ᑰᑦᔪᐊᖅ, ᑯᐯᒃ (ᓄᕐᕋᓕᐅᑦ 30, 2016) – ᑲᑎᕕᒃ ᐃᓕᓐᓂᐊᓂᓕᕆᓂᖅ ᑯᐯᒻᒥᓗ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᓇᔨᒻᒪᕆᐅᓂᕐᒥᓗ ᑲᑐᑦᔨᖃᑎᒌᕝᕕᖓ (QASEA) ᐅᐱᒍᓱᕐᖁᑦ ᑐᓴᕐᑎᓯᒋᐊᒥᒃ ᐃᓕᓐᓂᐊᑏᒃ ᓴᓪᓗᒥᐅᒃ ᓄᓇᕕᒻᒥ ᓵᓚᓕᕕᓂᐅᓂᖏᓐᓂᒃ ᐱᖓᔪᒋᔭᐅᑦᓱᑎᒃ ᐅᕕᒃᑲᓛᖑᓂᕐᓭᑦ ᓴᕐᕿᔮᕐᑎᓯᓂᖃᕐᑎᓗᒋᑦ ᑲᓇᑕᒥᐅᓕᒫᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᔮᕐᑎᓯᓂᖓᓂ (ESPC) ᐊᑑᑎᔭᐅᓚᐅᔪᑦ ᒪᓐᑐᔨᐊᒥ ᓄᕐᕋᓕᐅᑦ 16-ᒥᑦ 20-ᒧᑦ 2016-ᒥ. ᐃᓓᑦᔭ ᐁᓯᒃ, ᔨᓂ ᐅᕿᑦᑐᓗ ᐳᕐᑐᓂᕐᓴᒥ 2-ᒥ ᐃᓕᓐᓂᐊᑏᒃ ᐃᑯᓯᒻᒥ ᓴᓪᓗᓂ. ᑕᐯᕐᑎᓯᓚᐅᔫᒃ ᑐᑭᑖᕆᔨᓂᒃ ᐱᓇᓱᐊᕐᑕᒥᓄᑦ, “ᖁᓪᓕᖅ 2.0: ᓄᑕᐅᓯᓕᕐᑕᐅᓂᖓ ᐃᓄᐃᑦ ᐱᐅᓯᑐᖃᕐᑎᒍᑦ ᐃᑯᒪᖓ”.

ᔨᓂ, ᐃᓓᑦᔭᓗ ᓵᓚᖃᐅᑎᑖᕆᓚᐅᔫᒃ ᓯᕗᓪᓕᐹᒨᕐᓱᑎᒃ ᐳᕐᑐᓂᕐᓴᒥᐅᑦ 2-3-ᒥ ᐃᓕᓐᓂᐊᑏᑦ ᐊᕕᑦᑐᓯᒪᐅᑎᖏᓐᓂ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᑎᓪᓗᒋᑦ (ESAQ) ᑎᕆᓪᓗᓕᐅᑦ 4-5-ᓂ 2016-ᒥ ᒥᔅᑎᓯᓂᒥ. ᓵᓚᖃᕐᓂᕕᓂᕐᒥᓄᑦ ᑲᓇᑕᒥᐅᑦ ᓴᕐᕿᔮᕐᑎᓯᓂᖓᓅᕈᓐᓇᓯᑎᑕᐅᓚᐅᔫᒃ (CWSF)-ᒧᑦ ᒪᓐᑐᔨᐊᒥ ᐊᑑᑎᔭᐅᔪᒧᑦ. ᑭᒡᒐᑐᓚᐅᔫᒃ ᑯᐯᒻᒥᐅᑦ ᓄᓇᖃᕐᖄᓯᒪᔪᖏᓐᓂᒃ CWSF-ᒥ. ᓄᓇᖃᕐᖄᓯᒪᔪᑦ ᐃᓚᓖᑦ ᑯᐯᒻᒥᐅᓂᒃ ᐊᓪᓚᓴᔦᑦ ᐃᓄᐃᓪᓗ ᓄᓇᖏᓐᓂᒃ. 50-ᓄᑦ ᖃᐅᔨᒪᔭᐅᑦᓯᐊᑐᓄᑦ ᐃᓚᒋᔭᐅᔪᖅ ᐅᕕᒃᑫᑦ ᓱᑯᐃᔦᓂᓕᕆᓂᖓ ᑲᓇᑕᒥ, ᐊᑐᐃᓐᓇᕈᕐᑎᓯᒪᓲᑦ CWSF-ᓂᒃ. CWSF ᖃᐅᔨᒪᔭᐅᑦᓯᐊᑐᖅ ᓵᓚᖃᓕᐅᑎᓂᐅᓲᖑᑦᓱᓂ ᑲᑎᒍᑎᐅᑦᓱᓂ 500-ᓄᑦ ᐱᓯᑎᐅᓂᕐᐹᕕᓂᕐᓄᑦ ᓱᑯᐃᔦᓂᕐᒥᒃ ᐱᓇᓱᐊᕐᑕᓕᓐᓄᑦ ᐳᕐᑐᓂᕐᓴᒥ ᐃᓕᓐᓂᐊᑎᓄᑦ ᑲᓇᑕᒥ.

ᐅᐱᒋᕙᕗᑦ ᐃᓓᑦᔭ, ᔨᓂᓗ, ᐃᓕᓐᓂᐊᑎᑦᓯᔨᓗ ᖁᑰ ᔪᕐᑌᖕ ᐃᑲᔪᕐᓯᒣᓐᓇᖃᑦᑕᓚᐅᔪᖅ ᐃᓕᓐᓂᐊᓇᐅᑉ ᐊᕐᕌᒍᓕᒫᖓᓂ. ᓂᓪᓕᕈᑎᖃᕈᒪᒻᒥᔪᒍᑦ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᔮᕐᑎᓯᑎᓪᓗᒋᑦ ᑎᕆᓪᓗᓕᐅᑦ 2016-ᒥ, ᐃᓓᔭ, ᔨᓂᓗ ᓵᓚᖃᐅᑎᑖᓚᐅᔪᒻᒥᒪᑎᒃ Cultural Heritage Award-ᒥᒃ. ᑯᐯᒻᒥ ᑕᒪᑦᓱᒥᖓ ᐱᓇᓱᐊᕐᑎᓗᒋᑦ, ᓯᕗᓪᓕᐹᖑᑦᓱᑎᒃ ᓵᓚᓂᕕᓃᒃ ᐳᕐᑐᓂᕐᓴᒥᐅᑦ 4-5-ᒥ ᐊᕕᑦᑐᓯᒪᓂᖏᓐᓂ ᐃᓗᓯᕐᓱᓯᐊᕐᓂᒨᓕᖓᔪᓂᓪᓗ ᓵᓚᖃᐅᑎᑖᕐᒥᓱᓂ ᐃᓕᓐᓂᐊᑎ ᓴᓪᓗᒥᐅᖅ, ᓘᑲᓯ ᐊᒫᒪᑦᑐᐊᖅ. ᐅᐱᒍᓲᑦᔨᕙᑦᓯ!

 ᐱᓇᓱᐊᕐᑕᕗᑦ:

ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᓇᓂᕐᒥᓗ ᓴᕐᕿᑎᑦᓯᓯᒪᓂᖓᑕ ᑲᑐᑦᔨᖃᑎᒌᓐᓂᖓ (QASEA) ᖄᖏᕐᓂᑯᓕᐅᕐᑎᐅᖏᑦᑐᖅ ᑎᓕᔭᐅᒪᐅᑎᖃᕐᓱᓂ ᐃᓕᓴᕐᑕᐅᒍᒪᓕᕐᑎᓯᓂᕐᒥᒃ ᓱᑯᐃᔦᓂᕐᒥᓗ ᓴᓇᓂᕐᒥᓗ ᓄᓇᓕᑐᖃᕐᓄᑦ ᐅᕕᒃᑲᓄᑦ ᐃᓕᓵᓄᑦ ᓄᓇᓕᑐᙯᑦ ᐃᓄᐃᓪᓗ ᓄᓇᓕᖏᓐᓂ ᑯᐯᒻᒥᐅᓂᒃ. ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᓇᓂᕐᒥᓗ ᓴᕐᕿᑎᑦᓯᓯᒪᓂᖓᑕ ᑲᑐᑦᔨᖃᑎᒌᓐᓂᖓ (QASEA) ᑎᓕᔭᐅᒪᐅᑎᒥᓄᑦ ᑎᑭᐅᑎᒍᓐᓇᓯᓲᖅ ᓄᓇᓕᑐᖃᕐᓂᒃ ᓱᑯᐃᔭᕐᓯᒪᔭᒥᓂᒃ ᑕᑯᑦᓴᐅᑎᑦᓯᓂᕐᒥᒃ ᐱᓇᓱᐊᕐᓂᒥᒍᑦ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: www.esaquebec.ca

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᒻᒥ ᓄᓇᓕᓐᓂ 14-ᓂ. ᐃᓄᒃᑎᑐᑦ ᐅᖃᐅᓯᕐᖄᖑᑎᓪᓗᒍ, ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂ. ᐃᓕᓐᓂᐊᓂᓕᕆᓂᖅ ᐃᓕᓐᓂᐊᕕᖁᑎᖃᕐᑐᖅ 17-ᓂᒃ ᐅᒃᑭᓂᕐᓴᒦᑦᑐᓄᑦ ᐳᕐᑐᓂᕐᓴᒦᑦᑐᓄᓪᓗ ᑕᓪᓕᒪᓂᓪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂᒃ ᐃᓕᓐᓂᐊᕕᖁᑎᖃᕐᓱᓂ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᕐᑎᒍᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

— 30 —

ᑐᑭᓯᒋᐊᕈᒪᒍᑦᓯ, ᐅᖄᓚᕕᒋᓗᒍ:

ᑦᔮᑦ ᑐᔅᓅ-ᐱᐊᕐᓃ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ – ᑲᑎᕕᒃ ᐃᓕᓐᓂᐊᓂᓕᕆᓂᖅ | (514) 482-8220 | publicrelations@kativik.qc.ca

ᐅᕝᕙᓘᓐᓃᑦ

ᒫᒃ ᓚᓛᓐ | ᐊᖓᔪᕐᖄᖅ – QASEAᑯᓐᓂ ᑮᓇᐅᔭᓕᕆᔨ | (819) 684-1889