ᑲᑎᕕᒃ ᐃᓕᓐᓂᐊᓂᓕᕆᓂᖅ ᒪᕐᕈᐃᓂᒃ ᐱᓂᐊᕐᓂᖃᕈᑎᖃᓛᕐᑐᖅ ᐱᓇᓱᐊᕈᓯᐅᓚᖓᔪᒥ
ᑰᒃᔪᐊᖅ (ᓯᑉᑎᒻᐱᕆ 6, 2017) – ᐊᕐᕌᒍᑦ 40-ᓃᑲᓵᑦᑐᓂᒃ ᑎᒥᐅᔫᓕᕐᓱᓂ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑦᓯᒋᐊᖕᖓᓛᕐᑐᖅ ᓄᑖᒥᒃ ᑕᕐᓴᒥᒃ ᐃᓕᒃᑯᑦ ᐱᓂᐊᕐᓂᖃᕈᑎᒋᓗᒍ ᔮᓂᒻᒪᕆᒃ ᐃᓕᓐᓂᐊᕕᒻᒥ, ᑰᒃᔪᐊᒥ, ᐊᓪᓕᑐᖃᕇᒥ ᓯᑉᑎᒻᐱᕆ 11, 2017-ᒥ 3:15-ᖑᕐᐸᑦ.
ᐁᑉᐸᖓᓂᒥ, ᓯᑉᑎᒻᐱᕆ 12-ᒥ, ᑕᕐᓴᑲᓪᓚᒃ ᐃᓕᓐᓂᐊᕕᒃ ᐊᐅᐸᓗᒻᒥ ᐅᒃᑯᐃᑕᐅᓂᖃᓛᕐᑐᖅ ᐱᓂᐊᕐᓂᖃᕈᑎᐅᑎᓪᓗᒍ ᓄᓇᓕᒻᒧᑦ ᐃᓕᓐᓂᐊᕇᕐᓯᒪᓕᕐᐸᑕ. ᐃᓕᓐᓂᐊᕕᖓ ᐃᑯᐊᓪᓚᓱᓂ ᐊᑐᕋᑦᓴᐅᒍᓐᓀᓚᐅᔪᒻᒪᑦ ᒫᑦᔨ 15, 2014-ᖑᑎᓪᓗᒍ. ᐁᕆᓕ 2014 ᐊᒻᒪᓗ ᔫᓂ 2016 ᐊᑯᓐᓂᖏᓐᓂ, ᐃᓕᓐᓂᐊᕕᐅᓚᐅᕐᑐᑐᒥᒃ ᐃᓂᖃᕐᓱᑎᒃ ᑲᔪᓯᓚᐅᔪᔪᑦ, ᐊᐅᐸᓗᒻᒥ. ᐊᖏᕐᑕᐅᔪᕕᓂᐅᑎᓪᓗᒋᑦ ᑮᓇᐅᔦᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ ᑯᐯᒻᒥ ᔫᓂ 2015-ᒥ, ᐃᓕᓐᓂᐊᕕᐅᑉ ᓴᓇᔭᐅᓂᖓ ᐱᔭᕇᕐᑕᐅᓚᐅᔪᕗᖅ ᓈᒻᒪᓈᕐᓱᑎᒃ 2016-2017 ᐃᓕᓐᓂᐊᓇᐅᑉ ᐊᕌᒍᖓᑕ ᐱᒋᐊᕐᓂᖓᓄᑦ. ᐃᙯᓕᓴᕐᕕᖓ ᐃᓕᓐᓂᐊᕕᐅᑉ ᐃᓚᖓᑎᒍᑦ ᑮᓇᐅᔭᖃᕐᑎᑕᐅᓯᒪᔪᖅ ᐊᐅᐸᓘᑉ ᑲᕙᒫᐱᒃᑯᖏᓐᓄᑦ ᐊᒻᒪᓗ ᐊᑐᕐᑕᐅᓱᓂ ᓄᓇᓕᒻᒧᑦ ᓱᓇᓱᐊᕐᑎᓯᕕᐅᑦᓱᓂ (ᐱᖕᖑᐊᕕᒋᔭᐅᑦᓱᓂ).
ᑭᓇᒃᑰᓂᕗᑦ:
ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca
— 30 —
ᑐᑭᓯᒪᐅᑎᑦᓴᓄᑦ, ᐅᓇ ᖃᐅᔨᒋᐊᕐᓗᒍ :
ᔮᑦ ᑑᓯᓅ-ᐱᐊᕐᓂᐁᕐ
ᑐᓴᐅᒪᖃᑎᒌᒍᑎᓄᐊᖓᔪᓂᒃ ᐊᑕᐅᑦᓯᑰᕐᑎᓯᔨ