ᐆᒪᖕᖓᑦ, ᑌᐋᓇ ᒪᒃᓕᐊᕋᓐ-ᑭᓂᑎ , ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕕᓐᓂ ᐊᐅᓚᑦᓯᔨ , ᑰᒃᔪᐊᖅ

ᐃᓕᓐᓂᐊᓇᐅᑉ ᐅᓪᓗᖓᑕ ᓯᕗᓪᓕᐹᕆᕙᐅᒃ. ᕿᒥᕐᖁᔪᑎᑦ ᐃᓕᓐᓂᐊᕕᑉᐱᑦ ᐃᓗᐊᓂ ᓂᕆᐅᓐᓂᖃᕐᓱᑎᑦ ᓴᐱᒐᓚᓐᓂᒥᒃ, ᑕᑯᑦᓱᒋᑦ ᓵᑦ ᐋᕐᕿᓱᕐᑕᕕᓂᑎᑦ ᐃᓕᓐᓂᐊᓯᐊᖁᔨᒧᑦ, ᐃᓕᓐᓂᐊᕈᑎᑦᓭᑦ ᐊᒥᓱᓂ ᑫᕙᓪᓚᒍᓯᓂᒃ ᐋᕐᕿᓱᕐᑕᕕᓂᑎᑦ ᐊᑐᐃᓐᓇᐅᓯᐊᖁᑦᓱᒋᑦ ᐊᒻᒪᓗ ᐊᑐᕐᓂᖃᑦᓯᐊᖁᑦᓱᒋᑦ, ᐅᒃᑯᐊᖅ ᐊᒻᒪᓗ ᐊᓪᓚᓯᒪᔪᖃᐅᑏᑦ – ᓱᓇᑕᖃᓚᐅᖕᖏᑐᑦ ᐅᓪᓗᓂ ᐊᓂᒍᕐᑐᓂ – ᒫᓐᓇ ᐊᓪᓚᓯᒪᔪᕐᑕᖃᓕᕐᑐᖅ ᑐᖕᖓᓱᑦᑎᓯᔪᓂᒃ ᐊᖓᔪᕐᖄᖏᓐᓂᒃ ᐊᒻᒪᓗ ᐃᓕᓐᓂᐊᑎᓂᒃ. ᐅᓪᓗᓄ ᐊᒥᓱᓄᑦ ᐸᕐᓇᓯᒪᔪᑎᑦ ᓱᖏᐅᓯᓴᖃᑎᒌᓐᓂᒨᓕᖓᔪᓂᒃ ᐊᒻᒪᓗ ᓱᖃᑦᓯᒍᑎᑦᓴᓄᑦ ᐸᕐᓇᓯᒪᔪᑎᑦ. ᓄᑖᖑᑐᐊᕈᕕᑦ ᐃᓕᓐᓂᐊᑎᑦᓯᔨᐅᓗᑎᑦ, ᐃᒻᒪᖄ ᐃᑦᓯᕕᑎᓐᓂᒃ ᐸᕐᓀᔮᕇᑦᓴᕋᑕᕐᑐᑎᑦ, ᐃᓚᐅᔪᕕᓂᐅᔪᑎᑦ ᐃᓕᓐᓂᐊᑎᑦᓯᔩᑦ ᓂᕆᒃᑭᓱᑎᒃ ᓂᕆᖃᑎᒌᓐᓂᖓᓄᑦ ᒪᕐᕈᕕᑦᓯᒪᔪᑦᓴᐅᕗᑎᐊᓪᓛᑦ, ᒪᔪᕋᕐᓯᒪᑦᓱᑎᑦ ᓄᓇᓕᒻᒥ ᐊᒻᒪᓗ ᐊᑦᔨᓕᐅᕆᑦᓱᑎᑦ ᐊᑦᔨᖑᐊᖃᐅᑎᒨᕋᑦᓴᓯᐊᓂᒃ ᐃᓱᖃᕐᑑᔮᖕᖏᑐᒥᒃ ᓄᓇᒥᒃ. ᐃᓚᐅᓕᕐᓱᑎᓪᓗ ᓄᓇᓕᑦᓯᓂ ᐃᓕᓐᓂᐊᕕᓯ Facebook-ᖓᓄᑦ, ᖃᐅᔨᒪᓕᕐᓱᑎᓪᓗ ᓇᓪᓕᐊᓄᑦ ᓯᕙᓂᕆᐊᖃᕐᓂᓄᑦ ᐃᒣᕈᒍᕕᑦ, ᐊᒻᒪᓗ ᓯᕗᓪᓕᐹᒥ ᑎᑭᓭᓯᒪᓕᕐᓱᑎᑦ ᓂᕿᓂᒃ ᐊᒥᓱᓂᒃ. ᐊᖏᕐᕋᓯᒪᑦᓯᐊᓕᕐᖁᑎᑦ ᓄᓇᕕᒻᒥ ᐊᒻᒪᓗ ᒫᓐᓇ ᐱᐊᕋᕐᓂᒃ ᑲᑎᓯᓵᕈᒪᓕᕐᓱᑎᑦ! ᓄᓪᓚᖓᑫᓐᓇᕆᑦ ᐊᓂᕐᑎᕆᓗᑎᑦ. ᐃᕝᕕᐅᓯᐊᕐᓗᑎᑦ. ᓯᕗᓪᓕᐹᒥ ᐃᓕᓐᓂᐊᕕᒻᒥ ᐅᓪᓗᖃᑦᓯᐊᓚᖓᕗᑎᑦ.

ᒫᓐᓇ ᓄᐃᑕᑎᑦᓯᕗᑎᑦ ᐱᒐᓱᐊᑦᓯᐊᓂᕐᒥᒃ, ᐋᕐᕿᓱᕐᓯᒪᑦᓯᐊᓂᕐᒥᒃ, ᐃᓚᑦᔪᒍᓱᓐᓂᒥᒃ, ᐅᒃᑯᐃᖔᑦᓯᓂᕐᒥᒃ, ᒥᑭᓪᓕᑎᕐᓂᒥᒃ, ᒥᑕᓐᓂᒥᒃ ᐊᒻᒪᓗ ᓄᐃᑕᑦᓯᐊᓱᑎᑦ. ᑖᒃᑯᐊ ᐊᑐᕐᑕᑎᑦ ᐃᓕᓐᓂᐊᕆᐊᖕᖓᓂᕐᒥ ᓄᐃᑕᑎᖏᓐᓇᑭᑦ ᔫᓂᒧᑦ ᑎᑭᓪᓗᒍ ᓱᓕᑦᓯᐊᑐᒥᒃ ᐱᐅᔪᒥᒃ ᐊᕐᕌᒍᖃᓚᖓᕗᑎᑦ! ᑖᓐᓇ ᓂᕆᐅᓐᓂᖅ ᐊᖏᔪᒻᒪᕆᐅᔮᕐᑐᒐᓗᐊᖅ ᐊᑑᑎᓯᑐᐊᕈᕕᑦ ᓂᕆᐅᓐᓇᑐᓂᒃ ᐃᑉᐱᓂᐊᕐᓂᓂᒃ ᐱᐅᔪᓂᒃ ᐊᒻᒪᓗ ᐱᐅᖕᖏᑐᓂᒃ ᐃᓕᓐᓂᐊᑎᑦᓯᔨᐅᑦᓱᓂ, ᐃᓗᕐᖁᓯᕆᖕᖏᑕᕐᒦᓂᖅ, ᐊᖏᕐᕋᕈᒪᓪᓕᓂᖅ ᐊᒻᒪᓗ ᐃᓅᓂᕐᒧᑦ! ᐱᒋᐊᖕᖓᑎᓪᓗᑎᑦ ᓄᑖᒧᑦ ᐃᓅᓯᕐᒧᑦ ᐊᒻᒪᓗ ᐃᓕᓐᓂᐊᓂᓕᕆᓂᕐᒧᑦ, ᑖᓐᓇ ᐃᕐᙯᑎᑦᓯᒋᐊᕈᑎᐅᓕ ᐱᐅᓰᑦ ᐊᑐᕐᑕᐅᖃᑦᑕᕈᑎᒃ ᖃᐅᑕᒫᑦ ᐱᕙᓪᓕᐊᑎᑦᓯᓲᑦ ᐊᑯᓃᕐᑐᒧᑦ ᓭᒪᓂᕐᒧᑦ, ᓴᐱᓕᕐᖃᔭᖕᖏᓂᕐᒧᑦ ᐊᒻᒪᓗ ᑲᔪᓯᑦᓯᐊᓂᕐᒧᑦ. ᐃᓱᒪᒐᓱᐊᕆᑦ ᓱᓇᓂᒃ ᐱᐅᓯᕐᓂᒃ ᐊᑐᕈᒪᔭᑎᓐᓂᒃ, ᐊᓪᓗᕆᐊᖃᑦᑕᓗᑎᑦ ᐱᐊᕋᕐᑎᑐᑦ ᐃᓚᐅᑎᒐᓱᐊᕐᓗᒋᑦ ᐊᑐᖃᑦᑕᑕᑎᓐᓄᑦ ᐅᓪᓗᑕᒫᑦ. ᐃᓄᑦᓯᐊᖑᓗᑎᑦ ᐃᒻᒥᓄᑦ: ᐅᓪᓗi4 21-ᓂᒃ ᐊᑐᕆᐊᖃᓲᖑᕗᒍᑦ ᓄᑖᓂᒃ ᐱᐅᓯᕐᑖᕋᓱᐊᓕᕋᑦᑕ! ᐊᓪᓚᓂᐊᕆᐊᓪᓚᕆᑦ ᐱᖓᓲᔪᕐᑐᓄᑦ ᐱᐅᓯᕐᓄᑦ ᐃᑲᔪᕐᓯᓯᒪᔪᓄᑦ ᐊᒥᓱᓄᑦ ᑲᑎᕕᒻᒥ ᐃᓕᓐᓂᐊᑎᑦᓯᔨᓄᑦ ᐱᒍᓐᓇᓯᑎᑦᓯᓱᑎᒃ!

ᑲᑎᓗᒋᑦ ᐃᓕᓐᓂᐊᑏᑦ ᑲᑕᒻᒥ

ᐱᓇᓱᐊᖃᑎᖃᑦᓯᐊᓂᖅ ᐃᓕᓐᓂᐊᑎᓂᒃ ᐃᓅᖃᑎᒌᓐᓂᑯᑦ ᐅᓪᓗ ᑕᒫᑦ ᐃᑲᔪᕐᓯᓚᖓᔪᖅ ᐱᐅᔪᒥᒃ ᐅᓪᓗᖃᕐᑎᓯᓗᓂ ᐃᓕᓐᓂᒃ, ᓄᐃᑕᑎᑦᓯᓗᓂ ᐃᓕᓐᓂᐊᑎᓄᑦ ᑲᒪᑦᓯᐊᓂᕐᓂᒃ, ᐊᒻᒪᓗ ᖃᓄᖅ ᐃᑉᐱᓂᐊᕐᓂᖏᓐᓂᒃ ᖃᐅᔨᒪᑎᑦᓯᓗᓂ ᐃᓕᓐᓂᐊᕕᓐᓅᑐᐊᕋᒥᒃ ᐊᓯᑦᔩᒍᓐᓇᓯᒐᔭᕋᕕᑦ ᓱᑎᑦᓯᓂᑎᓐᓂᒃ ᐅᕝᕙᓘᓐᓃᑦ ᑲᒪᒋᔭᖃᑦᓯᐊᓂᕐᒧᑦ ᐃᓕᓐᓂᐊᑎᒥᒃ ᕆᐊᖃᓕᑐᐊᕈᓂ.

ᖃᐅᔨᓚᖓᕗᑎᑦ ᐃᓚᖏᑦ ᐃᓕᓐᓂᐊᑏᑦ ᐃᑎᓲᖑᓂᖏᓐᓂᒃ ᐃᓕᓐᓂᐊᑎᑦᓯᒍᑎᑎᓐᓂᒃ ᐱᒋᐊᕐᓯᒪᓕᕐᑎᓗᑎᑦ. ᖃᐅᔨᑎᒃᑭᑦ ᑐᖕᖓᓱᑦᑎᓗᒋᑦ ᐊᒻᒪᓗ ᑕᑯᑎᓗᒋᑦ ᐊᓕᐊᓱᓐᓂᓂᒃ ᐃᓕᓐᓂᐊᕆᐊᕐᓂᖏᓐᓄᑦ. ᑖᒃᑯᐊᑕᒐ ᐃᓕᓐᓂᐊᑏᑦ ᑭᖕᖒᒪᑦᓯᓂᕐᐹᑦ ᐱᐅᔪᒥᒃ ᐱᐅᓯᖃᕐᕕᐅᓂᕐᒧᑦ ᑖᒃᑯᓄᖓ. ᖃᖓᑐᐃᓐᓇᖅ ᐃᓕᓐᓂᐊᑎᑦᓯᓗᑎᑦ, ᐅᖄᖃᑎᒋᓚᐅᕐᑐᐊᐱᓪᓗᒋᑦ ᑖᒃᑯᑑᓗᑎᒃ 30-ᓂ ᑕᕐᓵᕈᓯᐊᐱᓐᓂ.

ᑲᔪᓯᓗᑎᑦ ᑖᒃᑯᓂᖓ ᐊᑐᕐᑕᑎᓐᓂᒃ ᐃᓅᖃᑎᖃᕐᓂᒧᑦ. ᐱᓇᓱᐊᕈᓯᐅᑉ ᓯᕗᓪᓕᐹᖓᑕ ᓄᖕᖑᐊᓂ ᐃᓕᓐᓂᐊᕆᐊᖕᖓᓂᕐᒥ, ᐊᐱᕆᒋᑦ ᐃᒻᒥᓂᒃ ᐊᑎᓕᐅᕈᓐᓇᒪᖔᕐᐱᑦ ᐊᑐᓂᒃ ᐃᓕᓐᓂᐊᑎᐅᑉ ᐱᒍᒪᔭᖓᓂᒃ. ᖃᔭᖕᖏᑯᕕᑦ, ᐊᐅᒡᒍᓯᒥ ᐱᒐᓱᐊᕐᓚᖓᕓᑦ.

ᐃᓘᓐᓇᑎᒃ ᐊᑐᓂᑦ ᐱᐊᕋᕐᒥᒃ ᑲᒪᔩᑦ ᐅᖄᕕᒋᓗᒋᑦ ᐱᐅᔫᓂᖏᓐᓂᒃ   

ᑖᓐᓇ ᐊᑑᑎᓚᖓᕓᑦ ᐱᓇᓱᐊᕈᓯᐅᑉ ᐁᑉᐸᖓᓅᓚᐅᕐᓇᒃ ᐃᓕᓐᓂᐊᓇᐅᑉ. ᓯᕿᓐᓂᓯᐅᕐᓂᒧᑦ ᐅᖄᓚᓃᑦ ᐱᐅᔫᕗᑦ ᐱᒋᐊᖕᖓᓂᕐᒧᑦ ᐅᑉᐱᕆᑦᓯᐊᑕᑎᓐᓂᒃ ᐱᖃᑎᑖᕐᓂᒧᑦ ᐊᖓᔪᕐᖄᕆᔭᐅᔪᓄᑦ ᐊᒻᒪᓗ ᑲᒪᔨᖏᓐᓄᑦ ᐃᓕᓐᓂᐊᑎᑉᐱᑦ. ᐊᐅᓚᔨᒋᑦ ᐊᖓᔪᕐᖄᑦ ᐃᓚᒋᒐᕕᒃᑭᑦ. ᐃᓘᓐᓇᓯ ᐱᒍᒪᒐᑦᓯ ᑖᑦᓱᒥᖓᑦᓭᓇᖅ: ᐱᐊᕋᖓᓂᒃ ᑲᔪᓯᑦᓯᐊᑎᑦᓯᓂᕐᒥᒃ – ᐃᓕᓐᓂᐊᓂᕐᒧᑦ, ᐃᓅᓯᖓᓄᑦ ᐊᒻᒪᓗ ᐃᓅᖃᑎᒌᓐᓂᖏᓐᓄᑦ. ᓯᕗᓪᓕᐹᒥ ᐅᖄᓚᓃᑦ ᐊᖏᔪᒥᒃ ᓯᕗᓕᐅᕆᓚᖓᕗᖅ ᐃᓚᒌᓐᓂᑎᓐᓄᑦ ᐃᓕᑕᕐᓯᑐᐊᕈᕕᑦ ᓲᖏᓂᖏᓐᓂᒃ ᐃᓕᓐᓂᐊᑎᐅᑉ. ᐃᓕᓐᓂᐊᕕᓕᐊᓲᖑᕚ ᐅᓪᓗ ᑕᒫᑦ? ᐱᐅᔪᓃᒃ ᓯᕗᓕᕐᑎᐅᒍᓐᓇᓂᖃᕐᖃ? ᐃᔪᕐᑎᓯᒍᓐᓇᖄ ᐃᓕᓐᓂᐊᑎᐅᖃᑎᒥᓂᒃ? ᓴᓇᖕᖑᐊᑎᐅᓂᕐᒨᑦ ᐊᓕᐊᒋᔭᖃᕐᖃ? ᐊᑐᓂᑦ ᐃᓕᓐᓂᐊᑏᑦ ᐱᓯᑎᐅᒍᑎᖃᕐᖁᑦ ᐊᑦᔨᒌᖕᖏᑐᓂᒃ – ᖃᐅᔨᑎᓗᒋᑦ ᐃᓚᖏᑦ ᐃᓕᑕᕐᓯᔭᑎᓐᓂᒃ ᐱᒋᐊᖓᓂᖓᓂ ᐊᕐᕌᒎᑉ.

ᐃᓚᖏᑦ ᐃᓚᒌᑦ ᐅᖄᓚᐅᑎᖃᓲᖑᖕᖏᑐᑦ, ᐊᓯᐊᓂᒃ ᐊᑐᕆᐊᖃᕋᔭᕐᖁᑎᑦ ᐅᖄᖃᑎᖃᕐᓂᒧᑦ ᐃᒻᒪᖄ ᐳᓛᕆᐊᕐᓗᑎᑦ, ᖃᕆᑕᐅᔭᒃᑯᑦ ᐊᓪᓚᓗᑎᑦ, ᐊᓪᓚᓯᒪᔪᑎᒍᑦ, ᐊᓪᓚᓯᒪᔪᓂᒃ ᐊᓂᕐᕋᖓᓅᕆᓗᑎᑦ, ᐅᖄᓚᕕᒋᓗᒍ ᐱᓇᓱᕝᕕᖓᓄᑦ, ᐃᓕᓐᓂᐊᕕᐅᑉ ᒥᑦᓵᓄᑦ ᐊᓪᓚᕕᑎᓐᓄᑦ ᖃᕆᑕᐅᔭᑎᒍᑦ, ᑐᓴᐅᒪᑎᑦᓯᒍᑎᑎᒍᑦ ᐃᓕᓐᓂᐊᕕᒻᒥ ᓄᓇᓕᒻᒥᓘᓐᓃᑦ Facebook-ᑯᑦ ᑐᓴᐅᑎᒃᑯᓘᓐᓃᑦ, Facebook-ᑯᓘᓐᓃᑦ ᐊᓪᓚᕕᒋᓗᒍ (ᐊᑐᑐᐊᕈᕕᐅᒃ ᑖᓐᓇ, Facebook ᓕᐅᕆᐊᓪᓚᕈᕕᑦ ᐱᐅᔫᒐᔭᕐᑐᖅ). ᐊᐱᕆᓗᒍ ᑲᒪᔨᖓ ᓇᓪᓕᐊᒍᑦ ᐅᖄᕕᐅᒍᒪᒻᒪᖔᑦ, ᐊᒻᒪᓗ ᑲᒪᔨᒻᒪᕆᒻᒧᑦ ᐅᖄᓗᑎᑦ ᑭᓇ ᑐᓵᔨᐅᕋᔭᕐᒪᖔᑦ, ᐊᒻᒪᓗ ᐱᐅᔫᒐᔭᕐᒪᖔᑦ ᑕᒃᑯᓄᖓ ᐃᓪᓗᒥᐅᖃᑎᒌᓄᑦ.

ᐅᖄᓚᒌᕐᓯᒪᓕᕈᕕᑦ ᐊᑐᓂᑦ ᐃᓕᓐᓂᐊᑎᓄᑦ, ᐅᖄᖃᑎᒌᓐᓃᑦ ᐅᑯᐃᖔᕐᑎᓯᐊᕐᓗᒋᑦ. ᐊᖓᔪᕐᖄᕆᔭᐅᔪᑦ ᖃᐅᔨᒪᒍᒪᒻᒪᑕ ᐱᐊᕋᖏᑦ ᓱᓇᓂᒃ ᐃᓕᑦᓯᕙᓪᓕᐊᒪᖔᑕ, ᐊᒻᒪᓗ ᐃᓕᓐᓂᐊᓂᖏᑦ ᖃᓄᐃᒻᒪᖔᑕ ᐃᓅᖃᑎᒌᓐᓂᖏᓪᓗ. ᐊᐅᓚᔨᒋᑦ ᐃᑭᐊᕐᒥᐅᑕᕇᓐᓂᒧᑦ ᐊᑐᕐᑕᐅᓲᒥᒃ: ᐅᖄᓚᒍᑎᖃᕈᒪᑐᐊᕈᕕᑦ ᐱᒻᒪᕆᒻᒧᑦ ᐅᖃᐅᓯᑦᓴᒧᑦ, ᐱᒋᐊᕐᓗᑎᑦ ᐊᒻᒪᓗ ᐃᓱᓕᒍᑎᒋᓗᒍ ᐱᐅᔪᒥᒃ ᐅᖃᐅᓯᑦᓴᖃᕐᓂᖅ. ᐱᐅᓂᕐᓴᐅᓲᖑᕗᖅ ᐱᐅᔫᑎᑦᓯᓂᕐᓴᐅᓂᖅ ᐃᓕᓐᓂᐊᑎᐅᑉ ᐱᐅᓯᖓᓂᒃ, ᐊᒻᒪᓗ ᓂᕆᐅᓐᓂᓯᓐᓂᒃ ᑲᒪᒋᔭᖃᕐᓂᓴᐅᓂᕐᒥᒃ.

ᖃᐅᔨᓴᕐᓗᑎᑦ ᓄᓇᓕᓯ ᓱᓇᓂᒃ ᐊᑐᐃᓐᓇᐅᑎᑦᓯᒪᖔᑦ

ᐱᑦᓯᐊᓂᖃᕈᒪᒍᕕᑦ ᓄᑖᒥ ᓄᓇᓕᓐᓂ, ᐱᐅᓯᕐᑖᕆᒐᓱᐊᕈᒃ ᖃᐅᔨᓴᕐᓗᑎᑦ ᓄᓇᓕᓐᓂᒃ ᓯᓚᑖᓂ ᐃᓕᓐᓂᐊᕕᐅᑉ ᐊᒻᒪᓗ ᐊᖏᕐᕋᐱᑦ. ᐱᐅᓂᖓ ᓄᓇᖓᑕ ᐊᑑᑎᔭᐅᒍᓐᓇᖁᖅ ᐊᑦᔨᒌᖕᖏᑐᑎᒍᑦ ᐊᕐᕌᒍᓕᒫᒥ – ᐅᒥᐊᕐᑐᓂᒃᑯᑦ, ᓯᑐᕋᐅᑎᓯᒪᓂᒃᑯᑦ, ᓯᑭᑑᕐᓂᑯᑦ, ᖃᕐᖃᒥ ᒪᔪᕋᕐᓂᑯᑦ, ᐊᐅᓚᓴᕆᐊᕐᓂᑯᑦ, ᐸᐅᕐᖓᑕᕐᓂᑯᑦ ᐊᒻᒪᓗ ᐊᓯᒋᐊᓪᓚᖏᑎᒍᑦ! ᐊᓕᐊᓇᕐᑐᐃᑦ ᓱᓂᒐᓓᑦ, ᐅᑭᐅᒥ ᓯᑐᕋᐅᑎᓯᒪᓂᖅ ᐊᓄᕆᒧᑦ ᐊᐅᓚᑕᐅᓗᓂ ᐱᒋᐅᕐᓴᕐᓂᒧᑦ ᑕᓯᕐᒥ, ᑐᓴᕐᓂᔮᕐᓃᑦ, ᓂᕆᒻᒫᓃᑦ, ᐊᓐᓄᕌᕐᓗᓯᒪᓕᐅᑎᓃᑦ (ᐊᓐᓄᕌᕐᓗᓯᒪᓐᓇᖅ ᐱᒻᒪᕆᐅᕗᖅ ᓄᓇᕕᒻᒥ, ᐊᖏᔪᓪᓚᕆᓐᓂᒃ ᓵᓚᖃᐅᑎᑖᕈᓐᓇᓱᑎᒃ ᑮᓇᐅᔭᓂᒃ ᐊᓐᓄᕌᓕᐅᕐᓂᒧᑦ ᐊᑦᔨᐅᖏᑦᑐᓂᒃ!), ᐱᓯᑎᐅᓵᖕᖑᐊᓂᕐᒧᑦ ᑲᑎᒪᓂᐊᕈᓰᑦ ᐊᒻᒪᓗ ᕿᑎᖕᖑᒥ ᐱᖕᖑᐊᓃᑦ ᐊᑑᑎᔭᐅᓲᑦ ᐃᓘᓐᓇᖏᓐᓂᒃ ᓄᓇᓕᓐᓂ. ᖃᐅᔨᒻᒫᑖᕆᒃᑭᑦ ᐱᓇᓱᖃᑎᑎᑦ ᐊᒻᒪᓗ ᓄᓇᓕᓐᓂ ᐃᓄᐃᑦ ᖃᐅᔨᓴᕐᓗᑎᑦ ᑭᓇᒃᑯᑦ ᐱᒍᒪᔭᕐᐱᑦ ᐊᑦᔨᖏᓐᓂᒃ ᐱᒍᒪᒻᒪᖔᑖ. ᐃᓚᖏᑦ ᓄᓇᓖᑦ ᓱᖃᑦᓯᑎᑦᓯᓂᖃᓲᖑᕗᑦ ᑌᒪᖕᖓᒐᓚᒃ – ᐆᑦᑐᑎᒋᓗᒍ ᑎᒥᒥᒃ ᐃᙯᓕᓴᕐᑎᓯᓂᖅ ᐊᒻᒪᓗ ᓄᓇᓕᓐᓂ ᐃᒐᕕᖓᓂ ᐃᒐᒋᐅᕐᓴᓂᕐᒧᑦ ᑲᑎᒪᓂᐊᕈᓯᖃᕐᓂᖅ, ᑐᑭᕐᑕᕆᐅᕐᓴᓂᖅ, ᐊᔪᑦᑕᓂᖅ, ᖄᑭᖕᖑᐊᓂᖅ ᐊᒻᒪᓗ ᐊᒥᓱᒋᐊᓪᓓᑦ – ᐊᓯᖏᓪᓗ ᓇᓪᓕᑳᕋᑦᓴᖃᖕᖏᓂᕐᓭᑦ ᐊᒻᒪᓗ ᓱᒍᓐᓇᓂᑎᓐᓂᒃ ᐊᑐᕐᑎᓯᒍᓐᓇᒥᔪᑎᑦ ᐱᓇᓱᐊᕈᓯᑕᒫᑦ ᓄᓇᓕᓐᓂ ᓱᖃᑦᓯᑎᑦᓯᓗᑎᑦ ᐅᕝᕙᓘᓐᓃᑦ ᓱᖃᑦᓯᒋᐊᓪᓚᑎᑦᓯᒍᑎᐅᑎᓗᒍ ᐃᓕᓐᓂᐊᕇᕐᐸᑕ. ᐱᑕᖃᕐᑎᓯᓗᑎᑦ ᑫᕙᓪᓚᒍᓯᓂᒃ ᐊᒥᓲᖕᖏᑐᓂ ᐱᓇᓱᐊᕈᓯᑕᒫᑦ ᐱᐅᓯᐅᒥᑎᑦᓯᓂᕐᒧᑦ ᓄᓇᓕᓐᓂ ᐊᑐᕐᑕᐅᔪᓂᒃ, ᑐᕌᒐᑦᓴᑎᓐᓂᒃ ᑐᑭᖃᑦᓯᐊᑐᓂᒃ ᐱᑖᕐᑎᑕᐅᒍᓐᓇᖁᑎᑦ ᐃᓕᓐᓂᒃ ᑲᔪᓯᑎᑦᓯᓯᐊᓚᖓᔪᓂᒃ ᐃᓕᓐᓂᐊᓇᕐᓂ ᐃᓚᖏᓐᓂᒃ ᐱᔭᕆᐊᑐᔫᓂᖏᓐᓂ.

ᐋᕐᕿᓱᐃᓗᑎᑦ ᓂᕆᐅᒋᔭᑎᓐᓂᒃ ᐃᓕᓐᓂᐊᑎᑎᓐᓄᑦ

ᐱᓇᓱᐊᕈᓯᐅᑉ ᓯᕗᓪᓕᐹᖓ ᐃᓕᓐᓂᐊᕕᒻᒥ ᐱᐅᓂᕐᐸᐅᕗᖅ ᐋᕐᕿᓱᐃᓂᕐᒧᑦ ᓂᕆᐅᒋᔭᑎᓐᓂᒃ ᐃᓕᓐᓂᐊᑎᑎᓐᓂᑦ. ᐋᕐᕿᓱᐃᓕᕈᕕᑦ ᐃᓕᓐᓂᐊᕕᒻᒥ ᖃᕆᐊᒥ ᓂᕆᐅᒋᔭᑎᓐᓂᒃ, ᑕᑯᒋᐊᒃᑭᑦ ᐃᓕᓐᓂᐊᕕᑦᓯᓂ ᐱᐅᓯᕐᓲᑎᐅᒋᐊᓖᑦ ᐃᓪᓕᕆᔭᖏᓐᓄᑦ ᐊᒻᒪᓗ ᓂᕆᐅᒋᔭᖏᓐᓄᑦ. ᐃᓕᓐᓂᐊᑏᑦ ᐃᑲᔪᕐᑎᓗᒋᑦ ᐃᓕᓐᓂᐊᕕᒻᒥ ᖃᕆᐊᒥ ᐊᑐᓂᑦ ᐃᓪᓕᓇᕐᑐᓂᒃ ᐊᑦᔨᒌᖕᖏᑐᓄᑦ ᐃᓕᓐᓂᐊᕕᒻᒥ ᖃᕆᐊᒥ ᖃᓄᐃᓕᖓᓂᐅᔪᓄᑦ (ᖃᕆᐊᒧᑦ ᐃᓕᓐᓂᐊᕕᒻᒧᑦ ᐃᑎᑐᐊᕐᐸᑦ ᐃᓕᓐᓂᐊᑎ, ᐃᓄᑑᓗᓂ ᐱᓇᓱᐊᕐᓇᒧᑦ, ᐱᓇᓱᖃᑎᒌᓐᓇᒧᑦ, ᐃᓕᓐᓂᐊᑎᑦᓯᔨ ᐅᖄᓕᕐᐸᑦ ᐃᓕᓐᓂᐊᑎᑦᓯᓗᓂ). ᐃᑉᐱᒋᓗᒋᑦ ᐱᑕᖃᕐᒪᖔᑕ ᑕᓪᓕᒪᓂᒃ ᐱᐅᔪᓂᒃ ᐅᖃᐅᓯᕐᓂᒃ ᐃᓕᓐᓂᐊᕕᒻᒥ ᖃᕆᐊᒥ ᓂᕆᐅᒋᔭᐅᔪᓂᒃ ᐅᕝᕙᓘᓐᓃᑦ ᐃᑭᓐᓂᓴᓂᒃ. ᐃᓱᒫᓗᒍᓐᓀᓗᑎᑦ ᐱᑦᓯᐊᕋᓗᐊᕐᒪᖔᑕ! ᒪᓕᑦᑕᐅᒋᐊᓖᑦ ᐋᕐᕿᒋᐊᕐᑕᐅᖃᑦᑕᕈᓐᓇᑐᑦ ᐃᓚᒋᔭᐅᑎᓪᓗᒋᑦ ᐊᒻᒪᓗᑭᑕᐅᓕᖓᓗᓯ ᐅᖄᓕᕈᑦᓯ ᓯᐊᕈᒋᐊᖅ, ᐃᓚᖏᑦ ᐱᓀᓗᑕᖃᑐᐊᕐᐸᑕ.

ᖃᐅᔨᒪᔪᕆᑦᓯᖃᑦᑕᕈᓐᓀᓗᑎᑦ ᐃᓕᓐᓂᐊᑏᑦ ᖃᐅᔨᒪᓂᖏᓐᓂᒃ ᐱᐅᓯᕆᔭᐅᖁᔭᑎᓐᓂᒃ ᐃᓕᓐᓂᐊᕕᒻᒥ. ᐱᓀᓗᑕᓂᒃ ᓄᐃᑎᑦᓯᑌᓕᒋᑦ ᐃᓕᓐᓂᐊᑎᓗᒋᑦ ᖃᓄᐃᑦᑐᓂᒃ ᓂᕆᐅᒻᒪᖔᕐᐱᑦ  ᓇᓃᓐᓂᓕᒫᑦᓯᓂ (ᖃᐅᔨᒪᓇᕐᑐᔫᔭᕋᓗᐊᕐᐸᑕ), ᑕᑯᓐᓇᑎᓗᒋᑦ ᐃᑦᔭᕋᑦᓴᓯᐊᒥᒃ, ᐆᑦᑐᕋᕐᑎᖃᑦᑕᓗᒋᑦ ᓂᕆᐅᒋᔭᐅᔪᓂᒃ,

ᐊᒻᒪᓗ ᐱᑕᖃᕐᑎᓯᐊᕐᓗᒋᑦ ᐊᑦᔨᒌᓕᑦᓯᐊᑐᒥᒃ ᖃᐅᔨᒋᐊᕐᑎᓯᓂᕐᒥᒃ. ᐃᓕᓐᓂᐊᑎᑦᓯᓂᖅ ᓂᕆᐅᒋᔭᐅᔪᒥᒃ ᐊᒻᒪᓗ ᐋᕐᕿᓱᐃᓂᖅ ᐃᓅᖃᑎᒌᓐᓂᒥᒃ ᓯᕗᓪᓕᐸᐅᑦᔭᐅᒋᐊᓕᒃ ᐊᓯᓕᒫᖏᓐᓂᑦ ᐃᓕᓐᓂᐊᕈᑎᓂᒃ ᓯᕗᓪᓕᐹᒥ ᑕᕐᕿᖓᓂ ᐃᓕᓐᓂᐊᕆᐊᖕᖓᑎᓪᓗᒋᑦ. ᑖᓐᓇ ᑌᒣᓕᖓᑎᑦᓯᓂᖅ ᐱᐅᔫᒐᔭᕐᖁᖅ ᐊᒻᒪᓗ ᑕᖃᓇᖕᖏᑐᒥᒃ ᐱᑕᖃᕐᑎᓯᓗᓂ. ᐊᕐᕌᒍᓕᒫᒥ, ᐱᑕᖃᕐᑎᓯᒋᐊᖃᕋᔭᕐᖁᑎᑦ ᐊᒥᓲᖕᖏᑐᓂᒃ ᐃᕐᙯᑎᑦᓯᒋᐊᕐᓂᒥᒃ ᐃᓕᓐᓂᐊᑎᑦᓯᓗᑎᑦ ᓂᕆᐅᒋᔭᐅᔪᓂᒃ, ᐊᒻᒪᓗ ᐱᐅᔫᖏᓐᓇᓲᖅ ᐆᑦᑐᕋᖃᑦᑕᓂᖅ ᐃᕐᙯᑎᑦᓯᒋᐊᕈᑎᐅᑦᓱᓂ ᐃᓕᓐᓂᐊᑎᓂᒃ ᓱᓂᐅᓚᖓᔪᖅ ᐱᒋᐊᓚᐅᕐᑎᓇᒍ.

ᑐᑭᓯᑎᑦᓯᒋᐊᓪᓚᕈᑎ: ᐆᑦᑐᕋᕐᓗᑎᑦ ᐊᑐᕐᓗᑎᑦ Class Dojo-ᒥᒃ (ᐊᑭᖃᖕᖏᑐᖅ ᐃᓕᓐᓂᐊᕕᒻᒥ ᖃᕆᐊᒥ ᑲᒪᒋᔭᖃᕐᓂᒧᑦ ᐊᑐᕐᑕᐅᓲᖅ ᖃᕆᑕᐅᔭᑎᒍᑦ) ᐱᑕᖃᕐᑎᓯᓗᑎᑦ ᐊᓕᐊᓇᕐᑐᓂᒃ ᐃᓕᓐᓂᐊᕕᓐᓂ ᖃᕆᐊᒥ ᑲᒪᔨᐅᓂᕐᓄᑦ! ᐃᑉᐱᒋᓗᒋᑦ ᑕᑯᓐᓇᓗᒋᑦ ᐱᐅᔪᐃᑦ ᐱᐅᓯᕆᔭᐅᔪᑦ ᐊᒻᒪᓗ ᐱᑕᖃᕐᑎᓗᒋᑦ ᐃᓕᓐᓂᐊᑏᑦ ᐱᒍᓐᓇᕕᑦᓴᖏᓐᓂᒃ ᐊᒥᓱᕕᓪᓗᑎᒃ ᖁᕝᕙᕆᐊᕈᑎᑖᕐᓂᒧᑦ ᐅᓪᓗᓕᒫᖅ. ᑐᕌᒐᕆᓗᒍ ᐅᓄᕐᓂᖓ 5:1 ᐋᕐᕿᒋᐊᕆᓂᕐᒧᑦ ᐊᑐᕐᑕᐅᑎᑕᐅᓲᖅ.

ᖃᐅᔨᒍᒪᓂᖃᕐᓗᑎᑦ, ᓂᖕᖓᕈᓐᓀᓗᑎᑦ

ᐃᓕᓐᓂᐊᑎᐅᑉ ᐱᐅᓯᖓ ᐸᕝᕕᒋᓕᓯᒍᕕᐅᒃ, ᖃᐅᔨᓴᕆᑦ ᑭᐅᑦᑌᓕᓗᑎᑦ ᓂᐸᕆᑦᑑᓗᑎᑦ ᓂᓪᓕᑌᓕᓂᕐᒥᒃ, ᓱᒋᐊᓂᒍᑎᓂᒃ ᐊᑐᕐᑌᓕᓗᑎᑦ ᐅᕝᕙᓘᓐᓃᑦ ᐊᖓᔪᕐᖃᐅᓂᕐᓂᒃ ᐊᑐᕐᑌᓕᑦᓯᐊᓗᑎᑦ. ᐃᒣᓘᖔᕐᓗᑎᑦ, ᓂᐅᕆᐊᕐᓗᑎᑦ. ᐊᐱᕆᒋᑦ ᐃᒻᒥᓂᒃ “ᓱᔪᕕᓂᕐᓕᑭᐊᖅ ᑖᓐᓇ ᐃᓕᓐᓂᐊᑎ ᑌᒣᓗᕆᐊᒥᒃ ᐃᓕᑦᓯᔪᕕᓂᖅ  ᐆᒪᒐᓱᐊᕐᓱᓂ? ᖃᓄᕐᓕᑭᐊᖅ ᐃᓅᓯᖓ ᐱᐅᓯᓕᒃ ᒫᓐᓇ? ᓱᓇᒥᓪᓕᑭᐊᖅ ᑭᖕᖒᒪᒋᔭᓕᒃ ᐱᐅᓯᖓᑕ ᐊᑐᓚᕿᔭᖓ ᑕᒪᓐᓇ ᐊᒻᒪᓗ ᖃᓄᐃᓘᕈᓐᓇᖁᖔ, ᖃᓅᖅ ᐱᒍᓐᓇᓯᑎᑦᓯᒍᓐᓇᖁᖓ ᐃᓕᓐᓂᐊᑎᓗᒍ, ᐃᑲᔪᕐᓯᓗᒍ ᐃᓕᓐᓂᐊᑎ ᑖᓐᓇ ᑭᖕᖒᒪᒋᔭᖏᓐᓄᑦ ᐱᕕᖃᕐᑎᓯᓚᖓᔪᒥᒃ ᐊᓯᖏᓐᓂᒃ (ᐅᕙᖓ ᐃᓚᐅᑎᓪᓗᖓ) ᐱᑕᖃᕐᑎᓯᓚᖓᔪᒥᒃ ᐱᒍᒪᔭᖏᓐᓄᑦ”?

ᐅᖁᒣᑦᑐᑰᖃᑦᑕᑐᐊᕈᕕᑦ ᐱᐅᓯᕐᓲᑎᒋᔭᐅᔪᒧᑦ, ᐊᐱᕆᒍᓐᓇᖁᑎᑦ ᐊᑑᑎᖃᑦᓯᐊᕋᓗᐊᕐᒪᖔᑕ ᐃᓕᓐᓂᐊᑎᑦᓯᒍᑎᑎᑦ ᐅᕝᕙᓘᓐᓃᑦ ᐃᒻᒥᓂᒃ ᒥᑭᓪᓕᑎᑐᐃᓐᓇᕆᐊᖃᕐᖁᑎᑦ ᐃᓕᓐᓂᐊᑎ ᑲᕙᕐᑐᔫᔭᑐᐊᕐᐸᑦ ᐃᓕᓐᓂᓘᓐᓃᑦ ᐱᐅᑦᓴᖏᓐᓂᖓ ᓄᐃᑕᔫᔭᑐᐊᕐᐸᑦ. ᓄᕐᖃᕆᐊᓪᓚᕆᑦ ᓂᐅᕆᐊᕆᐊᓪᓚᓗᑎᑦ, ᐃᒻᒥᓂᒃ ᐃᕐᙯᑎᒋᐊᕆᑦ ᐱᐅᓯᕐᓲᑎᖓᓂᒃ ᐃᓕᓐᓅᓕᖓᓕᕐᑎᓯᑦᑌᓕᑦᓯᐊᕆᑦ (ᐱᔭᕆᐊᑐᔫᒐᓗᐊᕐᐸᑦ!). ᐃᑲᔪᕐᓯᒍᓐᓇᕋᓗᐊᕐᑎᓗᒍ ᑕᑯᒋᐊᕐᓂᖅ ᐃᓕᓐᓂᐊᑎᑦᓯᒍᑎᑎᓐᓂᒃ ᐊᒻᒪᓗ ᖃᓄᐃᓘᕈᑎᑎᓐᓂᒃ ᐱᐅᓯᐅᒥᒋᐊᕋᔭᕋᕕᑦ, ᐃᒻᒥᓂᒃ ᐱᕐᖃᔭᑦᓯᐊᖏᑑᑎᓂᖅ ᐃᓕᓐᓂᒃ ᐊᕐᑐᓴᓗᐊᓕᕐᑎᓯᒍᓐᓇᖁᖅ ᐊᒻᒪᓗ ᐊᓕᐊᓇᕐᓂᖓᓂᒃ ᐃᓕᓐᓂᐊᑎᑦᓯᔨᐅᓂᕐᒧᑦ ᐱᑕᖃᕈᓐᓀᑎᑦᓯᓗᓂ (ᐃᓅᓯᕐᒧᒐᓴᒃ!). ᐃᓕᓐᓂᐊᑎᑦᓯᔨᐅᓂᕐᒥᒃ ᐱᓯᑎᒐᓭᑦ ᐅᓪᓗᖃᓲᖑᕗᑦ ᓱᓇᓕᒫᖏᑦ ᐱᐅᖕᖏᓕᑦᓱᑎᒃ. ᐃᒻᒥᓂᒃ ᖁᓖᒃᑯᑦ ᐸᑎᑦᑕᕆᑦ (ᓚᕆᓪᓗᑎᑦ) ᐅᓪᓗᑕᒫᑦ ᑲᔪᓯᑦᓯᐊᓂᑎᓐᓄᑦ. ᕿᓂᕐᓗᑎᑦ ᐃᔪᕐᓇᑐᓂᒃ ᐃᓕᓐᓂᐊᑎᑦᓯᒍᑎᑦᓭᑦ ᐅᕙᓘᓐᓃᑦ ᓱᑎᑦᓯᓂᑎᑦ ᐸᕐᓇᓯᒪᐅᑎᑎᓐᓂᒃ ᐊᑑᑎᓐᓂᖏᑉᐸᑕ. ᖃᓄᐃᓘᕐᓗᑎᑦ ᐃᒻᒥᓂᒃ ᐃᑉᐱᒋᑦᓯᐊᕈᓐᓇᓂᕐᓂᒃ ᕿᓂᕐᓗᑎᑦ ᖃᐅᑕᒫᑦ. ᓯᓂᓯᑲᐱᓪᓗᑏᑦ ᐱᐅᔫᕋᔭᕐᖃ? ᐅᖄᖃᑎᖃᕆᐊᓪᓚᓗᑎᑦ ᐱᖃᑎᓐᓂᒃ? 10-ᓂᒃ ᑕᕐᓵᐱᓐᓂᒃ ᑕᓯᓴᕐᓗᑎᑦ ᐃᙯᓕᓴᖃᑦᑕᓗᑎᑦ? 15-ᓂᒃ ᑕᕐᓵᐱᓐᓂᒃ ᐃᑯᒪᒧᑦ ᒪᒥᓴᕐᓂᖃᕐᓗᑎᑦ ᐅᓪᓛ ᑕᒫᑦ? ᑌᒣᖕᖓᒐᓚᒃ ᒥᑭᔪᐃᑦ ᐱᐅᓰᑦ ᐊᖏᔪᕐᔪᐊᒥᒃ ᐃᓅᓯᕐᓂᒃ ᐋᕐᖀᒍᓐᓇᑐᑦ, ᐊᒻᒪᓗ ᐱᒍᓐᓇᓃᑦ ᐸᕐᓇᓂᕐᒧᑦ ᐊᒻᒪᓗ ᑭᐅᒍᑎᒋᓗᒋᑦ ᖃᓄᐃᓕᒋᐊᕈᑎᒋᖔᕈᓐᓀᓗᒋᑦ ᓱᓇᑐᐃᓐᓇᖅ ᐅᖁᒣᓪᓕᐸᑦ.

ᐊᑕᐅᓯᖅ ᐱᐅᓯᖅ ᓄᕐᖃᑫᓐᓇᓂᖅ, ᓂᐅᕆᐊᕐᓂᖅ, ᐊᒻᒪᓗ ᐊᐱᕆᓂᖅ ᐃᒻᒥᓂᒃ ᓱᓇᒥ ᑭᖕᖒᒪᑦᓯᒪᖔᕐᐱᑦ ᐃᓕᓐᓂᐊᑎᑎᓪᓗ ᐃᓕᓐᓂᒃ ᐊᓯᑦᔩᓚᕆᒍᓐᓇᑐᖅ ᐃᓅᓯᕐᓂᒃ.

ᐃᑲᔪᕐᑎᓴᑎᓐᓂᒃ ᖃᐅᔨᓴᕐᓗᑎᑦ ᑭᖕᖒᒪᑦᓯᓚᐅᕐᓇᒃ

• ᐃᓕᓐᓂᐊᑎᑦᓯᔩᑦ: ᐃᓕᓐᓂᐊᑎᑦᓯᔨᐅᖃᑎᑎᑦ ᐃᓕᑦᓯᕕᒋᒍᓐᓇᓂᕐᐹᑎᑦ; ᐅᖄᖃᑎᒋᓗᒋᑦ ᐃᓱᒪᒋᔭᑎᓐᓂᒃ ᐊᒻᒪᓗ ᑕᑯᓐᓇᓂᕐᒥᒃ ᖃᑦᑕᐅᑎᖃᑎᒋᓗᒋᑦ ᐱᐅᔫᕗᖅ ᐱᓇᓱᐊᕐᑕᑎᓐᓂᒃ ᐋᕐᕿᒋᐊᕆᒍᑎᒋᓗᒋᑦ ᐊᒻᒪᓗ ᐱᑕᖃᕐᑎᓯᑦᓱᓂ ᐊᖏᖃᑎᒌᓐᓂᒥᒃ ᐊᒻᒪᓗ ᐱᓇᓱᐊᖃᑎᒌᓐᓂᒥᒃ ᐃᓕᓐᓂᐊᕕᒻᒥ.
• ᑲᑎᕕᒃ ᐃᓕᓴᕐᓂᓕᕆᕕᒻᒥ ᐊᓪᓚᓂᐊᒐᓕᕆᕕᒃ. ᑲᑎᕕᒃ ᐃᓕᓴᕐᓂᓕᕆᓂᖅ ᐊᖏᓕᕙᓪᓕᐊᔪᒥᒃ ᐊᓪᓚᓂᐊᒐᓕᕆᕕᖃᕐᖁᖅ 6000 ᐅᖓᑖᓄᑦ ᐊᓪᓚᓂᐊᕋᑦᓴᓕᒻᒥᒃ ᐅᖄᔪᓂᒃ ᐃᓕᓐᓂᐊᕕᒻᒥ ᖃᕆᐊᒥ ᑲᒪᓂᕐᒧᑦ, ᐃᓄᐃᑦ ᐃᓗᕐᖁᓯᖓᓄᑦ ᐊᒻᒪᓗ ᐊᑑᑎᓯᒪᔪᓄᑦ, ᐃᓕᓐᓂᐊᕈᑎᑦᓴᓂᒃ ᐊᒻᒪᓗ ᐊᒥᓱᒋᐊᓪᓚᓂᒃ ᐱᑕᖃᕐᓱᓂ! ᑕᑯᒋᐊᒃᑭᑦ ᕿᒥᕐᕈᐊᑦ ᐊᒻᒪᓗ ᖃᕆᑕᐅᔭᑎᒍᑦ ᑎᑭᑎᑕᐅᒍᓐᓇᑐᑦ ᐊᓪᓚᑎᒍᑦ. ᖃᐅᔨᓴᕐᕕᒋᓗᒍ ᑭᒻ ᐊᖑᑎᒍᓗᒃ, ᐅᕝᕙᓘᓐᓃᑦ ᑕᑯᒋᐊᕐᓗᑎᑦ ᑎᑭᓭᒍᑎᒥᒃ ᐅᕙᓂ: https://www.kativik.qc.ca/employee/library-services/
• ᐱᓇᓱᒐᕐᒧᑦ ᐱᕙᓪᓕᐊᑎᑦᓯᒍᑏᑦ. 5ᔾᓂᒃ ᑕᕐᓵᐱᓐᓂᒃ ᐱᓱᒍᓐᓇᖁᑎᑦ (ᐊᖁᓪᓗᑎᓪᓘᓃᑦ) ᐱᓇᓱᕝᕕᓄᑦ, ᓂᐅᕕᕐᓂᐊᕕᒻᒧᑦ, ᐃᙯᓕᓴᕐᕕᒧᑦ ᐊᒻᒪᓗ ᐱᖃᑎᑖᕐᖃᒥᑎᓐᓄᑦ ᐊᖏᕐᕋᖓᓄᑦ. ᓱᑫᓂᕐᓴᒧᑦ ᐃᓅᓯᕐᒧᑦ ᐅᑭᐅᕐᑕᑐᒥ ᓄᓪᓚᓯᒪᓕᕐᖁᑎᑦ, ᐊᒻᒪᓗ ᖃᐅᔨᑲᓪᓚᓚᕿᑦᓱᑎᑦ ᑫᕙᓪᓚᒍᓯᓂᒃ ᐊᒥᓱᓂᒃ ᐱᑕᖃᕆᐊᓪᓚᕆᐊᒥᒃ ᐊᑑᑎᖃᑦᑕᓯᒪᔭᑎᓐᓂᒃ ᐊᖏᕐᕋᕋᓱᐊᕐᓱᑎᑦ ᐱᓇᓱᒋᐊᕐᑐᕋᓱᐊᕐᓱᑎᓪᓘᓃᑦ. ᐊᑐᕈᓐᓇᑕᑎᑦ ᐃᑲᐅᕐᓂᒋᐊᓪᓓᑦ ᐃᓕᓐᓂᐊᕆᐊᓪᓚᓂᕐᒧᑦ? ᐃᓘᓐᓇᑎᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᑎᑦᓯᔩᑦ ᐅᑎᕐᕕᐅᒍᓐᓇᖁᑦ $2000-ᒧᑦ ᑎᑭᓪᓗᒍ ᐱᓇᓱᒐᕐᒨᓕᖓᔪᓄᑦ ᐃᓕᓐᓂᐊᕈᑎᓄᑦ. ᖃᕆᑕᐅᔭᑎᒍᑦ ᐃᓕᓐᓂᐊᑕᐅᒍᓐᓇᑐᑦ ᐃᑲᔪᕐᓯᒍᓐᓇᑐᑦ ᐱᒍᓐᓇᑕᑎᓐᓂᒃ, ᐃᓕᑦᓯᓯᒪᓂᕐᓂᒃ ᐊᒻᒪᓗ ᐱᒍᓐᓇᓯᐊᕐᓂᓂᒃ, ᐊᒻᒪᓗ ᐱᑕᖃᕐᑎᓯᓗᑎᒃ ᐱᓇᓱᐊᖃᑎᖃᕐᓂᒥᒃ. ᐃᓕᓐᓂᐊᑎᑦᓯᔨᐅᑐᐊᕈᕕᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᕐᕌᒍᓕᒫᒥ, ᐱᒐᓱᐊᕈᑎᓂᒃ ᐱᒍᓐᓇᖁᑎᑦ ᐃᓚᐅᓂᕐᒧᑦ ᑲᑎᖕᖓᔪᓄᒐᓴᒃ! ᐊᖏᕐᑕᐅᑐᐊᕈᕕᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐅᑎᕐᑎᓯᒍᓐᓇᑐᖅ ᖃᖓᑦᑕᐅᑎᓂᒃ ᒪᓐᑐᔨᐊᒧᑦ ᐃᓚᐅᑎᓪᓗᒋᑦ $2000. ᑕᑯᒋᐊᖁᔨᓪᓚᕆᒃᑯᒍᑦ ᐃᓕᓐᓂᒃ ᐅᑯᓂᖓ:
• PBIS (ᐱᐅᔪᓂᒃ ᐱᐅᓯᕐᓲᑎᓂᒃ ᐊᑐᕐᑎᓯᓂᕐᒧᑦ ᐊᒻᒪᓗ ᐃᑲᔪᕐᓯᓂᕐᒧᑦ): ᐱᐅᔪᓂᒃ ᐅᓪᓗᖃᕐᑎᓯᓂᕐᒧᑦ ᐊᒻᒪᓗ ᐊᑦᑕᓇᖏᑦᑐᒥᒃ ᐃᓕᓐᓂᐊᓂᒧᑦ ᓯᓚᑎᖃᕐᑎᓯᓂᕐᒧᑦ
  • ᐆᑦᑐᐱᕆ 4-5, 2018; Hilton Chicago; ᓯᑳᑯᒥ, IL, ᐊᒥᕆᑲᒥ
  • https://sites.google.com/a/midwestpbis.org/pbis-leadership-forum-2018/
• IIRP (ᓯᓚᕐᔪᐊᒥ ᐃᓕᓐᓂᐊᕕᒃ ᐋᕐᕿᓱᐃᓂᕐᒧᑦ ᐊᑐᕐᑕᐅᓲᓂᒃ) ᓯᓚᕐᔪᐊᒥᐅᓕᒫᑦ ᑲᑎᒪᓂᖓ
  • ᐆᑦᑐᐱᕆ 24-26, 2018; Crowne Plaza Downtown Riverfront; Detroit, MI, ᐊᒥᕆᑲᒥ
  • https://detroit2018.iirp.edu/
• Northwest PBIS Network Conference
  • ᕕᕈᐊᕆ 28 – March 1, 2019; Oregon Convention Center; Portland, OR, ᐊᒥᕆᑲᒥ
  • https://pbisnetwork.org/conference/
• ᐊᕕᑦᓯᖃᔭᖕᖏᓂᕐᒧᑦ ᐊᒻᒪᓗ ᖁᐊᕐᓵᓇᕐᑐᑰᕐᓯᒪᓂᕐᒧᑦ ᒪᒥᓴᕐᕕᒃ ᒪᒥᓴᕐᓂᒧᑦ ᑲᑎᒪᓂᖅ (ᐃᓕᒐᓱᐊᕈᑎᓄᑦ ᐊᓪᓚᓯᒪᔪᑦ ᐊᑐᐃᓐᓇᐅᖏᑦᑐᑦ ᐊᓪᓚᑕᐅᑎᓪᓗᒍ ᑖᓐᓇ)
• ᐃᓱᒪᑦᓯᐊᓂᕐᒧᑦ ᐃᓅᓯᕐᒥ ᑲᑎᒪᓂᖓ (ᐃᓕᒐᓱᐊᕈᑎᓄᑦ ᐊᓪᓚᓯᒪᔪᑦ ᐊᑐᐃᓐᓇᐅᖏᑦᑐᑦ ᐊᓪᓚᑕᐅᑎᓪᓗᒍ ᑖᓐᓇ)
• ᐱᓇᓱᑦᑏᑦ ᐊᒻᒪᓗ ᐃᓚᒌᑦ ᐃᑲᔪᕐᑕᐅᒍᑎᖏᑦ:
  • homeweb.ca 1 (800) 663-1142 or TTY 1(888) 384-1152
  • ᐊᑯᓃᖕᖏᑐᒥᒃ ᐃᑲᔪᕐᑕᐅᒍᑏᑦ ᐱᒍᓐᓇᐅᑎᓕᓐᓄᑦ ᐃᓱᐊᕐᓭᔨᓄᑦ, ᐃᓚᒌᓄᑦ ᐃᑲᔪᕐᑕᐅᒍᑏᑦ, ᐱᖁᔭᕐᓅᓕᖓᔪᓄ ᐃᑲᔪᕐᑕᐅᒍᑏᑦ, ᑮᓇᐅᔭᓕᕆᓂᕐᒧᑦ ᐃᑲᔪᕐᑕᐅᒍᑏᑦ, ᐋᓐᓂᐊᓯᐅᑎᐅᖕᖏᑐᓄᑦ ᐱᓚᑦᑐᑕᐅᓂᐅᖕᖏᑐᒧᓪᓗ ᐋᓐᓂᐊᓯᐅᕈᑏᑦ, ᐃᓗᓯᕐᓱᓯᐊᕐᓂᒧᑦ ᐱᒋᐅᕐᓴᑎᑦᓯᒍᑏᑦ, ᐊᑦᔨᐅᖏᑦᑐᒧᑦ ᐃᓱᐊᕐᓭᒍᑏᑦ ᐊᒻᒪ ᖃᕆᑕᐅᔭᑎᒍᑦ ᐱᒐᓱᐊᕈᑏᑦ
  • ᐊᑭᖃᖕᖏᑐᖅ ᐊᒻᒪᓗ ᑐᓴᕐᑕᐅᒋᐊᖃᖕᖏᑐᖅ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᓇᓱᑦᑎᓄᑦ ᐊᒻᒪᓗ ᐆᒪᒐᓱᐊᕐᑕᖏᓐᓄᑦ!
• ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᒃ ᐱᓇᓱᖃᑎᒌᑦ. ᐃᑲᔪᕐᑕᐅᒍᒪᕖᑦ ᐊᑐᕋᓱᐊᕐᓂᒧᑦ ᓄᑖᓂᒃ ᐱᐅᓯᕐᓂᒃ ᐊᒻᒪᓗ ᖃᐅᑕᒫᕐᓯᐅᑎᑎᓐᓂᒃ? ᐃᓱᒪᖃᕐᖀᑦ ᖃᕆᐊᒥ ᐃᓕᓐᓂᐊᕕᓐᓄᑦ ᐊᒻᒪᓗ ᐃᑲᔪᕐᑕᐅᒍᑎᖃᕈᒪᕕᑦ? ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᒻᒥ ᐱᓇᓱᖃᑎᒌᑦ ᑕᒫᓃᑦᑐᑦ ᐃᓕᓐᓄᑦ! ᐅᖄᕕᒋᓗᒋᑦ ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᒻᒥ ᐃᓕᓐᓂᐊᓂᕐᒧᑦ ᐃᓱᐊᕐᓭᔩᑦ ᐅᕝᕙᓘᓐᓃᑦ ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ ᐊᐱᕆᐅᑎᑎᓐᓄᑦ, ᐃᓱᒫᓗᒋᔭᑎᓐᓄᑦ, ᐃᓱᒪᒋᔭᑎᓐᓄᑦ ᐊᒻᒪᓗ ᖃᐅᔨᓴᕐᓂᒧᑦ ᐊᓪᓚᓂᐊᕋᑦᓴᖁᑎᑦᑎᓄᑦ ᐃᓕᓐᓂᐊᕕᑦᓯᓂ, ᖃᕆᑕᐅᔭᑎᒎᕈᑎᕗᑦ, ᐅᕝᕙᓘᓐᓃᑦ ᐃᓕᓐᓂᐊᕕᒻᒥ ᖃᕆᐊᒥ ᑕᑯᓐᓇᑐᑦᓴᓕᐅᕐᓗᑎᑦ ᐊᒻᒪᓗ ᐅᖃᐅᓯᑦᓴᖃᕐᕕᐅᓂᕐᒧᑦ ᑲᑎᒪᑦᓯᓂᕐᒧᑦ. ᑲᑎᓯᒍᒪᕗᒍᑦ ᐃᓕᓐᓂᒃ J

ᐱᑦᓯᐊᖁᔨᓚᖓᕗᒍᑦ ᖃᐅᔨᓴᕐᓂᓂᒃ ᐱᐅᓯᕆᒍᒪᔭᑎᓐᓄᑦ ᐃᓕᓐᓄᑦ ᐊᑐᕐᓂᖃᑦᓯᐊᑐᓂᒃ. ᐊᕐᕌᒍᕐᓯᐅᓯᐊᖁᔨᕗᒍᑦ!!

ᐊᐱᕆᐅᑎᑦᓴᖃᕈᕕᑦ ᐅᕝᕙᓘᓐᓃᑦ ᐅᖄᖃᑎᖃᕈᒪᒍᕕᑦ ᖃᓄᐃᓘᕈᑎᐅᔪᓂᒃ ᐅᓐᓂᑑᑎᒍᑎᓂᒃ ᑕᒃᑲᓂ ᐅᕝᕙᓘᓐᓃᑦ ᐃᑲᔪᕐᑕᐅᒍᒪᒍᕕᑦ ᐊᑐᕐᑎᓯᓂᕐᒧᑦ ᐃᓚᑦᔪᒍᓱᒍᓐᓇᓂᕐᒥᒃ ᐃᓕᓐᓂᐊᕕᖃᕐᓂᒧᑦ ᐊᑐᕐᑕᐅᓲᓂᒃ ᐃᓕᓐᓂᐊᕕᓐᓂ ᖃᕆᐊᒥ, ᖃᐅᔨᒋᐊᕐᕕᒋᓗᒋᑦ ᐱᓇᓱᖃᑎᕗᑦ:

ᑌᔮᓇ ᒪᒃᓕᐊᔭᓐ-ᑭᐊᓂᑎ (ᐊᑕᐅᑦᓯᑰᕐᑎᓯᔨ)

ᒫᒃᓰᒻ ᕉᓲ (ᐃᓕᓐᓂᐊᓂᕐᒥᒃ ᖃᐅᔨᒪᔨ – ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᓐᓂ)

ᐋᓐᓂᐊᓯᐅᕐᑎᒪᕆᒃ ᐳᔨᓐᑕ ᓕᓐ (ᐃᓕᓐᓂᐊᓂᕐᒥᒃ ᖃᐅᔨᒪᔨ – ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᓐᓂ)

ᑲᑐᕆᓐ ᖄᓖ (ᐃᓕᓐᓂᐊᓂᕐᒥᒃ ᖃᐅᔨᒪᔨ – ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᓐᓂ)

ᔨᐊᔅ ᑏᓐ (ᐃᓕᓐᓂᐊᓂᕐᒥᒃ ᖃᐅᔨᒪᔨ – ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᓐᓂ)