ᖃᓂᒻᒪᓇᕐᑐᖅ COVID-19 ᓯᓚᕐᔪᐊᒥ ᐃᕐᐸᑎᓐᓂᖓ ᓱᕐᕃᕙᓪᓕᐊᖏᓐᓇᒪᑦ ᐃᓕᓐᓂᐊᓂᖃᕐᑎᓯᓂᐅᔪᓂᒃ ᑲᓇᑕᓕᒫᒥ. ᑯᐯᒃᒥ, ᐱᓇᓱᐊᕈᓯᑕᒫᑦ ᐃᓕᓐᓂᐊᕖᑦ ᑐᓴᕐᑎᓯᖃᑦᑕᑐᑦ ᖃᕆᐊᑦ ᐅᒃᑯᐊᑎᕐᑕᐅᓂᖏᓐᓂᒃ ᐱᑦᔪᑎᒋᑦᓱᒍ ᖃᓂᒻᒪᓇᕐᑐᑖᖃᑦᑐᑐᓄᑦ COVID-19-ᒧᑦ. ᐸᕐᓇᑕᐅᒪᖃᑦᑕᑐᑦ ᐊᐅᓚᑕᐅᑦᓯᖃᖁᓪᓗᒋᑦ ᖃᓂᒻᒪᓇᕐᑐᒧᑦ ᓱᕐᕋᑕᐅᒪᑐᐃᓐᓇᕆᐊᓖᑦ ᐃᕐᐸᑎᓐᓂᖓᓗ. ᐱᓇᓱᑦᑏᑦ ᐃᓕᓐᓂᐊᑏᓪᓗ ᓄᑖᓂᒃ ᐱᓂᐊᕐᓂᖃᕐᑎᑕᐅᖃᑦᑕᑐᑦ ᐃᑭᓪᓕᐅᒥᖁᓪᓗᒋᑦ ᐃᕐᐸᑎᕆᓂᐅᑐᐃᓐᓇᕆᐊᓖᑦ ᖃᓂᒻᒪᓇᕐᑐᒥᒃ ᐃᓕᓐᓂᐊᕕᓐᓂ (ᐊᒡᒐᓂᐊᑲᑦᑕᓂᒃᑯᑦ, ᑮᓇᑉᐸᓂᒃ ᐊᑐᕐᓂᑯᑦ, ᖃᓂᖕᖏᑕᕇᓐᓂᑯᑦ, ᐊᓯᖏᓐᓂᓗ).

ᑌᒣᒐᓗᐊᕐᑎᓗᒍ, ᖃᓂᒻᒪᓇᐅᑉ ᓯᓚᕐᔪᐊᒥ ᐃᕐᐸᑎᓐᓂᖓ ᓱᕐᕃᓯᒪᓪᓚᕆᑦᑐᖅ ᐃᓕᓐᓂᐊᕕᑦᑎᓂ. ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᑐᓕᕐᑎᓯᓯᒪᔪᑦ ᖃᓄᐃᖕᖏᓯᐊᕐᓂᒨᓕᖓᔪᓂᒃ ᒪᓕᒐᓐᓂᒃ ᔪᓓᒥ, ᐊᐅᒡᒎᓯᒥ ᓯᑉᑎᒻᐱᕆᒻᒥᓗ, ᐃᓚᐅᒻᒥᑎᓪᓗᒋᑦ ᐱᓇᓱᐊᕈᓯᓐᓂ 6-ᓂᒃ ᑎᑭᐊᔭᕐᓂᕕᓂᖏᑦ ᓄᓇᕕᒻᒧᑦ ᐱᓇᓱᑦᑏᑦ ᐱᓇᓱᑦᑎᑖᕆᔭᐅᔪᕕᓃᑦ ᑲᓇᑕᒥ. ᐃᓕᓐᓂᐊᕖᑦ ᐅᒃᑯᐃᑎᕐᑕᐅᓂᖏᑦ ᓯᑉᑎᒻᐱᕆᐅᓪᓗ ᐆᒃᑑᐱᕆᐅᓪᓗ ᑕᕐᕿᖏᓐᓂ ᓱᕐᕃᓯᒪᔪᑦ ᐃᓕᓐᓂᐊᓂᐅᔪᓂ ᐊᒻᒪᓗ ᐱᒍᑦᔨᓂᕆᓲᑦᑎᓂ. ᖃᓂᒻᒪᓇᐅᑉ ᓯᓚᕐᔪᐊᒥ ᐃᕐᐸᑎᓐᓂᖓ ᐱᕙᓪᓕᐊᖏᓐᓇᑐᖅ, ᑖᓐᓇᓗ ᐱᑦᔪᑎᐅᖏᓐᓇᓱᓂ ᐊᓯᑦᔨᕙᓪᓕᐊᓂᕐᓄᑦ.

ᑖᓐᓇ ᐊᑑᑎᔪᖅ ᐃᓕᑕᕐᓯᒪᔭᐅᔪᖅ ᑯᐯᒃᑯᑦ ᐃᓕᓐᓂᐊᓂᕐᒥᒃ ᒥᓂᔅᑕᖃᕐᕕᖓᓄᑦ ᐆᒃᑑᐱᕆ 8, 2020-ᐅᑎᓪᓗᒍ. ᑐᓴᕐᑎᓯᑦᓱᑎᒃ ᐃᓕᓐᓂᐊᕕᓕᒫᓂ ᐱᒍᑦᔨᕕᓐᓂᒃ ᐃᓕᓴᕐᓂᓕᕆᕕᒃᑯᓂᓪᓗ ᑯᐯᒃᒥ, ᐃᓕᓐᓂᐊᓂᕐᒥᒃ ᒥᓂᔅᑕᖓᑦ ᕈᐱᐊᕐᔾ ᑐᓴᕐᑎᓯᔪᕕᓂᖅ ᐊᓯᑦᔨᑕᐅᓂᖏᓐᓂᒃ ᐃᓕᓐᓂᐊᑏᑦ ᖃᐅᔨᓴᕐᑕᐅᓂᕆᓲᖏᑦ ᐃᓕᓐᓂᐊᕕᓐᓂ ᐳᒃᑭᓂᕐᓴᒥ ᐳᕐᑐᓂᕐᓴᒥᓪᓗ. ᑕᒪᒃᑯᐊ ᐊᓯᑦᔨᑕᐅᓂᖏᑦ ᑐᕌᒍᑎᐅᕋᓱᐊᓚᕿᔪᑦ ᐃᓕᑦᓯᓂᕐᓴᐅᖁᓪᓗᒋᑦ ᖃᐅᔨᓴᕐᑕᐅᖏᖔᕐᓗᑎᒃ.

ᑕᒪᒃᑯᐊ ᐃᓱᒪᒋᔭᐅᓚᕿᔪᕕᓃᑦ ᐃᓕᓐᓂᐊᕕᖃᕐᑎᓯᔪᐃᑦ ᓱᕐᕋᑕᐅᓯᒪᓂᖏᓐᓄᑦ ᐊᓂᒎᑎᕋᓱᐊᕆᐊᖃᕐᓱᑎᓪᓗ ᐃᓕᓐᓂᐊᑏᑦ ᐃᓕᓐᓂᐊᕕᓐᓂᓗ ᐱᓇᓱᑦᑎᖏᑦ ᒫᑦᔨ 2020 ᐱᒋᐊᓕᕐᓂᒪᑦ.

ᐃᓱᒪᑦᓴᓯᐅᓚᐅᑲᑦᓱᑎᒃ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑕᒪᒃᑯᓂᖓ ᑐᑭᑖᕆᔪᕕᓃᑦ ᐊᓯᑦᔨᑐᕐᑕᐅᔪᓂᒃ ᒪᓕᑦᑕᐅᑎᓗᒋᑦ ᐱᐅᔫᓂᖓᓂᒃ ᓄᓇᕕᒻᒥ ᐃᓕᓐᓂᐊᑎᓄᑦ. ᐊᖓᔪᕐᖄᕆᔭᐅᔪᐃᑦ ᑐᓴᕐᑎᑕᐅᓛᕐᑐᑦ ᐊᓯᑦᔨᑐᕐᑕᐅᔪᐃᑦ ᒥᑦᓵᓄᑦ ᐊᓪᓚᓯᒪᑎᓪᓗᒋᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ ᐱᓪᓗᑎᒃ, ᐃᓕᓐᓂᐊᕕᓐᓄᑦ ᑐᓂᔭᐅᓛᕐᓱᑎᒃ, ᐆᒃᑑᐱᕆ 26, 2020-ᐅᑉ ᐱᓇᓱᐊᕈᓯᖓᓂ.

ᐃᓕᓐᓂᐊᑏᑦ ᖃᐅᔨᑎᑦᓯᒍᑎᖏᑦ
ᒪᕐᕉᓂᒃ ᖃᐅᔨᑎᑦᓯᒍᑎᖃᓛᕐᑐᖅ ᐊᖓᔪᕐᖄᓄᑦ ᑐᓂᔭᐅᓛᕐᑐᓂ ᑕᒡᒐᓂ ᐊᕐᕌᒍᒥ.
ᓯᕗᓪᓕᐹᖓ ᖃᐅᔨᑎᑦᓯᒍᑎ ᑐᓂᔭᐅᓛᕐᑐᖅ ᕕᕗᐊᕆ 15, 2021-ᖑᓚᐅᕐᑎᓇᒍ.
ᑐᖓᓕᐊ ᖃᐅᔨᑎᑦᓯᒍᑎ ᑐᓂᔭᐅᓛᕐᑐᖅ ᔪᓓ 10, 2021-ᖑᓚᐅᕐᑎᓇᒍ.

ᐃᓕᓐᓂᐊᑏᑦ ᐳᕐᑐᓂᖏᑦ ᑖᒃᑯᓇᓂ ᐃᓕᓐᓂᐊᓇᐅᔪᓂ ᐱᐅᓯᖃᓛᕐᑐᑦ 50% – 50% ᓇᓕᕐᖁᐊᖃᕐᑎᓗᒋᑦ ᐊᕐᕌᒎᑉ ᓈᓂᖓᓂ ᐳᕐᑐᓂᕆᔭᐅᓲᓂᒃ.

ᐱᔪᓐᓇᐅᑎᑖᕆᔭᐅᔪᐃᑦ ᐃᓕᓐᓂᐊᕈᑎᐅᔪᓂ ᐊᑐᓂ ᖃᐅᔨᓴᕐᑕᐅᓂᖃᓛᕐᑐᑦ ᐃᓕᓐᓂᐊᓇᐅᔪᓂ ᐊᑐᓂ.

ᕿᑐᕐᖓᐱᑦ ᐱᕙᓪᓕᐊᓂᖏᓐᓄᑦ ᖃᐅᔨᓴᕐᑕᐅᓂᖏᑦ ᑕᒡᒐᓂ ᐅᑭᐊᑦᓴᒥ
ᑎᑭᑕᐅᓛᕐᖁᑎᑦ ᓯᕗᓪᓕᐹᒥ ᑐᓴᕐᑎᓯᐅᑎᒥᒃ ᕿᑐᕐᖓᐱᑦ ᐃᓕᓐᓂᐊᑎᑦᓯᖓᓂᒃ ᐱᓯᒪᔪᒥᒃ ᓅᕕᒻᐱᕆ 20, 2020-ᐅᓚᐅᕐᑎᓇᕈ. ᑖᓐᓇ ᑐᓴᕐᑎᓯᐅᑎ ᑐᓴᐅᒪᒋᐊᓕᑎᓐᓂᒃ ᐃᓗᓕᖃᓛᕐᑐᖅ ᕿᑐᕐᖓᐱᑦ ᐃᓕᑦᓯᕙᓪᓕᐊᓂᖓ ᐱᑦᔪᑎᒋᑦᓱᒍ, ᐱᐅᓯᖓᓂᒃ ᐊᒻᒪᓗ, ᐃᑲᔪᕐᑕᐅᐸᑦ ᐃᑲᔪᕐᑕᐅᓂᖓᓄᑦ ᒪᓕᒐᓕᐊᖑᓯᒪᔪᑦ ᐊᑐᓕᕐᑎᑕᐅᓂᕕᓂᖏᑦᑕ ᒥᑦᓵᓄᑦ.
ᓄᓇᓕᑉᐱᑦ ᐃᓕᓐᓂᐊᕕᖓ ᑐᓴᕐᑎᓯᖃᑦᑕᓂᐊᕐᑐᑦ ᐊᖓᔪᕐᖄᕆᔭᐅᔪᓂᒃ ᓄᓇᓕᑎᒍᑦ ᐅᓪᓗᓴᕆᓛᕐᑕᖓᓂᒃ ᑐᓴᕐᑎᑕᐅᓂᐅᓛᕐᑑᑉ ᓯᕗᓪᓕᐹᖓᓂᒃ.

ᐊᖓᔪᕐᖄᕆᔭᐅᔪᐃᑦ ᑲᑎᔭᐅᓂᖏᑦ (ᓅᕕᒻᐱᕆ)
ᐊᖓᔪᕐᖄᕆᔭᐅᔪᐃᑦ ᑲᑎᓯᒍᒪᒍᑎᒃ ᕿᑐᕐᖓᒥᑕ ᐃᓕᓐᓂᐊᑎᑦᓯᔨᖏᓐᓂᒃ ᐱᕕᑦᓴᖃᕐᑎᑕᐅᓛᕐᑐᑦ. ᑐᖕᖓᕕᒋᑦᓱᒍ ᖃᓂᒻᒪᓇᕐᑑᑉ COVID-19 ᓯᓚᕐᔪᐊᒥ ᐃᕐᐸᑎᓐᓂᖓ, ᐃᓕᓐᓂᐊᕖᑦ ᐊᑐᓂ ᑲᑎᓐᓂᐅᒐᔭᕐᑐᓂᒃ ᐱᓂᐊᕐᓂᖃᓛᕐᑐᑦ ᐃᓱᐊᕆᔭᒥᓂᒃ ᓄᓇᓕᐅᑉ ᐱᐅᓯᖏᑦ ᒪᓕᓪᓗᒋᑦ. ᑌᒣᒐᓗᐊᕐᑎᓗᒍ, ᖃᐅᔨᒪᖁᔨᕗᒍᑦ ᐱᕕᑦᓴᖃᕐᑎᑕᐅᓛᕋᕕᑦ ᕿᑐᕐᖓᐱᑦ ᐃᓕᓐᓂᐊᑎᑦᓯᔨᖓᓂᒃ ᐅᖄᖃᑎᖃᕐᓂᑯᑦ ᐁᓯᒪᓗᑎᓪᓘᓃᑦ, ᐅᖄᓚᐅᑎᒃᑯᓘᓐᓃᑦ ᐊᓯᐊᒍᓘᓐᓃᑦ ᑐᓴᖃᑎᒌᕈᓯᐅᔪᑎᒍᑦ ᐃᓱᐊᕆᔭᐅᔪᒥᒃ.

ᓄᓇᓕᑉᐱᑦ ᐃᓕᓐᓂᐊᕕᖓ ᑐᓴᕐᑎᓯᓛᕐᑐᑦ ᓄᓇᓕᐅᑉ ᐃᓗᐊᓂ ᐅᓪᓗᓴᒋᕋᔭᕐᑕᖓᓂᒃ ᖃᓄᕐᓗ ᐱᐅᓯᖃᓛᕐᒪᖔᑕ ᑕᒡᒐᓂ ᐊᕐᕌᒍᒥ ᓅᕕᒻᐱᕆᒥ ᐊᖓᔪᕐᖄᕆᔭᐅᔪᐃᑦ ᑲᑎᔭᐅᓂᖏᑦᑕ ᒥᑦᓵᓄᑦ.

ᐊᖓᔪᕐᖄᕆᔭᐅᔪᐃᑦ ᑲᑎᔭᐅᓂᖏᑦ (ᐁᕆᓕ)
ᐊᖓᔪᕐᖄᕆᔭᐅᔪᐃᑦ ᑲᑎᓯᒍᒪᒍᑎᒃ ᕿᑐᕐᖓᒥᑕ ᐃᓕᓐᓂᐊᑎᑦᓯᔨᖏᓐᓂᒃ ᐱᕕᑦᓴᖃᕐᑎᑕᐅᓛᕐᑐᑦ ᐅᐱᕐᖓᓴᐅᓕᕐᐸᑦ. ᐃᓕᓐᓂᐊᕕᓐᓂ ᐊᐅᓚᑦᓯᔩᑦ ᐸᕐᓀᓯᒪᓛᕐᑐᑦ ᐊᑐᐃᓐᓇᓂᕐᒥᓂᒃ ᐁᕆᓕᐅᓕᕐᐸᑦ, ᐃᓕᓐᓂᐊᑎᑦᓯᔩᑦ ᑲᑎᔭᐅᖃᑦᑕᓛᕐᓗᑎᒃ ᐊᖓᔪᕐᖄᕆᔭᐅᔪᓄᑦ.

ᐁᕆᓕᒥ ᑲᑎᔭᐅᓂᖃᓕᕐᐸᑕ ᐊᖓᔪᕐᖄᕆᔭᐅᔪᐃᑦ ᑐᓴᕐᑎᑕᐅᓂᖃᓛᕐᑐᑦ ᕿᑐᕐᖓᒥᑕ ᐱᕙᓪᓕᐊᓂᖏᓐᓄᑦ ᐊᕐᕌᒎᖅ ᓈᓚᐅᕐᑎᓇᒍ ᖃᐅᔨᑎᑦᓯᒍᑏᑦ ᑐᓂᔭᐅᓚᐅᕐᑎᓇᒋᑦ.
ᓄᓇᓕᑉᐱᑦ ᐃᓕᓐᓂᐊᕕᖓ ᑐᓴᕐᑎᓯᖃᑦᑕᓛᕐᑐᖅ ᐊᖓᔪᕐᖄᕆᔭᐅᔪᓂᒃ ᓄᓇᓕᑦᑎᒍᑦ ᐅᓪᓗᓴᕆᒐᔭᕐᑕᖓᓂᒃ ᖃᓄᐃᓘᕐᓂᐅᓛᕐᑐᓂᓪᓗ ᑕᒡᒐᓂ ᐊᕐᕌᒍᒥ ᐁᕆᓕᐅᑎᓪᓗᒍ ᐊᖓᔪᕐᖄᕆᔭᐅᔪᐃᑦ ᑲᑎᔭᐅᓂᖏᑦᑕ ᒥᑦᓵᓄᑦ.

ᒥᓂᔅᑕᒃᑯᑦ ᖃᐅᔨᓴᐅᑎᖏᑦ ᐊᒻᒪᓗ ᓄᓇᓕᑎᒍᑦ ᖃᐅᔨᓴᐅᑏᑦ
ᑐᑭᓯᑎᑦᓯᕆᐊᓪᓚᐅᑏᑦ ᐊᑐᐃᓐᓇᐅᑎᑕᐅᓛᕐᑐᑦ ᐃᓕᓐᓂᐊᓂᕐᒥᒃ ᒥᓂᔅᑕᒃᑯᖏᓐᓄᑦ, ᒥᓂᔅᑕᒃᑯᑦ ᖃᐅᔨᓴᐅᑎᖏᑦᑕ ᐊᒻᒪᓗ ᐊᐅᓚᑦᓯᒍᓯᖏᑦᑕ ᒥᑦᓵᓅᓕᖓᔪᓂᒃ ᑕᒡᒐᓂ ᐊᕐᕌᒍᒥ.

ᑌᒣᒐᓗᐊᕐᑎᓗᒍ, ᐃᓕᓐᓂᐊᓂᕐᒥᒃ ᒥᓂᔅᑕᖓ ᕈᐱᐊᕐᔾ ᑐᓴᕐᑎᓯᒌᕐᓯᒪᔪᖅ ᓈᓂᖓᓂ ᖃᐅᔨᓴᐅᑎᕕᓃᑦ ᐳᒃᑯᓂᕐᓴᒥ ᐊᒻᒪᓗ ᐳᕐᑐᓂᕐᓴᒥ 1 ᐳᒃᑭᓕᕆᐊᕐᑕᐅᓛᕐᓂᖏᑦ 20-ᒦᑦᑐᕕᓂᐅᑦᓱᓂ 10%-ᒨᕐᑕᐅᓛᕐᓂᖓ.

ᐃᓕᓐᓂᐊᕖᑦ ᐊᒻᒪᓗ ᐃᓕᓴᕐᓂᓕᕆᕕᒃᑯᑦ ᐳᒃᑭᓕᕆᐊᕆᖁᔭᐅᒻᒥᔪᑦ ᓄᓇᓕᒻᒥ ᐃᓕᓐᓂᐊᑏᑦ ᖃᐅᔨᓴᕐᑕᐅᒍᑎᖏᓐᓂᒃ, ᐃᓕᓐᓂᐊᑏᑦ ᐊᕐᓱᕉᑎᖃᖁᓇᒋᑦ ᐃᓕᓐᓂᐊᓂᖃᕐᓗᑎᒃ ᐊᒻᒪᓗ ᐊᓂᒎᑎᑦᓯᐊᖁᓪᓗᒋᑦ.