ᐱᖃᑎᒌᓐᓂᒧᑦ ᐱᖕᖑᐊᓂᖅ ᐱᐅᓯᕆᔭᐅᓲᖑᕗᖅ ᐊᕐᕌᒍᓂ ᓯᑕᒪᓂ ᐃᓕᓴᕐᓂᓕᕆᓂᕐᒥ. ᐱᒍᓐᓇᑎᑦᓯᓲᖑᕗᖅ ᐊᑦᔨᒌᖕᖏᑐᓂᒃ ᐃᓕᓐᓂᐊᕕᓐᓂᒃ ᐱᓇᓱᖃᑎᒌᓐᓂᒥᒃ ᐊᒻᒪᓗ ᐃᓚᐅᓂᕐᒥᒃ ᐃᓕᓐᓂᑎᓂᒃ ᐃᙯᓕᓴᕐᓂᑯᑦ ᐱᓯᑎᐅᓕᐅᑎᓂᕐᒥᒃ. ᐊᑐᓂᑦ ᐃᓕᓐᓂᐊᕖᑦ ᐃᓕᒌᓕᐅᓲᖑᕗᑦ, ᐱᒋᐅᕐᓴᓱᑎᒃ ᐊᒻᒪᓗ ᐱᔭᕆᐅᕐᓴᑎᑦᓯᓱᑎᒃ ᑕᕐᕿᓂ ᐊᒥᓱᒐᓚᓐᓂ ᐱᓯᑎᐅᓕᐅᑎᓐᓇᓚᐅᕐᑎᓇᒍ. ᐃᓕᓐᓂᐊᑏᑦ ᐱᔭᕆᐅᕐᓴᑎᑕᐅᓲᑦ ᓄᓇᓕᓐᓂᒥᐅᒧᑦ ᐊᒻᒪᓗ ᐃᓕᓐᓂᐊᑎᑦᓯᔨᒧᑦ ᐸᑦᑕᒥᒃ ᐊᓂᒡᒍᑕᒐᕆᐅᕐᓴᓱᑎᒃ, ᑲᑌᔪᒐᕐᓂᒥᒃ, ᐊᒻᒪᓗ ᐃᓪᓘᑉ ᐃᓗᐊᓂ ᐊᔪᑦᑕᓱᑎᒃ, ᐃᓄᐃᑦ ᐱᖕᖑᐊᕈᓯᖏᓐᓂᒃ ᐊᒻᒪᓗ ᖄᑭᕐᓂᒥᒃ. ᐱᑦᔪᑎᖓ ᐱᓯᑎᐅᓕᐅᑎᓂᐅᑉ ᐱᖃᑎᒌᓕᐅᕐᓂᒧᑦ ᐊᒻᒪᓗ ᐱᒍᒪᔭᐅᓕᕐᑎᓯᓂᕐᒧᑦ ᐃᓗᓯᕐᓱᐊᕐᓂᒥᒃ ᐃᓅᓯᖃᕐᓂᒥᒃ.

ᑐᕌᒐᖓ ᐱᖃᑎᒌᓐᓂᒧᑦ ᐱᖕᖑᐊᓃᑦ ᐃᑲᔪᕐᓯᓂᒧᑦ ᐋᕐᕿᓱᐃᓂᕐᒥᒃ ᓲᖑᔪᒥᒃ ᐃᓕᓐᓂᐊᓂᕐᒥᒃ ᐊᒻᒪᓗ ᐃᑲᔪᕐᓯᓂᕐᒥᒃ ᐃᒻᒥᓂᒃ ᓈᒻᒪᒋᓂᕐᒥᒃ. ᐱᒍᓐᓇᓯᑎᑦᓯᓲᖅ ᐃᓕᓐᓂᐊᑎᓂᒃ ᐱᑖᕐᓂᒥᒃ ᐃᑲᔪᖃᑎᒌᓐᓂᒥᒃ ᐃᓅᖃᑎᖃᕐᓂᒥᒃ ᐱᖕᖑᐊᑎᐅᖃᑎᒥᓂᒃ ᐊᒻᒪᓗ ᓴᓇᓂᕐᒥᒃ ᓄᑖᓂᒃ ᐱᖃᑎᖃᕐᓂᓂᒃ ᐃᓕᓐᓂᐊᑎᑦᓯᔨᓄᑦ ᐊᒻᒪᓗ ᐱᒋᐅᕐᓴᑎᑦᓯᔨᒥᓄᑦ. ᑖᒃᑯᐊ ᐱᖃᑎᒌᓐᓃᑦ ᐃᑲᔪᕐᓯᓚᖓᔪᑦ ᐱᖕᖑᐊᓂᓕᒫᖏᓐᓂ. ᐱᒍᓐᓇᓂᖅ ᐊᐅᓪᓚᓂᕐᒧᑦ ᐊᑦᔨᒌᖕᖏᑐᓄᑦ ᓄᓇᕕᒻᒥ ᓄᓇᓕᓐᓄᑦ, ᐃᓕᑦᓯᓕᐅᒥᓂᕐᒧᑦ ᓄᓇᕕᒻᒥᒃ ᐊᒻᒪᓗ ᐃᓕᓐᓂᐊᑎᓄᑦ ᓄᓇᓕᒻᒥᓂ ᐱᒍᑦᔨᓂᕐᒥᒃ.

ᑕᑯᓐᓇᖏᓐᓂᓭᑦ ᐱᓯᑎᐅᓕᐅᑎᓂᕐᒥᒃ ᑕᑯᓐᓇᓂᕐᓭ ᐃᓕᒌᓐᓂᒥᒃ ᐋᕐᕿᓱᐃᓂᕐᒥᒃ. ᐱᖓᓱᓂᒃ ᐱᖃᑎᒌᓐᓂᒧᑦ ᐱᖕᖑᐊᓂᖃᕐᓯᒪᓕᕐᑐᖅ ᑕᒃᑲᓂ ᐊᕐᕌᒍᒥ: ᑲᖏᕐᓱᖅ (ᓅᕕᒻᐱᕆ 16-20), ᑰᑦᔪᐊᖅ (ᑏᓯᒻᐱᕆ 1-4) ᐊᒻᒪᓗ ᒫᓐᓇᕋᑖᖅ ᑲᖏᕐᓱᔪᐊᒥ (ᕕᕈᐊᕆ 22-26). ᐃᓕᓐᓂᐊᕖᑦ ᐅᐊᕈᑎᒌᑦᑎᓲᑦ ᐋᕐᕿᓱᐃᑦᓱᑎᒃ ᓄᓇᓕᓐᓂ ᐃᓕᒌᓂᒃ, ᐱᓕᐅᑦᔨᓕᐅᑎᓂᐅᖕᖏᑐᒥᒃ ᐃᓕᓐᓂᐊᕕᐅᖃᑎᒌᓂᑦ. ᓯᓚᑖᒍᑦ ᓱᖃᑦᓯᓂᕐᒥᒃ ᐋᕐᕿᓱᐃᓲᖑᒻᒥᔪᑦ ᐳᐃᑦᔪᕋᕐᓂᒥᒃ, ᑕᕐᕋᓕᔮᕐᓂᒥᒃ ᐅᓐᓄᑐᒃᑯᑦ, ᐅᕕᒐᕐᑐᐃᑦ ᐃᓪᓗᖏᓐᓄᑦ ᐳᓛᕆᐊᕐᓂᒥᒃ ᐊᒻᒪᓗ ᐃᒐᓂᕐᒥᒃ ᐱᓇᓱᐊᕐᓂᒥᒃ ᐃᑲᔪᕈᑎᑦᓴᓂᒃ ᐃᓕᓐᓂᐊᑎᓂᒃ ᖃᓂᓪᓕᐅᒥᑎᑦᓯᓂᕐᒧᑦ ᐊᒻᒪᓗ ᖃᐅᔨᒪᐅᑎᓕᐅᒥᑎᑦᓯᓂᕐᒧᑦ.

ᐱᖃᑎᒌᓐᓂᒧᑦ ᐱᖕᖑᐊᓃᑦ ᑮᓇᐅᔭᖃᑎᑕᐅᓲᑦ ᖃᓄᐃᖕᖏᓯᐊᕐᓂᒧᑦ ᐃᓕᓐᓂᐊᕕᖃᕐᑎᑕᐅᓂᕐᒧᑦ, ᐱᓇᓱᐊᕐᑕᐅᔪᖅ ᐊᑐᓕᕐᑎᑕᐅᔪᕕᓂᖅ ᐱᓇᓱᖃᑎᖃᕐᓱᑎᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓪᓗ. ᐃᓕᓐᓂᐊᕖᑦ ᐃᓚᐅᒍᒪᔪᑦ ᑖᑦᓱᒧᖓ ᐁᑦᑐᑕᐅᓲᑦ ᐊᐅᓚᒍᑎᑦᓴᒥᓂᒃ ᑮᓇᐅᔭᓂᒃ ᐊᒻᒪᓗ ᐊᑐᕆᐊᖃᓲᖑᑦᓱᑎᒃ ᐱᖓᓱᓂᒃ ᐊᑐᕐᓂᒥᒃ ᐃᓄᑦᓯᐊᖑᓂᕐᒧᑦ “ᐱᑖᕈᓐᓇᓯᓂᕐᒧᑦ” ᖃᖓᑦᑕᐅᑎᒥᒃ. ᐅᑦᑑᕋᐅᑏᑦ ᑖᒃᑯᓄᖓ ᖃᓄᐃᓘᕐᓂᓄᑦ ᐃᒪᐃᑦᑑᕗᑦ ᐱᑕᖃᕐᑎᓯᓂᖅ ᑕᕐᕋᓕᔮᕐᑎᓯᓂᕐᒧᑦ ᐅᓐᓄᑐᒃᑯᑦ ᐱᐊᕋᕐᓄᑦ, ᐃᒐᒍᑦᔨᓂᕐᒧᑦ ᐃᓄᒻᒪᕆᓐᓂᒃ, ᓴᓗᒻᒪᓭᓂᕐᒧᑦ ᓄᓇᓕᓐᓂ ᐅᕝᕙᓘᓐᓃᑦ ᓱᑎᑦᓯᓂᕐᒧᑦ ᐃᙯᓕᓴᕐᕕᒥ. ᓄᓇᓖᑦ ᐱᖕᖑᐊᕕᐅᔪᑦ ᑮᓇᐅᔭᕐᑖᑎᑕᐅᓲᖑᒻᒥᔪᑦ, ᐃᑲᔪᕐᓯᔪᓂᒃ ᓯᓂᑦᑕᐅᑏᑦ ᐊᑭᖏᓐᓂᒃ, ᐅᓯᑲᑦᑕᐅᑎᓂᒃ ᐊᒻᒪᓗ ᓱᖃᑦᓯᑎᑦᓯᓂᕐᒧᑦ ᑐᑭᒧᐊᑦᑎᓯᒍᑎᓂᒃ.

ᖃᐅᔨᒋᐊᑦᓯᐊᕈᒪᒍᕕᑦ ᖃᓄᖅ ᐃᓕᓐᓂᐊᕕᓯ ᐃᓚᐅᒍᓐᓇᒪᖔᑕ ᐅᕝᕙᓘᓐᓃᑦ ᐱᖕᖑᐊᕆᐊᕐᑐᕕᐅᒍᓐᓇᒪᖔᑦ ᑭᖑᓪᓕᐅᓛᕐᑐᒥ ᐱᖕᖑᐊᓂᐅᓛᕐᑐᒥ ᐱᖃᑎᒌᓐᓂᒧᑦ, ᖃᐅᔨᒋᐊᕈᓐᓇᖁᑎᑦ ᕕᑦᑐᔨᐊ ᓯᒥᒐᕐᒧᑦ, ᐃᓕᓐᓂᐊᓂᕐᒥ ᖃᐅᔨᒋᐊᕐᕕ ᐃᓗᓯᕐᓱᓯᐊᕐᓂᒥᒃ ᐃᓕᓐᓂᐊᕕᖃᕐᑎᓯᓂᕐᒧᑦ. ᑕᑯᒍᒪᒍᕕᑦ ᐱᖕᖑᐊᓂᕕᓂᕐᓂᒃ ᐱᖃᑎᒌᓐᓂᒧᑦ, ᑕᑯᒋᐊᒃᑭᑦ ᑕᑯᓐᓇᕋᑦᓴᓕᐊᕕᓃᑦ ᐊᑖᓂᑦᑐᑦ.