ᐃᓄᑦᔪᐊᒃ, ᓄᓇᕕᒃ, ᑯᐯᒃ (ᐁᕆᓕ 8, 2013) – ᑕᒡᒐᓂ ᐱᓇᓱᐊᕈᓯᕐᒥ ᐃᓐᓇᓕᒃ ᐃᓕᓐᓂᐊᕕᒻᒥ ᐃᓕᓐᓂᐊᑏᑦ ᐅᖄᖃᑎᖃᓛᕐᑐᑦ ᑲᓇᑕᒥᐅᔭᒧᑦ ᐊᓂᕐᓂᖃᖕᖏᑐᓕᐊᕐᑎᒧᑦ Chris Hadfield-ᒧᑦ, ᓯᓚᕐᔪᐊᒥᐅᑦ ᐊᓂᕐᓂᖃᖕᖏᑐᒃᑯᕕᖓᓂ ᐊᐅᓚᑦᓯᔨ. ᓈᓚᐅᑎᒃᑯᑦ ᐅᖄᖃᑎᒌᓐᓂᖅ ᐱᒋᐊᕐᓗᓂ ᓂᕿᑦᓯᕕᒻᒥ ᐁᕆᓕ 12, 2013-ᒥ 13:30ᖑᐸᑦ, ᐊᓂᕐᓂᖃᖕᖏᑐᒃᑯᕕᒃ ᖁᒻᒧᐊᑎᑕᐅᓯᒪᔪᖅ ᐃᓄᑦᔪᐊᒥᑦ ᖁᓚᐅᓕᕐᐸᑦ, 400-ᑭᓚᒦᑕᒐᓛᓂ ᑭᖏᓐᓂᖃᕐᓗᓂ ᓄᓇᕐᔪᐊᒥᑦ.

“ᐃᓕᓐᓂᐊᑎᕗᑦ Chris Hadfield-ᒧᑦ ᐊᐱᕐᓲᑎᑦᓴᒥᓂᒃ ᐊᑐᐃᓐᓇᕈᕐᑎᖃᑦᑕᑐᑦ” ᐃᓐᓇᓕᒃ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᔨ ᐅᖃᕐᑐᖅ Haley Digel. “ᐊᓂᕐᓂᖃᖕᖏᑐᒃᑯᕕᒻᒦᑐᓄᑦ ᐅᖄᖃᑎᖃᕐᓂᖅ ᐊᓕᐊᓇᕐᑐᒪᕆᐅᕗᖅ, ᓱᑯᐃᔦᓂᕐᓅᓕᖓᔪᓂᒃ ᐱᓇᓱᓐᓇᓱᓂ ᐃᓕᓐᓂᐊᑎᓄᑦ ᐱᖕᖑᐊᕈᑎᒋᓇᒋᑦ” ᐅᖃᕐᑐᖅ Digel.

ᐊᓂᕐᓂᖃᖕᖏᑐᒃᑯᕕᒻᒥᐅᓄᑦ ᐅᖄᖃᑎᖃᕐᓂᒥᓂ, ᐃᓐᓇᓕᒃ ᐃᓕᓐᓂᐊᕕᒃ ᐃᓄᑦᔪᐊᒥᐅᓄᑦ ᐅᐸᑦᑕᐅᓯᒪᕈᓐᓇᓛᕐᒥᔪᖅ. “ᑕᒪᓐᓇ ᐱᓇᓱᐊᕐᑕᐅᔪᖅ ᐱᒻᒪᕆᐅᕗᖅ ᐃᓕᓐᓂᐊᑎᓂᒃ ᑲᖐᒋᔭᖃᕐᓂᓴᐅᑎᑦᓯᒋᐊᕐᓂᒧᑦ ᓱᑯᐃᔦᓂᕐᓂᒃ ᐃᓱᕐᕉᑎᓕᕆᓂᕐᓂᓗ”, ᐃᓐᓇᓕᒃ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓ ᐅᖄᕐᑐᖅ ᐹᓪ ᐳᕋᓴ. “ᐱᐅᔪᓪᓚᕆᐅᕗᖅ ᕿᑐᕐᖓᓖᑦ ᓄᓇᓕᒻᒥᐅᓗ ᐃᓚᐅᕕᖃᕈᓐᓇᒪᑕ ᐃᓕᓐᓂᐊᑏᑦ ᐃᓚᒋᓗᒋᑦ”, ᐅᖃᕆᐊᓪᓚᓱᓂᓗ.

ᐊᓂᕐᓂᖃᖕᖏᑐᒃᑯᕕᒻᒥᐅᒧᑦ Chris Hadfield-ᒧᑦ ᐅᖄᖃᑎᖃᖕᖏᓂᕐᒥᓂ, ᐃᓕᓐᓂᐊᑏᑦ ᑲᑎᒪᓂᐊᕈᓯᖃᕐᑎᑕᐅᖃᑦᑕᓚᖓᔪᑦ ᐊᕐᓴᓃᑦ ᐱᐅᓯᖏᓐᓅᓕᖓᔪᓂᒃ. ᓯᓚ ᐱᐅᔫᑉᐸᑦ, ᐅᓐᓄᑐᒃᑯᑦ ᑕᑯᓐᓇᕆᐊᕐᓂᒧᑦ ᐊᑐᐃᓐᓇᕈᕐᑎᓯᒪᒻᒥᔪᑦ.

ᐊᕐᕌᒍᓂ ᐊᓂᒍᕐᑐᓂ, ᑕᒪᓐᓇ ᐊᑐᐃᓐᓇᐅᑎᑕᐅᓲᖑᓕᕐᑐᖅ ᓄᓇᕕᒻᒥ ᐃᓕᓐᓂᐊᕕᓐᓄᑦ ᑮᓇᐅᔭᖃᕐᑎᓯᑎᓪᓗᒋᑦ ᒪᑭᕝᕕᑯᑦ, First Air-ᑯᑦ ᐃᓄᐃᓪᓗ ᖃᖓᑦᑕᔫᖏᑦ. ᐱᓇᓱᐊᕐᑕᐅᔪᖅ ᐊᑕᐅᑦᓯᑰᕐᑎᑕᐅᑦᓱᓂ Amateur Radio on the International Space Station-ᑯᓐᓄᑦ (ARISS), ᐃᑲᔪᕐᑎᓗᒋᑦ National Aeronautics and Space Administration-ᑯᓐᓄᑦ (NASA) ᐊᒻᒪᓗ Canadian Space Agency-ᑯᓐᓄᑦ (CSA).

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖏᑦ ᒪᓕᑦᓱᒋᑦ. 1978-ᒥᓂᑦ, ᓄᓇᕕᒻᒥᐅᓄᑦ ᐃᓕᓐᓂᐊᓂᕐᒥᒃ ᐱᒍᑦᔨᔨᑐᐊᖑᓲᖑᓕᕐᑐᖅ. ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕈᑎᓕᐊᕕᓂᖏᑦ ᐃᓕᓐᓂᐊᕕᓐᓂ ᐊᑐᕐᑕᐅᓲᑦ ᓄᓇᓕᓕᒫᓂ ᓄᓇᕕᒻᒥ, ᐃᓄᒃᑎᑐᑦ ᐅᖃᐅᓯᕐᖄᒥ ᐃᓕᓐᓂᐊᑎᑦᓯᒍᑎᐅᑎᓪᓗᒍ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖏᓐᓂ. ᑐᑭᓯᒋᐊᕐᕕᐅᕈᓐᓇᑐᖅ: www.kativik.qc.ca

— 30 —

ᑐᑭᓯᒋᐊᕐᕕᐅᕈᓐᓇᑐᖅ:

ᑲᐅᑦᔭᒃ ᐹᓪᓚᔮᑦ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ
ᑲᑎᕕᒃ ᐃᓕᓐᓂᐊᓂᓕᕆᓂᖅ
(514) 482-8220
publicrelations@kativik.qc.ca