ᐃᓕᓐᓂᐊᓇᐅᑉ ᐊᕐᕌᒍᖓ ᐱᒋᐊᖕᖓᑎᓪᓗᒍ, ᐅᖃᕈᒪᕗᖓ ᐊᓕᐊᓱᓐᓂᕋᓄᑦ ᐅᐱᒍᓱᓐᓂᕋᓄᓪᓗ ᓄᓇᕕᒻᒥᐅᓕᒫᑦ ᐊᓂᒎᑎᑦᓯᐊᓯᒪᓂᖏᓐᓄᑦ ᐱᔭᕇᕐᓯᒪᑦᓱᑎᓪᓗ ᐃᓕᓐᓂᐊᑎᑕᐅᓂᕐᒥᓄᑦ 2022-2023-ᒥ.

ᓄᓇᕕᓕᒫᒥ, 76 ᐃᓄᐃᑦ ᐃᓕᑕᕆᔭᐅᒍᑎᑖᕐᑐᕕᓃᑦ ᐱᔭᕇᕐᑐᕕᓂᐅᓂᕐᒥᓄᑦ ᐳᕐᑐᓂᕐᓴᒥ (7 ᓄᑲᕐᓰᑦ ᐃᓕᓐᓂᐊᑎᑕᐅᕕᖏᓐᓂ ᐊᒻᒪᓗ 5 ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂ). ᓄᑲᕐᓰᑦ ᐃᓕᓐᓂᐊᑎᑕᐅᕕᖏᓐᓂ, 8 ᐃᓕᓐᓂᐊᑏᑦ ᐃᓕᑕᕆᔭᐅᒍᑎᑖᕐᓂᒥᔪᑦ ᐱᓇᓱᐊᓚᐅᕋᑎᒃ ᐱᒋᐅᕐᓴᑎᑕᐅᓂᕐᒧᑦ ᐱᔭᕇᒍᓯᕐᑕᐅᓱᑎᒃ. ᐱᓇᓱᒐᕐᓂ ᐱᒋᐅᕐᓴᑎᑕᐅᓂᕐᓄᓕ, 5 ᐃᓄᐃᑦ ᐃᓕᑕᕆᔭᐅᒍᑎᑖᕐᑐᕕᓃᑦ ᐱᓇᓱᐊᕐᒥᒃ ᐱᒋᐅᕐᓴᑎᑕᐅᓂᖃᕐᓱᑎᒃ ᐊᑦᔨᒌᖕᖏᑐᓂ ᑐᖕᖓᕕᓕᓐᓂ. ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᕆᓲᖏᑦ ᑲᔪᓯᑦᓯᐊᑐᒥ ᐊᓂᒎᑎᑦᓯᐊᓲᖑᖏᓐᓇᑐᖅ, 16 ᐃᓄᑐᐃᓐᓀᑦ ᐃᓕᓐᓂᐊᑎᑦᓯᔩᑦ ᐃᓕᑕᕆᔭᐅᒍᑎᑖᕐᓯᒪᓕᕐᑐᑦ, ᐃᓚᐅᑎᓪᓗᒋᑦ 6 ᒪᑭᐊᓪ ᐃᓕᓐᓂᐊᕕᕐᔪᐊᖓᓂ ᐊᒻᒪᓗ 10 UQAT ᐃᓕᓐᓂᐊᕕᕐᔪᐊᖓᓂ. ᑭᖑᓪᓕᐹᒥ, ᑲᑎᓕᒫᕐᓱᒋᑦ 37 ᓄᓇᕕᒻᒥ ᐃᓚᐅᔫᔪᐃᑦ ᐱᔭᕇᕐᓯᒪᒻᒥᔪᑦ ᐱᔪᓐᓇᐅᑎᑖᕐᓂᒧᑦ ᐱᒋᐅᕐᓴᑎᑕᐅᓂᕐᒥᒃ, ᐃᓕᓐᓂᐊᕆᐊᓪᓛᕕᒻᒥ ᐃᓕᓐᓂᐊᑎᑕᐅᓂᒃᑯᑦ ᐅᕝᕙᓘᓐᓃᑦ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᑕᐅᓂᒃᑯᑦ ᐅᐱᕐᖓᓴᐅᓚᐅᔪᒥ (ᐃᓚᐅᑎᓪᓗᒋᑦ ᓄᓇᕕᒃ ᓯᕗᓂᑦᓴᕘᒻᒥ). ᐊᑕᐅᑦᓯᑯᑦ, ᑕᒪᒃᑯᐊ ᐱᔭᕇᕐᓯᒪᔪᑦ ᓄᓇᕕᒻᒥ ᓯᕗᒧᐊᕆᐊᕐᑎᓯᕗᑦ. ᐊᑦᑐᑕᐅᓪᓚᕆᒃᑯᖓ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᓴᐳᒻᒥᒍᓐᓇᓯᓯᒪᒻᒪᑕ ᐃᓘᓐᓇᓯᐊᖏᓐᓂᑦ ᐃᓕᓐᓂᐊᓂᖃᕐᑎᓗᒋᑦ.

ᑕᒪᒃᑯᐊ ᐊᓂᒎᑎᔭᐅᓯᒪᔪᑦ ᐱᕕᑦᓴᐅᒍᓐᓇᖏᓪᓚᑦ ᐃᓚᐅᓐᓂᖏᒃᑯᑎᑦ ᐱᓇᓱᑦᑎᓕᒫᑦ, ᐊᒥᓱᐃᓪᓗ ᐱᓇᓱᑦᑏᑦ ᑕᑯᑦᓴᐅᒐᑎᒃ ᐱᓇᓱᐊᕐᓂᖃᓲᑦ ᑲᔪᓯᑦᓯᐊᑐᒥ ᐊᓂᒎᑎᖁᓪᓗᒋᑦ ᐃᓕᓐᓂᐊᑎᖁᑎᖏᑦ. ᐃᓕᒐᑖᕐᓯᒪᒍᕕᑦ ᐱᓇᓱᑦᑎᐅᓂᕐᒧᑦ, ᑐᖕᖓᓱᑦᑎᕙᒋᑦ. ᐅᑎᓛᕐᓂᐊᕈᕕᑦ ᑖᑦᓱᒧᖓ ᐊᕐᕌᒍᑦᑎᓄᑦ, ᓇᑯᕐᒦᒃ ᑲᔪᓯᐅᑦᔨᓯᒐᕕᑦ  ᐃᓕᓐᓂᐊᓂᕐᒨᓕᖓᔪᒥᒃ ᐊᒻᒪᓗ ᐃᑲᔪᕐᓯᒐᓱᐊᕐᕋᕕᑦ ᓄᓇᕕᒻᒥ.

ᐊᕐᕌᒍᖅ 2023 ᓇᓗᓀᕐᓯᒋᕗᖅ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᑎᓕᔭᐅᒍᑎᖏᑦᑕ ᐃᓱᓕᓯᓐᓂᖓᓄᑦ.. ᐊᒥᓱᓂᒃ ᐱᓇᓱᐊᕐᓯᒪᔪᐹᓘᑦᓱᑎᒃ ᐊᓂᒍᐃᖃᑦᑕᓱᑎᓪᓗ ᑎᓕᔭᐅᒍᑎᕕᓂᕐᒥᓄᑦ, ᐅᖃᕈᒪᕗᖓ ᐳᒃᑭᓕᒋᐊᕐᓯᒪᓂᖏᓐᓄᑦ ᐊᑯᓐᓂᖁᑦᓯᐅᑎᐅᓲᑦ ᐱᓇᓱᓐᓂᑯᑦ ᐱᐅᓯᐅᒋᐊᓕᓐᓂ ᒪᓂᒪᔭᐅᓲᑦ ᐱᓇᓱᑦᑎᖁᑎᑦᑎᓄᑦ ᓄᓇᕕᐅᑉ ᐃᓗᐊᓂ ᐊᒻᒪᓗ ᐱᓇᓱᑦᑎᑖᕆᔭᐅᓲᑦ ᓄᓇᕕᐅᑉ ᓯᓚᑖᓂ. ᐊᕐᕌᒎᓚᐅᔪᒥ, ᒪᓂᔨᖃᑦᑕᓯᒪᔪᒍᑦ ᓄᑖᓂᑦ ᐱᕚᓪᓕᕈᑎᑦᓴᐅᔪᓂᑦ ᐃᓚᐅᑎᓪᓗᒋᑦ ᐊᑭᓖᕈᑎᐅᒍᓐᓇᓂᖏᓐᓄᑦ ᓂᖀᑦ ᐅᓯᔭᐅᒍᑎᖏᓐᓄᑦ ᐃᑲᔪᕐᓯᐅᑏᑦ, ᐃᓚᒋᓕᕐᑕᐅᓱᑎᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᓄᑦ. ᐊᓯᖏᑦ ᐱᕚᓪᓕᕈᑎᑦᓭᑦ, ᐆᑦᑑᑎᒋᓗᒍ ᐱᓇᓱᑦᑎᐅᖏᓐᓇᓂᕐᒧᑦ ᐊᑭᓕᕐᑕᐅᒍᑏᑦ, ᖃᖓᑦᑕᐅᑏᑦ ᐱᕚᓪᓕᕈᑎᑦᓭᑦ (ᐊᓂᕐᕋᑫᓐᓇᕈᑏᑦ) ᐊᒻᒪᓗ ᐃᓪᓗᖃᕐᑎᑕᐅᓂᕐᒧᑦ ᐃᑲᔪᕐᓯᐅᑏᑦ, ᐊᐅᓚᑦᓯᓂᓕᕆᓂᑦᑎᒍᑦ ᒪᓕᒐᓕᐊᖑᓯᒪᔪᑦ ᑐᓂᔭᐅᒪᑦᓱᑎᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓄᑦ ᓇᑯᕐᑐᖅ ᐃᓚᒋᐊᕐᑎᑕᐅᓂᕕᓂᖏᓐᓄᑦ ᐊᒻᒪᓗ ᑮᓇᐅᔭᖃᕐᑎᑕᐅᒋᐊᓪᓛᓲᖑᓂᖏᓐᓄᑦ ᑲᕙᒪᒃᑯᓄᑦ.

ᑫᓪᓗᑐᐃᒋᐊᓪᓛᖁᖓ ᑭᓇᓕᒫᒃᑯᓂ ᐃᓕᓐᓂᐊᓂᕐᒥᒃ ᐊᓐᓂᕈᓱᑦᑐᓂᒃ ᐃᓚᐅᖃᑕᐅᒋᐊᓪᓛᖁᑦᓱᒋᑦ ᐱᖁᔭᓕᕆᓂᕐᒥᒃ. ᓱᓕᑦᓯᐊᑑᓗᑎᑦ ᐊᒻᒪᓗ ᐊᔪᐃᓐᓇᕈᑎᖃᑦᓯᐊᓗᑎᑦ, ᓄᓇᓕᓐᓂ ᐆᑦᑐᕋᑦᓴᓂᐊᕆᑦ ᐃᑦᓯᕙᑦᑎᐅᓂᕐᒧᑦ ᐊᒻᒪᓗ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᐅᓂᕐᒧᑦ. ᑲᑎᖕᖓᔩᑦ ᓂᕈᐊᕐᑕᐅᓂᑦᓴᖏᑦ ᐊᑑᑎᓛᕐᓂᐊᑐᑦ ᓇᑦᔪᐃᔭᕐᕕᒃ 2023-ᒥ.

ᐅᑎᑦᓯᐊᕆᑦᓯ ᐊᒻᒪᓗ ᐊᓕᐊᓱᐊᓪᓗᓯ ᐃᓕᓐᓂᐊᓇᐅᑉ ᐊᕐᕌᒍᖓᓂ ᐃᓘᓐᓇᓯᐊᓯ!