ᐊᒥᓱᑎᒍᑦ ᑐᓴᐅᒪᕇᕐᑐᓴᐅᕗᓯ ᓄᕐᕃᑦ ᒥᑦᓵᓄᑦ – ᑭᓯᐊᓂ ᖃᐅᔨᓚᐅᕋᑕᕐᖀᑦ ᑖᓐᓇ ᑲᔪᓯᑎᑕᐅᓂᖓ ᐊᕐᕌᒍᓂ ᖁᓕᓂᑦ ᓇᓪᓕᐅᓂᕐᓯᐅᓯᒪᒻᒪᑦ ᓱᖃᑦᓯᑎᑦᓯᓲᖑᑦᓱᑎᒃ ᓄᓇᕕᒻᒥᐅᓂᑦ ᐅᕕᒃᑲᓂᑦ?

ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑦᓱᓂ ᐱᓇᓱᐊᖃᑎᖃᓲᖅ ᐱᓇᓱᑦᑎᐅᖃᑎᒥᓂᒃ ᐊᒻᒪᓗ ᑎᒥᐅᔪᓂᒃ ᓯᓚᑖᓂ ᐱᓯᒪᔪᓂᒃ ᑐᕌᒐᖃᖃᑎᒌᑦᓱᑕ: ᐅᑉᐱᒋᔭᖃᕐᑐᒍᑦ ᐃᓕᓐᓂᐊᑏᑦ ᐊᓂᒎᑎᑦᓯᐊᖁᓪᓗᒋᑦ ᐱᒋᐊᕐᓂᖃᓲᑦ ᑭᓇᐅᓂᕐᒥᓂᒃ ᐃᓕᑕᕐᓯᒪᓂᒃᑯᑦ, ᐱᕐᖁᓯᑐᖃᕐᑎᒍᑦ, ᐊᒻᒪᓗ ᐱᑐᑦᓯᒪᖃᑎᖃᕐᓂᑯᑦ ᐃᓄᓐᓂᒃ ᐊᒻᒪᓗ ᓄᓇᕕᐅᑉ ᓄᓇᖓᓂᒃ

ᐊᒥᓲᒐᓗᐊᕐᑎᓗᒋᑦ ᐊᑕᐅᓯᓗᐊᖕᖑᐊᖅ ᐊᑦᔨᐅᖏᑦᑑᒍᑎᖓ ᓄᕐᕃᑦ ᓄᓇᒦᑦᓱᑎᒃ ᐃᓕᓐᓂᐊᓲᖑᓂᖏᑦ. ᓄᕐᕃᑦ ᓱᖃᑦᓯᑎᑕᐅᓂᖏᑎᒍᑦ, ᑐᑦᑐᐃᑦ ᐊᒻᒪᓗ ᐃᑳᕐᑐᐃᑦ, ᐅᑭᐅᖃᕐᓱᑎᒃ ᑖᒃᑯᐊ 10-ᒥᒃ 25-ᒧᑦ ᑎᑭᑦᓱᒍ, NJK ᓱᖃᑦᓯᐊᑎᑦᓯᓲᑦ ᐃᒻᒥᒍᑦ ᐃᓅᖃᑎᒌᑎᒍᓪᓘᓃᑦ ᐱᕙᓪᓕᐊᑎᑦᓯᒐᓱᐊᕐᓱᑎᒃ ᓄᓇᕕᒻᒥᐅᓂᒃ ᐊᓃᕐᑎᓱᒋᑦ ᓱᖃᑦᓯᑎᒐᓚᑦᓱᒋᑦ.

ᓇᓪᓕᐅᓂᕐᓯᐅᓚᐅᑲᑦᑎᓗᒋᑦ ᐊᕐᕌᒍᐃᑦ 10 ᐊᓂᒍᕐᒪᑕ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑲᑎᖃᑎᓕᕕᓃᑦ ᑲᒪᔨᒻᒪᕆᐅᑉ ᐃᑲᔪᕐᑎᖓᓂᒃ ᔨᐊᕆᒥ ᐱᓛᕐᒥᒃ ᑐᑭᓯᒋᐊᑦᓯᐊᕈᒪᑦᓱᑎᒃ ᖃᓄᐃᓘᕐᓂᖃᓲᖑᒻᒪᖔᑕ.

ᑕᒪᓐᓇᑕᒐ ᑐᖕᖓᕕᓪᓚᕆᖓ ᐃᓘᓐᓀᓄᑦ NJK ᓱᖃᑦᓯᓂᕆᓲᖏᑦ: ᐃᓚᐅᔪᓕᒫᑦ. ᐱᑐᑦᓯᒪᐅᑎᒪᓪᓚᕆᑦᑐᐃᑦ ᑲᑎᕕᒃ ᐃᓕᓴᕐᓂᓂᕆᓂᒃᑯᑦ ᐊᒻᒪᓗ ᓄᕐᕃᑦ | Jeunes Karibus, ᒫᓐᓇᓗ ᓱᖃᑦᓯᑎᑦᓯᓂᖃᓲᖑᑦᓱᑎᒃ ᓄᓇᓕᓕᒫᓂ 14-ᓂᑦ. ᓄᕐᕃᑦ ᐊᒻᒪᓗ ᑐᑦᑐᐃᑦ ᐱᓇᓱᐊᕐᓂᖏᑦ ᐱᒋᐊᓲᑦ ᐃᓕᓐᓂᐊᓇᐅᑉ ᐊᕐᕌᒍᖓᑕ ᐱᒋᐊᕐᓂᖓᓂ, ᐃᓕᓐᓂᐊᑎᑦᓯᔨᓄᓪᓗ ᐊᐅᓚᑕᐅᓲᖑᑦᓱᑎᒃ, ᐃᒻᒥᓂᕐᓱᓱᑎᒃ ᐃᑲᔪᒐᓱᐊᓲᑦ ᓯᕗᓕᕐᓱᑎᒃ ᑲᒪᔨᐅᓲᑦ. ᐊᑐᐃᓐᓇᕈᕐᑎᓕᕋᒥᒃ, ᐅᓪᓗᓂ ᐱᖓᓱᓂ ᑰᑦᔪᐊᒥ ᐱᒋᐅᕐᓴᑎᑕᐅᓂᖃᓲᑦ, ᓄᕐᕃᑦ | Jeunes Karibus ᐱᓇᓱᑦᑎᖁᑎᖏᑦ ᐱᒋᐅᕐᓭᓱᑎᒃ ᓄᓇᒦᑦᑎᓯᓂᒃᑯᑦ ᓱᖃᑦᓯᑎᑦᓯᓂᒃᑯᓗ, ᐅᑭᐅᒥ ᒪᙯᓐᓂᑯᑦ ᐊᒻᒪᓗ ᓯᐊᕐᕆᔭᐅᑎᑯᑖᒃᑯᑦ ᐱᒋᐅᕐᓴᓱᑎᒃ. ᐱᒋᐅᕐᓴᑎᑕᐅᓕᕋᒥᒃ ᑐᖕᖓᕕᓪᓚᕆᒻᒥᒃ ᓄᐃᑦᓯᓚᕆᓲᑦ ᐃᓕᓐᓂᐊᑎᑦᓯᔨᓄᑦ ᓱᖃᑦᓯᑎᑦᓯᖃᑦᑕᓂᐊᕐᑎᓗᒋᑦ ᐃᓕᓐᓂᐊᓇᐅᑉ ᐊᕐᕌᒍᖓᓂ: ᐊᑕᐅᓯᐊᕐᓱᑎᒃ ᐱᓇᓱᐊᕈᓯᐅᑉ ᐃᓗᐊᓂ ᓱᖃᑦᓯᒐᓚᑦᓱᑎᒃ, ᒪᕐᕈᕕᑦᓱᑎᒃ ᒪᙯᑦᓱᑎᒃ, ᐊᒻᒪᓗ ᐅᓪᓗᓂ ᑕᓪᓕᒪᓂ ᓄᓇᕕᐅᑉ ᐃᓗᐊᓂ ᐊᓃᕐᓱᑎᒃ.

ᐊᕐᕌᒍᐃᑦ ᖁᓖᑦ ᐃᓗᐊᓂ, | Jeunes Karibus ᖃᓄᓕᒫᖅ ᐱᓂᐊᕐᓂᖃᖃᑦᑕᓯᒪᔪᑦ ᐊᒻᒪᓗ ᐊᖏᖃᑎᖃᑦᓯᐊᓲᖑᑦᓱᑎᒃ ᐃᓚᐅᔪᐃᑦ ᑭᖕᖒᒪᒋᔭᖏᓐᓂ. “ᑖᓐᓇ ᓱᖃᑦᓯᑎᑕᐅᓂᐅᓲᖅ ᑭᓇᑐᐃᓐᓇᒧᑦ ᐅᒃᑯᐃᖔᑦᓯᐊᖃᑦᑕᓯᒪᔪᖅ ᐃᓚᐅᒍᒪᔪᓄᑦ. ᖃᐅᔨᓯᒪᔪᒍᑦ, ᒪᓕᒐᖃᕐᑎᓯᖕᖏᓱᑕ ᐃᓚᐅᔪᓂᒃ, ᐊᒥᓱᓂᒃ ᐊᓂᒍᐃᖃᑦᑕᓯᒪᔪᒍᑦ ᑐᕌᒐᕆᖃᑦᑕᓯᒪᔭᑦᑎᓂᒃ” ᐅᖃᕐᑐᕕᓂᖅ ᔨᐊᕆᒥ. “ᐃᓚᐅᔪᐃᑦ ᐃᓚᐅᒍᒪᓂᕐᓴᐅᓯᓲᑦ ᐃᓕᓐᓂᐊᕆᐊᕐᓂᒧᑦ. ᓄᓇᒥ ᓱᖃᑦᓯᑎᑕᐅᓂᒃᑯᑦ, ᓲᖑᔪᑦᓯᐊᒥᒃ ᐱᑐᑦᓯᒪᓂᖃᓯᑦᐊᓱᑎᒃ ᓯᕗᓕᕐᑐᓂᒃ (ᐃᓕᓐᓂᐊᑎᑦᓯᔨᓂ), ᑕᒪᓐᓇᓗ ᐅᑎᒧᑦ ᓈᓚᑦᓯᐊᓕᐅᒥᑎᑦᓯᓲᖑᑦᓱᓂ ᖃᕆᐊᑉ ᐃᓗᐊᓂ. ᑕᒪᓐᓇ ᐱᐅᔪᖅ ᑕᒪᒃᑮᑐᑎᒍᑦ” ᐅᖃᕆᐊᓪᓚᑐᕕᓂᖅ.

2024-2025-ᖑᑎᓪᓗᒍ, ᓄᕐᕃᑦ | Jeunes Karibus 17-ᕕᓃᑦ ᓄᓇᕕᓕᒫᒥ, ᐃᓚᐅᔪᑦ 11-ᖑᑎᑦᓱᑎᒃ ᐳᕐᑐᓂᕐᓴᒥ ᐃᓕᓐᓂᐊᑏᑦ ᐃᒻᒥᒎᕐᑎᑐᑦ ᐊᒻᒪᓗ 6 ᐱᒋᐅᕐᓴᓂᕐᒦᑐᑦ ᐃᒻᒥᒎᕐᒥᔪᑦ, ᑕᒪᒃᑯᐊᓗ ᐃᓕᓐᓂᐊᑏᑦ ᐅᑭᐅᑭᓐᓂᐹᖓ 10-ᓂᒃ ᐅᑭᐅᖃᕐᑎᓗᒍ.. ᐊᓯᖏᑦ ᐱᒋᐊᖕᖓᐅᑎᐅᒻᒥᔪᑦ ᓄᑖᑦ ᐱᓇᓱᐊᕐᑕᐅᔪᑦ ᐃᑳᕐᑐᐃᑦ ᐱᓇᓱᐊᕐᑕᐅᓂᖓᒍᑦ, ᐃᓚᐅᔪᓂᒃ ᐃᓚᖏᓐᓂᓗ ᐃᓚᐅᑎᑦᓯᓂᖃᓲᖑᑦᓱᓂ ᓱᖃᑦᓯᑎᑕᐅᓂᒃᑯᑦ ᐱᒋᐊᖕᖓᐅᑎᐅᔪᖅ ᑐᕌᒍᑎᖃᕋᓱᐊᕐᑎᓗᒍ ᐃᓚᒌᓂᒃ ᖃᓂᑕᑖᕐᐸᓕᐊᑎᑦᓯᒐᓱᐊᕐᓂᒧᑦ!

ᑕᒪᓐᓇ ᓯᕗᓪᓕᐹᖅ ᐊᓪᓚᑕᐅᒪᔪᖅ ᓴᕐᕿᑎᑕᐅᒪᔪᖅ ᐱᖓᓱᐃᓕᖓᔪᒥ ᐃᓗᓕᓕᒃ ᓇᓗᓀᕐᓯᒍᑎᐅᑦᓱᓂ ᐱᓇᓱᐊᕐᑕᐅᓯᒪᓕᕐᑐᓂᒃ ᓄᕐᕃᑦ | Jeunes Karibus. ᑐᑭᓯᒋᐊᓪᓛᕈᒪᒍᕕᑦ ᐱᓇᓱᐊᕐᑕᐅᑉ ᒥᑦᓵᓄᑦ, ᑕᑯᓂᐊᕈᓐᓇᖁᑎᑦ ᐱᑐᕝᕕᖓᓄᑦ ᐅᕝᕙᓘᓐᓃᑦ ᑐᓴᐅᒪᖃᑎᒌᕝᕕᑎᒍᑦ ᕓᔅᐳᒃ ᒪᑉᐱᒐᖓᓂ.

ᑐᓴᐅᒪᕋᓱᐊᑦᓯᐊᓛᕆᕗᑎᑦ ᑐᖓᓕᐊᓄᑦ ᑐᓴᕐᑎᓯᐅᑎᒧᑦ!