ᐊᑯᓂᐅᓕᕐᑐᖅ ᐃᓕᓐᓂᐊᑎᑦᓯᔨᐅᑦᓱᓂ ᐅᓪᓗᕆᐊᖅ ᐃᓕᓐᓂᐊᕕᖓᓂ (ᑲᖏᕐᓱᐊᓗᑦᔪᐊᖅ) ᑖᓂᐊᓕ ᐋᓇᓈᒃ ᐃᓕᑕᕆᔭᐅᒍᑎᑖᕐᑐᕕᓂᖅ ᐳᕐᑐᓂᕐᐸᐅᖃᑕᐅᔪᒥᒃ ᐃᓕᑕᕆᔭᐅᒍᑎᒥᒃ ᓄᓇᕕᒻᐅᓄᑦ: ᐅᐱᒋᔭᐅᖃᑎᒌᑦ ᓄᓇᕕᒻᒥ ᐱᓂᐊᕈᑎᖓ.
ᑲᔪᓯᑎᑕᐅᓂᖃᕐᓱᓂ ᒪᑭᕝᕕᒃ ᑯᐊᐳᕇᓴᒃᑯᓄᑦ, ᑖᓐᓇ ᐃᓕᑕᕆᔭᐅᒍᑎ ᐅᐱᒍᓲᑎᐅᑦᓱᓂ ᐊᖑᑎᓄᑦ ᐊᕐᓇᓄᓪᓗ ᐅᑭᐅᓕᓕᒫᓄᑦ ᐊᒻᒪᓗ ᐃᓕᑕᕐᓯᒪᒍᑎᐅᑦᓱᓂ ᐱᓇᓱᐊᕐᑕᐅᓯᒪᔪᓂᑦ ᐊᑦᔨᒌᖕᖏᑐᓂ ᐱᓇᓱᒐᓐᓂ. ᐊᕐᕌᒍᑕᒫᑦ ᓄᓇᕕᒻᒥᐅᑦ ᓈᒪᓃᑎᓲᑦ ᔦᒥᓯ ᐯ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐃᓚᐅᔫᔪᓂᑦ ᐊᐅᓚᑦᓯᓂᕆᓲᖏᓐᓄᑦ ᐊᒻᒪᓗ ᐊᔪᐃᓐᓇᕈᑎᖃᓲᖑᓂᖏᓐᓄᑦ, ᐊᒻᒪᓗ ᐃᓕᑕᕆᔭᐅᒍᑎᑖᕐᑐᑦ ᑭᓇᐅᓂᖏᑦ ᓇᓗᓀᕐᑕᐅᓲᑦ ᓄᓇᕕᒻᒥ ᐃᑦᔭᕋᑦᓴᓯᐊᖑᓂᖏᓐᓄᑦ ᐊᒻᒪᓗ ᐃᓕᑕᕆᔭᐅᒍᑎᖃᓂᐊᓕᕐᓱᑎᒃ ᐅᐱᒋᔭᐅᖃᑎᒌᑦ ᓄᓇᕕᒻᒥ ᐱᓂᐊᕈᑎᖓᓄᑦ ᓇᓪᓕᐅᓂᕐᓯᐅᓂᖃᓕᑐᐊᕋᒥᒃ.
ᐊᕐᕌᒍᓂᑦ ᐊᕙᑎᑲᓴᐅᓕᕐᑐᓂ ᐱᓇᓱᐊᓕᕐᓱᓂ, ᑖᓂᐊᓕ ᐃᒻᒥᓂᑦ ᑐᓂᒪᑦᓯᐊᑐᕕᓂᖅ ᐃᑲᔪᕐᓯᒍᒪᓂᖃᕐᓱᓂ ᐊᕐᓱᕉᓴᕐᑐᓂᑦ ᐅᕕᒃᑲᓂᑦ ᐱᒍᓐᓇᓯᑎᑦᓯᐊᒐᓱᐊᕐᓱᒋᑦ ᓄᓇᓕᐅᑉ ᐃᓗᐊᓂ ᐃᑲᔪᕐᑐᓱᒋᑦ, ᐃᓕᓐᓂᐊᑎᑦᓱᒋᑦ ᐃᓅᓯᕐᒥᒃ ᐊᑐᕐᑐᓂᒃ ᐆᑦᑑᑎᒋᑦᓱᒍ ᐆᒪᔪᕐᓯᐅᓂᖅ, ᐊᒻᒪᓗ ᐃᓚᖓᓂ ᐊᑖᑕᐅᔪᑦᑎᑐᑦ ᐱᐅᓯᖃᕐᓱᓂ ᐊᒥᓱᓄᑦ ᓱᕈᓯᕐᓄᑦ ᐃᓕᓐᓂᐊᑎᑕᒥᓄᑦ.
ᓈᓇᓯ ᐃᑦᑐᒃ, ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᑕ ᑐᖓᓕᐊ ᓈᒪᓃᑎᕐᑐᕕᓂᖅ ᑖᓂᐊᓕᒥᒃ ᐅᐱᒋᔭᐅᖃᑎᒌᑦ ᓄᓇᕕᒻᒥ ᐱᓂᐊᕈᑎᖓᓄᑦ. “ᑖᓂᐊᓕ ᐆᑦᑑᑎᑦᓴᓯᐊᕕᓂᖅ ᑖᑦᓱᒧᖓ ᐃᓕᑕᕆᔭᐅᒍᑎᕐᒧᑦ, ᐱᓇᓱᐊᕐᓂᕆᖃᑦᑕᓯᒪᔭᓕᒫᖏᓐᓄᑦ ᓲᖑᓯᒋᐊᕆᖃᑦᑕᓱᓂ ᐅᕕᒃᑲᓂᑦ ᐊᒻᒪᓗ ᐃᓄᓐᓂᑦ ᐊᕙᑎᖏᓐᓃᑐᓂᑦ, ᖃᐅᔨᒪᓂᕐᒥᓂᒃ ᐃᓕᓐᓂᐊᑎᑦᓯᖃᑦᑕᓱᓂ ᐊᒻᒪᓗ ᐃᓄᑦᓯᐊᐸᐅᔮᓘᑦᓱᓂ. ᑖᓂᐊᓖ, ᐃᓕᓐᓂᑦ ᐅᐱᒍᓱᒻᒪᕆᒃᑯᖓ ᐱᖃᓐᓈᕆᒐᑦᑎᒋ ᐊᒻᒪᓗ ᓭᒻᒪᑕᐅᓯᒪᑦᓯᐊᑐᒍᑦ ᐃᓅᓯᑦᑎᓃᓂᕐᓄᑦ.”
ᑭᓇᓕᒫᒃᑯᓂ ᐱᑦᓱᓂ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ: ᓇᑯᕐᒦᒃ ᐃᓱᒣᓐᓈᓗᒃ ᑖᓂᐊᓖ ᐃᑲᔪᕐᓂᖃᒻᒪᕆᓲᖑᒐᕕᑦ ᐃᓕᓐᓂᐊᑎᑦᓯᓂᒃᑯᑦ ᐅᕕᒃᑲᖁᑎᑦᑎᓂ.