃᑕᑎᑦᓯᒋᐊᕐᓱᑎᒃ ᐊᒻᒪᓗ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᕐᒥᒃ ᓄᕐᖃᑎᑦᓯᒋᐊᕈᑎᖃᕐᓱᓂ ᐃᓕᓴᕐᕕᒃ ᑐᑭᑖᕐᓯᒪᔪᖅ ᓂᕕᖕᙰᓯᒪᓚᖓᑦᓱᓂ “ᖁᕐᕕᑯᕖᑦ ᐊᑭᓐᓇᖏᓐᓂᒃ ᐅᖃᐅᓯᖃᐅᑎᒥᒃ” ᐃᓕᓵᑦ ᑫᓪᓗᑐᕐᑕᐅᒍᑎᖃᕐᑎᓗᒋᑦ ᐊᑭᓐᓇᒥ ᐊᓪᓚᖁᔭᐅᑦᓱᑎᒃ ᐊᓕᐊᓇᕐᑐᓂᒃ ᐊᒻᒪᓗ ᐱᕙᓪᓕᓇᕐᑐᖔᓂᒃ ᐅᖃᐅᓯᕐᓂᒃ. ᑖᒃᑯᐊ ᓈᒻᒪᑐᓂᒃ ᓄᐃᑦᓯᕕᐅᑎᓪᓗᒋᑦ ᐊᒻᒪᓗ ᑐᕌᒐᖃᕐᓱᑎᒃ ᓵᓚᖃᒋᐊᕐᓂᓂᒃ ᐅᖃᐅᓯᕐᓂᒃ ᓈᒻᒪᖏᑦᑐᓂᒃ ᐊᓪᓚᑕᐅᕙᑦᑐᓂᒃ ᖁᕐᕕᑯᕖᑦ ᐊᑭᓐᓇᖏᓐᓂ.

The PBIS program (ᓄᕐᖃᕆᑦ, ᐱᓱᒋᑦ, ᐅᖃᕆᑦ) ᐱᓇᓱᐊᕈᑎᐅᕗᖅ ᒪᓂᔨᒍᑕᐅᓱᓂ ᑕᒪᖏᓐᓄᑦ ᐃᓕᓵᓄᑦ ᐊᒻᒪᓗ ᐱᓇᓱᑦᑎᓄᑦ ᖃᓄᖅ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᖅ ᑲᒪᒋᔭᐅᒋᐊᖃᕐᒪᖔᑦ. ᑫᓪᓗᑐᐃᒍᑎᒃ ᐃᓕᓵᓂᒃ ᑖᒃᑯᓂᖓ ᒪᓕᑉᐸᖁᑦᓱᒋᑦ ᓄᐃᑎᕐᓗᒋᑦ ᓯᓚᑖᓅᕇᒃᑯᑏᑦ ᐃᓱᕐᕆᒍᓐᓀᕈᑎᒃ ᖃᓄᐃᓘᕐᑕᐅᓂᕐᒥᓂᒃ. ᐱᓱᒋᑦ ᑫᓪᓗᑐᐃᒍᑎᒃ ᐃᓕᓵᓂᒃ ᕿᒣᑐᐃᓐᓇᐸᖁᑦᓱᒋᑦ ᖃᓄᐃᓘᕐᑕᐅᓕᕈᑎᒃ ᐊᒻᒪᓗ ᐃᑲᔪᕐᑎᓴᕐᓯᐅᓯᓗᑎᒃ. ᐅᖃᕆᑦ ᑫᓪᓗᑐᐃᒍᑎᒃ ᐃᓕᓵᓂᒃ ᐃᑲᔪᕐᑎᓴᕐᓯᐅᐸᖁᑦᓱᒋᑦ ᐅᕝᕙᓘᓐᓃᑦ ᐅᖃᕐᕕᖃᕐᓗᑎᒃ ᐊᖓᔪᕐᖄᒥᓂᒃ/ᑲᒪᔨᒥᓂᒃ. ᐱᓇᓱᒐᖅ ᐃᑲᔪᕐᓯᒍᑕᐅᒻᒥᔪᖅ ᑐᓵᔪᓂᒃ ᑕᑯᓐᓈᑐᓂᒃ ᐃᓚᐅᕙᖁᑦᓱᒋᑦ ᐱᓀᓗᑕᕐᒥᒃ ᑕᑯᒍᑎᒃ ᑐᓴᕈᑎᓘᓐᓃᑦ. ᑖᒃᑯᓭᓐᓀᑦ ᒪᓕᑦᑕᐅᒋᐊᓖᑦ ᐊᑐᕐᒥᑎᓪᓗᒋᑦ, ᑭᓇᑐᐃᓐᓇᖅ ᓄᕐᖃᖁᓗᒍ, ᐃᕐᓯᓵᕆᔪᒥᒃ ᕿᒣᕙᖁᓗᒍ ᐊᒻᒪᓗ ᐃᑲᔪᕐᑕᐅᒍᒪᓗᑎᒃ ᐅᖃᕐᐸᖁᓗᒍ ᐱᓇᓱᑦᑎᒧᑦ ᐅᕝᕙᓘᓐᓃᑦ ᐃᓕᓭᔨᒧᑦ. ᐱᒻᒪᕆᐅᑦᓱᓂ ᓴᓇᕐᕈᑎᐅᒻᒥᔪᖅ ᐃᓕᓭᔨᓄᑦ ᐃᑲᔪᕐᓯᒍᓐᓇᕕᖏᓐᓄᑦ ᐃᓕᓵᓂᒃ ᓱᓇᐅᒋᔭᐅᖕᖏᒧᑦ ᐃᕐᓯᑎᑕᐅᔪᓂᒃ.

ᐃᓄᑦᔪᐊᒥ, ᐅᐱᕐᖔᑕᒫᑦ ᐃᓕᓴᕐᕕᒃ ᑲᔪᓯᑎᑦᓯᓲᖅ ᐱᓱᓐᓂᒥᒃ ᐃᓕᓴᕐᕕᓕᒫᒥᒃ ᐊᒻᒪᓗ ᓄᓇᓕᒻᒦᑐᓂᒃ ᑲᑎᑎᑦᓯᓱᓂ ᐊᒻᒪᓗ ᓂᑯᕐᕋᖃᑎᒌᑦᑎᓱᒋᑦ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᐅᑉ ᓄᕐᖃᕆᐊᖃᕐᓂᖓᓄᑦ. ᑖᒃᑯᐊᑕᒐ ᐊᒥᓲᖕᖏᑲᓗᐊᕐᓱᑎᒃ ᐆᑦᑑᑏᑦ ᐱᓇᓱᐊᕐᑕᐅᕙᑦᑐᓂᒃ ᐃᓘᓐᓀᓂ ᓄᓇᓕᑦᑎᓂ.

ᓯᓐᓯᐊ ᒪᓂᔨᓲᒍᒻᒥᔪᖅ ᑐᕌᓪᓚᕆᒍᑎᓕᓐᓂᒃ ᐃᓕᓐᓂᐊᑎᑦᓯᓂᕐᓂᒃ ᐃᓕᓴᕐᕕᓂᒃ ᐱᓇᓱᑦᑎᓂᒃ ᐃᓕᓐᓂᐊᑎᑕᐅᖁᔨᔪᓂᒃ. ᐊᓕᐊᓇᕐᑐᒪᕆᒃ ᑐᓴᕆᐊᒥᒃ ᐃᒥᓱᐃᓂᒃ ᐱᓇᓱᒐᕐᓂᒃ ᑲᔪᓯᑎᑕᐅᔪᓂᒃ ᐃᓕᓴᕐᕕᑎᓐᓂ ᐊᒻᒪᓗ ᐱᓇᓱᐊᕈᑕᐅᒻᒪᕆᑦᑐᓂᒃ ᑲᒪᒋᔭᐅᑦᓯᐊᓂᖃᕐᓱᑎᒃ ᓄᓇᓕᓐᓄᑦ ᐃᓕᓵᑦ ᐊᑦᑕᓇᕐᑐᒦᖁᓇᒋᑦ ᐊᒻᒪᓗ ᐃᓱᕐᕆᓗᑎᒃ ᐃᓕᓴᕆᐊᖃᑦᑕᖁᑦᓱᒋᑦ. ᓄᕐᖃᑎᑦᓯᒐᓱᐊᕐᓂᖅ ᓱᓇᐅᑦᓴᖏᒻᒧᑦ ᐃᕐᓯᓵᕆᓂᕐᒥᒃ ᐊᑯᓂ ᐱᕙᓪᓖᓯᒪᑎᑦᓯᓚᖓᔪᖅ ᐃᓕᓭᒍᑎᓂᒃ ᑲᔪᓯᑎᑦᓯᓯᐊᕐᓂᑎᓂᒃ ᐊᒻᒪᓗ ᐱᔪᓐᓇᓯᐊᕐᑐᕆᓂᕐᑎᓂᒃ. ᑐᑭᓯᒋᐊᓪᓚᕈᒪᒍᕕᑦ ᐊᑦᔨᒌᖕᖏᑐᓄᑦ ᐱᓇᓱᒐᕐᓄᐊᖓᔪᓂᒃ, ᐅᖄᕕᖃᕈᓐᓇᓯᐊᕐᐳᑎᑦ ᓯᓐᓯᐊ ᑯᑐᕋᐅᓪᒥᒃ ᐃᓕᓴᕐᓂᒧᑦ ᑭᒡᒐᑐᕐᕕᒥ (ᑰᑦᔪᐊᒥ) ᑐᓴᕐᑎᑕᐅᒐᔭᕋᕕᑦ ᐊᑦᔨᒌᖕᖏᑐᓂᒃ ᐱᓇᓱᒐᕐᓂᒃ ᐃᓕᓴᕐᕕᑎᓂ ᐱᓇᓱᐊᕐᑕᐅᔪᓂᒃ.