ᑰᑦᔪᐊᖅ ᓄᓇᕕᒃ, ᑯᐯᒃ (ᕕᕈᐊᕆ 7, 2017) – ᑕᒡᒐᓂ ᐊᕐᕌᒍᒥ, ᓄᓇᕕᒻᒥᐅᑦ ᓄᓇᓕᓕᒫᖏᑦ ᓱᑯᐃᔦᓂᕐᒧᑦ ᓴᕐᕿᑎᑦᓯᓯᒪᓂᖃᓛᓕᕐᒥᔪᑦ ᕕᕈᐊᕆ 14-15-ᓂ ᐃᓐᓇᓕᒃ ᐃᓕᓴᕐᕕᒥ ᐃᓄᒃᔪᐊᒥ. ᑖᒃᑯᓈᓐᓂ ᐅᓪᓘᓂ, ᓱᑯᐃᔦᓂᕐᒥᒃ ᐱᓇᓱᐊᕐᑐᑦ ᓄᓇᓕᓐᓂ 14-ᓂ ᐱᓯᒪᓗᑎᒃ ᓴᕐᕿᑎᑦᓯᓯᒪᒋᐊᕐᑐᓛᕐᑐᑦ ᐱᓇᓱᐊᕐᑕᒥᓂᒃ ᐃᓂᓵᓄᑦ, ᐊᑖᑕᒃᑰᔪᓄᑦ ᓄᓇᓕᒻᒥᐅᓄᓪᓗ.

“ᐅᐱᒍᓱᑉᐳᒍᑦ ᓇᔪᕐᑕᐅᓯᒋᐊᒥᒃ ᐊᓕᐊᓇᕐᑐᒪᕆᒻᒧᑦ ᐱᓂᐊᕐᓂᒧᑦ ᐃᓄᒃᔪᐊᒥ,” ᐋᓚᓯ ᓈᓚᑦᑑᔭᖅ ᐅᖃᕐᑐᖅ, ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐊᖓᔪᕐᖄᖓ. ᓄᓇᓕᓕᒫᓂ ᓱᑯᐃᔦᓂᕐᒥᒃ ᓴᕐᕿᑎᑦᓯᓯᒪᓂᖅ ᐱᐅᔪᒻᒪᕆᐅᓲᖑᕗᖅ ᐃᓕᓵᓄᑦ ᐊᑑᑎᓪᓚᕆᑦᓱᑎᒃ ᐱᓇᓱᐊᕐᓂᖃᓲᖑᒻᒪᑕ ᖃᐅᔨᓴᕐᓂᖃᕐᓱᑎᒃ ᐊᓕᐊᒋᔭᒥᓂᒃ ᓱᑯᐃᔦᓂᕐᒧᑦ. ᑌᒣᑦᑐᓂᒃ ᐱᓂᐊᕐᓂᖃᕐᓂᑯᑦ, ᐃᓕᓐᓂᐊᓂᓕᕆᓂᖅ ᐅᕕᒃᑲᓂᒃ ᖃᐅᔨᓴᑦᓯᐊᕕᑦᓴᖃᖁᔨᕗᖅ ᓯᕗᓂᕐᒥ ᖃᓄᐃᑦᑐᒥᒃ ᐱᓇᓱᒐᖃᕈᒪᒐᔭᕐᒪᖔᕐᒥᒃ ᐳᕐᑐᓂᕐᓴᒋᐊᓪᓚᒥᓪᓘᓃᑦ ᐃᓕᓐᓂᐊᓂᕐᒧᑦ ᓱᑯᐃᔦᓂᕐᑕᖃᕆᐊᖃᓲᓂᒃ,” ᐅᖃᕐᒥᔪᖅ.

ᐱᓂᐊᕐᓂᒧᑦ ᐅᖃᐅᓯᑦᓴᖃᕈᑎᖓ, ᐃᓐᓇᓕᒻᒥ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓ ᒪᕆᐆ ᔪᓕᕕᐊᑦ ᐅᖃᕐᒥᔪᖅ ᐱᓪᓚᕆᐅᓂᖓᓂᒃ ᐆᑦᑐᕋᖃᑦᑕᓱᓂ ᐃᓕᓐᓂᐊᓂᐅᑉ. “ᐱᓇᓱᐊᕐᑕᒥᓂᒃ ᐱᓇᓱᐊᕐᓂᖃᕐᓱᑎᒃ, ᐃᓕᓐᓂᐊᑏᑦ ᖃᐅᔨᕚᓪᓕᓲᑦ ᓱᑯᐃᔦᓂᖅ ᐃᓪᓗᑕᒫᑦ ᐃᓅᓯᕐᒧᑦ ᐃᓚᒋᔭᐅᖏᓐᓇᓕᒫᒋᐊᖓ ᐃᓄᐃᓪᓗ ᐱᕐᖁᓯᑐᖃᒃᑯᑦ ᖃᐅᔨᒪᓂᖃᕐᓂᖓᓄᑦ. ᐃᓕᓐᓂᐊᑎᑦᓯᓂᖃᓲᖑᕗᒍᑦ ᐊᓪᓚᕕᑦᓴᑯᑐᐃᓐᓇᐅᖏᑦᑐᖅ ᖃᕆᐊᕐᒦᑎᓪᓗᒋᑦ, ᐊᑑᑎᓪᓚᕆᒍᓐᓇᑕᖏᓐᓂᒃ ᐊᑑᑎᓲᖑᕗᒍᑦ,” ᐅᖃᕐᑐᖅ.

ᑭᖑᓪᓕᐹᕐᓱᓕᕐᐸᑕ ᓴᕐᕿᑎᑦᓯᓯᒪᓂᕐᒥᒃ, ᑐᑭᑖᕆᔩᑦ ᑐᓴᕐᑕᐅᑎᑦᓯᓛᕐᑐᑦ ᓵᓚᓕᓐᓂᒃ ᐊᕕᑦᑐᓯᒪᐅᑎᖏᓐᓅᓕᖓᔪᓂᒃ (ᐳᕐᑐᓂᓖᑦ 5, 6, ᐳᕐᑐᓂᕐᓴᒥ 1, 2-3, 4-5-ᓂᓪᓗ). ᐱᓇᓱᖃᑎᒌᑦᑐᑦ ᓂᑦᑕᑎᑦᓯᓯᐊᕐᓂᐹᑦ ᐱᓇᓱᐊᕐᑕᒥᓂᒃ ᐱᐅᒋᔭᐅᓂᕐᐹᒥᒃ ᑎᒃᑯᐊᑕᐅᓛᕐᑐᑦ ᓄᓇᕕᒻᒥᒃ ᑭᒡᒐᑐᓛᕐᑎᓗᒋᑦ ᑯᐯᒻᒥᐅᑦ ᓄᓇᖃᕐᖄᓯᒪᔪᖏᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᑎᑦᓯᓯᒪᓕᕐᐸᑕ, Odanak-ᒥ ᒫᑦᔨ 28-ᒥᑦ 30-ᒧᑦ 2017-ᒥ.

ᐊᕐᕌᒎᓐᓂ ᐊᓂᒍᕐᑑᓂ, ᓄᓇᕕᒻᒥᐅᑦ ᓵᓚᖃᕐᓯᒪᔪᑦ ᑲᓇᑕᒥ, ᐃᓕᓐᓂᐊᑏᑦ ᐱᖓᓱᑦ ᓴᓪᓗᒥᐅᑦ ᓵᓚᖃᕐᓯᒪᑎᓪᓗᒋᑦ ᐊᕕᑦᑐᓯᒪᐅᑎᒥᓐᓂ 2014-ᒥ 2016-ᒥᓪᓗ ᑲᓇᑕᒥ ᓱᑯᐃᔦᓂᕐᒥᒃ ᓴᕐᕿᑎᑦᓯᓯᒪᓂᖃᕐᑎᓗᒋᑦ: ᔨᓂ ᖃᕐᖄᔪᖅ ᐸᒃᓯᓕ (ᒣ 2014), ᐃᓓᑦᔭ ᐁᓯᒃ (ᒣ 2016) ᐊᒻᒪᓗ ᔨᓂ ᐅᕿᑦᑐᖅ (ᒣ 2016).

ᐊᑕᐅᑦᓯᑰᕐᑎᑕᐅᑎᓪᓗᒋᑦ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕈᑎᓕᕆᕕᖓᓄᑦ, ᓄᓇᕕᒻᒥ ᓄᓇᓕᓕᒫᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᑎᑦᓯᓯᒪᓂᖓ ᓇᑯᕐᓴᓲᖑᕗᖅ ᑮᓇᐅᔭᖃᕐᑎᓯᒍᑎᖏᓐᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᒻᒥ ᓄᓇᓕᓐᓂ 14-ᓂ. ᐃᓄᒃᑎᑐᑦ ᐅᖃᐅᓯᕐᖄᖑᑎᓪᓗᒍ, ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂ. ᐃᓕᓐᓂᐊᓂᓕᕆᓂᖅ ᐃᓕᓐᓂᐊᕕᖁᑎᖃᕐᑐᖅ 17-ᓂᒃ ᐅᒃᑭᓂᕐᓴᒦᑦᑐᓄᑦ ᐳᕐᑐᓂᕐᓴᒦᑦᑐᓄᓪᓗ ᑕᓪᓕᒪᓂᓪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂᒃ ᐃᓕᓐᓂᐊᕕᖁᑎᖃᕐᓱᓂ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᕐᑎᒍᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

— 30 —

ᑐᑭᓯᒋᐊᕈᒪᕈᕕᑦ, ᐅᖄᓚᕕᒋᓗᒍ:

ᑲᐅᑦᔭ ᐹᓪᓚᔮᕐᓗ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᒍᑎᓕᕆᔨ

(514) 482-8220 – publicrelations@kativik.qc.ca