ᓈᓐᓯ ᑮᓐᒥ ᑲᑎᓯᓯᒪᕗᒍᑦ ᓅᕕᒻᐱᕆ 2022-ᖑᑎᓪᓗᒍ, ᐱᑕᑲᓪᓚᒃ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᔨᓄᑦ ᐊᖓᔪᕐᖄᖑᑎᓪᓗᒍ.  2024 ᐱᒋᐊᕐᓂᖓᓂ, ᐱᕕᑦᓴᐅᓕᕐᒪᑦ ᓄᕐᖃᖓᒍᑎᖃᑐᐃᓐᓇᓚᐅᔪᖕᖏᑐᖅ ᐱᓇᓱᒋᐊᒥᒃ ᐊᖏᓂᕐᓴᒥ ᐃᓕᓐᓂᐊᕕᒻᒥ, ᔮᓂᒻᒪᕆᒃ ᐃᓕᓐᓂᐊᕕᒻᒥ ᐅᓪᓗᒥ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᑕ-ᑐᖓᓕᖓᓂᒃ ᐱᓇᓱᕝᕕᒥᓂ.  ᐅᐃᒻᒪᖓᒐᓂ ᐃᓄᑦᓯᐊᖑᑦᓱᓂᓗ, ᐊᓕᐊᒋᔭᐅᔪᒻᒪᕆᐅᕗᖅ ᐃᓕᓐᓂᐊᑎᑦᓯᔨᓄᑦ ᐃᓕᓐᓂᐊᑎᓂᓗ.  ᐃᑎᕋᕕᑦ ᑰᒃᔪᐊᑉ ᐱᑕᑲᓪᓚᒃ ᐃᓕᓐᓂᐊᕕᖓᓄᑦ, ᐃᑉᐱᒋᒍᓐᓇᓴᐅᑎᒋᖃᑦᑕᓚᐅᔪᔦᑦ.   ᑖᑦᓱᒪ ᐃᓅᓱᑦᑑᓱᓂ ᐃᓕᓐᓂᐊᑎᑦᓯᔩᑦ-ᐊᖓᔪᕐᖄᖓᑕ ᐊᓪᓚᕕᖓᓄᑦ ᐃᓄᐃᑦ ᐃᑎᖃᑦᑕᓚᐅᔪᕗᑦ ᐊᓂᑦᓱᑎᓗ ᖁᖓᑦᓱᑎᒃ.

ᓈᓐᓯ ᑮᓐ ᐃᓕᓴᕐᕕᖓᓂ ᓄᓇᓕᖓᑕ ᐊᖓᔪᕐᖄᒍᓂᐊᕐᑐᕆᓯᒪᖕᖏᑐᖅ ᑖᕙᓂ ᐱᕈᕐᓴᓯᒪᑦᓱᓂ, ᑭᓯᐊᓂ ᐱᓇᓱᒐᕐᒥᒃ ᒪᓂᔭᐅᒐᒥ, ᑕᒉᓐᓇᖅ  ᑎᒍᓯᔪᕕᓂᖅ. “ᐃᓕᓴᕐᕕᐅᑉ ᐊᖓᔪᕐᖄᕆᓯᒪᔭᖓ ᐊᐅᓪᓚᕆᐊᖃᓚᐅᕐᓯᒪᔪᖅ ᐊᒻᒪᓗ ᐅᕙᓐᓂᒃ ᐱᓇᓱᒐᕐᑖᕆᐊᕐᒪ ᐊᖓᔪᕐᖄᒧᑦ-ᑐᖓᓕᖕᖑᓗᖓ ᓈᒻᒪᓂᕃᓯᒪᔪᖅ. ᐱᓇᓱᒐᖃᓕᕐᓱᖓ ᐊᕐᕌᒍᓂ ᐱᖓᓱᓂ ᑖᑦᓱᒥᖓ, 2022-ᒥ ᓯᕗᓪᓕᐸᐅᑎᓗᒍ ᐊᖓᔪᕐᖄᖑᓕᓚᐅᕐᓯᒪᔪᖓ,“ ᓚᓚᐅᕐᑐᖅ ᓈᓐᓯ. ᐊᒻᒪᓗ ᐱᓇᓱᒐᕐᒥᓂᒃ ᐊᓕᐊᒋᔭᖃᒻᒪᕆᑦᓱᓂ.

ᐃᓕᓵᓂᒃ ᐅᓪᓛᑕᒫᑦ ᑐᖕᖓᓱᑦᑎᓯᑦᓱᓂ, ᑕᑯᑦᓴᐅᑎᖏᓐᓇᓱᓂ ᐃᑎᕐᑐᓄᑦ ᑖᒃᑯᓄᖓ … ᑕᒪᓐᓇᑕᒐ ᐱᒻᒪᕆᐅᓂᕐᐹᖁᑎᖓ ᐱᔪᑦᓴᐅᔮᕈᑎᒋᑦᓯᐊᓱᒍ. ᐊᓕᐊᒋᔭᖃᒻᒪᕆᑦᓱᓂᓗ ᐃᓕᓭᔨᓂᒃ ᐅᖄᖃᑎᖃᕈᓐᓇᐸᒋᐊᒥᒃ ᐊᒻᒪᓗ ᐱᓇᓱᐊᖃᑎᖃᕐᐸᒋᐊᒥᒃ ᐃᓕᓴᕐᕕᐅᑉ ᑲᑎᒪᔨᖏᓐᓂᒃ ᖃᓄᕐᑑᖃᑎᒋᑦᓱᒋᑦ ᐱᓀᓗᑌᑦ ᐋᕐᕿᐅᑎᑦᓴᖏᓐᓂᒃ ᑭᓇᓕᒫᒃᑯᑦ ᑭᖕᖒᒪᔭᖏᑦ ᑕᒡᒐᐅᑎᒍᓐᓇᓯᑦᓱᒋᑦ.

ᐃᓚᒌᑦᑐᑦ ᐱᓇᓱᐊᖃᑎᒌᑦ ᕿᑎᖓᓂ ᑖᒃᑯᐊᓗ ᑕᑯᑦᓴᐅᓱᑎᒃ ᓈᓚᑦᓯᐊᐸᒋᐊᖏᑦ, ᐃᑲᔪᕐᐸᒋᐊᖏᑦ, ᐊᒻᒪᓗ ᓴᐳᑦᔨᐅᑎᕙᒋᐊᖏᑦ, ᐃᓕᓴᕐᕕᐅᑉ ᐊᖓᔪᕐᖄᖓ ᐃᔪᑦᑐᖅ ᑎᒍᒥᐊᕐᓂᕋᕐᓱᓂ ᐊᐅᓚᑦᓯᓂᕐᒥᒃ ᐱᓇᓱᒐᕆᑦᓱᒍ, ᑭᓇᓕᒫᒃᑯᑦ ᖁᓛᓃᒋᐊᒥᒃ ᐃᑉᐱᒋᔭᖃᕋᓂ. ᑭᓯᐊᓂᓕ, ᐃᑉᐱᒍᓱᑦᑐᖅ ᐃᓚᒋᔭᐅᒋᐊᒥᒃ ᐃᓘᓐᓀᓄᑦ ᐃᓘᓐᓇᑎᓪᓗ ᑕᑯᓐᓇᓂᖃᑦᓯᐊᓱᑎᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᑲᒃᑲᓛᑦ ᐊᒻᒪᓗ ᓄᓇᓕᖓᑕ ᐃᓕᓐᓂᐊᕕᖓᑕ.

ᐅᓪᓗᑕᒫᑦ ᑐᕌᒐᖃᓲᖅ: ᐃᓕᓵᑦ ᐱᓚᕿᑦᓯᐊᓂᖏᓐᓂᒃ. ᐊᒻᒪᓗ ᓈᓐᓯᒧᑦ, ᑖᓐᓇ ᐱᓚᕿᑦᓯᐊᓂᖅ ᓯᕗᓪᓕᐸᐅᒋᐊᖃᕐᐳᖅ ᐊᒻᒪᓗ ᐱᒐᓱᐊᕐᑕᐅᓂᕐᐸᐅᓗᓂ ᐱᓇᓱᐊᖃᑎᒌᑦ ᑲᑐᑦᔮᕆᑦᓱᒋᑦ ᐱᒐᓱᐊᕐᑕᖏᓐᓄᑦ. “ᐃᓕᓵᖁᑎᕗᑦ ᐱᔪᑦᓴᐅᔮᓚᕿᐅᑎᕗᑦ, ᐊᒻᒪᓗ ᐃᓕᓭᔨᖁᑎᕗᑦ ᓲᖑᓂᕆᑦᓱᒋᑦ!”

ᐱᓇᓱᑦᑐᓴᕐᓯᐅᐳᒍᑦ! ᐱᓇᓱᐊᖃᒌᑦᑐᓄᑦ ᐃᓚᐅᒋᑦ ᐅᕙᑦᑎᓄᑦ ᐱᓇᓱᒐᕐᒧᑦ ᐃᓕᒐᓱᐊᕈᑎᓕᐅᕐᓗᑎᓗ ᐅᓪᓗᒥ.
ᐃᓕᒐᓱᐊᕆᑦ ᒫᓐᓇ ➔