ᐃᓕᓐᓂᐊᑎᑦᓯᔨᒥᑦ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ:

ᐃᓚᒻ ᐊᒃᐳᑉ ᐃᖏᕐᕋᓂᕆᓯᒪᔭᖓ

ᐃᓚᒻ ᐊᒃᐳᑉ ᐃᓅᓯᕐᒥᓂ ᐊᕐᖁᑎᖓ ᐊᒥᓱᓂ ᐊᕝᕕᐊᓗᑕᓂᒃ ᐱᑕᖃᕐᑐᖅ ᐅᑕᕐᕿᑐᓂᒃ ᐊᓂᒍᑎᔭᐅᓂᑦᓴᒥᒃ.

“  ᐃᒻᒥᓂᒃ ᐅᖃᐅᑎᕙᑉᐳᖓ ᐃᓅᓯᖅ ᐅᖁᒣᓪᓘᓇᕐᑐᑕᖃᕆᐊᖓ. ᓱᓇᓕᒫᑦᓯᐊᑦ ᐊᑑᑎᔭᒃᑲ, ᓇᒧᖕᖓᕋᓗᐊᕈᒪᓗ, ᐅᖁᒣᓪᓘᕈᑎᒃ ᐅᑕᕐᕿᔪᖅ: ᓄᐃᑦᓴᕋᑕᕐᒪᓗ, ᐃᓱᒪᒃᑯᑦ ᐊᑐᐃᓐᓇᕈᕐᑎᒌᕐᓯᒪᕙᑉᐳᖓ ᓴᖕᖓᓚᖓᓕᕆᐊᖓ. ᑖᓐᓇ ᐱᐅᓯᑐᐃᓐᓇᕋ.  ”

ᐅᑭᐅᕐᑕᑐᒥᒃ ᖃᐅᔨᓂᖅ

ᐃᓅᓕᕐᓯᒪᔪᖅ ᑑᑯᒥ, ᐃᓗᒻ ᐊᓂᕐᕋᒥᓂᒃ ᕿᒣᓯᒪᔪᖅ ᑲᓇᑕᓕᐊᕐᓱᓂ 2013 ᐅᐱᕐᖔᖓᓂ. ᓯᑰᑎᒥᒥᐅᖑᓚᐅᑲᑦᓱᓂ ᓯᓐ ᕗᐊᒨᓕᕐᓂᒥᔪᖅ, ᐱᓇᓱᐊᕈᒪᒐᔭᕐᑕᒥᓂᒃ ᓇᕝᕚᓂᐊᓕᕋᒥ ᐊᑐᒑᑉ ᐃᓕᓐᓂᐊᕕᕐᔪᐊᖓᓂ: ᐃᓕᓐᓂᐊᑎᑦᓯᔨᐅᓂᕐᒥᒃ. ᐊᓂᕐᕋᖃᓕᕐᓱᓂ ᐋᑐᒐᑉ ᓄᓇᖁᑎᖓᓂ, ᐃᓗᒻ ᐃᓕᓐᓂᐊᕕᕐᔪᐊᒦᓕᕐᑐᕕᓂᖅ 2016-ᒥ, ᓯᕗᓂᖃᓕᕐᓱᓂ ᐃᓕᓐᓂᐊᑎᑦᓯᔨᐅᒍᒪᓂᕐᒥᒃ ᓄᓇᖃᕐᖄᓯᒪᔪᑦ ᓄᓇᓕᖓᓂ.

“  ᓱᓇᒧᑦ ᓄᓇᖃᕐᖄᓯᒪᔪᑦ ᓄᓇᓕᖓᓂ ᐃᓕᓐᓂᐊᑎᑦᓯᔨᐅᒍᒪᓚᕿᓯᒪᕕᑦ?  ” ᑐᑭᓯᒍᒪᓂᑯᒐᓄᑦ.

“  ᐋᑐᒑᑉ ᐃᓕᓐᓂᐊᕕᕐᔪᐊᖓᓂ ᐃᓕᓐᓂᐊᑕᕋ ᐃᓚᖃᕐᓯᒪᔪᖅ ᓇᓪᓕᑳᕋᑦᓴᔭᐅᔪᓂᒃ ᐃᓕᓐᓂᐊᑎᐅᓕᕐᑐᓄᑦ ᒪᕐᕉᓂᒃ ᐊᕐᕌᒎᓐᓂᒃ. ᐃᓚᖓᑦ ᓇᓪᓕᑳᕋᑦᓴᔦᑦ ᐃᓕᓐᓂᐊᓂᐅᓯᒪᔪᖅ ᓄᓇᖃᕐᖄᓯᒪᔪᑦ, ᐃᓄᐃᑦ ᐊᓪᓚᖓᔪᐃᓪᓗ ᐱᓪᓗᒋᑦ, ᑖᓐᓇᓗ ᐃᓕᑦᓯᒍᑎᒋᓪᓚᕆᓯᒪᔭᕋ ᐃᓕᕐᕈᓯᖓᓂᒃ ᐃᓕᓐᓂᐊᓂᖓᓂᓪᓗ ᓄᓇᖃᕐᖄᓯᒪᔪᐃᑦ. ᐃᓱᒪᖃᕐᑐᖓᓕ, ᑖᓐᓇ ᐃᓕᓐᓂᐊᕋᑦᓴᓯᐊᕌᓗᒋᐊᖓ ᑭᓇᑐᐃᓐᓇᒧᑦ ᐃᓕᓐᓂᐊᑎᑦᓯᒍᒪᒐᔭᕐᑐᒧᑦ ᑲᓇᑕᒥ.  ”

“  ᑕᒪᓐᓇ ᓱᓕᔪᕋᑕ! ᑕᒐ ᑲᓇᑕᐅᑉ ᓄᓇᖃᕐᖄᓯᒪᔪᖏᑦᑕ ᖃᓄᐃᑦᑐᑰᕐᓯᒪᓂᖓ ᑐᑭᓯᒍᒪᓪᓚᕆᑦᓯᒪᔦᑦ?  ”

“  ᐃᓱᒣᓐᓇᖅ. ᐃᓕᓐᓂᐊᑕᕋᓂ ᐱᔭᕇᑦᓴᑐᐊᕋᒪ, ᐱᓇᓱᐊᖃᑎᖃᕈᒪᓯᓚᐅᔪᖓ ᐊᓪᓚᓂᒃ ᒍᐃᓂᐲᒃ ᓴᓂᐊᓂᒥᐅᓂᒃ.  ”

ᒫᓂᑑᐸᒥ, ᐃᓗᒻ, ᒍᐃᒍᐃᑎᑑᕆᐅᕐᓴᑎᑦᓯᔨᐅᑦᓱᓂ, ᑲᑎᓯᒋᐊᖕᖓᓯᒪᔪᑦ ᓄᓇᖃᕐᖄᓯᒪᔪᓂᒃ. ᓯᑕᒪᓂᒃ ᑕᕐᕿᓂᒃ ᐃᓕᓐᓂᐊᑎᑦᓯᓚᐅᕐᓱᓂ, ᐃᓗᒻ ᑐᑭᑖᓕᕐᓂᒥᔪᖅ ᐊᓯᐊᓄᑦ ᓅᓚᖓᓕᕆᐊᒥᒃ. Hay River-ᒧᑦ ᓄᓇᑦᓯᐊᒥ ᐃᓕᓐᓂᐊᑎᑦᓯᔨᐅᓯᒻᒥᓱᓂ.

“  ᐊᑯᓃᕐᓂᓴᐅᒐᔭᕐᓯᒪᒐᓗᐊᕐᑐᖓ, ᑭᓯᐊᓂ Hay River-ᒥ ᐱᓀᓗᑕᖃᓚᐅᔪᖅ ᒍᐃᓂᐲᒃᑎᑐᑦ: ᐃᑭᓗᐊᑦᓯᐊᓚᐅᔪᒻᒪᑕ ᓄᓇᖃᕐᖄᓯᒪᔪᑦ ᐃᓕᓐᓂᐊᑏᑦ ᒍᐃᒍᐃᑎᑐᑦ ᐃᓕᓐᓂᐊᕕᖏᓐᓂ, ᐊᒥᓲᓂᕐᓭᑦ ᖃᓪᓗᓇᑎᑑᕐᑐᓂ ᐃᓕᓐᓂᐊᕕᓐᓃᓂᕐᓴᐅᓚᐅᔪᑦ.  ”

ᑖᓐᓇ ᑑᑯᒥᐅᔭᖅ ᐃᓕᓐᓂᐊᑎᑦᓯᔨ ᓴᐱᓕᕐᓂᐅᔭᕐᓯᒪᖕᖏᑐᖅ ᑲᓇᑕᒥ ᐃᓕᓐᓂᐊᑎᑦᓯᔨᐅᒍᒪᑦᓱᓂ. 2019-ᖑᓕᕐᑎᓗᒍ ᐱᓇᓱᒐᕐᑖᕈᓐᓇᓯᓚᐅᔪᖅ ᑲᑎᕕᒃ ᐃᓕᓴᕐᓂᓕᕆᔨᒃᑯᖏᓐᓂ, ᑯᐯᑉ ᑕᕐᕋᖓᓅ ᐁᓚᕿᑦᓱᓂ.

ᓄᓇᕕᒃ!

ᐃᓗᒻ ᐃᓕᓴᕐᓂᓕᕆᔨᒃᑯᑎᓐᓂ ᐱᓇᓱᐊᕐᓯᒪᓕᕐᑐᖅ ᐊᕐᕌᒍᓂᒃ ᓯᑕᒪᓂᒃ ᐃᓕᓐᓂᐊᑎᑦᓯᔨᓄᓪᓗ ᐊᖓᔪᕐᖃᐅᓕᕐᓱᓂ ᑕᕐᓴᑲᓪᓚᐅᑉ ᐃᓕᓐᓂᐊᕕᖓᓂ ᐊᐅᐸᓗᒻᒥ. ᕕᕗᐊᕆ 2020-ᒥ ᐃᓕᓐᓂᐊᑎᑦᓯᓯᔪᕕᓂᖅ ᓴᓪᓗᓂ, ᐃᑲᔪᕐᑕᐅᓯᐊᕆᐊᓕᓐᓂᒃ ᐃᓕᓐᓂᐊᑎᑦᓯᓱᓂ ᐱᒋᐅᕐᕕᐅᑉ ᐃᓕᓐᓂᐊᕕᖓᓂ, ᑕᒡᒐᓂ ᐊᕐᕌᒍᑦᓭᓇᕐᒥ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ ᑐᖓᓕᑖᕆᔭᐅᓯᒻᒥᓱᓂ.

“  ᖃᓄᖅ ᑐᓴᕐᓂᕿᑦ ᑲᑎᕕᒃ ᐃᓕᓴᕐᓂᓕᕆᔨᒃᑯᑦ ᒥᑦᓵᓄᑦ?  ”

“  ᓄᓇᑦᓴᔭᕋᓂᒥᐅᔭᖅ ᐱᖃᑎᒐ ᐃᓕᓐᓂᐊᕕᕐᔪᐊᒦᖃᑎᒋᓯᒪᑦᓱᒍ ᐱᓇᓱᒐᕐᒧᑦ ᐆᑦᑐᖁᔨᓯᒪᔪᖅ ᓄᓇᕕᒻᒥᐅᖑᒐᔭᕐᓗᖓ. ᓱᓇᐅᕝᕙ ᐃᓕᓐᓂᐊᑎᑦᓯᔨᐅᓕᕇᕐᑐᕕᓂᒃ ᑲᑎᕕᒃ ᐃᓕᓴᕐᓂᓕᕆᔨᒃᑯᖏᓐᓂ Hay River-ᒥᐅᖑᑎᓪᓗᖓᓱᓕ.  ”

“  ᐊᓱᐃᓛ ᓈᒻᒪᓇᕐᓂᖃ ᐱᓇᓱᒐᕐᑖᕋᓱᐊᖁᔨᑦᓱᓂ?  ” ᐃᔪᕐᑐᖓ.

“  ᒪᕆᒃ, ᖁᖓᑦᓱᓂ. ᐃᓂᑦᓴᔭᕋᓂᓪᓚᕆᒃᑯᖓ ᑕᒫᓂ.  ” 

ᐃᓗᒻ ᐱᓇᓱᐊᒐᖃᕐᑐᖅ ᑕᕐᓴᑲᓪᓚᐅᑉ ᐃᓕᓐᓂᐊᕕᖓᓂ ᓴᐳᑦᔨᓯᒪᒋᐊᖃᕐᓱᓂ ᐃᓕᓐᓂᐊᑎᑦᓯᔨᓂᒃ, ᑭᖕᖑᒪᒋᔭᖏᑦᑎᒍᑦ ᐃᑲᔪᕐᓱᒋᑦ ᐱᓇᓲᑎᖃᑦᓯᐊᑎᒐᓱᐊᕐᓱᒋᓪᓗ ᐃᓕᓐᓂᐊᑎᑦᓯᓯᐊᕈᑎᑦᓴᖏᓐᓂᒃ ᐃᓕᓐᓂᐊᑎᓂᒃ.

“  ᐃᓕᓐᓂᐊᑎᑦᓯᔨᓄᑦ ᐊᖓᔪᕐᖃᐅᒋᐊᒥᒃ ᐱᒍᓐᓇᓯᐊᕐᑐᕆᕖᑦ?  ”

“  ᐃᓕᓐᓂᐊᑎᑦᓯᔩᑦ ᑐᑭᓯᒪᔭᐅᒍᒪᓂᖃᑦᓯᐊᑐᑦ ᐊᐅᓚᑦᓯᔨᐅᔪᓄᓪᓗ ᓴᐳᑎᓯᒪᔭᐅᒋᐊᖃᕐᓂᒥᒃ ᖃᐅᔨᒪᒋᐊᖃᕐᓱᑎᒃ, ᐃᓕᓐᓂᐊᑎᑦᓯᔨᓄᑦ ᐊᖓᔪᕐᖄᕆᔭᐅᑦᓱᖓ, ᓯᕗᓂᖃᕋᓱᐊᕐᖁᖓ ᑕᒪᑐᒥᖓ ᑲᔪᓯᑎᑦᓯᓯᐊᕈᒪᓂᕐᒥᒃ ᐊᐅᐸᓗᒻᒦᓗᖓ ᐊᑯᓃᕈᓐᓇᕕᓕᒫᕋᓄᑦ.  ” ᐃᓗᒻ ᑭᐅᔪᖅ, ᐃᓱᒪᑦᓴᓯᐅᓚᐅᕐᓱᓂ.

“  ᑕᑯᓯᒪᔭᕋᒍᑦ, ᐃᓕᓐᓂᐊᕕᐅᑉ ᐱᓇᓱᑦᑎᖏᑦ ᐃᓕᓐᓂᒃ ᐅᒃᑯᐃᖔᕐᕕᖃᑦᓯᐊᕆᐊᒥᒃ ᓯᕘᕋᒐᓛᖕᖏᑐᑦ.  ” 

“  ᐊ! ᐅᕙᓐᓄᑦ ᙯᕙᑦᑐᑦ ᐊᖏᕐᑕᐅᒍᒪᐅᑎᖃᓕᕋᒥᒃ ᐱᓇᓱᐊᕈᒪᔭᒥᓂᒃ ᐃᓱᒪᒌᓯᒪᔭᒥᓂᓪᓗ. ᑕᒪᓐᓇ ᓇᓗᒋᖕᖏᓯᐊᕐᑕᕋ ᐃᓅᖃᑎᒋᔭᕐᒥᒃ ᐱᓇᓱᐊᖃᑎᖃᑦᓯᐊᕈᓐᓇᐅᑏᑦ ᐊᑐᕐᓱᒋᑦ. ᐃᑦᓯᕙᖃᑎᖃᕈᓐᓇᓯᐊᕐᑐᖓ ᐃᓄᓐᓂᒃ, ᐅᖄᖃᑎᒋᑦᓱᒋᑦ, ᐊᐱᕆᖃᑦᑕᓱᒋᑦ ᑐᑭᓯᕕᒋᑦᓱᒋᓪᓗ, ᐱᓇᓱᐊᖃᑎᒌᓐᓂᑯᑦ ᓇᓗᓀᕐᓯᖃᑎᒌᒍᓐᓇᕋᑦᑕ ᐱᓀᓗᑕᓄᑦ ᐋᕐᕿᒍᑎᐅᒍᓐᓇᑐᓂᒃ. ᐱᕕᓕᒫᒃᑯᑦ ᑲᔪᓯᑎᑦᓯᒍᓐᓇᓯᓲᖑᔪᖓ ᖃᓄᐃᓘᕈᑕᐅᒍᒪᔪᓂᒃ ᐱᒍᓐᓇᕕᖃᑦᓯᐊᑐᐊᕐᒪ.  ”

“  ᐃᓗᒻ, ᐊᓕᐊᓇᑫᓐᓇᖁᖅ ᐅᖄᖃᑎᖃᕆᐊᒥᒃ ᐃᓕᓐᓂᒃ. ᓯᕗᓂᖃᑦᓯᐊᖁᕙᒋᑦ!  ”