ᑰᑦᔪᐊᒥ, ᓄᓇᕕᒃ ᑯᐯᒻᒥ (ᑎᕆᓪᓗᓕᐅᑦ 13, 2015) – ᔮᓂᒻᒪᕆᒻᒥ ᐃᓕᓐᓂᐊᑏᑦ ᐃᓚᐅᖃᑕᐅᔪᑦ ᐱᓇᓱᐊᕐᑕᖏᓐᓄᑦ “Jeunes Karibus”-ᑯᑦ ᓴᕐᕿᑎᑦᓯᓯᒪᓂᖃᕐᓂᐊᑐᑦ ᐊᐳᑎᒃᑯᑦ ᓯᐊᕐᕆᔭᐅᓯᔭᕐᓂᕕᓂᕐᒥᓂᒃ ᑰᑦᔪᐊᒥᑦ ᑕᓯᐅᔭᒧᑦ.

ᓴᕐᕿᑎᑦᓯᓯᒪᓂᖓ ᐃᓚᖃᕐᑎᓗᒍ ᑕᑯᓐᓇᕋᑦᓴᒥᒃ ᐊᑯᓂᐅᖕᖏᑑᕐᑐᒥᒃ ᖃᓄᐃᑦᑐᑰᕐᓂᕕᓂᖏᓐᓅᓕᖓᔪᓂᒃ. ᐅᓪᓗᒥ ᐊᑑᑎᓚᖓᔪᑦ ᑎᕆᓪᓗᓕᐅᑦ 13, 2015-ᒥ ᑕᓪᓕᒪᖕᖑᐸᑦ ᐱᖓᓲᔪᕐᑐᒧᑦ ᑎᑭᓪᓗᒍ ᑰᑦᔪᐊᑉ ᑕᕐᕋᓕᔮᕐᕕᖓᓂ ᑲᕙᒫᐱᒃᑯᖏᑦᑕ ᐃᓪᓗᖁᑎᖓᓂ.

ᐱᓇᓱᐊᕐᑕᖓ ᖁᕝᕙᕆᐊᕐᓯᒪᑎᑦᓯᔪᖅ ᐊᑐᕆᐊᑦᓯᐊᓂᖃᕐᓂᒥᒃ ᓄᓇᒥᒃ ᐃᓗᓯᕐᓱᓯᐊᕐᓇᑐᒥᒃ ᐃᓅᑎᖃᕐᓂᑎᒍᑦ ᐱᐅᓯᕐᓲᑎᑦᓯᐊᖃᕐᓂᑯᓪᓗ ᐊᔪᐃᓐᓇᓂᖃᖏᓐᓇᓱᑎᒃ ᐃᓕᓐᓂᐊᕕᒻᒥᒃ. ᐱᓇᓱᐊᕐᑕᐅᔪᖅ ᐊᐅᓚᑕᐅᔪᖅ ᐳᕐᑐᓂᕐᓴᒥ ᐃᓕᓐᓂᐊᑎᑦᓯᔩᓐᓄᑦ ᔮᓂᒻᒪᕆᒻᒥ, ᕙᓕᕆ ᕆᒨᖕᒧᑦ ᒪᒃᓯᒻ ᓲᓃᒧᓪᓗ, ᐃᙯᓕᓴᕐᑎᒪᕆᒃ ᐃᓚᒋᔭᐅᑎᓪᓗᒍ ᒫᕆ-ᐋᓐᑎᕆ ᕗᐊᕐᑌᖕ.

ᐅᑯᐊ ᐃᓕᓐᓂᐊᑏᑦ ᐱᒋᐅᕐᓴᖃᑦᑕᓚᐅᔪᑦ ᔭᓄᐊᕆ 2015-ᒥᑦ ᒫᑦᔨᒧᑦ ᑎᑭᑦᓱᒍ ᐊᐳᑎᒃᑯᑦ ᓯᐊᕐᕆᔭᐅᓯᔭᕐᓱᑎᒃ ᑕᓯᐅᔭᓕᐊᓚᐅᔪᑦ ᑰᑦᔪᐊᒥᒃ ᐱᑦᓱᑎᒃ: ᑏᓯ ᑯᐸ, ᐄᕆᒃ ᓗᒦᕐ, ᔪᐊᓇ ᑯᐸ, ᐋᓚᓐ ᑕᓐᑲᓐ, ᐋᓕᔅ ᑯᕐᒦ, ᐃᓓᑦᔭ ᓯᓅᐸ, ᓀᐆᒥ ᖁᖏᐊᖅ ᑯᐊᑕ, ᒍᐃᓕ ᔪᐊᓇᓯ, ᑯᕆᔅᑏᓐ ᖁᖏᐊᖅ ᑯᐊᑕ, ᒍᐃᓕᐊᒻ ᓯᓅᐸ, ᓀᐆᒥ ᓵᓚ-ᑰᕓᖕ, ᓯᑏᕙᓐ ᐋᓇᓈᒃ.

ᐱᓇᓱᐊᕐᑕᐅᔪᖅ ᐊᑑᑎᕈᓐᓇᓚᕿᓚᐅᔪᖅ ᐃᑲᔪᕐᓯᑎᓪᓗᒋᑦ ᓄᓇᕕᐅᑉ ᐱᓇᓱᐊᕐᕕᖓ ᓄᓇᓕᐅᓪᓗ ᖄᖏᓐᓂᑯᓕᐅᒐᓱᐊᕐᑎᖏᑦ (ᑲᑎᕕᒃ ᐃᓕᓐᓂᐊᓂᓕᕆᓂᖅ, ᒪᑭᕙᕕᒃ, ᓄᓇᕕᒃ ᓄᓇᓕᓕᒫᑦ ᑲᑎᒪᔨᖕᒋᑦ ᐃᓗᓯᓕᕆᓂᕐᓄᑦ).

ᐅᕙᒍᑦ ᒥᑦᓵᓄᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (KSB) ᐱᖕᖑᑎᑕᐅᓯᒪᔪᖅ 1975-ᒥ, ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᐅᑉ ᐊᑖᒍᑦ. 1978-ᒥᓂᒃ, ᐱᒍᑦᔨᔨᑐᐊᖑᓯᒪᔪᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᒪᓂᔪᓂᒃ ᓄᓇᕕᐅᑉ ᐃᓄᖏᓐᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᐅᑉ ᓄᓇᓕᖏᓐᓂ 14-ᓂ. ᐃᓄᒃᑎᑐᑦ ᓯᕗᓪᓕᐸᐅᑦᓱᓂ ᐅᖃᐅᓯᐅᔪᖅ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓰᑦ ᑐᖓᓪᓕᐅᓱᑎᒃ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᓄᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

— 30 —

ᑐᑭᓯᒋᐊᕈᒪᕈᕕᑦ, ᐅᕗᖓ ᐅᖃᕐᓗᑎᑦ:

ᔮᑦ ᑐᔅᓅ ᐱᐊᕐᓃ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᒍᑎᓕᕆᔨ
(514) 482-8220
publicrelations@kativik.qc.ca