ᐊᕐᕌᒍᐃᑦ 10 ᐅᖓᑖᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᑲᔪᓯᑎᑦᓯᖃᑕᐅᓯᒪᓕᕐᑐᖅ ᑯᐯᒃᒥ ᓄᓇᖃᕐᖄᓯᒪᔪᑦ ᓱᑯᐃᔦᒍᑎᓄᑦ ᑕᑯᑎᑦᓯᓂᖓᓂᒃ (QISF), ᐊᑦᔨᐅᒐᓂ ᐱᔪᓐᓇᓯᒍᑎᒥᒃ ᖁᕝᕙᑎᕆᐅᑎᓂᒃ ᓱᑯᐃᔦᓂᕐᒥᒃ ᐊᒻᒪᓗ ᓴᓇᒻᒪᓕᐅᕐᓂᒥᒃ ᐊᓪᓓᑦ ᐊᒻᒪᓗ ᐃᓄᐃᑦ ᓄᓇᓕᖏᓐᓂ ᑯᐯᒃᒥ ᓇᓂᓕᒫᖅ.
ᐊᕐᕌᒍᑕᒫᑦ, ᓄᓇᖃᕐᖄᓯᒪᔪᑦ ᐅᕕᒃᑫᑦ ᓇᓂᑐᐃᓐᓇᖅ ᑯᐯᒃᒥ ᓄᐃᑦᓯᓲᖑᕗᑦ ᐱᓇᓱᑦᑕᕕᓂᕐᒥᓂᒃ ᓱᑯᐃᔦᓂᕐᒥᒃ ᐊᑐᕐᓱᑎᒃ ᐊᒻᒪᓗ ᓄᐃᓚᐅᕐᓯᒪᖕᖏᑐᓕᐅᕐᓱᑎᒃ. ᓂᕈᐊᕐᑕᐅᔪᑦ ᐃᓚᐅᓚᖓᓗᑎᒃ ᐊᐅᓪᓚᓲᑦ ᓄᓇᖃᕐᖄᓯᒪᔪᑦ ᓄᓇᓕᖓᓄᑦ ᐅᕝᕙᓘᓐᓃᑦ ᐃᓕᓐᓂᐊᕕᖓᓄᑦ ᐊᒻᒪᓗ ᑕᑯᑎᑦᓯᓱᑎᒃ ᖃᐅᔨᒍᑎᒥᓂᒃ ᐃᑦᓯᕙᖃᑎᒌᓄᑦ ᑐᑭᑖᕐᑎᓄᑦ ᐱᓯᒪᔪᓄᑦ ᑯᐯᒃᒥ ᓄᓇᖃᕐᖄᓯᒪᔪᑦ ᓱᑯᐃᔦᒍᑎᓄᑦ ᐊᒻᒪᓗ ᓴᓇᒻᒪᓕᐅᕐᓂᒧᑦ ᑲᑐᑦᔨᖃᑎᒌᓐᓂᖓᓂᒃ (QASEA)
ᐃᓚᐅᔪᑦᓴᓄᑦ ᐊᓪᓚᑕᐅᓂᐊᕋᒥᒃ, ᐃᓕᓐᓂᐊᑏᑦ ᑐᓂᔨᒋᐊᓖᑦ 5-ᓂᒃ ᒪᑉᐱᒐᓕᒻᒥᒃ ᑐᓴᕐᑎᓯᒍᑎᒥᒃ, ᐊᑦᔨᖑᐊᒥᓪᓗ ᐱᓇᓱᖃᑎᒌᓄᑦ, ᐊᒻᒪᓗ 2-ᓂᒃ ᑕᕐᓵᐲᓐᓂᒃ ᐊᑯᓂᕆᓂᓕᒻᒥᒃ ᑕᑯᓐᓇᕋᑦᓴᒥᒃ ᐱᓇᓱᑦᑕᕕᓂᖓᑕ ᒥᑦᓵᓄᑦ. ᑌᒪ ᖃᐅᔨᓴᐅᑎᖏᑦ ᕿᒥᕐᕈᔭᐅᓯᓲᑦ ᑐᑭᑖᕐᑎᐅᖃᑎᒌᓄᑦ ᐊᒻᒪᓗ ᑖᒃᑯᓄᖓ ᓂᕈᐊᕐᑕᐅᔪᑦ ᙯᖁᔭᐅᓲᖑᕗᑦ QSIF-ᒧᑦ. ᐅᓪᓗᓂ ᐱᖓᓱᓂ ᑕᑯᓐᓇᑎᑦᓯᓂᖃᓚᐅᕐᓱᑎᒃ, ᐱᖓᓱᐃᑦ ᐱᓇᓱᐊᖃᑎᒌᑦ ᓵᓚᓖᑦ ᓂᕈᐊᕐᑕᐅᓲᑦ 5-ᓂᑦ ᐊᕕᑦᑐᓯᒪᐅᑎᓂ ᐊᒻᒪᓗ ᓵᓚᖃᐅᑎᖏᑦ ᐃᓚᖃᓲᖑᑦᓱᑎᒃ ᑮᓇᐅᔭᓂᒃ, ᑐᓂᕐᕈᓯᐊᓂᒃ ᐊᒻᒪᓗ ᓵᓚᓖᑦ ᑕᑯᕚᖏᓐᓂᒃ. ᓯᑕᒪᑦ ᓇᓪᓕᑳᕐᑕᐅᓯᒪᔪᑦ ᐱᓇᓱᑦᑕᕕᓃᑦ ᐃᓚᖏᑦ ᓂᕈᐊᕐᑕᐅᓲᑦ ᑲᔪᓯᒋᐊᓪᓚᓂᐊᕐᓱᑎᒃ ᑳᓇᑕᓕᒫᒥ ᓱᑯᐃᔦᒍᑎᓂᒃ ᑕᑯᓐᓇᑎᑦᓯᓂᕐᒧᑦ ᐊᕐᕌᒍᑕᒫᑦ ᐊᑐᕐᑕᓲᒧᑦ ᑲᓇᑕᒥ ᓄᓇᐅᑉ ᐊᕕᑦᑐᓯᒪᔪᖓᓂ.
ᐱᔭᕆᐊᑭᑦᑑᔭᖏᑦᑐᖅ ᐊᐅᓪᓚᑎᑦᓯᓱᓂ ᐃᓕᓐᓂᐊᑎᓂᒃ ᓇᑭᑐᐃᓐᓇᖅ ᓄᓇᕕᒻᒥ ᐁᑎᑦᓱᒋᑦ QSIF-ᒧᑦ. ᐃᓕᓐᓂᐊᑏᑦ ᓯᓂᑦᑕᕕᒻᒦᓲᑦ ᒪᓕᑦᑎᖃᕆᐊᖃᕐᓱᑎᓪᓗ ᑲᒪᔨᒥᒃ ᐊᐅᓪᓚᓯᒪᓂᓕᒫᒥᓂ. ᓱᑯᐃᔦᓂᐅᑉ ᐊᓯᐊᒍᑦ, ᑖᓐᓇ QSIF ᐊᑦᔨᐅᒐᓂ ᐱᔪᓐᓇᓯᒍᑕᐅᒻᒥᔪᖅ ᑲᑎᓯᓂᕐᒥᒃ ᐃᓕᓐᓂᐊᑎᐅᒻᒥᔪᓂᒃ ᑕᑯᑎᑦᓯᒋᐊᕐᑐᓯᒪᒻᒥᔪᓂᒃ ᐊᒻᒪᓗ ᐃᓚᐅᓂᕐᒥᒃ ᖃᐅᔨᒻᒫᑖᕈᑎᓄᑦ ᓱᒐᓚᒍᑎᓄᑦ ᐆᑦᑑᑎᒋᓗᒍ ᐱᖕᖑᐊᓂᕐᓄᑦ ᐅᕝᕙᓗᓘᓐᓃᑦ ᐅᒃᑯᐃᓯᓂᕐᒥᒃ ᐊᒻᒪᓗ ᐅᒃᑯᐊᓯᓂᕐᒥᒃ ᓇᓪᓕᐅᓂᖃᕐᑎᓯᒍᑎᓄᑦ.
ᐊᕐᕌᒎᓛᕐᑐᒥ QISF-ᑯᓄᑦ ᐃᓚᐅᓛᕈᒪᒍᑦᓯ, ᑐᑭᒧᐊᑦᑎᓯᔨᖓ ᑲᕈᓖᓐ ᒪᕐᑏᓐ ᐃᓱᒪᒋᔭᑦᓴᓂᒃ ᙯᑦᓯᒍᒪᔪᖅ: “ᐱᒋᐊᑦᓴᐅᑎᒋᓗᓯ! ᐃᓂᓕᐅᕐᓯᒪᓗᓯ ᐃᓕᓐᓂᐊᑏᑦ ᓂᕈᐊᕈᓐᓇᓂᐊᕐᒪᑕ ᐱᓇᓱᐊᑦᓴᒥᒃ ᒥᑦᓯᖃᕐᑐᖁᑎᒥᓂᒃ ᐃᒻᒥᓄᑦ, ᑕᒪᓐᓇ ᐊᐅᓚᑦᓯᓚᕆᒻᒪᑦ! ᐃᓕᓐᓂᐊᑏᑦ ᑎᒍᓯᒻᒪᑕ ᓱᓇᒐᓚᒻᒥᒃ ᖃᐅᑕᒫᑦ ᐃᓅᓯᕐᒥᓃᓲᒥᒃ ᐊᓕᐊᒋᔭᒥᓂᒃ ᐅᕝᕙᓘᓐᓃᑦ ᖃᐅᔨᑦᓯᐊᕈᒪᔭᒥᓂᒃ, ᐊᒻᒪᓗ ᑌᒪ ᑕᑯᓐᓇᓯᒻᒪᑕ ᑌᑦᓱᒥᖓ ᓱᑯᐃᔦᓂᒃᑯᑦ ᑕᐅᑐᑦᓱᒍ, ᑕᒪᓐᓇ ᓵᓚᖃᕐᓂᐅᓕᕇᕐᖁᖅ.”
ᑕᒡᒐᓂ ᐊᕐᕌᒍᒥ, ᑲᑎᕕᒃ ᐃᓕᓴᕐᓂᓕᕆᓂᖅ 5-ᓂᒃ ᐃᓕᒌᑦᑎᑐᓂᒃ ᐊᐅᓚᑎᑦᓯᓚᐅᔪᖅ ᓚᕚᓪ ᓯᓚᑦᑐᓴᕐᕕᒧᑦ ᒫᑦᔨ 21-ᒥᒃ 24-ᒧᑦ ᐁᓯᒪᑎᑦᓱᒋᑦ. ᑖᕐᑯᐊ ᐃᓕᒌᑦᑎᑐᑦ ᐃᒻᒧᐊᓂᒃ, ᔮᓂᒻᒪᕆᒃ ᐃᓕᓐᓂᐊᕕᒃ ᓵᓚᖃᐅᑎᖃᓚᐅᔪᖅ ᐊᑦᔨᐅᖏᑦᑐᒥᒃ ᓵᓚᖃᐅᑎᒥᒃ ᓄᑖᔭᓕᐅᕐᓂᒧᑦ ᐱᑦᔪᑎᖃᕐᑎᓗᒍ ᐱᓇᓱᑦᑕᕕᓂᖓᓂᒃ ᒪᑐᒥᖓ “ᐊᑐᕐᓂᖅ tetra-ᓂᒃ ᐴᕕᓂᕐᓂᒃ ᑭᐊᑦᓴᕈᑕᐅᓂᐊᕐᒪᑕ ᐃᓪᓗᓄᑦ ᐊᒻᒪᓗ ᒪᙯᕝᕕᓂ ᐃᓪᓗᐊᐱᓐᓄᑦ”, ᐊᒻᒪᓗ ᐊᓂᕐᕋᐅᔨᒻᒥᓱᓂ ᓯᕗᓪᓕᐸᐅᒍᑎᒥᒃ ᓵᓚᖃᐅᑎᒥᒃ ᐱᓇᓱᑦᑕᒥᓄᑦ “ᐊᒥᓱᐃᓂᒃ ᐊᑑᑎᖃᕈᓐᓇᑐᒥᒃ ᓄᓇᒃᑰᔫᓕᐅᕐᓂᖅ ᑲᕙᒫᐱᐅᑉ ᐊᑐᕋᑦᓴᖓᓂᒃ.” ᐊᕐᓴᓂᖅ ᐃᓕᓐᓂᐊᕕᒃ ᐱᖓᔪᒋᓕᐅᑎᒍᑎᒥᒃ ᓵᓚᖃᐅᑎᖃᓚᐅᔪᖅ ᐱᓇᓱᑦᑕᒥᓄᑦ “ᖃᓅᖅ ᐱᐅᓂᕐᐸᐅᕙ ᕿᒧᑦᓯᕈᑏᓐᓂᒃ ᖃᒧᑏᓐᓂᒃ ᐅᓂᐊᕐᓗᓂ?”; ᐊᒻᒪᓗ ᑭᖑᓪᓕᐹᖅ ᑭᓯᐊᓂ ᓱᖕᖏᓂᐸᐅᒥᒐᓂ, ᓄᕝᕕᑎ ᐃᓕᓐᓂᐊᕕᒃ ᓵᓚᖃᓚᐅᔪᒻᒥᔪᖅ ᒪᕐᕉᓂ ᐊᑦᔨᐅᖏᑦᑑᓂ ᐊᕕᑦᑐᕈᑏᓐᓂ: ᐃᓗᕐᖁᓯᕐᒥᒃ ᕿᒻᒪᖁᓯᕐᓂᐅᑉ ᓵᓚᖃᐅᑎᖓᓂᒃ ᐊᒻᒪᓗ ᓱᑯᐃᔦᓂᒃᑯᑦ ᐱᕙᓪᓕᐊᓂᕐᒧᑦ ᓵᓚᖃᐅᑎᒥᒃ ᐱᓇᓱᑦᑕᒥᓄᑦ “ᐱᐊᑦᑐᒪᕆᒃ ᐊᒥᖅ” (Des peaux qui glissent), ᐊᒻᒪᓗ ᑖᓐᓇ ᐱᑦᔪᑎᒋᓗᒍ ᖃᐅᔨᓴᐅᑎᓂᒃ ᐃᓕᓐᓂᐊᑎᓯᔨᒻᒪᕆᒻᒧᑦ ᑎᑭᑕᐅᓛᕐᓱᑎᒃ ᐃᓕᓐᓂᐊᕕᒻᒥᓂ ᐊᕐᕌᒎᑉ ᐃᓗᐊᓂ.
ᐃᓚᐅᒍᒪᒍᑦᓯ ᐊᕐᕌᒍ ᑯᐯᒃᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᑕᑯᑎᑦᓯᒍᑎᖏᓐᓂ ᐅᕝᕙᓘᓐᓃᑦ ᐊᐱᕐᓲᑎᑦᓴᖃᕆᐊᓪᓚᕈᑦᓯ, ᑐᓴᕐᑎᓗᒍ ᑳᕈᓕᓐ ᒪᕐᑌᖕ, ᐃᓕᓐᓂᐊᕈᑎᑎᒍᑦ ᐃᓱᒻᒪᓭᔨᒧᑦ ✉