ᐅᖄᖃᑎᒋᕈᓐᓇᓯᓚᐅᔭᕗᑦ ᑖᓂᐊᓪ ᑭᓖᓴᓐ, ᐊᔪᐃᓐᓇᓯᑎᐅᑦᓱᓂ ᓯᖁᒥᓯᒪᔪᓐᓂᐊᑎᓂᒃ ᑲᒪᔨ ᑰᑦᔪᐊᒥ. ᐃᓪᓗᐃᑦ ᐱᐅᓯᐅᒥᒋᐊᕐᓱᒋᑦ, ᑖᓂᐊᓪ ᐱᓇᓱᑦᑎᖁᑎᖏᓪᓗ ᓄᑕᐅᓯᓕᕐᑐᐃᔪᕕᓃᑦ ᐊᓂᕐᕋᓯᐊᐹᓗᓐᓂᒃ ᐊᒻᒪᓗ ᐋᕐᕿᒋᐊᕐᓯᒪᑦᓱᒋᓪᓗ ᐃᓕᓴᕐᓂᓕᕆᔨᒃᑯᑦ ᐃᓪᓗᖁᑎᖏᑦ.
ᐱᓇᓱᒐᕐᒥᓄᑦ ᐃᓕᓚᐅᕋᓂ, ᑖᓂᐊᓪ ᐱᓇᓱᐊᕐᓯᒪᔪᖅ ᕿᔪᓕᕆᓂᕐᒥᒃ.
“ᓯᕗᓪᓕᐹᒥ, ᓄᓇᕕᒻᒨᓚᐅᕐᓯᒪᕗᖓ ᐃᓄᑦᔪᐊᒧᑦ ᕿᔪᓕᕆᓂᕐᒥᒃ ᐃᓕᓐᓂᐊᑎᑦᓯᒋᐊᕐᑐᓱᖓ ᐃᓄᒻᒪᕆᓐᓂᒃ ᐃᓕᓐᓂᐊᑎᓂᒃ,” ᐅᖃᕐᑐᕕᓂᖅ.
ᑖᓂᐊᓪ ᑕᕐᕋᒥ ᐊᓕᐊᒋᔭᕐᑖᑐᕕᓂᖅ. “ᐃᓕᓐᓂᐊᑎᒃᑲ ᐃᓄᑐᐃᓐᓀᑦ ᑕᕐᕋᒦᒋᐊᓪᓚᕈᒪᓂᕋᓂᒃ ᐊᑯᓂᒋᐊᓪᓚᖅ ᓄᐃᑦᓯᓚᕆᑦᑐᕕᓃᑦ,” ᐅᖃᕐᑐᕕᓂᖅ.
“ᐃᓚᒃᑲ ᓇᓂᑐᐃᓐᓇᖅ ᓄᓇᖃᕐᓯᒪᔫᒐᓗᐊᑦ ᐃᓅᓯᓕᒫᑦᑎᓂ, ᑭᓯᐊᓂ ᖃᓂᑕᕇᖏᓐᓇᓕᒫᖃᑦᑕᓯᒪᔪᒍᑦ. ᖃᓂᖕᖏᑐᒥᐅᖑᒐᓗᐊᕋᑦᑕ, ᐃᓚᒌᓐᓂᕗᑦ ᑐᖕᖓᕕᑐᐊᕆᑦᓱᒍ ᑲᔪᓯᑦᓯᐊᑐᖅ.
ᐱᒍᓐᓇᓂᖃᑦᓯᐊᑐᑦ ᐱᓇᓱᑦᑎᐅᖃᑎᒌᑦ, ᐱᐅᓯᐅᒥᒋᐊᕐᑕᐅᓯᒪᔪᑦ ᐃᓪᓗᐃᑦ
“ᓯᕗᓪᓕᐹᒥ ᑕᒪᐅᖕᖓᕆᐅᕐᓱᖓ, ᐃᓪᓗᖁᑏᑦ ᖃᓄᐃᓯᒪᖕᖏᑐᑦ,” ᑖᓂᐊᓪ ᐅᖃᕐᑐᕕᓂᖅ. “ᑭᓯᐊᓂ ᐱᓇᓱᑦᑎᖁᑎᒃᑲᓗ ᐃᓪᓗᐃᑦ ᐱᐅᓯᐅᒥᒋᐊᓪᓚᕆᑦᓯᒪᔭᕗᑦ.”
ᑲᒪᔨᐅᑦᓱᓂ, ᑖᓂᐊᓪ ᑐᕌᒍᑎᒋᓯᒪᔭᖓᑦ ᐱᑦᓯᐊᓂᕐᐸᐅᖃᑕᐅᔪᖅ ᐱᔪᓐᓇᓂᖃᑦᓯᐊᓂᒃᑯᑦ, ᓴᖑᖃᑦᑕᓱᓂ ᐱᐅᖕᖏᑐᒐᓚᓐᓂᒃ ᓄᕐᖃᑎᑦᓯᒐᓱᐊᕐᓂᑯᑦ. ᐱᖁᑎᒻᒪᕆᖃᕐᓱᓂ ᐱᓇᓲᑎᓂᒃ ᐊᒻᒪᓗ ᓲᓱᒋᔭᖃᑦᓯᐊᓂᒃᑯᑦ, ᐱᓇᓱᑦᑎᖁᑎᖏᑦ ᐱᖁᑎᖃᐅᑎᒥᒃ ᐱᔪᓐᓇᓂᕐᑖᓯᒪᓪᓚᕆᑦᑐᑦ ᓯᖁᒥᓯᒪᔪᓐᓂᐊᓂᕐᒥᒃ ᐊᓂᕐᕋᒋᔭᐅᔪᓂᒃ ᐊᒻᒪᓗ ᑲᒪᒋᔭᖃᕐᓂᑯᑦ ᐱᔭᑦᓴᓂᒃ ᐃᒻᒥᓂᕐᓱᓱᑎᒃ.
“ᐱᓇᓱᑦᑎᖁᑎᑎᑦ ᓱᑲᑦᑐᓯᐊᒥ ᐱᓇᓱᐊᕈᓐᓇᓯᐊᕐᑐᑦ ᓈᒻᒪᓯᐊᕐᑐᒥᓪᓗ,” ᐅᖃᕐᓯᒪᕗᖓ. “ᖃᓄᖅ ᑌᒫᒃ ᓄᐃᑦᓯᒍᓐᓇᓯᓯᒪᕕᑦ ᑲᔪᓯᑦᓯᐊᑐᒥᒃ?”
“ᑖᒃᑯᐊ ᐱᓇᓱᑦᑏᑦ ᐱᒍᓐᓇᓯᐊᕐᒪᑕ. ᑐᖕᖓᕕᓪᓚᕆᒋᓯᒪᔭᕋ ᓄᐃᑦᓯᓂᖅ ᐱᓇᓱᕝᕕᓯᐊᒥᒃ ᓲᖑᓂᖃᑦᓯᐊᑎᓪᓗᒋᑦ ᑲᔪᓯᑦᓯᐊᑐᐃᓐᓇᓂᕐᒥᒃ ᐊᒻᒪᓗ ᐆᑦᑐᕋᖃᑦᑕᓂᕐᒥᒃ ᓱᓇᑐᐃᓐᓇᒥᒃ.”
ᐊᑖᑕᒐ ᐃᓕᓐᓂᐊᑎᑦᓯᓚᐅᕐᓯᒪᔪᖅ ᐊᔪᐃᓐᓇᕆᐊᖃᕐᓂᒥᒃ ᐱᓇᓱᓐᓂᑯᑦ ᐊᒻᒪᓗ ᓴᐱᕐᑌᑑᓂᕐᒥᒃ, ᐊᑖᑕᑦᓯᐊᕋᓕ ᐃᓕᓐᓂᐊᑎᑦᓯᓯᒪᑎᓪᓗᒍ ᐱᒻᒪᕆᐅᓂᖓᓄᑦ ᐃᓄᑦᓯᐊᖑᕆᐊᖃᕐᓂᒥᒃ ᐊᒻᒪᓗ ᐃᕐᖃᑐᐃᖕᖏᓂᕐᒥᒃ. ᑕᒪᒋᒃ ᐊᑦᔨᒌᖕᖏᑑᓐᓂᒃ ᑕᑯᓐᓇᕈᓯᖃᕐᓯᒪᔫᒃ ᐃᓕᑦᓯᕕᒋᓪᓚᕆᓯᒪᑦᓱᒋᓗ.
ᐊᕕᑦᑐᓯᒪᔪᓂᒃ ᐊᕐᖁᓯᐅᕆᓂᖅ ᓈᓚᓐᓂᑯᑦ
ᑖᓂᐊᓪ ᐊᖏᕐᑐᕕᓂᖅ ᓲᓱᒋᔭᖃᕐᓂᖅ ᐱᓇᓱᑦᑎᒥᓂᒃ ᐊᕐᓱᕈᒍᑎᒋᓯᒪᒐᒥᐅᒃ. “ᓯᕿᓂᕐᒥᐅᑦ ᑎᑭᑐᐊᕐᒪᑕ, ᑕᒉᓐᓇᓭᓐᓇᖅ ᓲᓱᒋᔭᖃᑦᓯᐊᓲᖑᖕᖏᑐᑦ ᓯᕗᓪᓕᐹᒥ. ᑭᓯᐊᓂ ᓈᓚᑦᓱᒋᑦ ᐱᓇᓱᑦᑏᑦ ᑕᕐᕿᓂ ᐱᖓᓲᔪᕐᑐᓂᒃ ᐊᒻᒪᓗ ᖃᐅᔨᒪᑎᑦᓯᐊᓱᒋᑦ ᐅᑉᐱᒋᑦᓯᐊᕋᒃᑭᑦ ᐱᔪᓐᓇᓂᖏᑦ.”
ᓈᓂᖓᓂ, ᑖᓂᐊᓪ ᐅᖃᐅᓯᑦᓴᖏᑦ ᐱᓇᓱᑦᑎᓄᑦ ᓇᓗᓇᖕᖏᑐᖅ: “ᐅᒃᑯᐃᖔᑦᓯᐊᓗᑎᑦ, ᓲᓱᒋᔭᖃᕐᓗᓯ ᐊᑐᓂᑦᓯᐊᖅ, ᐊᒻᒪᓗ ᑲᔪᓯᑐᐃᓐᓇᓗᓯ” ᑖᓐᓇ ᑲᔪᓯᑦᓯᐊᒍᑎᒋᓯᒪᔭᖓ ᐱᓇᓱᑦᑎᐅᓱᓂ ᑲᔪᓯᑦᓯᐊᑐᒥᓪᓗ ᐱᕙᓪᓕᐊᒍᑎᒋᑦᓱᒍ.