ᑰᒃᔪᐊᖅ, ᑯᐯᒃ (ᐊᐅᒡᒍᓯ 25, 2017) – ᑲᑎᕕᒃ ᐃᓕᓐᓂᐊᓂᓕᕆᓂᖅ ᖁᕕᐊᒋᔭᖃᕐᐳᖅ ᖃᐅᔨᑎᑦᓯᒍᑎᖃᕆᐊᒥᒃ ᓄᓇᕕᒻᒥᐅᓂᒃ ᐃᒫᒃ ᑕᒡᒐᓂ ᐃᓕᓐᓂᐊᓇᐅᑉ ᐊᕐᕌᒍᖓᓂ ᐱᒋᐊᕐᓗᑎᒃ, ᐃᓕᓐᓂᐊᑏᑦ ᐱᔭᕇᑐᐊᕈᑎᒃ ᐳᕐᑐᓂᕐᓴᒥ ᐃᓕᓐᓂᐊᒐᕐᓂᒃ ᐁᑦᑐᑕᐅᖃᑦᑕᓂᐊᓕᕐᒪᑕ ᐳᕐᑐᓂᕐᓴᓂᒃ ᐃᓕᓐᓂᐊᒐᕐᓂᒃ ᐱᔭᕇᕈᑎᒥᒃ ᑯᐯᒃ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᖓᓄᑦ.

“ᑕᒪᓐᓇ ᑐᓴᕋᑦᓴᓯᐊᒻᒪᕆᒃ ᓄᓇᕕᒻᒥᐅᓕᒫᓄᑦ,” ᐅᖃᓚᐅᕐᑐᖅ ᑲᑎᕕᒃ ᐃᓕᓐᓂᐊᓂᓕᕆᓂᕐᒥᒃ ᐊᖓᔪᕐᖄᖅ ᐋᓚᓯ ᓈᓚᒃᑑᔭᒃ. ᑕᕐᕿᒥᒃ ᔪᓓᒦᑦᑎᓗᑕ, ᐃᓕᓐᓂᐊᓂᓕᕆᓂᖅ ᖃᐅᔨᑎᑕᐅᓚᐅᔪᒻᒪᑦ ᓴᓇᑦᑐᓴᐅᑎᓕᕆᐅᑎᓄᑦ ᐊᒻᒪᓗ ᓱᑯᐃᔦᓂᕐᒧᑦ ᐱᓪᓗᑯᒋᐊᓕᓕᕆᒍᑎᓂᓪᓗ ᐃᓕᓐᓂᐊᒉᑦ ᐊᑐᐃᓐᓇᐅᑎᓲᖏᑦ ᓇᓪᓕᖁᐊᕆᔭᐅᑦᓯᐊᕆᐊᖏᑦ ᑐᕐᖃᑕᕐᕕᑯᑦ ᐃᓕᓐᓂᐊᑎᑦᓯᒍᑎᖏᓐᓄᑦ.

“ᐃᓕᓐᓂᐊᓂᓕᕆᓂᒃᑯᑦ ᐃᓕᓐᓂᐊᕈᑎᑦᓴᖏᑦ ᕿᒥᕐᕈᔭᐅᓚᐅᔪᒻᒪᑕ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ ᐊᒻᒪᓗ ᓱᕐᖁᐃᑕᐅᑦᓯᐊᓱᑎᒃ ᓇᓪᓕᖁᐊᕆᔭᐅᑦᓯᐊᕆᐊᖏᑦ ᐃᓕᓐᓂᐊᕈᑎᑦᓴᐅᓲᓄᑦ ᐊᓯᖏᓐᓄᑦ ᑯᐯᒻᒥ. ᑕᒪᓐᓇ ᓯᕗᒧᐊᕆᐊᕈᑎᐅᑦᓱᓂ ᐊᓪᓗᕆᐊᕐᓂᒪᕆᐅᕗᖅ,” ᐅᖃᐅᓯᕐᒥᓂᒃ ᐃᓓᒋᐊᕆᓚᐅᕐᑐᖅ ᓈᓚᒃᑑᔮᒃ.

ᓴᓇᑦᑐᓴᐅᑎᓕᕆᐅᑎᓂ, ᐃᓕᓐᓂᐊᑏᑦ ᑐᕐᖃᑕᕐᕕᑯᑦ ᖃᐅᔨᓴᕈᑎᓕᐊᕆᓯᒪᔭᖏᓐᓂᒃ ᖃᐅᔨᓴᕐᑕᐅᒍᑎᖃᕐᐸᓂᐊᕐᑐᑦ. ᓱᑯᐃᔦᓂᕐᒥᒃ ᐱᓪᓗᑯᒋᐊᓕᓕᕆᒍᑎᓂᓪᓗ, ᐃᓕᓐᓂᐊᑏᑦ ᐊᕐᕌᒎᑉ-ᐃᓱᓕᓐᓂᖓᓂ ᖃᐅᔨᓴᕈᑎᓕᐊᕆᓯᒪᔭᖏᓐᓂᒃ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᖃᐅᔨᓴᕐᑕᐅᕙᑦᑎᓗᒋᑦ. ᐃᓕᓐᓂᐊᓂᓕᕆᓂᖅ ᐊᑐᐃᓐᓇᐅᕕᖃᑦᓯᐊᖃᑦᑕᓚᖓᔪᖅ ᐃᑲᔪᕐᓯᒍᑎᑦᓴᓄᑦ ᐃᓕᓐᓂᐊᑎᓂᒃ ᐱᔭᖃᕈᓐᓇᓯᑦᓯᐊᖁᑦᓱᒋᑦ ᑐᕐᖃᑕᕐᕕᑯᑦ ᖃᐅᔨᓴᕈᑎᖏᓐᓄᑦ ᐊᕐᕌᒎᑉ-ᐃᓱᓕᓐᓂᖓᓂ ᓴᓇᑦᑐᓴᐅᑎᓕᕆᐅᑎᓄᑦ ᐊᒻᒪᓗ ᓱᑯᐃᔦᓂᕐᒧᑦ ᐱᓪᓗᑯᒋᐊᓕᓕᓐᓂᓗ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐊᕐᕌᒎᑉ-ᐃᓱᓕᓐᓂᖓᓂ ᖃᐅᔨᓴᕈᑎᓕᐊᕆᓯᒪᔭᖏᓐᓄᑦ ᖃᐅᔨᓴᕐᑕᐅᓕᑐᐊᕐᐸᑕ.

ᓴᓇᑦᑐᓴᐅᑎᓕᕆᐅᑎᓄᑦ ᓱᑯᐃᔦᓂᕐᒧᑦ ᐱᓪᓗᑯᒋᐊᓕᓕᕆᓂᕐᒧᓗ ᐃᓕᓐᓂᐊᒐᕐᓄᑦ ᐃᓚᒋᔭᐅᒻᒥᔪᖅ, ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕋᑦᓴᖏᑦ ᐃᒻᒥᒍᑦ ᐊᕐᖁᓯᐅᕐᑕᐅᓯᒪᔪᒃᑯᑦ ᐃᓕᓐᓂᐊᕈᑎᓂᒃ ᕿᒥᕐᕈᔭᐅᓯᒪᓕᕐᒥᔪᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ. ᑖᒃᑯᐊᑕᐅᒃ ᐃᓕᓐᓂᐊᕈᑎᑦᓭᑦ ᓱᕐᖁᐃᑕᐅᑦᓯᐊᓚᐅᕐᒥᔪᑦ ᓇᓪᓕᖁᐊᕆᔭᐅᑦᓯᐊᕆᐊᖏᑦ ᑐᕐᖃᑕᕐᕕᑯᑦ ᐋᕐᕿᓱᕐᓯᒪᔭᖏᓐᓄᑦ ᐱᓇᓱᒐᕐᒨᓚᐅᕋᑎᑦ ᐃᓕᓐᓂᐊᕈᑎᓄᑦ. ᑕᒪᓐᓇ ᐃᓕᓐᓂᐊᑎᓂᒃ ᐃᒻᒥᒍᑦ ᐊᕐᖁᓯᐅᕐᑕᐅᓯᒪᔪᒃᑯᑦ ᐃᓕᓐᓂᐊᕈᑎᓂᒃ ᐅᕝᕙᓘᓐᓃᑦ ᐱᓇᓱᐊᕐᑕᐅᔪᒥᒃ-ᑐᖕᖓᕕᖃᕐᓱᑎᒃ ᐃᓕᓐᓂᐊᕋᑦᓴᓕᐊᖑᓯᒪᔪᓂᒃ ᐱᔭᕇᕐᑐᓂᒃ ᐱᕕᖃᕐᑎᓯᒍᓐᓇᓚᖓᔪᖅ ᐁᑦᑐᑕᐅᒍᓐᓇᖃᑦᑕᓂᐊᕐᑎᓗᒋᑦ ᐱᓇᓱᒐᕐᒨᓚᐅᕋᓂ ᐃᓕᓐᓂᐊᕇᕐᓂᒥᒃ ᐃᓕᑕᕆᔭᐅᒍᑎᑖᕈᓐᓇᖃᑦᑕᓂᐊᕐᑎᓗᒋᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᑦ, ᐃᓚᒋᔭᐅᑎᓪᓗᒍ ᐃᓕᓐᓂᐊᓂᓕᕆᓂᕐᒥ ᐱᔭᕇᕐᓂᖓᑕ ᐃᓕᑕᕆᔭᐅᓂᖓᓄᑦ.

ᐃᓕᓐᓂᐊᓂᓕᕆᓂᖅ ᐱᓇᓱᐊᕐᒥᔪᖅ ᐃᓕᓐᓂᐊᑏᑦ ᐁᑦᑐᑕᐅᓯᒪᔪᐃᑦ ᓱᓕᓂᕃᒍᑎᒥᒃ ᐳᕐᑐᓂᕐᓴᓂ ᐃᓕᓐᓂᐊᒉᑦ ᓇᓪᓕᖁᐊᖏᓐᓂᒃ ᐱᔭᕇᕐᓯᒪᓂᕐᒥ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ 2015 2017-ᓗ ᐊᑯᓐᓂᖏᓐᓂ ᐋᕐᕿᑕᐅᒍᑎᑦᓴᖏᓐᓂᒃ. “ᖃᓄᐃᓕᕕᖃᕐᓯᒪᓕᕐᐳᒍᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᒥᒃ ᑲᒪᒋᔭᐅᓪᓗᑐᖁᔨᒍᑎᕗᓐᓂᒃ ᑕᒪᓐᓇ ᐱᓪᓗᒍ,” ᐅᖃᕐᒥᓱᓂ ᓈᓚᑦᑑᔭᒃ.

ᑭᓇᒃᑰᓂᕗᓐᓄᐊᖓᔪᖅ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᓯᒪᔪᖅ 1975ᒥ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ ᓄᐃᑕᐅᑦᓱᓂ. ᑌᒪᖕᖓᓂᑦ 1978ᒥᓂᑦ, ᑖᓐᓇᑑᑦᓱᓂ ᐃᓕᓐᓂᐊᓂᕐᒥᒃ ᐱᒍᑦᔨᐅᑎᓂᒃ ᐱᑕᖃᕐᑎᓯᔪᑑᓯᒪᔪᖅ ᓄᓇᕕᒻᒥᐅᓄᑦ. ᐃᓕᓐᓂᐊᓂᕐᒥᒃ ᐱᓇᓱᐊᕐᓃᑦ ᐱᕙᓪᓕᐊᑎᑕᐅᓯᒪᔪᑦ ᑲᑎᕕᒃᑯᓄᑦ ᒪᓂᔭᐅᕗᑦ ᐃᓕᓴᕐᕕᓕᒫᖏᓐᓂ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐅᖃᐅᓯᕐᖄᕆᔭᐅᑎᓪᓗᒍᑦ ᐃᓄᒃᑎᑐᑦ ᐊᒻᒪᓗ ᒍᐃᒍᐃᑎᑐ ᖃᓪᓗᓈᑎᑐᓪᓗ ᐅᖃᐅᓯᕐᒧᑦ ᐁᑉᐱᒍᑎᐅᑎᓪᓗᒋᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓃᑦᑐᓂᒃ ᐳᕐᑐᓂᕐᓵᓃᑦᑐᓂᓪᓗ ᐃᓕᓴᕐᕕᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕆᓄᑦ ᐃᓕᓴᕐᕕᓂᒃ. ᑐᑭᓯᒋᐊᓪᓚᕕᑦᓭᑦ ᐅᕙᓂ:

www.kativik.qc.ca

— 30 —

ᑐᑭᓯᒋᐊᓪᓚᕈᒪᒍᕕᑦ, ᐅᓇ ᐅᖄᓚᕕᒋᓗᒍ:

Jade Duchesneau-Bernier

ᑐᓴᐅᒪᖃᑎᒌᓐᓂᓕᕆᓂᕐᒥ ᐊᑕᐅᑦᓯᑰᕐᑎᓯᔨ

(514) 482-8220