ᐁ ᓯᕗᓕᕐᑎ ᓕᒎᙰ,
ᐁᕆᓕ 2022 ᐱᒋᐊᕐᖃᒥᐅᑎᓪᓗᒍ, ᐊᒡᓚᕕᒋᓚᐅᔪᒐᒃᑭᑦ ᓇᓗᓀᕐᓯᒍᑎᓂᒃ ᐃᒫ, ᑌᒫᑦᓭᓇᖅ ᓄᓇᖃᕐᖄᓯᒪᔪᑦ ᑯᐯᒃᒥ ᑭᒡᒐᑐᕐᑎᖏᑎᑐᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᑕᑯᒍᒪᒻᒪᑕ ᐃᓄᐃᑦ ᐃᓕᓐᓂᐊᑏᑦ ᐃᓕᓐᓂᐊᕕᓐᓂ ᐳᕐᑐᓂᕐᓴᒋᐊᓪᓚᓂ ᐃᓕᓐᓂᐊᑎᐅᖃᑎᐅᑦᓱᑎᒃ ᑯᐯᒃᒥ ᐃᓚᐅᑎᑕᐅᖕᖏᑑᒍᑎᖓᓂᒃ ᐱᖁᔭᖅ 96-ᒧᑦ ᐃᓕᖓᔪᓄᑦ. ᑕᒪᓐᓇ ᐱᓪᓗᒍ, ᖃᐅᔨᔭᐅᑎᑦᓯᒋᐊᓪᓚᒍᒪᒋᕗᖓ ᐃᒫᒃ ᑲᑎᕕᒃ ᐃᓕᓴᕐᓂᓕᕆᓂᖅ ᓄᓇᖃᕐᖄᓯᒪᔪᑦ ᐃᓕᓐᓂᐊᓂᓕᕆᓂᕐᒥ ᑲᑎᖕᖓᔨᖏᑦᑕ, ᓄᓇᖃᕐᖄᓯᒪᔪᑦ ᑯᐯᒃ-ᓛᐸᑐᐊᒥ ᐅᖃᕐᕕᒪᕆᖓᑕ ᐊᒻᒪᓗ ᐊᒥᓱᒐᓓᑦ ᓄᓇᖃᕐᖄᓯᒪᔪᑦ ᐊᖓᔪᕐᖄᖏᑦᑕ ᑐᑭᑖᕐᓯᒪᔭᖏᓐᓂᒃ ᓴᐳᑦᔨᒪᑦ.
ᐋᔩᖃᑎᒌᒍᑎᐅᓂᖓ ᐱᖁᔭᖅ 96-ᒨᓕᖓᔪᑦ, ᑕᒐᑕᒐᐅᑎᓪᓗᒍ ᓇᐅᓕᒫᓂᒃ ᖃᐅᔨᒪᑎᑦᓯᒍᑎᐅᖃᑦᑕᒪᑦ, ᑭᒡᒐᑐᓂᕐᓗᒪᑦ ᓄᓇᖃᕐᖄᓰᒪᔪᑦ ᓄᓇᓕᖏᑦᑕ ᐱᒍᒪᔭᖏᓐᓂᒃ. ᖃᓪᓗᓈᑎᑑᕐᑐᖅ ᐅᖃᐅᓯᖅ ᑎᑭᑦᑎᒋᓚᐅᕐᑕᕕᓂᑦᑎᓂᑦ ᐅᖃᐅᓯᕐᑖᕆᒍᒪᑦᔭᖏᑦᑕᕗᑦ. ᓄᓇᖃᕐᖄᓯᒪᔪᑦ ᐅᖃᐅᓯᖏᑦ ᑖᒃᑯᐊᖑᕗᑕᒐ ᐅᖃᐅᓰᑦ ᐅᖄᒍᓯᒋᒍᒪᔭᕗᑦ, ᐅᖃᐅᓯᕆᒍᒪᔭᕗᑦ, ᐊᑐᕐᑕᐅᑎᓕᒋᐊᓪᓚᒍᒪᔭᕗᑦ, ᐱᕈᕐᓴᕈᒪᔭᕗᑦ, ᐊᑦᑕᓀᓕᑎᒋᐊᕈᒪᔭᕗᓪᓗ.
ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓ (1975) ᒪᓕᑦᓱᒍ, ᐅᖃᐅᓯᖅ ᐃᓕᓐᓂᐊᑎᑦᓯᓂᕐᒥ ᓄᓇᕕᒻᒥ ᐊᑐᕐᑕᖅ ᐃᓄᒃᑎᑑᕐᑐᖅ; ᒍᐃᒍᐃᑎᑑᕐᑐᖅ ᐊᒻᒪᓗ ᖃᓪᓗᓈᑎᑑᕐᑐᖅ ᐃᓕᓐᓂᐊᑕᐅᓲᒃ ᐅᖃᐅᓯᕐᒧᑦ ᐁᑉᐸᕆᔭᐅᑦᓱᑎᒃ. ᐃᓄᒃᑎᑐᑦ ᐅᖃᐅᓯᖅ ᐊᑐᕐᑕᖅ ᐃᓄᖏᑦᑕ 98%-ᖏᓐᓄᑦ 14-ᓂᑦ ᓄᓇᓕᓐᓂᑦ ᓄᓇᕕᒻᒥ, ᐊᒻᒪᓗ ᐊᓂᕐᕋᒥ ᐅᖃᐅᓯᕆᔭᐅᑦᓱᓂ ᐃᓚᒌ ᐊᓂᕐᕋᖏᑦᑕ 85.7%-ᖏᓐᓂᑦ (ᓄᓂᕚᑦ, ᓄᓇᕕᒃ ᑭᓯᑦᓯᒍᑎᑎᒍᑦ 2020-ᒥ ᐊᒻᒪᓗ ᑭᑎᑦᔪᑎᓕᕆᔨᓂᒃ ᑲᓇᑕᒥ, 2016). ᑖᒃᑯᐊ ᓄᓇᓖᑦ ᐃᓄᒋᐊᑦᑑᖏᑦᑐᑦ. ᐅᐸᒋᐊᑐᔪᕐᒦᑐᑦ ᐊᕐᖁᑎᓄᑦ ᐱᑐᑦᓯᒪᖕᖏᑐᒥ: ᐅᖃᐅᓯᕐᑎᒍᑦ ᖃᐅᑕᒫᕐᓯᐅᑎᒥᓂ ᐃᓅᓯᕐᒥ ᐅᖃᐅᓯᐅᑉ ᐁᑉᐸᖓᓂᒃ ᐊᑐᕐᑐᓂᒃ ᑐᓵᓪᓗᐊᖏᑦᑐᑦ, ᐊᒻᒪᓗ ᓄᓇᒥᓃᑦᓱᑎᒃ ᐅᐸᑦᑕᐅᒍᓐᓇᓱᑎᒃ ᖃᖓᑦᑕᔫᒃᑯᑦ ᐅᒥᐊᒃᑯᓘᓐᓃᑦ ᑭᓯᐊᓂ.
ᓄᓇᕕᒻᒥ ᐃᓕᓐᓂᐊᑏᑦ ᐊᓂᒍᐃᑦᓯᐊᕈᑎᑦᓴᖏᓐᓄᑦ ᓂᒍᒋᐊᓖᑦ ᐊᕝᕕᐊᓗᑌᓪᓗ ᐊᒥᓲᕗᑦ ᐃᓘᓐᓇᖏᓐᓃᓱᑎᓗ. ᐃᓕᓐᓂᐊᕕᒻᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᕐᔪᐊᒥᓪᓘᓃᑦ ᐃᓕᓐᓂᐊᒍᒪᒍᑎᒃ, ᓄᓇᕕᒻᒥᐅᑦ ᓄᓇᕕᒻᒥᒃ ᕿᒣᒋᐊᖃᓲᑦ. ᐅᓪᓗᒥᐅᑎᓪᓗᒍ ᐱᐅᓯᕐᒥᓂ, ᓄᓇᕕᐅᑉ ᑐᓴᕈᑎᓄᐊᖓᔪᓂᒃ ᐱᓇᓱᒍᑎᖏᑦ ᐱᕕᖃᕐᑎᓯᓲᖑᖕᖏᑐᑦ ᐅᖓᓯᑦᑐᒦᓪᓗᓂ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᒐᓱᐊᕈᓐᓇᕈᑎᑦᓴᓂᒃ. ᑕᒪᓐᓇ ᐱᓀᓗᑕᐅᓂᖓ ᐊᒡᓚᑕᐅᓯᒪᑦᓱᓂ ᓇᓗᓀᕐᑕᐅᓯᒪᑦᓯᐊᑐᖅ. ᓱᓕᒋᐊᓪᓚᒃ, ᓇᓗᓇᖕᖏᓯᐊᕆᕗᖅ ᐃᒫᒃ ᐱᔭᖃᕈᑎᑦᓴᓄᑦ ᐃᑲᔪᕐᓯᒍᑎᑦᓭᑦ ᑌᒃᑯᐊᑎᑐᑦ ᑲᓇᑕᐅᑉ ᑲᕙᒪᖓᓄᑦ ᐅᖃᐅᓯᐅᓚᐅᕐᑐᑎᑑᕐᑐᑦ ᓄᓇᕕᒻᒥ ᐊᑐᕐᑎᑕᐅᕐᖃᔭᖕᖏᑐᑦ ($20/ᑕᕐᕿᑕᒫᖅ ᓱᑲᒃᑐᒥᒃ ᖃᕆᑕᐅᔦᑦ ᐱᑐᑦᓯᒪᒍᑎᖏᓐᓄᑦ ᑮᓇᐅᑦᔭᓵᑭᑦᑐᓄᑦ ᐃᓚᒌᓄᑦ ᐊᒻᒪᓗ ᐃᓄᑐᖃᕐᓄᑦ ᐃᑲᔪᕐᓯᒍᑎᓂᒃ).
ᑕᒐᑕᐅᔪᖅ, ᒥᑦᓴᐅᓵᕈᑎᑎᒍᑦ ᓄᓇᕕᒻᒥ ᐃᓕᓐᓂᐊᓂᕐᒥᒃ ᐱᔭᕇᕈᓯᕐᓂᒧᑦ ᑎᑭᐅᑎᖃᑦᑕᑐᑦ ᐳᕐᑐᓂᕐᓴᒥ ᐃᓕᓐᓂᐊᑏᑦ 23%-ᖏᑦ. 3.5%-ᑐᐃᓐᓇᖏᑦ ᐃᓄᐃᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥᑦ ᐱᔭᕇᕈᑎᑖᕐᓯᒪᔪᑦ. ᐃᓕᓐᓂᐊᕕᕐᔪᐊᒥ, 1.2%-ᖏᑦ ᐃᓄᖏᑦᑕ ᐃᓕᑕᕆᔭᐅᒍᑎᑖᕐᓯᒪᔪᑦ ᐊᒻᒪᓗ 0.8%-ᖏᑦ ᐊᓪᓕᐅᓂᕐᓴᒥᒃ ᐃᓕᓐᓂᐊᕕᕐᔪᐊᒥ ᐱᔭᕇᕈᑎᑖᕐᓯᒪᑎᓪᓗᒋᑦ ((ᓄᓂᕚᑦ, ᓄᓇᕕᒃ ᑭᓯᑦᓯᒍᑎᑎᒍᑦ 2020-ᒥ ᐊᒻᒪᓗ ᑯᐯᒃᒥ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᑦ).
ᐅᓪᓗᒥᐅᑎᓪᓗᒍ, ᑯᐯᒃᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᖃᕐᓂᖓ ᐊᑕᐅᓯᐅᓕᖓᔪᖅ. ᐊᓪᓛᑦ ᐃᒣᓕᖓᔪᖅ, ᐃᓕᓐᓂᐊᑎ ᐃᓕᓐᓂᐊᑎᐅᒐᓗᐊᕈᓂ ᖃᓪᓗᓈᑎᑐᑦ ᐅᕝᕙᓘᓐᓃᑦ ᒍᐃᒍᐃᑎᑐᑦ, ᑕᒪᒋᓐᓂᑦ ᐃᓕᓐᓂᐊᑐᓄᑦ ᐃᓕᓐᓂᐊᑕᐅᒋᐊᖃᓲᓂᒃ ᐃᓕᓐᓂᐊᒐᓕᒃ, ᐃᓚᐅᑎᓪᓗᒋᒃ ᒪᕐᕉᒃ ᐅᖃᐅᓯᐅᑉ ᐁᑉᐸᖓᓂ ᐃᓕᓐᓂᐊᒑᒃ: ᖃᓪᓗᓈᑎᑐᑦ ᐅᖃᐅᓯᐅᑉ ᐁᑉᐸᖓᓂ ᐃᓕᓐᓂᐊᒐᖅ ᑌᒃᑯᓄᖓ ᒍᐃᒍᐃᑎᑐᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒦᑐᓄᑦ (CEGEP), ᐊᒻᒪᓗ ᒍᐃᒍᐃᑎᑐᑦ ᐅᖃᐅᓯᐅᑉ ᐁᑉᐸᖓᓂ ᐃᓕᓐᓂᐊᓂᖅ ᑌᒃᑯᓄᖓ ᐃᓕᓐᓂᐊᑐᓄᑦ ᓯᑕᒪᐅᔪᕐᑐᐃᑦ ᖃᓪᓗᓈᑦᑐᑦ ᐳᕐᑐᓂᕐᓴᒋᐊᓪᓚᒥ ᑯᐯᒃᒥ ᐃᓕᓐᓂᐊᕖᑦ ᓇᓪᓕᑐᐃᓐᓇᖓᓂᑦ.
ᐃᓄᓐᓄᑦ ᐃᓕᓐᓂᐊᑎᓄᑦ ᓄᓇᕕᒻᒥ ᐱᔪᓄᑦ, ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᖅ ᐊᑑᑎᒌᕐᒪᑦ ᐅᖃᐅᓯᐅᑉ ᐁᑉᐸᖓᓂ ᐃᓕᓐᓂᐊᓂᕐᒥᒃ, ᖃᓪᓗᓈᑎᑑᕐᑐᒥ ᒍᐃᒍᐃᑎᑑᕐᑐᒥᓪᓘᓃᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᓇᓪᓕᑐᐃᓐᓇᖓᓃᒐᓗᐊᕈᓂ. ᐊᑑᑎᔪᖅ ᐃᒣᓕᖓᖔᕐᑐᖅ, ᐱᖁᔭᖅ 96 ᓄᐃᑦᓯᖔᑐᐃᓐᓇᓚᖓᔪᖅ ᒪᕐᕈᐃᓕᕐᕿᖓᔪᒥᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᖃᕈᓰᓐᓂᒃ, ᐊᑦᔨᒌᖕᖏᑐᓂᒃ ᐊᑐᓂ ᐱᑕᖃᕆᐊᓕᑦᑕᖃᑐᐃᓐᓇᑎᓪᓗᒋᒃ. ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥ ᐱᔭᕇᕐᓂᒧᑦ ᐱᑕᖃᕆᐊᓕᓐᓂᒃ ᓄᓇᕕᒻᒥ ᐃᓄᓐᓄᑦ ᖃᓪᓗᓈᑎᑐᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥ ᑐᑭᑖᕐᓯᒪᔪᓄᑦ ᐃᓚᒋᐊᕆᓗᓂ ᓈᒻᒪᖏᑦᑐᖅ.
ᓯᑉᑎᒻᐱᕆ 30-ᒥ, ᑲᓇᑕ ᓇᓪᓕᐅᓂᕐᓯᐅᕈᑎᖃᕐᓱᓂ ᖁᕕᐊᓱᒍᑎᖃᓚᐅᔪᕗᖅ ᓯᕗᓪᓕᐹᒥᒃ ᑲᓇᑕᐅᑉ ᐅᓪᓗᖓᓂᒃ ᓱᓕᓂᕐᒧᑦ ᓭᒻᒪᖃᑎᒌᒍᑎᖃᕐᓂᒧᓪᓗ. ᐱᓇᓱᐊᕈᓰᑦ ᐊᒥᓲᓪᓗᐊᖏᑦᑐᖅ ᖄᖏᓕᕐᑐᑦ, ᑲᓇᑕ ᐱᒋᐊᕐᑎᓯᓚᐅᔪᑎᓪᓗᒍ ᓄᓇᕐᔪᐊᒥᐅᖑᖃᑎᒌᑦ ᑲᑐᑦᔨᖃᑎᒌᑦᑐᑦ ᐅᑭᐅᑦ ᖁᓕᑦ ᓄᓇᖃᕐᖄᓯᒪᔪᑦ ᐅᖃᐅᓯᖏᓐᓂᒃ ᐃᓕᑕᕐᓯᓂᖓᓂᒃ ᐋᑐᒑᒥ. ᔫᓂ 21, 2021-ᒥ, ᓄᓇᕐᔪᐊᒥᐅᖑᖃᑎᒌᑦ ᑲᑐᑦᔨᖃᑎᒌᑦᑐᑦ ᐅᖃᒻᒪᕆᒍᑎ-ᖓ ᓄᓇᖃᕐᖄᓯᒪᔪᑦ ᐱᔪᓐᓇᐅᑎᖏᓐᓄᑦ ᐱᖁᔭᖅ ᐊᑐᓕᕐᑎᑕᐅᓚᐅᔪᕗᖅ ᑲᓇᑕᒥ. ᑖᓐᓇ ᐱᖁᔭᖅ, ᓯᕗᒧᐊᑦᑎᓯᒋᐊᕐᓱᓂ ᐅᖃᒻᒪᕆᒍᑎᐅᑉ ᑲᔪᓯᑎᑕᐅᓂᖓᓂᒃ, ᑲᓇᑕᐅᑉ ᑲᕙᒪᖓᑕ (ᐊᒻᒪᓗ ᓄᓇᖁᑎᖏᑦᑕ ᑲᕙᒪᖏᑦᑕ) ᓄᓇᖃᕐᖄᓯᒪᔪᓂᒃ ᐱᓇᓱᐊᖃᑎᖃᕐᓂᖏᓐᓂᒃ ᓄᑕᐅᓯᓕᕐᑎᕆᓂᕐᒥ ᐱᒻᒪᕆᐅᑦᓱᓂ ᐱᓇᓱᐊᕐᓂᐅᕗᖅ.
ᑌᒣᓕᖓᔪᑦ ᑕᒪᒃᑯᐊ ᐃᓱᒪᒋᑦᓱᒋᑦ, ᐃᒣᓕᖓᔪᕐᔫᔮᕐᒪᑦ ᐅᕙᑦᑎᓄᑦ ᑖᓐᓇ ᐱᖁᔭᖅ 96 ᐱᕕᑦᓴᐅᒋᐊᖃᕐᓱᓂ ᓄᓇᖃᕐᖄᓯᒪᔪᑦ ᐅᖃᐅᓯᖏᓐᓂᒃ ᐊᑦᑕᓀᓕᑎᕆᒍᑎᐅᓗᓂ, ᓴᓂᕐᕙᖔᕈᓐᓀᓗᒋᓪᓗ ᑐᖓᓕᐅᑎᑕᒍᓗᑐᐃᓐᓇᐅᕕᒻᒧᑦ, ᐅᕝᕙᓘᓐᓃᑦ ᓲᕐᓗ ᒍᐃᒍᐃᑎᑐᑦ ᐅᖃᐅᓯᐅᑉ ᐊᓯᐅᖕᖏᒍᑎᑦᓴᖓᓄᑦ ᐅᓗᕆᐊᓇᕈᑎᓕᐅᔮᕐᑎᓗᒋᑦ ᐱᓂᐊᕐᓂᖃᕕᒋᒍᓐᓀᓗᒋᑦ. ᐊᑭᕋᕐᑐᓚᖓᕗᒍᑦ ᖃᓄᑐᐃᓐᓇᖅ ᐊᓯᑦᔨᕈᑎᒥᒃ ᑭᖑᕙᕐᑎᓯᒐᔭᕐᓂᐊᑐᒥᒃ ᓄᓇᕕᒻᒥᐅᑦ ᐃᓄᐃᑦ ᐱᕕᑦᓴᖃᕈᑎᖏᓐᓂᒃ ᐃᓚᐅᑦᓯᐊᓂᕐᒧᑦ ᑯᐯᒃᒥᐅᖑᖃᑎᒌᑦᑐᓄᑦ ᐃᒫᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐊᑐᖏᓐᓇᓗᑎᒃ ᑌᒫᒃ ᐃᓕᓐᓂᐊᑎᑕᐅᓯᒪᒐᒥᒃ ᑯᐯᒃ ᐅᑭᐅᕐᑕᑐᖓᓃᑦᓱᑎᒃ ᐅᑭᐅᓂᒃ ᑕᐅᓴᓐᑎᒐᓴᖏᓐᓃᑐᓂᒃ. ᖃᓄᕐᑑᕕᒋᒋᐊᓕᒻᒦᑐᒍᑦ. ᖃᓄᑐᐃᓐᓇᖅ ᐱᓂᐊᕐᓂᖓ ᓱᓕᑦᓯᐊᓗᓂ ᑲᕙᒪᐅᑉ ᐅᖄᖃᑎᒌᓪᓚᕆᓐᓂᒥᒃ ᖃᓄᐃᓘᖃᑎᐅᒍᒪᓂᖓᓂᒃ ᐃᓄᓐᓄᑦ ᐊᒻᒪᓗ ᓄᓇᕐᖄᓯᒪᔪᓄᑦ ᑯᐯᒃᒥ ᓄᐃᑦᓯᔪᒥᒃ ᐱᑕᖃᕋᔭᕐᐸᑦ ᐱᓪᓚᕆᐅᒐᔭᕐᑐᖅ.
ᓱᓕᑦᓯᐊᓱᖓ,
ᓯᐊᔭ ᐋᓗᐸ
ᐊᖓᔪᕐᖄᖅ