ᓴᓪᓗᐃᑦ, ᓄᓇᕕᒃ ᑯᐯᒃ (ᕕᕈᐊᕆ 24, 2014) – ᓄᓇᕕᒻᒥ ᓄᓇᓕᓕᒫᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᑎᑦᓯᓯᒪᓂᖓ ᐊᑑᑎᓛᕐᑐᖅ ᕕᕈᐊᕆ 25, 26-ᒥᓪᓗ 2014-ᒥ ᐃᑯᓯᒃ ᐃᓕᓐᓂᐊᕕᒻᒥ ᓴᓪᓗᓂ.

“ᐅᐱᒍᓱᕐᖁᒍᑦ ᓇᔪᕐᑕᐅᒋᐊᒥᒃ ᑕᒪᒃᑯᓄᖓ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᑎᑦᓯᓯᒪᓂᕐᓄᑦ” ᐅᖃᕐᑐᖅ ᐱᐊᕐᓈᕐ ᓗᕓᑉ, ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓ ᐃᑯᓯᒃ ᐃᓕᓐᓂᐊᕕᒻᒥ. “ᓱᑯᐃᔦᓂᕐᒥ ᓴᕐᕿᑎᑦᓯᓯᒪᓂᖅ ᑌᒪᖕᖓᑦ ᐃᓚᖃᓲᖅ ᐊᓕᐊᒋᔭᐅᓪᓚᕆᑦᑐᓂᒃ ᐃᓕᓐᓂᐊᑎᓄᑦ ᓄᓇᕐᖃᑎᒌᖕᖏᑐᓄᑦ ᓴᕐᕿᑎᑦᓯᕕᖃᖃᑎᒌᓐᓂᒥᒃ” ᓚᕆᐊᓪᓚᓱᓂᓗ.

ᑖᒃᑯᓈᓐᓂ ᐅᓪᓘᓂ, ᐃᓕᓐᓂᐊᑏᑦ 50-ᒐᓓᑦ ᓄᓇᕕᒻᒥᐅᑦ ᓴᕐᕿᑎᑦᓯᒍᑎᖃᓛᕐᑐᑦ ᓱᑯᐃᔦᓂᕐᒥ ᐱᓇᓱᐊᕐᑕᒥᓂᒃ ᑲᒪᔨᓄᑦ ᓵᓚᖃᕐᑐᓴᓂᒃ ᑐᑭᑖᕆᔨᓄᑦ.

“ᐃᓚᐅᖃᑕᐅᓂᖅ ᓄᓇᓕᓕᒫᓂ ᓱᑯᐃᔦᓂᕐᒥᒃ ᓴᕐᕿᑎᑦᓯᓯᒪᓂᕐᒧᑦ ᐃᓕᓐᓂᐊᑎᓄᑦ ᐃᓕᓐᓂᐊᒍᑎᑦᓯᐊᖑᕗᖅ” ᐅᖃᕐᒥᔪᖅ ᖂᑯ ᔪᐊᑕᓐ, ᓴᓇᑦᑐᓴᐅᑎᓂᒃ ᓱᑯᐃᔦᓂᕐᒥᓗ ᐃᓕᓐᓂᐊᑎᑦᓯᔨ ᐃᑯᓯᒻᒥ ᐅᐃᒍᐃᑎᑐᑦ. “ᐱᓇᓱᐊᕐᓱᓂ ᐊᑑᑎᓪᓚᕆᑦᓱᒋᑦ ᑐᐹᕐᓭᕈᑎᐅᔮᕐᖁᖅ ᓱᑯᐃᔦᓂᕐᒥᒃ ᐃᓱᒻᒪᓯᕐᒥᒃ. ᐱᓇᓱᐊᕐᑕᒥᓂᒃ ᑐᑭᓯᑎᑦᓯᖃᑦᑕᓱᑎᒃ ᑐᑭᑖᕆᔨᓄᑦ, ᑕᑯᓂᐊᕐᑐᓄᑦ ᐊᓯᖏᓐᓄᓗ ᐃᓚᐅᖃᑕᐅᔪᓄᑦ, ᐃᓕᓐᓂᐊᑏᑦ ᓇᒻᒥᓂᖅ ᓇᓗᕐᖁᑎᖕᖏᓂᖃᓪᓚᕆᒋᐊᖃᕐᒥᔪᑦ” ᓚᑦᓱᓂᓗ.

ᐱᓇᓱᖃᑎᒌᑦᑐᓂ ᐱᐅᓂᕐᐹᓂᒃ ᓴᕐᕿᑎᑦᓯᔪᕕᓂᕐᓂᒃ ᐱᓇᓱᐊᕐᑕᒥᓂ, ᐃᓚᖏᑦ ᑭᒡᒐᑐᕈᓐᓇᓯᓛᕐᑐᑦ ᓄᓇᕕᒻᒥᒃ ᓄᓇᐅᑉ ᐊᕕᑦᑐᓯᒪᓂᖏᑦᑕ ᓴᕐᕿᑎᑦᓯᓯᒪᓂᖏᓐᓂ, 2014-ᒥ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᕐᕿᑎᑦᓯᓯᒪᓂᕆᓛᕐᑕᖓᓂ, ᒫᑦᔨ 25-26-ᓂ Wendake, ᑯᐯᒻᒥ.

ᓵᓚᖃᓕᐅᑎᓃᑦ ᓄᐃᑕᖏᑦ ᑐᓴᕐᑎᓯᒍᑕᐅᓛᕐᑐᑦ ᕕᕈᐊᕆ 26, 2014-ᒥ, ᐃᑯᓯᒻᒥ ᓴᕐᕿᑎᑦᓯᓯᒪᐅᑏᑦ ᐅᒃᑯᐊᑕᐅᓂᖃᓕᕐᐸᑕ.

ᐊᑕᐅᑦᓯᑰᕐᑎᑕᐅᑦᓱᑎᒃ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ, ᑕᒪᓐᓇ ᐱᓂᐊᕐᓂᖅ ᓴᐳᑦᔨᔭᐅᓯᒪᓲᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᓴᓪᓗᐃᑦ ᑲᕙᒫᐱᖓᓄᑦ ᓄᑖᓂᓪᓗ ᐊᕐᖁᓯᐅᕐᓂᓄᑦ ᐃᓕᓐᓂᐊᓂᕐᒨᓕᖓᔪᓂᒃ (ᐃᓄᓕᕆᔨᑐᙯᑦ ᐅᑭᐅᕐᑕᑐᒥᓪᓗ ᑲᓇᑕᒥ ᐱᕙᓪᓕᐊᓂᕐᒥ ᑐᕐᖃᑕᕐᕕᑯᑦ).

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖑᓯᒪᓕᕐᓱᓂ ᐃᓕᓐᓂᐊᓂᕐᒨᓕᖓᔪᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᕈᑎᓕᐊᖑᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᓄᓇᓕᓐᓂ 14-ᓂ ᐃᓕᓐᓂᐊᑎᑦᓯᕈᑕᐅᔪᑦ. ᐃᓄᒃᑎᑐᑦ ᐅᖃᐅᓯᕐᖄᖅ ᐁᑉᐱᐅᑎᒋᔭᐅᑎᓪᓗᒋᒃ ᖃᓪᓗᓈᑎᑑᕐᓂᖅ ᐅᐃᒍᐃᑎᑐᓪᓗ. ᑐᑭᓯᒋᐊᕈᑎᖃᕈᒪᒍᑦᓯ, ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᑎᓐᓄᑦ ᑕᑯᓂᐊᕈᓐᓇᑐᓯ ᐅᕗᖓ: www.kativik.qc.ca

— 30 —

ᑐᑭᓯᒋᐊᕈᒪᒍᑦᓯ ᐅᓇ ᐅᖄᓚᕕᐅᑦᑌᓕᖕᖏᑐᖅ:

ᔮᑦ ᑐᔅᓅ-ᐱᐊᕐᓃ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ
ᑲᑎᕕᒃ ᐃᓕᓐᓂᐊᓂᓕᕆᓂᖅ
514-482-8220