ᓕᓯᐅᑉ ᑲᔪᓯᑦᓯᐊᓂᖓ ᐱᓇᓱᒐᕐᒥᓂ ᐃᓕᓐᓂᐊᑎᒻᒥᓄᑦ ᐆᑦᑐᒐᐅᑎᑦᓯᐊᖅ ᐱᒍᓐᓇᓂᕐᔪᐊᒥ ᐃᓕᓭᓪᓂᑯᑦ ᐋᕐᖀᓯᐊᕐᓱᓂ ᐅᕕᒃᑫᑦ ᐃᓅᓯᖏᓐᓂᒃ.

ᓕᓯ ᑕᕐᕿᐊᐱᒃ ᐱᓇᓱᐊᖃᑦᑕᑐᖅ 30 ᐅᑭᐅᓂ ᐃᓅᓯᕐᒥᓂ ᐃᓕᓭᑦᓱᓂ ᐅᕕᒃᑲᓂ ᑰᑦᔪᐊᒥᐅᓂ. ᑕᒐᑕᒐ ᐃᓄᑦᑎᑐᑦ ᐃᓕᓭᔨᒃ ᐳᕐᑐᓂᓕᓐᓂ 4 ᐊᒻᒪᓗ 5, ᐱᓇᓱᐊᖃᑎᖃᓯᒪᓕᕐᑐᖅ ᐃᓕᓴᒋᐊᖕᖓᑐᓐᓂ, ᐳᕐᑐᓂᓖᑦ ᐊᑕᐅᓯᖅ ᐊᒻᒪᓗ ᐳᒃᑭᓂᕐᓴᓂ ᐃᓕᓐᓂᐊᑎᓐᓂ ᐱᓇᓱᒐᕐᒥᓂ ᐊᒥᓱᓂ ᐊᒡᕌᒍᓂᑦ. ᓕᓯᐅᑉ ᐊᑑᑎᓯᒪᔭᖏᑦᑕ ᐅᐱᓐᓇᑐᖅ ᐅᑎᖃᑦᑕᓚᐅᕐᒪᑦ ᐃᓕᓴᕐᕕᒧᑦ ᐊᒡᒑᕈᑕᒫᑦ ᐱᒋᐊᖕᖓᓕᕐᒪᑕ ᐃᓕᓴᕐᕕᒥ ᑕᖃᒪᖃᑦᑕᑐᕕᓂᐅᓕᒐᓗᐊᕈᒥ ᐃᓕᓴᓐᓇᐅᑉ ᑭᖑᓪᓗᐹᕐᓯᐅᓕᒻᒪᑕ.

“ᑌᒪᖕᖓ ᐃᒻᒥᓂ ᐅᖃᐅᑦᔨᕙᑦᓱᖓ ᐱᓇᓱᕝᕕᕋᓄ ᐅᑎᓛᑦᔭᕈᓐᓀᖁᖓ. ᓱᓕ ᑕᒫᓂ ᐃᑦᓯᕙᖏᓐᓈᖁᖓ” ᓕᓯ ᑌᒫ ᐅᖃᕐᑐᖅ, ᐃᔪᕿᑕᕐᓱᓂ.

ᐊᐱᕆᔭᖃᕐᐳᖓ, “ᓱᓇᒥᒃ ᐊᖏᓂᕐᐸᐅᑎᓪᓗᒍ ᐅᖁᒣᑦᑐᑰᒍᑎᒋᕓᑦ ᐱᓇᓱᐊᑦᓱᑎᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ?”

“ᐃᓕᓭᑦᓱᖓ ᕿᑐᕐᖓᑲᓂ.ᐃᓕᓭᔨᐅᒋᐊᖃᓯᒪᕗᖓ, ᐊᓈᓇᐅᑦᔭᓇᖓ, ᐅᖁᒣᑦᑐᒪᕆᐅᓚᐅᔪᖅ.” ᓕᓯ ᖃᐅᔨᒪᑦᓯᐊᑐᕕᓂᖅ ᐅᖃᒣᑦᑑᓂᖓᓂ ᐃᓕᓭᒋᐊᒥ ᕿᑐᕐᖓᒥᓂᑦ, ᑕᖃᓐᓇᓯᖃᑦᑕᓯᒪᕐᒪᑦ ᐃᓚᒌᓐᓂᑯᑦ. ᑭᓯᐊᓂ, ᐃᓕᑦᓯᒍᑎᕆᓯᒪᔭᖓ ᑖᑦᓱᒪ ᐊᑑᑎᓯᒪᔭᒻᒥᓂ: “ᐃᕐᖑᑕᒃᑲᓂᑦ, ᐃᓕᓴᓯᒪᔭᒃᑲ ᐊᑦᔨᐅᖏᑦᑐᑯᑦ.” ᐃᓱᒪᒋᔭᕐᒥᓂ, ᐱᒻᒪᕆᐅᕗᖅ ᐃᓂᕐᑎᒋᓪᓗᓂ ᐅᕕᒃᑲᐅᓂᕐᓴᓂᑦ ᐃᓕᓭᔨᓐᓂ ᐃᓕᒃᑰᓯᐊᓪᓗᑎᒃ ᐱᓇᓱᒐᖓ ᐊᒻᒪᓗ ᐊᓈᓇᒃᑰᓂᖏᓪᓗ ᐊᑖᑕᒃᑰᓂᖏᑦ.

ᑕᒪᒃᑯᐊᐅ ᖁᒣᑦᑐᑰᓐᓃᑦ ᐱᒐᓗᐊᕐᑎᓗᒋᑦ, ᓕᓯ ᐊᓕᐊᒋᔭᖃᑦᑐᖅ ᐱᓇᓱᕝᕕᒥᓂ. “ᐱᓇᓱᖃᑎᒃᑲ ᐊᓕᐊᒋᔭᒃᑲ, ᐊᓕᐊᑦᓱᖓᓗ ᐱᓇᓱᐊᖃᑎᖃᒋᐊᒥᒃ ᑲᒃᑲᓛᓐᓂ.”

ᐊᓕᐊᒋᔭᓕᒃ ᐃᓕᓭᓐᓂᒥ ᐊᓕᐊᒋᔭᖃᓚᕿᑦᓱᓂ ᐃᑦᔭᒐᑦᓴᓯᐊᕐᒥᒃ ᐊᔭᒻᒥᓂ, ᐃᓕᓴᐱ ᑕᕐᕿᐊᐱᒃ, ᐃᓕᓭᖃᑕᐅᓯᒪᔪᒻᒥ ᐃᓕᓴᕐᕕᒥ. ᐃᑦᔭᕋᑦᓴᓯᐊᒻᒥ, ᓕᓯ ᐱᓇᓱᐊᕙᑦᑐᖅ ᑭᖑᓂᖃᑦᑎᓗᒍ ᓱᓱᒋᓪᓗᒋᑦ ᑭᖑᕚᑦ ᐃᓕᓴᖁᓪᓗᒋᑦ ᐊᒻᒪᓗ ᐊᓐᓂᒍᓱᓪᓗᑎᒃ ᐅᖃᐅᓯᒻᒥᓂ ᐅᖃᐅᓯᑐᖃᕐᒥᓂᑦ, ᑌᒣᒐᓗᐊᕐᒪᑕ ᐊᑑᑎᓪᓗᑯᐃᑦ ᑕᒐᑕᒐᐅᓕᕐᑐᖅ ᖃᓪᓗᓈᑦᑎᑐᑦ ᐅᖃᐅᓯᖅ ᓇᓂᓕᒫᖅ ᖃᕆᑕᐅᔭᒃᑯᑦ. ᓄᓇᕕᒻᒥᐅᑦ ᐃᓕᓪᓂᐊᑎᑦ ᑕᑯᒋᐊᕐᑎᓗᒋᑦ ᓯᕗᓂᒻᒥ, ᓕᓯᐅᑉ ᖃᐅᔨᒪᑦᓯᐊᓂᖓ ᐊᑐᑎᓯᒪᔭᖏᓪᓗ ᑲᔪᓯᓚᖓᔪᖅ ᓯᕗᒧᐊᑦᑎᓗᒋᑦ ᐃᓕᓴᕐᓂᒥᓂᑦ.