ᓄᓇᓕᑦᓯᓂ ᐃᓕᓐᓂᐊᕕᒻᒥ, ᑕᕐᕿᖓᓂ ᕕᕗᐊᕆᒥ.

ᑲᒪᔨᒻᒪᕆᓯ, ᐃᓕᓐᓂᐊᑎᑦᓯᔨᓄᑦ ᐊᖓᔪᕐᖄᓯ-ᑐᖓᓕᖓ ᐅᕝᕙᓘᓐᓃᑦ ᐃᓕᓐᓂᐊᕕᒻᒥ ᐊᒡᓚᑎᓯ ᑐᓴᕐᑕᐅᑎᑦᓯᓛᕐᑐᖅ ᐃᓕᓐᓂᐊᕆᐊᖕᖓᑐᑦᓭᑦ ᐊᒡᓚᑕᐅᒪᒍᑎᖏᓐᓂᒃ ᐱᓇᓱᐊᓕᕐᐸᑕ.

ᑕᑯᒋᐊᖏᓐᓇᖃᑦᑕᓗᒍ ᐃᓕᓐᓂᐊᕕᓯ ᑕᑯᑦᓴᐅᑎᑦᓯᕕᖓ Facebook -ᒥ ᑐᓴᐅᑎᓯᓐᓂᓗ ᓈᓚᓪᓗᓯ.

ᕿᑐᕐᖓᐱᑦ ᐃᓅᓕᕐᓯᒪᓂᖓᑕ ᓇᓗᓀᕐᓯᒍᑎ.

ᐱᐊᕋᕐᐱᑦ ᐃᓅᓕᕐᓱᓂ ᓇᓗᓀᒃᑯᑕᖓᑕ ᐊᑦᔨᖓᓂᒃ ᐱᑕᖃᖕᖏᑯᕕᑦ, ᑎᑭᓴᕐᓗᒍ ᐅᕘᓇ ‣‣‣

ᐅᑕᕐᕿᓃᓐᓂ, ᐃᓕᒐᓱᐊᕐᑎᕈᓐᓇᑌᑦ ᐱᐊᕃᑦ.
ᐃᓅᓕᕐᓱᓂ ᓇᓗᓀᒃᑯᑕᖅ ᐳᐃᒍᕐᑌᓕᓪᓗᒍ ᐃᓕᓐᓂᐊᕕᓕᐊᕈᑦᔨᓛᕐᙯᑦ ᑎᑭᑉᐸᑦ.

ᐱᐊᕋᓕᒫᑦ ᐅᑭᐅᓖᑦ 5-ᓂᒃ ᒫᓐᓇ ᐅᕝᕙᓘᓐᓃᑦ ᓯᑉᑎᒻᐱᕆ 30-ᐅᑉ ᓯᕗᓂᐊᒍᑦ.

ᐅᑉᐱᕆᔭᖃᕈᕕᑦ ᕿᑐᕐᙰᑦ ᐃᓕᑦᓯᒍᐊᕐᑑᒋᐊᖓ ᐅᑭᐅᖃᑎᒥᑕᓗ ᓴᓂᐊᓂ ᐊᖓᔪᑦᓯᑎᑐᑦ ᐱᐅᓯᖃᕐᐸᑦ, ᑐᑦᓯᕋᐅᑎᓕᐅᕈᓐᓇᑐᑎᑦ ᕿᑐᕐᖓᐱᑦ ᐊᓂᒎᑎᒋᐊᖃᕋᔭᕐᑕᖓᓂᒃ ᖃᐅᔨᓴᕐᑕᐅᒍᑎᖓᓂᒃ ᐱᒋᐊᕐᕕᐅᒋᐊᓕᐅᑉ ᐊᓯᐊᒎᕐᑎᑕᐅᕕᖃᕈᑎᖓᓄᑦ. ᐱᐊᕃᑦ ᖃᐅᔨᓴᕐᑕᐅᓂᖃᕆᐊᓕᒃ ᐊᓂᒎᑎᓗᓂᓗ ᖃᐅᔨᓴᕐᑕᐅᒍᑎᒥᓂᒃ.

ᖃᐅᔨᒪᔭᐅᓕ ᐃᒫᒃ ᓇᐅᑐᐃᓐᓇᖅ ᐱᐊᕋᖅ (ᑲᒃᑲᓛᖅ) ᐃᓕᓐᓂᐊᓂᕐᒧᑦ ᐊᑐᐃᓐᓇᐅᖏᒃᑯᓂ ᐱᒋᐊᓕᕐᓗᓂ ᐃᓕᓐᓂᐊᕆᐊᖕᖓᑐᕐᓯᐅᑎᓂᒃ, ᑕᒪᓐᓇ ᑐᕌᕐᑎᓯᒍᓐᓇᒪ ᐱᒻᒪᕆᓄᑦ ᐱᓀᓗᑕᖃᓕᕐᓂᖓᓄᑦ ᐃᓕᓐᓂᐊᓂᕐᒥᒍᑦ, ᐱᐅᓯᕐᒥᒍᑦ (ᐱᓂᐊᕐᓂᒥᒍᑦ) ᐊᒻᒪᓗ ᐃᒻᒥᓂᒃ-ᐅᐱᒋᓂᕐᒥᒍᑦ.

ᑯᐯᒃ ᑲᕙᒪᖓ ᐱᒍᓐᓇᑎᑦᓯᓲᖅ ᐱᕈᕐᐸᓕᐊᓂᕐᒥᓂᑦ ᓯᕗᒧᐊᕐᓯᒧᕖᖕᖓᑐᐊᕐᒪᑕ ᐱᐊᕋᕐᓂᒃ ᐊᒻᒪᓗ ᐱᒍᓐᓇᑕᐅᒋᐊᓕᓐᓂᒃ ᐱᒍᓐᓇᑐᐊᕐᒪᑕ ᐃᓕᓐᓂᐊᕕᒻᒧᑦ ᐃᑎᕈᓐᓇᑎᑕᐅᓲᑦ ᐊᕐᕌᒍᓕᒫᒧᑦ ᓯᕗᓕᐅᕐᓱᒍ ᐃᓕᓐᓂᐊᕆᐊᖕᖓᑐᓂᑦ ᐃᓕᓐᓂᐊᕈᓐᓇᑎᑦᓱᒋᑦ.  ᑕᒪᓐᓇ ᐊᑐᓕᑭᑕᖕᖏᑐᖅ ᒪᓕᒐᖅ ᐊᑐᕐᑕᐅᒍᓐᓇᓲᖅ ᑕᑯᑦᓴᐅᑎᑕᐅᑐᐊᕐᒪᑦ ᐃᑲᔪᕐᓯᒪᖕᖏᒋᐊᖓ ᑖᑦᓱᒥᖓ ᐱᐊᕋᕐᒥᒃ ᐃᓕᓐᓂᐊᕈᓐᓇᓂᕐᒧᑦ ᐱᕕᖃᕐᑎᓯᖕᖏᓗᓂ. ᐆᒃᑐᕋᐅᑎᒋᓗᒍ, ᑖᓐᓇ ᐱᐊᕋᖅ ᐱᓯᑎᒻᒪᕆᐅᒍᑎᖃᑐᐊᕐᐸᑦ, ᐃᓕᓐᓂᐊᑲᐱᖕᖏᑯᓂ ᐱᕈᕐᐸᓕᐊᓂᖓᓄᑦ ᐃᑲᔪᕐᓯᒪᖕᖏᑑᑐᐃᓐᓇᕆᐊᖃᕐᑎᓗᒍ.

ᕿᑐᕐᙰᑦ ᐊᑐᐃᓐᓇᐅᖏᑉᐸᑦ, ᐃᓕᓐᓂᐊᕆᐊᖕᖓᑐᓂᑦ ᐱᒋᐊᑦᓴᐅᑎᒋᒍᓂ ᐃᓅᖃᑎᒌᓂ-ᐃᑉᐱᓂᐊᕈᑎᖏᑦᑕ, ᑐᑭᓯᒪᖃᑎᒌᓐᓂᑯᑦ, ᑎᒥᒃᑯᑦ ᑐᑭᓯᐊᓂᒃᑯᓗ ᐱᕈᕐᐸᓕᐊᓂᖓᓂᒃ ᐃᓱᐃᓪᓕᑎᕆᒍᓐᓇᑐᖅ. ᓯᕗᓂᕐᒥ ᐳᕐᑐᓃᑦ ᓇᓪᓕᑐᐃᓐᓇᖏᓐᓂᒃ ᐱᒋᐊᓕᕐᕿᒋᐊᖃᕋᔭᕐᓂᒧᑦ ᐅᓗᕆᐊᓇᕐᑐᒦᓲᑦ, ᑕᒪᓐᓇᓗ ᑐᕌᒍᑎᐅᒍᓐᓇᓱᓂ ᐃᒻᒥᓂᒃ-ᐅᐱᒋᓂᕐᒧᐊᖓᔪᓄᑦ ᐱᓀᓗᑕᓄᑦ.

ᑕᒪᓐᓇ ᕿᑐᕐᖓᐱᑦ ᖃᐅᔨᓴᕐᑕᐅᒍᑎᒋᒋᐊᓕᖓᑎᒍᑦ ᖃᐅᔨᓴᐅᑎᑎᒍᑦ ᓱᕐᖁᐃᑕᐅᓲᖅ.  ᕿᑐᕐᖓᐱᑦ ᖃᐅᔨᓴᕐᑕᐅᒍᑎᖏᑦ ᓄᐃᑕᑎᑦᓯᒋᐊᓖᑦ ᕿᑐᕐᖓᓂᒃ ᐱᐊᕃᑦ ᐊᓯᒥᑕ ᓴᓂᐊᓂᑦ ᓯᕗᒧᐊᕐᓯᒪᓂᕐᓴᐅᒋᐊᖓ 4-ᓂᑦ ᐱᕈᕐᐸᓕᐊᓂᖓᓂᒃ ᓇᐅᑦᓯᑐᕈᑎᐅᓲᓂᑦ.

ᑕᒪᒃᑯᐊ ᐱᕈᕐᐸᓕᐊᓂᖏᑦ ᓱᓇᒥᑦᓯᔪᑦ ᐱᒃᑲᕆᑦᓯᓯᒪᒍᑎᐅᒋᐊᓕᓐᓂᒃ ᕿᑐᕐᖓᐱᑦ ᐱᒍᓐᓇᕆᐊᓕᖏᓐᓂᒃ ᓇᓗᕐᖁᓀᑦᑑᓗᓂ ᐱᔭᖃᕈᓐᓇᓂᐊᕈᓂ ᐃᓕᓐᓂᐊᕕᒻᒥ:

• ᐅᖃᐅᓯᖓ ᐊᒻᒪᓗ ᐅᖄᓂᖓ: ᐱᐊᕋᐅᑉ ᐅᖄᒍᓯᖓ, ᓱᓇᓂᒃ ᑐᑭᓯᐊᒻᒪᖔᑦ, ᐊᓯᖏᓪᓗ.
• ᐅᖄᖕᖏᓗᓂ ᑐᑭᓕᐅᕐᓂᖓ: ᐱᐊᕋᐅᑉ ᐃᓱᒪᒍᓐᓇᓂᖓ, ᐱᓀᓗᑕᓂᒃ ᐋᕐᖀᒍᓐᓇᓂᖓ, ᐊᓯᖏᓪᓗ.
• ᓄᑭᒥᓂᒃ ᐊᑐᕈᓐᓇᓂᖓ: ᖃᓄᐃᓕᖓᑦᓱᓂ ᐊᒡᓚᐅᑎᒥᒃ ᐊᒻᒪᓗ ᑭᑦᔭᐅᑏᓐᓂᒃ ᑎᒍᒥᐊᓲᖑᒻᒪᖔᑦ, ᓂᒪᓲᖑᒻᒪᖔᑦ, ᐊᓯᖏᓪᓗ.
• ᐃᓅᖃᑎᒌᓂ-ᐃᑉᐱᓂᐊᕈᑎᖏᑦᑕ ᐱᕈᕐᐸᓕᐊᓂᖓ: ᐱᐊᕋᐅᑉ ᓱᓇᓱᐊᕈᓐᓇᓂᖓ ᐃᒻᒥᓂᕐᓱᓗᓂ, ᐱᕈᕐᓯᒪᓂᖓᑕ ᓇᓪᓕᖁᐊᖏᑦ, ᐱᓇᓱᐊᕈᓐᓇᓂᖓ, ᐱᐅᓯᖓ (ᐱᓂᐊᕐᓂᖃᕈᓯᖓ), ᐊᓯᒥᓄᑦ ᐱᖕᖑᐊᖃᑎᐅᑦᓯᐊᕈᓐᓇᓂᖓ, ᐊᓯᖏᓪᓗ.

ᐱᒋᐊᕐᕕᐅᒋᐊᓕᐅᑉ ᐊᓯᐊᒎᕐᑎᑕᐅᕕᖃᕐᓂᖅ ᑐᑭᓕᒃ ᐃᒫᒃ ᑐᑦᓯᕋᐅᑎᓕᐅᕐᑐᑎᑦ ᐃᓕᓴᕐᓂᓕᕆᓂᒃᑯᓄᑦ ᕿᑐᕐᖓᓂᒃ ᐱᐅᓯᐅᓗᑭᖕᖏᑐᒃᑯᑦ ᐊᖏᕐᑕᐅᖁᔨᑦᓱᑎᑦ ᐃᓕᓐᓂᐊᕆᐊᖕᖓᑐᓂ ᐱᒋᐊᕐᑎᑕᐅᖁᑦᓱᒍ ᐅᑭᐅᖏᑦ ᑎᑭᐅᑎᔭᐅᓯᒪᒋᐊᓕᓐᓄᑦ 5-ᓄᑦ ᑎᑭᕋᑕᕐᑎᓇᒋᑦ.

ᕿᑐᕐᖓᓄᑦ ᐱᒋᐊᕐᕕᐅᒋᐊᓕᐅᑉ ᐊᓯᐊᒎᕐᑎᑕᐅᒍᑎᑦᓴᖓ ᐱᒐᓱᐊᕐᓗᒍ, ᐃᒣᓘᕐᓯᒪᒋᐊᖃᕐᑐᑎᑦ:

• ᑐᑦᓯᕋᐅᑎᓕᐅᕆᑎ ᑕᑕᕐᓴᓗᒍ ᖃᕆᑕᐅᔭᑎᒍᑦ ᐃᓕᒐᓱᐊᕈᑎ ᓇᑦᓯᐊᓕᐅᑦ 15-ᖑᓚᐅᕐᑎᓇᒍ. ᐃᑲᔪᕐᑕᐅᒍᒪᕈᕕᑦ, ᐃᓕᓐᓂᐊᕕᒻᒥ ᐱᓇᓱᑦᑎ ᐃᑲᔪᕈᓐᓇᑐᖅ ᑕᑕᕐᓴᒐᕐᒥᒃ ᑐᓂᔭᐅᒍᒪᕈᕕᑦ. ᐅᖄᓚᕕᖃᕈᓐᓇᒥᕗᑎᑦ ᐅᕙᑦᑎᓄᑦ ᐅᕗᖓ 1-866-964-1136, ᓃᓂᕐᓗᒍ 301.
• ᑐᑦᓯᕋᐅᑎᓕᐊᑦ ᑐᑭᓯᓇᕐᑎᓯᓂᖃᕆᐊᓕᒃ ᐱᐊᕋᑉᐱᑦ ᓲᖑᓂᖏᓐᓂᑦ. ᑕᑕᕐᓴᒐᕐᒥᒃ, ᐊᓪᓚᕆᐊᖃᕐᑐᑎᑦ ᐃᓕᓐᓂᐊᕆᐊᖕᖓᑐᓄᑦ ᐃᓕᖕᖏᐸᑦ ᐱᐊᕋᕐᐱᑦ ᐱᕙᓪᓕᐊᓂᖓᓂᒃ ᐱᕈᕐᐸᓕᐊᓂᖓᓂᓪᓗ ᖃᓄᖅ ᓱᕐᕃᓂᖃᕋᔭᕐᒪᖔᑦ.
• ᕿᑐᕐᙰᑦ ᑕᒃᑯᒧᑦ ᖃᐅᔨᓴᕐᑕᐅᓂᕆᒐᔭᕐᑕᒥᓄᑦ ᐊᑐᐃᓐᓇᕈᑎᓯᒪᑦᓯᐊᕆᐊᓖᑦ ᓯᕗᓂᖓᒍᑦ. ᐱᐅᓯᐅᓲᖅ ᒪᓕᑦᓱᒍ, ᖃᐅᔨᓴᕐᑕᐅᒍᑎᓂᒃ ᐱᓇᓱᐊᓲᑦ ᓇᑦᓯᐊᓕᐅᑦ 15 ᐁᕆᓕ 15-ᓗ ᐊᑯᓐᓂᖓᓂ.  ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓄᑦ ᐅᓪᓗᖓ ᐅᖃᐅᓯᕆᔭᐅᓛᕐᑐᖅ.

ᖃᐅᔨᓴᕐᑕᐅᒌᕐᓯᒪᓕᑐᐊᕐᐸᑦ, ᐊᒡᓚᓯᒪᔪᑎᒍᑦ ᑭᐅᔭᐅᒐᔭᕐᑐᑎᑦ ᑕᕐᕿᓕᒫᖅ ᐊᓂᒍᓚᐅᕐᑎᓇᒍ, ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᐅᑎᓂᒃ ᐱᓇᓱᕝᕕᒧᑦ ᑰᒃᔪᐊᒥᑦ.

ᐱᒻᒪᕆᐊᓘᕗᖅ ᐊᖓᔪᕐᖄᕆᔭᕐᓄᑦ ᑐᑭᓯᒪᔭᐅᒋᐊᓕᒃ ᐃᒫᒃ ᕿᑐᕐᖓᖓ ᐃᓕᓐᓂᐊᕆᐊᖕᖓᓂᕐᒧᑦ ᐱᒋᐊᑦᓴᐅᑎᒋᒐᔭᕐᓂᖓ ᐊᖏᕐᑕᐅᓂᖕᖏᑲᓗᐊᕐᐸᑦ, ᑕᒪᓐᓇ ᐱᔭᖃᖕᖏᓂᐅᖕᖏᒪᑦ.

ᐃᒫᒃ ᑐᑭᖃᖔᕐᑐᐊᓛᑦ, ᑐᑭᖃᕐᓂᓴᐅᒍᓇᐅᕗᖅ ᕿᑐᕐᙰᑦ ᐱᕈᕐᐸᓕᐊᑦᓯᐊᑐᐃᓐᓇᑐᖅ ᐱᐅᓯᕐᓱᓱᓂ, ᐊᒻᒪᓗ ᐱᕙᓪᓕᑕᐅᓂᐊᕐᓱᓂ ᐊᕐᕌᒍᓕᒫᒥ ᐊᓂᕐᕋᓯᒪᒋᐊᓪᓚᓚᐅᕐᓗᓂ ᐃᓕᓐᓂᐊᓯᓚᐅᖕᖏᓂᕐᒥᓂ.  ᐃᓕᓐᓂᐊᕕᒻᒥ ᖁᕕᐊᒋᔭᖃᑦᓯᐊᓛᕐᑐᑦ ᕿᑐᕐᖓᓂᒃ ᑐᖕᖓᓱᑦᑎᓯᒋᐊᒥᒃ ᐊᕐᕌᒎᓚᖓᔪᒥ.

ᑖᓐᓇ ᖃᐅᔨᓴᕈᑎ ᑐᕌᒐᓕᒃ ᓱᕐᖁᐃᓯᓂᕐᒥᒃ ᕿᑐᕐᙰᑦ ᐃᓕᓐᓂᐊᓂᕐᒧᑦ ᐊᑐᐃᓐᓇᐅᒪᖔᑦ. ᑕᒪᓐᓇ ᐱᓇᓱᐊᕐᑕᐅᓲᖅ ᕿᑐᕐᙰᑦ ᖃᐅᔨᓴᕐᓱᒍ 4-ᓂᑦ ᐱᕈᕐᐸᓕᐊᓂᖓᓂᒃ ᑲᒪᒍᓯᐅᓲᓂᑦ.

ᐃᓕᓐᓂᐊᕕᒻᒥ ᐃᓕᒃᑯᑦ ᐃᓕᓐᓂᐊᑎᑕᐅᒍᑎᖃᕆᐊᓕᓐᓂᒃ ᐃᓕᓐᓂᐊᑎᑦᓯᔨ ᕿᑐᕐᖓᓂᒃ ᖃᐅᔨᓴᕋᔭᕐᑐᖅ.  ᐃᓕᒃᑯᑦ ᐃᓕᓐᓂᐊᑎᑕᐅᒍᑎᖃᕆᐊᓕᓐᓂᒃ ᐃᓕᓐᓂᐊᑎᑦᓯᔨᑕᖃᖕᖏᐸᑦ ᓄᓇᓕᒻᒥ ᐊᑐᐃᓐᓇᒥᒃ, ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᐅᑎᓂᒃ ᐱᓇᓱᕝᕕᒥᑦ ᐃᓕᓐᓂᐊᑎᑦᓯᔨᓄᑦ ᐃᑲᔪᕐᑎᖓ ᖃᐅᔨᓴᕈᑎᓂᒃ ᓄᓇᓕᑦᓯᓂ ᐱᓇᓱᐊᒐᔭᕐᑐᖅ.

ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᐅᑎᓂᒃ ᐱᓇᓱᕝᕕᒃ ᖃᐅᔨᓴᕐᑕᐅᒍᑎᖏᓐᓂᒃ ᑐᑭᓯᓇᕐᑎᓯᓲᖅ ᐊᒻᒪᓗ ᓱᕐᖁᐃᓱᒍ ᑖᓐᓇ ᐱᐊᕋᖅ ᐃᓕᓐᓂᐊᕆᐊᖕᖓᑐᓂ ᐱᒋᐊᑦᓴᐅᑎᒋᓂᕐᒧᑦ ᐊᑐᐃᓐᓇᐅᒪᖔᑦ.  ᑕᒪᓐᓇ ᐃᓕᓐᓂᐊᕕᒻᒧᑦ ᑐᑭᑖᕐᑕᐅᓲᖑᖕᖏᑐᖅ.

ᑐᑭᑖᕐᑕᖓᓂᒃ ᐊᖏᖃᑎᖃᖕᖏᑯᕕᑦ, ᐳᕐᑐᓂᕐᓴᒋᐊᓪᓚᒧᑦ ᐋᑦᓯᒍᓐᓇᑐᑎᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ.  ᐊᒡᓚᕕᖃᕈᓐᓇᒥᔪᑎᑦ ᐱᒍᑦᔨᒋᐊᓪᓛᒍᑎᓂᒃ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᐅᑎᓂᒃ ᐱᓇᓱᕝᕕᒥᒃ ᖃᕆᑕᐅᔭᒃᑯᑦ ᐅᖄᓚᕕᒋᓗᒋᓘᓐᓃᑦ ᐅᕙᓂ 1-866-964-1136 ext. 301 ᐱᒋᐊᕐᕕᐅᒋᐊᓕᐅᑉ ᐊᓯᐊᒎᕐᑎᑕᐅᒍᒪᒍᑎᒥᒃ ᑐᑦᓯᕋᐅᑎᑉᐱᑦ ᑭᐅᔭᐅᓂᖓᓅᓕᖓᔪᓂᒃ ᑐᑭᓯᒋᐊᓪᓚᕈᑎᑦᓴᑎᓐᓄᑦ.

ᖃᐅᔨᓴᕈᑎᓂᒃ ᐱᓇᓱᐊᓲᑦ ᓄᓇᓕᒻᒥ ᐃᓕᓐᓂᐊᕕᓯᓐᓂ.

ᐱᐅᓯᐅᓲᑎᒍᑦ, ᖃᐅᔨᓴᕈᑎᓂᒃ ᐱᓇᓱᐊᓲᑦ ᐁᕆᓕ 15 ᒫᑦᓯ ᒣ 15 ᐊᒻᒪᓗ. ᐃᑉᐱᒋᔭᖃᑦᓯᐊᕆᐊᖃᕐᑐᑎᑦ ᕿᑐᕐᙰᑦ ᑕᒃᑯᒧᑦ ᖃᐅᔨᓴᕐᑕᐅᓂᑦᓴᒥᓄᑦ ᐊᑐᐃᓐᓇᐅᒋᐊᖃᕐᓂᖓᓂᒃ.

ᕿᑐᕐᙰᑦ ᐅᖃᐅᓯᕐᖄᒥᓂᒃ ᐊᑐᕐᓗᓂ ᖃᐅᔨᓴᕐᑕᐅᒐᔭᕐᑐᖅ. (ᐃᓄᒃᑎᑐᑦ, ᒍᐃᒍᐃᑎᑐᑦ ᖃᓪᓗᓈᑎᑐᓘᓐᓃᑦ.

ᐊᐅᑲ, ᐊᖓᔪᕐᖄᕆᔭᒥᒃ ᐁᓯᒪᔪᖃᕈᓐᓇᖏᑦᑐᖅ ᕿᑐᕐᖓᖓᑕ ᖃᐅᔨᓴᕐᑕᐅᓂᖓᓂ.