ᐃᓓᓴ ᑲ ᓱᕕᐊᕐᔪᖅ ᐱᒍᓐᔨᓂᕕᓂᕐᒥᓄᑦ ᐅᐱᒍᓲᓯᐊᕐᑖᕕᓂᒥᓄᑦ ᐊᐱᕐᓱᑕᖅ
ᒫᔨ 2020-ᒍᑎᓪᓗᒍ, ᐃᓓᓴ ᑲ ᓱᕕᐊᕐᔪᒥᒃ ᐅᖄᖃᑎᖃᓚᐅᔪᕗᒍᑦ ᓴᓪᓗᒥᐅᒥᑦ. ᐊᕙᑎᑦ ᐊᕐᒑᒍᐃᑦ ᐅᖓᑖᓄᑦ, ᐃᓓᓴ ᐃᓕᓴᕆᐊᖕᖓᑐᓂᒃ ᐃᓕᓭᓯᒪᓕᕐᑐᖅ ᐱᒋᐅᕐᕕᒃ ᐃᓕᓴᕐᕕᖓᓂ. ᐃᓓᓴ ᐅᐱᒍᓲᓯᕐᑕᐅᓚᐅᔪᒋᕗᖅ ᒥᑎᐊᕐᔪᖅ ᓇᐹᓗᒃ ᐅᐱᒋᔭᐅᒍᑎᒥᒃ. ᑲᑎᒍᑕᐅᓚᐅᔪᕗᖅ ᑕᑯᓐᓇᑎᑦᓯᖁᑦᓱᒍ ᖃᓄᖅ ᐊᖏᓂᕐᓱᒪᓂᖃᕐᒪᖔᑦ ᑲᒃᑲᓛᓂᑦ ᓄᓇᕕᒻᒥᐅᓂᑦ ᐃᑲᔪᕈᒪᓂᕐᒥᓄᑦ. ᑐᑭᓯᒋᐊᓪᓚᕈᒪᑦᓱᒍᓗ ᖃᓄᖅ ᐱᕈᕐᓴᓂᕐᒪᖔᑦ, ᓱᓇᒥᓪᓗ ᑲᑦᓱᙰᒍᑎᖃᕐᓂᒪᖔᑦ ᐊᒻᒪᓗ ᓯᕗᓂᕐᒥᓂᒃ ᖃᓄᖅ ᐸᕐᓀᓯᒪᒻᒪᖔᑦ
ᐊᕐᒑᒎᒃ ᒪᕐᕉᒃ ᐃᓚᐅᑎᓇᒋᒃ, ᐃᓓᓴ ᐃᓕᓭᔨᐅᓯᒪᓕᕐᖁᖅ ᐃᓕᓴᕆᐊᖕᖓᑐᓂᒃ ᐊᕐᒑᒍᐃᑦ ᐊᕙᑏᑦ ᐅᖓᑖᓄᑦ, ᐱᓇᓱᒐᕐᒥᓂᒃ ᐊᓕᐊᒋᔭᖃᓪᓚᕆᓐᓂᑯᒥᓄᑦ, ᐃᓕᓭᔨᓂᒃ ᐃᓇᖏᕐᓯᐅᓯᒋᐊᖕᖓᓯᒪᔪᖅ:
ᐃᓕᓰᔨᑦᓯᐊᒍᓛᑐᕆᓚᐅᕐᓯᒪᑦᔭᖏᓪᓚᖓ, ᑭᓯᐊᓂ ᐃᓇᖏᕐᑎᐅᓯᓚᐅᕐᓯᒪᔪᖓ ᐃᓕᓭᔨᓂᒃ ᐊᒻᒪᓗ… ᐃᓕᓭᔨᐅᓂᕐᒥᓗ ᐃᓕᓴᖃᑕᐅᓯᑦᓱᖓ […] ᐱᒋᐊᑐᐊᕋᒪ, ᐃᓕᓭᔩᑦ ᐃᓕᓴᕐᑕᐅᓂᖓᓄᑦ ᐃᓕᓴᖃᑕᐅᖃᑦᑕᓱᖓ ᐊᐅᔭᕆᐊᑕᒫᑦ, ᐱᓇᓱᐊᕈᓰᑦ ᐱᖓᓲᑦ ᐊᓂᒍᖃᑦᑕᓱᒋᑦ. […] ᐃᓕᓵᕇᕈᑎᑖᕐᓱᖓ ᐃᓕᓭᔨᐅᓂᕐᒧᑦ ᒥᑭᐊᓪ ᔫᓂᕗᓯᑎᒥ 2006-ᒥ ᐊᑯᓕᕕᒻᒥ.
ᐊᐱᕐᓱᑕᐅᒐᒥ ᓱᓇᒧᑦ ᐱᔪᑦᓵᐅᔮᓚᕿᓐᓂᒪᖓᑦ, ᓱᓇᒧᑦ ᑲᑦᓱᙰᑎᑕᐅᓐᓂᒪᖔᑦ ᐃᓕᓭᒍᓐᓇᐅᑎᑖᕋᓱᐊᕐᓂᒥᒃ ᑲᒃᑲᓛᓂᓪᓗ ᐱᓇᓱᐊᖃᑎᖃᕐᓂᒥᒃ ᐊᑯᓂᕐᔪᐊᕌᓗᒃ, ᐃᓓᓴ ᑭᐅᑦᓴᐅᑎᒋᐊᐱᓚᐅᔪᕗᖅ ᐃᒫᒃ ” ᐊᖑᑎᖓᓄᑦ.”
”ᓄᑲᕐᓯᐹᕋ ᐃᕐᓂᕋ ᐊᖑᑎᒐᓗ ᐅᕙᓐᓂᒃ ᐃᑲᔪᕐᓯᒪᓂᕐᐸᐅᓚᐅᔪᕘᒃ ᑌᑦᓱᒪᓂ. ᐊᖑᑎᒐ ᑲᔪᖏᕐᓭᔨᒋᓪᓚᕆᓚᐅᔪᔭᕋ ᐃᓕᓵᕆᕈᑎᑖᖁᔨᕐᔪᐊᓱᓂᓗ ᐃᓕᓭᔨᐅᓂᕐᒧᑦ.”
22ᓂᒃ ᐊᕌᒍᓂᒃ ᐃᓕᓭᓯᒪᓂᕆᓕᕐᑕᖓ ᑕᑯᑦᓱᒋᑦ, ᐃᓓᓴ ᓯᓚᑐᓂᖃᓚᐅᔪᕗᖅ ᐊᒥᓲᐃᓂᒃ ᐊᑦᔨᒌᖕᖏᑐᓂᒃ, ᐅᖃᕋᑦᓴᖃᓚᐅᔪᕗᖅ ᐊᓕᐊᓱᓐᓂᒥᑦ ᐅᐱᒋᔭᖃᕐᓱᓂ:
“ᐃᓕᓭᓲᒍᕗᖓ ᑲᒃᑲᓛᕌᐱᓪᓚᕆᐊᐱᓐᓂᒃ ᑕᓪᓕᒪᑐᐃᓐᓈᐱᓐᓂᒃ ᐅᑭᐅᓕᓐᓂ. ᐋ… ᐅᓪᓛᑕᒫᑦ, ᐅᓪᓗᑕᒫᑦ ᐅᕙᓐᓂᒃ ᑕᑯᒋᐊᒥᒃ ᐊᓕᐊᓲᑦ. ᐋ, ᐅᕙᓐᓄᑦ ᐱᒍᑦᔭᐅᒍᒪᔪᐃᑦ ᓱᓕᔪᒥᒃ. ᐅᓪᓘᐃᑦ ᐃᓚᖓᓂ, ᐊᑦᔨᐅᖏᓐᓂᕋᓂ ᑕᑯᓐᓇᓲᑦ, ᑌᒪᖕᖓᓕᒫᒍᖕᖏᑐᖅ (ᐃᔪᕐᓱᓂᓗ).
ᑲᒃᑲᓛᕋᐱᐅᒐᓗᐊᕋᒥᒃ, ᑕᓪᓕᒪᓂᒃ ᐅᑭᐅᖃᕋᓗᐅᕋᒥᒃ, ᖃᐅᔨᒪᔪᐃᑦ ᐅᕙᓐᓄᑦ ᐃᑲᔪᕐᑕᐅᓚᖓᒋᐊᒥᒃ. ᕿᓚᓈᕆᓲᒃᑲ ᓂᓪᓕᐅᔨᑲᓪᓚᒍᒪᑦᓱᒋᑦ ᐅᓪᓗᑕᒫᑦᓯᐊᖅ.
ᑌᑦᓱᒪᓂ, ᐅᑯᓂᐊᓘᓕᕐᑐᖅ, ᐃᓕᓵᖃᕐᓯᓚᕗᖓ ᑕᓪᓕᒪᓂᒃ ᐅᑭᐅᓕᒻᒥᒃ ᐸᓂᐊᐱᒻᒥᒃ ᐊᓂᕐᕋᒥ ᐃᓱᕐᕆᑐᐃᓐᓇᖏᑦᑐᒥᒃ. ᐃᕐᙯᑎᑦᓯᓯᒪᔪᖅ ᓈᓚᖃᑦᑕᕆᐊᖃᕐᓂᕋᓂ ᖃᓄᓕᒫᖅ ᑲᒃᑲᓛᕌᐱᓐᓂᒃ. ᕿᐊᑦᓱᓂ ᐃᓕᓴᕆᐊᑐᕐᒪᑦ… ᕿᐊᖃᑎᒋᕙᑦᓱᒍ.
ᓈᓚᑦᓯᐊᖃᑦᑕᕆᐊᓕᑎᑦ ᑐᑭᓯᒪᑦᓯᐊᕋᓗᐊᕐᓗᒋᓪᓗ, ᑲᒃᑲᓛᕌᐱᐅᒐᓗᐊᕐᐸᑕ. […] ᐆᑦᑑᑦᓴᒋᐊᓪᓇᖃᕐᖁᖓ. ᑐᕈᓯᐊᐱᒃ ᐃᓕᓴᕆᐊᖕᖓᑐᓂ ᓰ-ᒥ ᐃᓕᓴᕆᐊᖕᖓᑐ ᐁ-ᒥᑦ ᐃᓕᓭᔨᐅᒐᒪ ᙯᑕᐅᓯᒪᔪᖅ ᐅᐃᒻᒪᖓᓂᑯᒥᓄᑦ. ᐃᓕᓴᐅᑎᓂᒃ ᐊᖓᔪᕐᖄᔭᐅᔪᑦ ᑕᑯᓂᐊᕐᑎᓗᒋᑦ, ᐊᓈᓇᖓ ᐅᓐᓂᓯᐅᒋᐊᕐᑐᓯᒪᔪᖅ ᓚᑦᓱᓂᓗ “ᐅᓪᓗᒍᒥᑕᕐᓇᐅᒋᐊᑕᒫᕉᖅ ᐃᓕᓴᕆᐊᒍᒪᖃᑦᑕᓕᕐᒪᑦ, ᐃᓕᓴᕆᐊᑲᓪᓚᒍᒪᓇᐅᕐᓯᒪᑦᔭᕈᓂ!” ᑐᓴᕐᓂᕆᑦᔪᐊᓯᒪᔭᕋ ᑐᓴᕋᒃᑯ! ᐃᒣᓕᒐᓱᐊᕐᐳᖓ ᐅᓪᓗᒍᒥᑕᕐᕇᑐᐊᕋᒥ ᐊᓈᓇᒥᓄᑦ ᐃᓕᓴᕆᐊᕈᒪᓂᕋᖃᑦᑕᓂᕐᒪᑦ. ᐃᓕᓴᕆᐊᒥᒃ ᐊᓕᐊᓚᕆᑦᓯᒪᔪᖅ! ]…} ᐃᓛᓐᓂ, ᖃᓂᒪᓕᑐᐊᕋᒪ ᐃᓕᓭᓇᖓᓗ, ᐃᓇᖏᑕᐅᒪᓕᕋᒪ, [ᑲᒃᑲᓛᑦ] ᑐᑮᕈᓲᑦ! (ᐃᔪᕐᓱᓂ)! ᑭᓯᐊᓂ ᐃᓕᓭᓕᕋᒪ, ᑲᒪᑦᓯᐊᑐᓪᓚᕆᐊᓘᑦᓱᑎᒃ ᐅᕙᓐᓂᒃ.”
ᒥᑭᓪᓕᑎᕐᔪᐊᓱᓂ, ᐃᓕᓭᔨᐅᓂᕐᒥᒃ ᐱᓇᓲᐊᕐᓂᑯᕕᓂᕐᒥᓄᑦ ᐅᐱᒋᔭᐅᒍᑎᑖᕋᒥ ᑲᔪᖏᓭᔨᒥᓂᒃ ᐃᑦᔭᕋᑦᓴᓯᐊᖁᑎᒥᓂᓪᓗ ᐱᓇᓱᐊᕐᓂᓕᒫᒥᓂᒃ ᐅᖄᔪᖅ:
“ᐱᓇᓱᒐᖅ ᐱᔭᕆᐊᑭᑦᑐᐱᑐᐃᓐᓇᐅᓚᐅᕐᓯᒪᑦᔭᖏᑦᑐᖅ. […] ᐊᓕᐊᓇᓲᖅ ᐊᓕᐊᓇᖕᖏᑑᓯᖃᑦᑕᓱᓂᓗ. ᐊᖑᑎᒐ ᓴᐳᒻᒥᓯᐊᕐᓯᒪᔪᖅ, ᑲᑦᓲᙰᓕᓭᑦᓯᐊᓱᓂ. ᐊᒻᒪᓗ, ᐊᕐᓇᖃᕐᒥᔪᖅ, ᐃᓕᓴᐅᑎᑦᓴᓕᐅᕐᑎᒥ ᐃᓕᓭᔨᓄᑦ. ᐃᑲᔪᕐᓯᓯᒪᕐᔪᐊᒥᔪᖅ. […] ᖃᓂᐅᔮᕐᐯᓂᒃ ᐊᓪᓚᒍᓯᕐᒥᓗᐊᖕᖑᐊᖅ. ᐱᓇᓱᒐᕐᒥᓂᒃ ᐃᓄᒻᒪᕆᐅᓂᕐᒥᓄᑦ ᓄᕐᖃᑎᓪᓗᒍ ᓇᒻᒧᖓᕖᕈᑦᓯᒪᕗᖓ (ᐃᑲᔪᕐᑎᓴᖅ)…”
ᐃᓄᒻᒪᕆᐅᓂᕐᒥᓄᑦ ᐱᓇᓱᕈᓐᓀᓲᓂᒃ ᐅᖄᑦᓴᓂᖓᓂ, ᐊᐱᕐᓱᓚᐅᔪᔭᕗᑦ ᐃᓄᒻᒪᕆᐅᓂᒧᒥᓄᑦ ᓄᕐᖃᕋᑕᕐᓗᓂ ᐃᓕᓭᔨᐅᒍᒪᒻᒪᖔᑦ ᓯᕗᓂᕐᒥ. ᐃᓓᓴ ᖁᐊᕐᓵᑐᕐᔫᔭᓚᐅᔪᕗᖅ: “ᐋ, ᐃᓕᓭᔨᐅᒍᒪᕗᖓ ᐃᓄᒻᒪᕆᐅᓂᕐᒧᑦ ᓄᕐᖃᓚᕿᕋᑕᕐᓗᖓ, ᐋ.”
ᑭᖑᓪᓕᐹᒥ, ᑭᖑᕚᑦᓴᕗᑦ ᐃᓱᒪᒋᓗᒋᑦ, ᖃᓄᖅ ᐃᒻᒥᓂᒃ ᐊᔪᖀᒋᐊᕋᔭᕐᒪᖔᑦ 12-13ᓂᒃ ᐅᑭᐅᖃᓂᕕᓂᕐᒥᓄᑦ ᐅᑎᕈᓐᓇᑐᐊᕈᓂ ᐃᒻᒥᓂᒃ ᑲᑎᓯᓗᓂ ᖃᓄᐃᓕᒐᔭᕐᒪᖔᑦ. ᑐᓴᕐᑕᐅᔪᑦᓴᐅᔪᕆᓚᐅᔪᔭᕗᑦ ᐅᖄᔭᖏᑦ ᐅᕕᒐᕐᑐᓕᒫᓄᑦ ᐃᓕᓭᔨᖕᖑᕈᒪᓲᓄᑦ: “ᐃᒫᒃ ᐅᖃᐅᑎᒐᔭᕐᑐᖓ: ᐃᒻᒥᓂᒃ ᐱᒍᓐᓇᐳᑎᑦ, ᐃᒻᒥᓂᒃ ᐅᑉᐱᕆᑦᓯᐊᕆᑦ, ᓲᖑᔫᕗᑎᑦ!”
*ᒥᑎᐊᕐᔪᖅ ᓇᑉᐹᓘᑉ ᐅᐱᒋᔭᐅᒍᑎᖓ ᐁᑦᑑᑕᐅᓲᒍᕗᖅ ᐃᑲᔪᕐᓯᒪᔪᓄᑦ ᐱᓇᓱᐊᕐᓯᒪᔪᓄᑦ ᐊᕐᒑᒍᓂ ᐊᕙᑎᓂ ᑲᔪᓯᑦᓯᐊᕐᑎᓯᑦᓱᑎᒃ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ.
ᑖᓐᓇ ᐅᐱᒋᔭᐅᒍᑎᑖᕈᑕᐅᓲᖅ ᐊᑦᓯᑕᐅᓯᒪᕗᖅ ᓇᓪᓕᒋᓯᒪᔭᕐᑕ ᐃᓄᒻᒪᕆᐅᑦᓱᓂ ᑲᖏᕐᓱᔪᐊᕐᒥᐅᔭᐅᑦᓱᓂ ᐱᒻᒪᕆᖁᑎᒋᔭᐅᓂᕐᐸᐅᖃᑕᐅᓯᒪᔪᖅ ᐃᓕᓭᔨᐅᖃᑕᐅᓯᒪᔪᖅ ᐃᓄᐃᑦ ᐃᓗᕐᕈᓯᖓᓂᑦ ᐃᓄᑦᑎᑑᕐᓂᒥᓪᓗ ᓄᓇᕕᒻᒥ. ᒥᑎᐊᕐᔪ ᓇᑉᐹᓘᑉ ᐱᓇᓱᐊᒻᒪᕆᓪᓚᕆᑦᓯᒪᕗᖅ ᐱᐅᓯᕕᓃᑦ, ᐅᓂᒃᑳᑐᐊᑦ, ᐱᐅᓯᑐᖃᖅ ᐅᖃᐅᓯᑐᙯᓪᓗ ᐃᓄᐃᑦ ᐃᓅᓯᖏᓐᓂ ᐊᐅᓚᔨᔭᖏᓐᓂᓗ ᐊᓪᓚᓯᒪᔪᖕᖑᑕᐅᑦᓯᐊᖁᑦᓱᒋᑦ ᓂᐱᓕᐅᕐᓗᒋᓪᓗ ᐊᓯᐅᔨᔭᐅᑐᐃᓐᓇᖕᖏᓂᖏᓐᓂ.